Kulonda Eluki Mpinji Yitwatela Kwikala Atona
Dizishenu Anyanenu
Kulonda Eluki Mpinji Yitwatela Kwikala Atona
MUNATELI kwiteja nenu kwikala atona hampinji yimudi kushikola hichuma chalema. Atwansi amavulu anoñokaña neyi adi mushikola, hela chochu, hakwila nawu mwiluki yuma yinakutañishañawu mwatela kwikala atona. Hadaha mwayaña cheñi nakupompa kumwadizaña Bayibolu.
Chumanyi chimwatela kwila kulonda mubuleña kunoñoka?— * Chuma chatachi chimwatela kwila hikuya nakukama swayi. Hadaha mwatela kukaamaku chantesha namwaana nawa kunateli kuyikwasha. Twayenu tutali chuma chitukudizila kudi mukwenzi wumu waholokeleli mutulu nawufuku hampinji yahanineñayi kapostolu Pawulu mpanji. Tañenu muBayibolu haYililu kapetulu 20, mavasi 7 kushika ku 12 kulonda mwiluki chuma chamwekeni.
Pawulu wahempwili chipompelu chekala mumusumba waTirowasi kwashikeneneña maatu. Bayibolu yashimuna nawu Pawulu ‘wateleli kunyamuka hankunku yakucha’ nawaatu. Dichi welili tuhu “hoshe-e nimukachi kawufuku.” Twatañaña nawu: “Munjanina mwashakamini kamukwenzi keyala, ijina dindi Yutikusa, hakuya mutulu twatweni; chaneliyi Pawulu hakushaku mazu amakwawu.” Chumanyi chamwekeni?—
Yutikusa waholokeli kufuma hanjanina “kwitala dahewulu damuchisatu.” Pawulu niakwawu akunkumukili lufuchi nakumutala. Kuwana Yutikusa nakami hamaseki nafwi. Wunateli kufwikija chaneñeluwu wejima wawu?— Bayibolu yashimuna nawu Pawulu wamunyamwini Yutikusa nakumukumbata. Chakubula kuumba mpinji Pawulu wahosheli namuzañalu nindi: ‘Bayi mwakamaku, wudi chiwahi!’ Nzambi wamusañwili Yutikusa.
Chumanyi chitwatela kudizila kudi Nzambi hachuma chamumwekeneni Yutikusa?— Chuma chimu chitwadizaña chakwila nawu Yehova, Tata yetu wamwiwulu, nateli kusañula afu kushilahu niatwansi. Yehova wayiluka nikuyikeña, kubadika chayikeñawu anvwali jenu. Hampinji yadiñayi Yesu hamaseki, wamwekesheli chekalayi Tata kuhitila mukulela anyana nikuyikiswila. Wasañwili niatwansi, kushilahu nikansi wamumbanda wayaaka 12.
Mwatiyaña ñahi hakwiluka nenu Tata yenu wamwiwulu wayikeña?— Eña, chatuleñelaña ninetu kumukeña Yehova nikufwila kwovwahila mwatulejañayi. Muneluki chitwatela kumwekesha netu Twamukeña?— Njila yimu yidi yakuhosha netu twamukeña. Yesu wahosheli nindi: ‘Namukeña Tata.’ Ilaña Yesu welili yuma yayivulu kubadika hakuhosha hohu nindi wamukeña Nzambi. Wamwekesheli chumichi kuhitila muyuma yelileñayi.
Yesu wamwovwahilili Nzambi. Yesu nindi, “Nelaña yuma yamutiyishaña kuwaha mafuku ejima.” Neyi twila chuma chamuchidiwu, tukumuzañalesha Yehova niMwanindi Yesu nawa tukuzata nañovu jetu jejima kulonda twikaleña atona hampinji yatelela.
Tañenu Mubayibolu Yenu
[Tumazu twaheshina]
^ Neyi munakutañila hamu namwana, iwu mufunda wunakuyanukisha nawu muhudikili nawa mumuleji mwana yahoshuhu.
