KA AKATIKA paa koe e me tei te apii koe, e mea puapinga kia ara ua koe. E manganui te varevarea moe ana i roto i te pia apii, inara e rauka ai te tamou i te apii ka anoanoia koe kia ara ua. Kare e kore e aere katoa ana koe ki te uipaanga i te Apii Pipiria.

Toou manako eaa taau ka rave ei tauturu ia koe kia ara ua?— * Tetai ravenga, e moe vave i te po. Penei ka tauturu katoa me moe poto i te avatea. Akara ana tatou e eaa ta tatou ka mou mai mei tei tupu ki tetai mapu tei varea e te moe i te turuaipo i ko i te akoanga a te apotetoro ko Paulo. Akara i roto i te Pipiria, pene 20 o Angaanga, irava 7 ki te 12, kia kite e eaa tei tupu.

Aere ana a Paulo i te atoro i te putuputuanga i te oire ko Teroa i te pae tai. Karanga ra te Pipiria e ‘kia popongi ake ka riro ke atu’ a Paulo na runga i te pai. No reira kua “tamou marie atura tana ako anga atu e turuaipo akera.” Ka tatau tatou: “Te noo ua ra tetai tangata ou ko Eutiko te ingoa i te ngutupa māramārama, varea iora aia e te moe maata: no te mea kua roa ta Paulo tuatua anga.” Eaa ra tei tupu mai?—

Kua topa a Eutiko ki vao i te maramarama “i te toru o te tupati pia te topa anga.” Kua oro viviki atura a Paulo e etai atu ki raro. Tei runga a Eutiko i te one​—kua mate takiri! E akamanako ua ana ra koe e mei teaa te maata o to ratou taitaia?— Te akakite maira te Pipiria e kua tipapa iora a Paulo ki rungao ia Eutiko, kua takave maira iaia. I reira kua na ko akera a Paulo ma te rekareka e: ‘Auraka kotou e aue; te vai nei te ao i roto iaia!’ Kua akaora akaou mai te Atua ia Eutiko!

Eaa te apiianga ta tatou i mou mai no runga i te Atua, no tei tupu kia Eutiko?—E tai ia mea  koia oki, ka rauka ia Iehova, to tatou Metua i te rangi, i te akaora akaou mai i tei mate, kapiti mai te tamariki. Maata atu to Iehova marama i toou turanga e tona inangaro ia koe, i ta toou nga metua. Ia Iesu i te enua nei, kua akaari mai aia e mei teaa te tu o tona Metua, na te ikiiki anga i te tamariki meariki e te akameitakianga ia ratou. Kua akaora mai aia i te au mapu, kapiti mai i tetai tamaine 12 mataiti.

Mei teaa rai toou manako i te kite anga e te inangaro maira toou Metua i te rangi ia koe?— Ae, ka tupu rai to tatou inangaro ia Iehova e ka inangaro i te akarongo i Tana tuatua. Kua kite koe e akapeea tatou me akaari i to tatou inangaro Iaia?— Na te akakite anga e, te inangaro nei tatou Iaia. Akakite a Iesu e: “Te anoano nei au i te Metua.” Inara e maata atu ta Iesu i rave i to te karanga ua e, te inangaro ra aia i te Atua. Kua akaari aia i te reira na roto i tana i rave.

Kua akarongo a Iesu ki te Atua. “Te akono nei au i ta te Metua i akaue mai iaku,” i karanga ai a Iesu. Me ka akapera rai tatou, i te akamareka ia Iehova e tana Tamaiti ia Iesu, ka tauta pakari tatou kia ara ua i te taime tikai no tatou kia ara ua.