Wawanakar yatichañataki

¿Kunapachanakas jan ikjañasäkaspa?

¿ESCUELAN jan ikjañajj wali wakiskirejjaya? Yatichirejj yatichaski ukhajj waljaniw ikjapjje, ukampis jumatï yateqañ munstajja janiw ikjañamäkiti. Bibliat yatjjatañatak tantachäwinakanjj janirakiw ikjañamäkiti.

¿Kunas jan ikjañatak yanaptʼiristamjja? *... Inas arumanakajj urut ikintjjchisma, jan ukajj urun mä jukʼa iktʼarakchisma. Mä arumajja, apóstol Pablor istʼkasaw mä waynitojj ikj-jjatayna, uka toqetwa Biblianjja parli. Kunsa uka toqet yateqsna uk jichhajj yateqañäni. Ukatakejja, Hechos libro 20 jalja ukat 7 tʼaqat 12 jiskʼa tʼaqakam liytʼam.

Pablojj Troas markankir tamaruw visittʼaskäna. Jupajj barcotwa “qhepärmanthi sarjjaña[päna]” ukat “chika arumkamaw yatichäna” sasaw Bibliajj qhanañchi. Ukat akham saskakiwa, “Eutico sat mä waynaw ventanan qonuskäna. Pablon wali arumkam parlatap laykusti, uka waynarojj ikiw wal purjjäna” sasa. ¿Qhepat kunas pasäna uk yatiñ munasmati?...

Euticojj “ikimp atipjayasisinjja kimsïr altos patatwa pampar jalaqtäna”. Pablosa ukat mayninakasa jankʼakiw escalerat saraqapjjäna. Pampar purisinsti jiwatakwa Euticor waytapjjäna. ¿Kunja llakitas jikjjatasipjjpachäna uk amuyasmati?... Pablojj uka waynarojj qhomantänwa. Ukat wali kusisitaw akham säna: “Jan sustjasipjjamti, jakaskiwa” sasa. Jïsa, Diosaw uka waynarojj jakäwip kuttʼayäna.

Euticor paskäna ukajja, ¿kunsa Diosat yatichistu?... Qalltañatakejja, Jehová Diosajj jiwatanakan jakäwipjja kuttʼayaspawa, wawanakarus  ukhamaraki. Ukhamarusa kunjamsa jumajj jikjjatasta ukjja, awk taykamat sipansa Diosajj sumwa yati ukat munasiraktamwa. Jesusajj aka oraqenkkäna ukhajja, Jehová Dios Awkipjamarakiw wawanakar munasïna. Jupanakarojj qhomantʼänwa ukat bendicirakïna. Ukampis janiw ukak lurkänti, jan ukasti walja wayn tawaqonakaruw jaktayarakïna, ukanakat maynïristi 12 marani mä jiskʼa imill wawaruw jaktayäna.

¿Diosajj jumar wal munasitapatjja, janit Jupar wal munaskarakta?... Ukhamawa, taqeniw Jupar munastanjja, ukatwa istʼañs munaraktanjja. Jupar wal munasitas uñachtʼayañatakejja, ¿kuns lursna uk yatiñ munasmati?... Kunjamtï Jesusajj siskänjja, ukhamarakwa Jupar sissna, jupajj akham sänwa: ‘Nayajj Awkir munastwa’ sasa. Ukampis ukjja luratanakapampiw uñachtʼayäna.

Jesusajj Diosarojj istʼapunïnwa. “Nayajj jupar kusisiykirpun kuns lurta” sänwa. Jiwasatï Diosaru ukat Yoqaparu kusisiyañatak istʼañ munstanjja, escuelansa ukat Bibliat yateqañatak tantachäwinakans jan ikjañatakiw chʼamachasiñasa.

Bibliat liytʼañataki

Hechos 20:7-12

Lucas 8:49-56

Juan 8:29; 14:31

[Qhanañchäwi]