Meta Għandna Nibqgħu Mqajmin
Għallem lil Uliedek
GĦANDEK mnejn taqbel li hu importanti li tibqaʼ mqajjem meta tkun l-iskola. Ħafna jaqbadhom in-nagħas meta jkunu fil-klassi, imma biex titgħallem, trid tibqaʼ mqajjem. Forsi tattendi wkoll laqgħat li fihom tistudja l-Bibbja.
X’tistaʼ tagħmel biex tibqaʼ mqajjem?— a Idea waħda hi li tmur torqod iktar kmieni filgħaxija. Forsi jkun t’għajnuna wkoll jekk tieħu nagħsa waranofsinhar. Ejja naraw x’nistgħu nitgħallmu minn żagħżugħ li marret għajnu bih tard bil-lejl waqt taħdita li kien qed jagħti l-appostlu Pawlu. Iftaħ il-Bibbja f’Atti kapitlu 20, versi 7 sa 12, u ara x’ġara.
Pawlu kien qed iżur il-kongregazzjoni li kienet fil-belt taʼ Troas li kellha port. Il-Bibbja tgħid li Pawlu “kien se jitlaq l-għada” b’dgħajsa. Allura, “tawwal id-diskors tiegħu sa nofsillejl.” Naqraw: “Wieħed żagħżugħ li kien jismu Ewtiku kien bil-qiegħda f’ħoġor it-tieqa u raqad fil-fond waqt li Pawlu kien għadu jitkellem.” Imbagħad x’ġara?—
Ewtiku waqaʼ mit-tieqa “għal isfel mit-tielet sular.” Pawlu u l-oħrajn niżlu jiġru t-taraġ malajr kemm setgħu, imma Ewtiku kien mal-art—mejjet! Tistaʼ timmaġina kemm ħassewhom imnikktin?— Il-Bibbja tgħid li Pawlu qabad lil Ewtiku f’idejh u għannqu. Pawlu ma damx ma għajjat bil-ferħ: ‘Tinkwetawx, m’għandu xejn!’ Alla kien qajjem lil Ewtiku mill-mewt!
X’nistgħu nitgħallmu dwar Alla minn dak li ġara lil Ewtiku?— Ħaġa waħda hi li Ġeħova, Missierna tas-sema, jistaʼ jqajjem lill-mejtin mill-mewt, inkluż liż-żgħażagħ. Ġeħova jifhimkom u jħobbkom, iva, saħansitra iktar mill-ġenituri tagħkom. Meta Ġesù kien fuq l-art, hu wera kif inhu Missieru billi ħa liċ-ċkejknin f’dirgħajh u berikhom. Irxoxta wkoll lil xi żgħażagħ, inkluż tifla taʼ 12-il sena.
Il-fatt li taf li Missierek tas-sema jħobbok, kif iġiegħlek tħossok?— Iġegħelna nħobbu lil Ġeħova lura u nkunu rridu nobdu dak li jgħid Hu. Taf kif nistgħu nuru li nħobbuh?— Mod wieħed hu billi ngħidu li nħobbuh. Ġesù qal: “Jien inħobb lill-Missier.” Imma Ġesù mhux biss qal li jħobb lil Alla. Hu wera li jħobbu b’dak li għamel.
Ġesù obda lil Alla. “Dejjem nagħmel dak li jogħġob lilu,” qal Ġesù. Jekk nagħmlu l-istess, se nagħmlu l-almu tagħna biex nibqgħu mqajmin meta suppost ħalli nogħġbu lil Ġeħova u lil Ibnu, Ġesù.
Aqra mill-Bibbja Tiegħek
[Nota taʼ taħt]
a Jekk qed taqra mat-tfal, is-sinjal qiegħed hemm biex ifakkrek li għandek tieqaf u tinkuraġġixxi lit-tfal jesprimu ruħhom.
Tistaʼ Tara Wkoll
IT-TORRI TAL-GĦASSA
Ġesù Kristu—Kif Għandna Niftakru Fih?
Għandna niftakru f’Ġesù biss bħala tarbija? Min kienu l-“irġiel għorrief” li ġew jarawh? Ġesù x’qed jagħmel issa?
IT-TORRI TAL-GĦASSA
Alla Jista’ Jħossu Mweġġa’—Kif Nistgħu Nferrħuh
Taf li tista’ teffettwa kif iħossu Ġeħova? Sir af kif l-azzjonijiet ta’ Adam u Eva weġġgħu lil Ġeħova.
IT-TORRI TAL-GĦASSA
X’Nistgħu Nitgħallmu Minn Kriminal?
Meta Ġesù kien se jmut, wiegħed li jagħti l-ħajja fil-Ġenna lil kriminal li kien qed imut. X’ried ifisser Ġesù, u fejn se tkun din il-Ġenna?
