Kpep Nditọ Fo

Mme Ini Emi Nnyịn Mîkpedehe Idap

IMỌFIỌK ke owo ndide idap ke ufọkn̄wed ifọnke. Ediwak owo ẹside idap ke ini ukpepn̄kpọ osụk akade iso ke ufọkn̄wed, edi inaha afo anam emi edieke oyomde ndifiọk n̄wed. Ekeme ndidi afo emesitiene aka mme mbono esop Christian, ebiet emi ẹsikpepde Bible.

Afo ekere ke akpanam nso man udude idap ke utọ itie emi?— * N̄kpọ kiet emi akpanamde edi ndisibabak ndụk idap. Ndide idap esisịt uwemeyo ekeme n̄ko ndin̄wam. Ẹyak ise se ikemede ndikpep nto se iketịbede inọ akparawa kiet emi ekedede idap okoneyo kiet ke ini Paul okosụk etịn̄de ikọ. Kụbọde Bible fo ka Utom ibuot 20, ufan̄ikọ 7 esịm 12 man okop se iketịbede.

Paul akasan̄a ese mme esop emi ẹdude ke esụk Troas. Bible ọdọhọ ke Paul “[akaduak] ndikpọn̄ do ke ndan̄nsiere.” Ntre, enye ama “etịn̄ ikọ ebịghi tutu esịm ufọt okoneyo.” Itien̄wed emi ọdọhọ ete: “Akparawa kiet emi ekerede Eutychus etie ke window ede ọkpọsọn̄ idap ke adan̄aemi Paul osụk etịn̄de ikọ.” Nso iketịbe?—

Eutychus ama “oto ke ọyọhọ enyọn̄ iba adian̄ade ọduọ ke isọn̄.” Paul ye mbon eken ẹma ẹsọsọp ẹfehe ẹsụhọde isọn̄, ẹkekụt ke Eutychus akpa. Ndi emekeme ndikere adan̄a nte mmọ ẹkefụhọde n̄kpa akparawa emi?— Bible ọdọhọ ke Paul ama emenede Eutychus, onyụn̄ afat enye. Ekem Paul ọdọhọ mme owo ete, ‘Ẹkûfịna idem, ke n̄kpọ inamke enye.’ Abasi ama anam Eutychus eset ke n̄kpa!

 Nso ke n̄kpọ emi ekpep nnyịn aban̄a Abasi?— Ikpep nte ke Jehovah, Ete nnyịn eke heaven, ekeme ndinam owo eset ke n̄kpa, kpa ye nditọwọn̄ nde. Jehovah enen̄ede ọdiọn̄ọ fi onyụn̄ ama fi akan nte ete ye eka fo ẹmade fi. Ke ini Jesus okodude ke isọn̄, enye ama esimen nditọwọn̄ akama onyụn̄ ọdiọn̄ mmọ, ndiwụt ke Ete imọ ama nditọwọn̄. Enye ama anam nditọwọn̄ n̄ko ẹset, esịnede eyenan̄wan emi ekedide isua 12.

Etie fi didie ke idem ndifiọk ke Jehovah, Ete fo eke heaven, ama fi?— Emi anam ima Jehovah n̄ko inyụn̄ iyom ndinam se Enye ọdọhọde inam. Ndi ọmọfiọk se ikpanamde ndiwụt ke imama Abasi?— N̄kpọ kiet edi nditetịn̄ ke imama enye ukem nte emi Jesus ọkọdọhọde Ete esie ete: “Ami mmama Ete.” Edi Jesus iketịn̄ke-tịn̄ kpọt ke imama Ete, edi akananam emi owụt.

Jesus ama esikop uyo Abasi. Enye ọkọdọhọ ke imọ inam ‘se inemde Ete imọ esịt kpukpru ini.’ Ndien edieke ikpebede Jesus, ọwọrọ ke iyesinam ofụri se ikekeme man ikûsude idap ke mme ini emi nnyịn mîkpedehe.

Kot ke Bible fo

Utom 20:7-12

Luke 8:49-56

John 8:29; 14:31

[Ikọ Idakisọn̄]