Ako mei he Folofola ʻa e ʻOtuá

ʻE Lava Fēfē ke Fiefia Ho Fāmilí?

ʻOku langaʻi hake ʻi he kupu ko ení ʻa e ngaahi fehuʻi kuó ke ʻeke nai pea fakahaaʻi ai ʻa e feituʻu ʻe lava ke ke lau ai ʻa e ngaahi talí ʻi hoʻo Tohi Tapú. ʻE fiefia ʻa e Kau Fakamoʻoni ʻa Sihová ke fetalanoaʻaki mo koe ki he ngaahi tali ko ení.

1. Ko e hā ʻoku mātuʻaki mahuʻinga ai ʻa e nofo malí ki he fiefia ʻa e fāmilí?

Ko Sihova, ʻa e ʻOtua fiefiá, naʻá ne kamataʻi ʻa e nofo malí. ʻOku mātuʻaki mahuʻinga ia ki he fiefia ʻa e fāmilí koeʻuhi ʻoku ʻomai ai ʻo ʻikai ngata pē ʻi he feohi kae toe pehē foki ki ha ʻātakai malu ʻa ia ʻe tauhi hake ai ʻa e fānaú. ʻOku anga-fēfē vakai ʻa e ʻOtuá ki he nofo malí? ʻOkú ne loto ke hoko ia ko ha fāʻūtaha tuʻuloa, kuo lēsisita fakalao ʻi he vahaʻa ʻo ha tangata mo ha fefine. (Luke 2:1-5) ʻOku fiemaʻu ʻe he ʻOtuá ʻa e ngaahi husepānití mo e ngaahi uaifí ke nau femateakiʻaki. (Hepelū 13:4) ʻOku fakaʻatā ʻe Sihova ʻa e kau Kalisitiané ke nau vete pea toe mali ʻo kapau pē ʻe fakahoko ha tono ʻe honau hoá.—Lau ʻa e Mātiu 19:3-6, 9.

2. ʻOku totonu ke fēfē ʻa e tōʻongafai fakaekinaua ʻa e husepānití mo e uaifí?

Naʻe fakatupu ʻe Sihova ʻa e kakai tangatá mo e kakai fefiné ke nau fakahoko ʻa e ngaahi ngafa fefakakakatoʻaki ʻi he nofo malí. (Sēnesi 2:18) ʻI he tuʻunga ko e ʻuluʻi fāmilí, ko ha husepāniti ʻoku totonu ke ne takimuʻa ʻi he tokonaki fakamatelie maʻa hono fāmilí pea ʻi hono akoʻi kinautolu fekauʻaki mo e ʻOtuá. ʻOku totonu ke ne feilaulauʻi-kita ʻi heʻene ʻofa ki hono uaifí. Ko e ngaahi husepānití mo e ngaahi uaifí ʻoku totonu ke nau feʻofaʻaki mo fefakaʻapaʻapaʻaki. Koeʻuhi ko e ngaahi husepāniti mo e ngaahi uaifi kotoa pē ʻoku nau taʻehaohaoa, ko e ako ke fakamolemolé ko ha kī ia ki he fiefia ʻi he nofo malí.—Lau ʻa e ʻEfesō 4:31, 32; 5:22-25, 33; 1 Pita 3:7.

3. ʻOku totonu ke mo māvae ʻi ha nofo mali ʻoku ʻikai fiefia?

Kapau ʻokú ke hokosia mo ho hoá ha ngaahi faingataʻa, ngāue ke tōʻongafai fakaekimoua ʻi he ʻofa. (1 Kolinitō 3:4, 5) ʻOku ʻikai fokotuʻu mai ʻe he Folofola ʻa e ʻOtuá ko e māvaé ko ha founga ia ke fakaleleiʻi ʻaki ʻa e ngaahi palopalema fakaemalí. Kae kehe, ʻi he ngaahi tuʻunga ʻoku fuʻu tōtuʻá, ʻe pau ke fili ai ha Kalisitiane pe ʻoku fakapotopoto ke māvae pe ʻikai.—Lau ʻa e 1 Kolinitō 7:10-13.

 4. Fānau, ko e hā ʻoku fiemaʻu ʻe he ʻOtua maʻamoutolú?

ʻOku fiemaʻu ʻe Sihova ke mou fiefia. ʻOkú ne ʻoatu kia kimoutolu ʻa e faleʻi lelei taha ki he founga ke mou fiefia ai ʻi hoʻomou kei talavoú. ʻOkú ne fiemaʻu ke mou maʻu ʻaonga mei he poto mo e taukei ʻa hoʻomou ongo mātuʻá. (Kolose 3:20) ʻOku ʻafioʻi ʻe Sihova ha meʻa pē ʻoku mou fai ke fakahīkihikiʻi ai ia.—Lau ʻa e Koheleti 12:1, 2 [11:9–12:1, PM]; Mātiu 19:13-15; 21:15, 16.

5. Ngaahi mātuʻa, ʻe lava fēfē ke maʻu ʻe hoʻomou fānaú ʻa e fiefiá?

ʻOku totonu ke mou ngāue mālohi ke tokonaki ʻa e meʻakai, nofoʻanga, mo e vala ki hoʻomou fānaú. (1 Tīmote 5:8) Ka koeʻuhi ke maʻu ʻe hoʻomou fānaú ʻa e fiefiá, ʻoku toe fiemaʻu ke akoʻi kinautolu ke nau ʻofa ki he ʻOtuá pea ke ako meiate ia. (ʻEfesō 6:4) Ko hoʻomou faʻifaʻitakiʻanga ʻi hono fakahāhā ʻa e ʻofa ki he ʻOtuá ʻe lava ke tākiekina lahi ai ʻa e loto hoʻomou fānaú. ʻI hono fakatefito ʻi he Folofola ʻa e ʻOtuá, ko hoʻomou fakahinohinó ʻe lava ke fakafuo ai ʻa e fakakaukau hoʻomou fānaú ʻi ha founga lelei.—Lau ʻa e Teutalōnome 6:4-7; Palōveepi 22:6.

ʻOku maʻu ʻaonga ʻa e fānaú ʻi he taimi ʻoku mou fakalototoʻaʻi ai mo fakaongoongoleleiʻi kinautolú. ʻOku toe fiemaʻu kia kinautolu ʻa e fakatonutonu mo e akonaki. Ko e akoʻi peheé ʻoku maluʻi ai kinautolu mei he ʻulungaanga ʻa ia ʻe lava ke ne kaihaʻasi meia kinautolu ʻa e fiefiá. (Palōveepi 22:15) Neongo ia, ko e akonakí ʻoku ʻikai ʻaupito totonu ke fefeka pe fakamamahi.—Lau ʻa e Kolose 3:21.

ʻOku pulusi ʻe he Kau Fakamoʻoni ʻa Sihová ʻa e ngaahi tohi ʻoku hiki tautefito ke tokoniʻi ʻaki ʻa e ngaahi mātuʻá mo e fānaú. Ko e ngaahi tohí ni ʻoku fakatefito ia ʻi he Tohi Tapú.—Lau ʻa e Saame 19:7, 11.

Ki ha fakamatala lahi ange, sio ki he vahe 14 ʻo e tohi ko ení, Ko e Hā ʻOku Lava ke Akoʻi Mai ʻe he Tohi Tapú?, ko e pulusi ʻe he Kau Fakamoʻoni ʻa Sihová.