Inshita iyo Tushilingile Ukulaala
Fundeni Abana Benu
Inshita iyo Tushilingile Ukulaala
UFWILE walishiba ukuti calicindama sana ukukanalaala ilyo uli ku sukulu. Abengi balalaala nga bali mu kalasi, lelo pa kuti uleumfwa ifyo balesambilisha, taufwile ukulaala. Nalimo ulaya na mu kulongana uko basambilisha Baibolo.
Bushe uletontonkanya ukuti cinshi wingacita pa kuti taulelaala ilyo ulesambilila?— * Cimo ico wingacita, kulalaala bwangu. E lyo nalimo kuti ulelaalako na panono akasuba. Leka tumone ifyo twingasambilila ku mulumendo uwaleele ilyo umutumwa Paulo alelanda ilyashi ubushiku sana. Belenga muli Baibolo pa Imilimo icipandwa 20, ifikomo 7 ukushinta ku 12 pa kuti umone icacitike.
Paulo aletandalila icilonganino cali mu musumba wa Troa umwali ne cabu. Baibolo ilanda ukuti Paulo “ali no kufumapo ubushiku bwakonkelepo.” E ico “alandile pa nshita ntali ukufika ubushiku pa kati.” Baibolo itila: “Pa windo paikele umulumendo umo ishina lyakwe Yutuki uwaponene mu tulo tukalamba ilyo Paulo alelanda.” Cinshi caishilecitika?—
Yutuki aliponene pa nshi “ukufuma pa ntunti iyalenga shitatu.” Bwangu bwangu, Paulo na bambi balitentemukile pa nshi kabili basangile Yutuki nafwa! Bushe uletontonkanya ukuti baumfwile shani?— Baibolo itila Paulo abuulile Yutuki no kumufukatila. Tapakokwele, Paulo abebele ukuti: ‘Mwisakamana, ali fye bwino!’ Lesa alibuushishe Yutuki!
Finshi twingasambilila kuli Lesa pali filya fyacitikile Yutuki?— Cimo ico twingasambililako ca kuti, Yehova, Shifwe wa ku muulu, kuti abuusha abafwa, ukubikako fye na bana abanono. Yehova alikwishiba bwino kabili alikutemwa sana ukucila ne fyo abafyashi bobe bakwishiba ne fyo bakutemwa. Ilyo Yesu ali pano calo, alilangile ifyo Wishi atemwa abana abanono ilyo alebafukatila no kubapaala. E lyo kabili Yesu alibuushishe na bana abanono, ukubikako no mukashana uwa myaka 12.
Bushe ukwishiba ukuti Shifwe wa ku muulu alikutemwa kwakulenga ukumfwa shani?— Ca cine, kuletulenga ukuti na ifwe tutemwe Yehova no kulamumfwila. Bushe nawishiba ifyo tulingile ukucita pa kulanga ukuti twalitemwa Yehova?— Cimo ico tulingile ukucita kulalandapo ukuti twalimutemwa. Yesu atile: “Nalitemwa Tata.” Yesu talelanda fye ukuti alitemenwe Lesa, lelo alelanga na mu ncitilo shakwe.
Yesu aleumfwila Lesa. Atile: “Lyonse ncita ifya kumusekesha.” Na ifwe nga tuleumfwila Lesa, ninshi pa kusekesha Yehova no Mwana wakwe Yesu, tukalaesha na maka yesu yonse ukukanalaala ilyo tuli ku kulongana nelyo ku sukulu.
Belenga muli Baibolo yobe
[Futunoti]
^ para. 4 Nga ca kuti mulebelengela capamo na bana, apo mulesanga bashilile fye ninshi mufwile mwalolelako pa kuti abana balandepo.
