Hen Kwagh Ken Mkaanem Ma Aôndo

U Er Nan Ve Tsombor Wou Ua Zua a Msaanyolo?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Hii nan ve ivese i lu kwagh u vesen u van a msaanyol hen tsomboro?

Ka Yehova, Aôndo u sar sar la yange hii kwagh u ivesegh ye. Ka kwagh u vesen u van a msaanyol hen tsombor, sha ci u ngi ne nom man kwase u lun imôngo tseegh ga, kpa shi ngi i bugh ian i dedoo i yesen mbayev kpaa. Aôndo nenge ivese nena? A soo ér nom man kwase ve nger ivese ve, i hingir kwagh u igbekeke, u i er sha tindi yô. (Luka 2:1-5) Aôndo soo ér noov man kasev ve eren kwagh a ayol a ve sha mimi. (Mbaheberu 13:4) Yehova na Mbakristu ian i paven ivaa, hiden eren igen, shighe u ikyar ve a er idya la tseegh.—Ôr Mateu 19:3-6, 9.

2. Gba u nom man kwase vea eren kwagh a ayol a ve nena?

Yehova yange gba nomso man kasev ér ve wasen ayol a ve ken ivese. (Genese 2:18) Er nom a lu ityough ki tsombor na yô, gba u una hemen sha u nengen sha ugbayol mba tsombor na, shi tesen ve kwagh u Aôndo kpaa. Gba una lu a dooshima u tangen iyol ga la sha kwase na. Gba u noov man kasev vea soo ayol a ve shi vea naan ayol a ve icivir. Er noov man kasev cii ve yen yô, u henen u den orgen a kwaghbo la, ka kwagh u vesen u van a msaanyol ken ivese.—Ôr Mbaefese 4:31, 32; 5:22-25, 33; 1 Peteru 3:7.

3. Aluer u zua a msaanyol ken ivesen you ga yô, doo u u undu ikyar u wee?

Aluer we man ikyar u ne mba lun a mbamzeyol yô, hen nen u eren kwagh a ayol a en sha dooshima. (1 Mbakorinte 13:4, 5) Mkaanem ma Aôndo na se ian i undun or u se vese nan la sha ci u sôron mbamzeyol mba ken ivese ga. Nahan cii kpa, shighe u zayol a ve kpoghuloo yô, Orkristu nana fatyô u tsuan a ishima i nan, aluer doo u nana undu ikyar u nan shin nana undu ga kpaa.—Ôr 1 Mbakorinte 7:10-13.

  4. Ne mbayev, ka nyi Aôndo a soo sha ci wene?

Yehova soo ér i saan ne iyol. Ngu a na ne kwaghwan u hemban doon cii, er ne ember uma wen u uye la yô. A soo ér ne zua a mtsera sha kwaghfan man mkav u mbamaren enev ve lu a mi la. (Mbakolose 3:20) Yehova fa hanma kwagh u ne eren sha u wuese un cii.—Ôr Orpasenkwagh 11:9–12:1; Mateu 19:13-15; 21:15, 16.

5. Ne mbamaren, ônov enev vea zua a msaanyol nena?

Gba u ne er tom taveraa sha er ne na ônov enev kwaghyan man ijiir i tsan man akondo yô. (1 Timoteu 5:8) Kpa u mbayev enev ve zua a msaanyol yô, gba u ne tese ve sha u Aôndo a doo ve ishima shi ve hen kwagh hen a na kpaa. (Mbaefese 6:4) Ikyav i u ver i tesen wer Aôndo doo u ishima la, ia fatyô u benden a ishima i wan wou tsung je. Aluer u har kwaghwan wou la sha mkaanem ma Aôndo yô, una fatyô u maan mhen u wan wou la sha gbenda u dedoo.—Ôr Duteronomi 6:4-7; Anzaakaa 22:6.

Ka wea taver mbayev ishima shi wea wuese ve yô, kwagh ne ngu a wase ve. Shi gba u a kôôm ve shi a tsaha ve. Ityesen la ka i kura ve sha aeren a ma a yange ve u zuan a msaanyol la. (Anzaakaa 22:15) Nahan cii kpa, gba u u naan tsaha sha ishimanyoon shin sha tswam ga.—Ôr Mbakolose 3:21.

Mbashiada mba Yehova ka ve gber ityakerada kpishi sha ci u wasen mbamaren man mbayev yô. Ityakerada ne har sha Bibilo.—Ôr Pasalmi 19:7, 11.

Wea soo u seer zuan a iwanger yô, ôr ityough 14 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye.