AJÉPA iñimportánte ñañatende porã ñaime jave eskuélape? Añetehápe heta oĩ okesetereíva klásepe, péro nde reaprendeséramo peteĩ mbaʼe, reñatende porã vaʼerã. Upéicha avei reho jave umi rreunión oñehesaʼỹijohápe la Biblia.

Mbaʼépa ikatu nepytyvõ ani hag̃ua reke? a... Ikatu reke voive pyharekue. Térã ikatu reke asajekue. La Bíbliape oñeñeʼẽ peteĩ mitãrusu okevaʼekuére ohenduhápe apóstol Páblope ojapo aja idiskúrso peteĩ pyharépe. Jahechamína mbaʼépa ikatu ñaaprende upe istóriagui. Eheka Hechos kapítulo 20 ha elee versíkulo 7 guive 12 peve.

Pablo ovisita oikóvo peteĩ kongregasión oĩva Tróaspe. La Biblia heʼi Pablo ‘oviahataha koʼẽ rire’ peteĩ várkope, upévare ‘osegi oñeʼẽ pyharepyte peve’. La Biblia heʼive: ‘Pe ventánape oguapyhína peteĩ mitãrusu hérava Eutico ha Pablo oñeʼẽ aja haʼe hopehyieterei ha opyta oke’. Reikuaasépa mbaʼépa oiko upe rire?...

Eutico ‘hoʼa 3 pisohágui’. Umi oĩvaʼekue upépe pyaʼeterei oguejy eskaléra rupi, umíva apytépe Pablo avei. Péro oguejypávo, otopáma Eutico omano. Mbaʼeichaite piko oiméne ombyasyrakaʼe hikuái, ajépa?... La Biblia heʼi: ‘Pablo, ojayvy ha oañuã chupe’. Upe rire vyʼápe heʼi umi héntepe: ‘Ani peñemondýi, haʼe ningo oikove’. Ha upeichaite oiko, Ñandejára omoingove jey pe mitãrusúpe.

Mbaʼépa ñanemboʼe Ñandejáragui Eutico rehe oikovaʼekue?... Ñepyrurã, Jehová ikatuha omoingove jey umi omanovaʼekuépe, umíva apytépe umi mitãme. Avei Jehová ontende  umi mbaʼe rehasáva ha nderayhueterei, nde tuvakuéragui jepe nderayhuve. Jesús oĩrõ guare ko yvy ape ári, ohechauka avei ohayhuha umi mitãme Itúva ohayhuháicha. Haʼe oañua ha ohovasa chupekuéra, avei omoingove jey heta imitãvape, umíva apytépe peteĩ mitãkuña orekóva 12 áño.

Mbaʼépa reñandu Ñandejárare reikuaávo nderayhuetereiha?... Opavave ningo jahayhu Ñandejárape, upévare ñaneñeʼẽrenduse Chupe. Ndépa reikuaase mbaʼépa ikatu jajapo jahechauka hag̃ua jahayhuha Ñandejárape?... Ikatu jaʼe Chupe jahayhuha, Jesús ojapo haguéicha. Haʼe heʼi: ‘Che ahayhu pe Túvape’, péro ndahaʼéi upépente opáva, haʼe ohechauka voi umi mbaʼe ojapóva rupive ohayhuha chupe.

Jesús iñeʼẽrendu Ñandejárape. Haʼe heʼi: ‘Che akóinte ajapo haʼe oguerohorýva’. Ha ñande ñaneñeʼẽrenduséramo Ñandejárape ñambovyʼa hag̃ua chupe ha Itaʼýrape, ñañehaʼãmbaitéta ani hag̃ua jake eskuélape ha umi rreunión oñehesaʼỹijohápe la Biblia.