Churi-wawaykichikta yachachiychik

¿Maykunapitaq mana puñunanchikchu?

ESCUELAPI rikchasqalla tarikuyqa ancha allinmi, ¿aw? Wakinqa escuelapim puñuywan aysachikunku, imatapas yachayta munaspaykiqa kallpanchakunaykim mana puñunaykipaq. Bibliamanta yachanapaq huñunakuypipas kallpanchakunaykim rikchanaykipaq.

¿Imataq yanapasunkiman mana puñunaykipaq? * . . . Ichapas sapa tuta tempranon puñuwaq. Otaq huk ratollapas punchawpi pisillatapas puñuwaq. Bibliam willawanchik huk tuta apostol Pablo rimachkaptin huk mozocha uyarisqanpi puñurusqanmanta. ¿Imatam yachachwan chay willakuymanta? Bibliapi maskay Hechos libropa 20 capitulonta hinaspa leey 7-12 versiculonkunata.

Lamar qochapa hichpan Troas llaqtapi congregaciontam Pablo watukuchkarqa. Bibliam nin: ‘Paqarinnintillanta [barcopi] pasakunan kaptinmi yaqa chawpi tutakama rimarqa’, nispa. Nintaqmi, ‘ventanapi tiyachkarqa huk joven Eutico sutiyoq’, hinaptinmi ‘Pablo tutakama rimachkaptin chay jovenqa puñuywan’ aysarachikurqa. ¿Yachayta munawaqchu Euticowan imam pasasqanta? . . .

Euticoqa ‘wichiykurqam iskay kaq altosmanta’. Hinaptinmi chay wasipi kaqkuna hinaspa Pablopas utqayllamanña bajamurqaku. Ichaqa wañusqatañam tarirurqaku. ¿Mayna llakisqachá tarikurqaku, aw? . . . Bibliam willawanchik Pabloqa Euticopa hawanman chutakuykuspan abrazaykusqanta. Hinaptinmi kusikuywan nirqa: “Ama manchakuychikchu, kawsachkanmi”, nispa. Chaynam karqa, Dios kawsarichisqanrayku.

 ¿Imatam Diosmanta yachanchik Euticomanta willakuywan? . . . Kuyakuq Jehová Diosqa atinmi wañusqakuna kawsarichiyta, warmachakunatapas. Chaymantapas payqa pimantapas astawanmi reqsisunki, tayta-mamaykimantapas astawanraqmi kuyasunki. Jesucristo kay Pachapi kaspanmi Taytan Jehová Dios hina warmachakuna kuyasqanta qawachirqa. Paykunata abrazaykuspam bendecirqa kawsarichirqataqmi 12 watayoq sipaschata hinaspa huk mozokunatapas.

¿Imaynatam sientekunki Dios kuyasusqaykimanta yachaspayki? . . . Awriki, llapanchikmi chayna sientekunchik, chaymi payta kuyaspa kasukunanchik. ¿Munawaqchu yachayta, imata ruraspataq kuyakuyninchikta qawachichwan? . . . Jesus hinam nichwan: ‘Taytaytaqa kuyanim’, nispa. Payqa kuyasqantam qawachirqa rurasqankunawan.

Jesusqa Diostam kasukurqa, chaymi nirqa: ‘Ñoqaqa paypa kamachiwasqantam rurani’, nispa. Diosta kasukuspa hinaspa Paytawan Churinta agradayta munaspaqa kallpanchakunanchikmi escuelapi hinaspa Bibliamanta yachananchikpaq huñunakuykunapi mana puñunanchikpaq.

Bibliapi leenapaq

Hechos 20:7-12

Lucas 8:49-56

Juan 8:29; 14:31

[Willakuy]