Dyondza Eka Rito Ra Xikwembu

Ndyangu Wa Wena Wu Nga Va Ni Ntsako Hi Ndlela Yihi?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Ha yini vukati byi ri bya nkoka eka ndyangu lowu tsakeke?

Yehovha, ku nga Xikwembu lexi tsakeke, hi yena musunguri wa vukati. Vukati i bya nkoka eka ndyangu lowu tsakeke hikuva byi kondletela vunghana ni ku tlhela byi va xisirhelelo loko swi ta emhakeni yo kurisa vana. Xana Xikwembu xi byi languta njhani vukati? Xi lava leswaku byi tshama hilaha ku nga heriki, byi tsarisiwa hi ku ya hi nawu. (Luka 2:1-5) Xikwembu xi lava leswaku vavanuna ni vavasati va tshembana. (Vaheveru 13:4) Yehovha u pfumelela Vakreste ku dlaya vukati kutani va tlhela va nghenela byin’wana ntsena loko munghana wa vona wa vukati a endle vuoswi.—Hlaya Matewu 19:3-6, 9.

2. Xana nuna ni nsati va fanele va khomana njhani?

Yehovha u vumbe vavanuna ni vavasati leswaku va pfunana. (Genesa 2:18) Tanihi nhloko ya ndyangu, wanuna u fanele a rhangela eku wundleni ka ndyangu wakwe hi tlhelo ra nyama ni ku wu dyondzisa hi Xikwembu. U fanele a titsona swo karhi hileswi a rhandzaka nsati wakwe. Vavanuna ni vavasati va fanele va rhandzana ni ku xiximana. Tanihi leswi vavanuna ni vavasati hinkwavo va nga hetisekangiki, i swa nkoka swinene leswaku va dyondza ku rivalela hikuva swi pfuna vatekani leswaku va va lava tsakeke evukatini bya vona.—Hlaya Vaefesa 4:31, 32; 5:22-25, 33; 1 Petro 3:7.

3. Loko u nga tsakanga evukatini bya wena, xana u fanele u tshika nkataku?

Loko wena ni nkataku mi ri ni swiphiqo, mi fanele mi tikarhatela ku va mi khomana hi rirhandzu. (1 Vakorinto 13:4, 5) Rito ra Xikwembu a ri swi bumabumeli leswaku vatekani va hambana tanihi ndlela yo tlhantlha swiphiqo swa vukati. Hambiswiritano, eka swiyimo swo tika, Mukreste u fanele a endla xiboho xa loko swi fanerile ku hambana kumbe e-e.—Hlaya 1 Vakorinto 7:10-13.

  4. Vana, i yini leswi Xikwembu xi swi languteleke eka n’wina?

Yehovha u lava leswaku mi va lava tsakeke. U mi nyika ndzayo leyinene ya ndlela leyi mi nga tiphinaka ha yona hi vuntshwa bya n’wina. U lava leswaku mi vuyeriwa eka vutlhari ni ntokoto wa vatswari va n’wina. (Vakolosa 3:20) Yehovha wa swi xiya loko mi yingisa vatswari va n’wina.—Hlaya Eklesiasta 11:9–12:1; Matewu 19:13-15; 21:15, 16.

5. Vatswari, i yini leswi vana va n’wina va swi lavaka leswaku va va ni ntsako evuton’wini?

Mi fanele mi tirha hi matimba leswaku mi kumela vana va n’wina swakudya, ndhawu yo tshama ni swiambalo. (1 Timotiya 5:8) Kambe leswaku vana va n’wina va kuma ntsako wa xiviri, na n’wina mi fanele mi va dyondzisa ku rhandza Xikwembu ni ku dyondza ha xona. (Vaefesa 6:4) Xikombiso xa wena xo rhandza Xikwembu xi nga khumba mbilu ya n’wana wa wena. Loko swi sekeriwe eRitweni ra Xikwembu, swiletelo swa wena swi nga vumba miehleketo ya n’wana wa wena hi ndlela leyinene.—Hlaya Deteronoma 6:4-7; Swivuriso 22:6.

Vana va vuyeriwa loko u va khutaza ni ku va bumabumela. Nakambe va lava ku lulamisiwa ni ku nyikiwa ndzayo. Sweswo swi nga va sirhelela eka mahanyelo lama nga endlaka leswaku va nga vi na wona ntsako. (Swivuriso 22:15) Kambe, a wu fanelanga u nyika n’wana wa wena ndzayo hi ku va u n’wi karihela kumbe hi ndlela ya tihanyi.—Hlaya Vakolosa 3:21.

Timbhoni ta Yehovha ti kandziyise tibuku to hlayanyana leti tsaleriweke ngopfu-ngopfu ku pfuna vatswari ni vana. Tibuku leti ti sekeriwe eBibeleni.—Hlaya Pisalema 19:7, 11.

Leswaku u kuma rungula leri engetelekeke, vona ndzima 14 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.