Lilongisila Kondaka Ya Suku

Epata Liove li Pondola Oku Kuata Ndati Esanju?

Ocipama cilo, ci kuete apulilo amue okuti pamue wa a lingile ale kuenda ci lekisa oku o pondola oku sanga atambululo aco Vembimbiliya liove. Olombangi Via Yehova, vi ka sanjuka poku konomuisila kumue love atambululo aco.

1. Momo lie oku tokekisa olohuela ci kuetele esilivilo koku kuata esanju vepata?

Yehova Suku yesanju eye usovoli wolohuela. Apata oku kala lesanju ci kuete esilivilo momo ci va kuatisa oku li kuata omunga kuenda oku kuata ocitumãlo cimue ca koka coku tekuila omãla. Suku o tenda ndati olohuela? Eye o yongola okuti olohuela vi kala otembo yosi kuenda ulume lukãi va tokekisa olohuela viavo kombiali. (Luka 2:1-5) Suku o yongolavo okuti alume kuenda akãi vavo va likolela pokati. (Va Heveru 13:4) Yehova ecelela lika Akristão oku li nyala kuenda oku kuela onjanja yavali nda umue pokati kavo wa linga ukahonga.—Tanga Mateo 19:3-6, 9.

2. Ulume lukãi va sukila oku li tata ndati pokati?

Yehova wa lulika ulume lukãi oco va likuatise pokati. (Efetikilo 2:18) Omo okuti ulume eye utue wepata, o sukila oku tekula vakuanjo yaye kuenda oku va longisa ovina viatiamẽla ku Suku. Eye o sukila oku likolisilako oku lekisa ocisola kukãi waye. Ulume lukãi va sukila oku lisola pokati kuenda oku lisumbila. Omo okuti, cikale alume cikale akãi vosi yavo ka va lipuile, oku lilongisa oku ecela ku va kuatisa oku kuata esanju volohuela.—Tanga Va Efeso 4:31, 32; 5:22-25, 33; 1 Petulu 3:7.

3. Anga hẽ citava oku siapo ohueli yove nda ku kuete esanju volohuela?

Nda ove kumue lohueli yove vu kuete ovitangi volohuela viene, likolisiliko oku likuatela ocisola pokati. (1 Va Korindo 13:4, 5) Ondaka ya Suku ka yi longisa okuti oku tepa olohuela, oyo onjila yoku potolola ovitangi. Eci Ukristão a liyaka lovitangi vinene volohuela, o sukila oku kũlĩhĩsa lutate nda kuli muẽle esunga lioku litepa ale sio.—Tanga 1 Va Korindo 7:10-13.

 4. Ene amãla, nye Suku a yongola kokuene?

Yehova o yongola okuti vu kuata esanju. Eye o ku ĩhi alungulo a ku kuatisi oku kuata esanju. Handi vali, o yongolavo okuti vu kuatisiwi lolondunge violonjali viene kuenda ongangu yavo. (Va Kolosai 3:20) Yehova o sanjukila ovina viosi vu linga vi eca esivayo kokuaye.—Tanga Ukundi 11:9–12:1; Mateo 19:13-15; 21:15, 16.

5. Ene alonjali, nye vu sukila oku linga oco omãla vene va kuate esanju?

Vu sukila oku likolisilako oku sanda okulia kuomãla vene, onjo, kuenda uwalo. (1 Timoteo 5:8) Pole, oco omãla vove va kuate esanju, o sukila oku va longisa oku sola Suku kuenda oku lilongisa ovina viatiamẽla kokuaye. (Va Efeso 6:4) Nda wa lekisi ocisola ku Suku, omãla vene va vetiyiwavo oku ci linga lutima wosi. Nda wa eci kokuavo elongiso Liondaka ya Suku, vu va kuatisa oku kuata ovisimĩlo via sunguluka.—Tanga Esinumuĩlo 6:4-7; Olosapo 22:6.

Omãla va kuatisiwa calua nda wa va kolisi loku va pandiya. Ovo va sukilavo elungulo kuenda epindiso. Epindiso liaco, li va teyuila kovituwa vĩvi vi pondola oku nyõla esanju liavo. (Olosapo 22:15) Pole, epindiso ka citava okuti lieciwa lungangala ale loku kelõha.—Tanga Va Kolosai 3:21.

Olombangi via Yehova via siata oku sandeka alivulu alua a sonehiwa locimãho coku kuatisa olonjali kuenda omãla. Pole, olonumbi vi sangiwa valivulu aco a tunda Vembimbiliya.—Tanga Osamo 19:7, 11.

[Elomboluilo lielitalatu kemẽla 17]

Oco o sange alomboluilo akuavo tanga ocipama 14, velivulu eli, lia sandekiwa Lolombangi Via Yehova.

[Elomboluilo lielitalatu kemẽla 17]

EMBIMBILIYA

LI Longisa NYE?