“Dulang le Phakgame”—Ke ka Baka la Eng go le Bohlokwa?

“PONTŠHO ya go ba gona ga gago le ya bofelo bja tshepedišo ya dilo e tla ba eng?” (Mat. 24:3) Ge Jesu a be a araba potšišo ye, o ile a botša barutiwa ba gagwe pontšho yeo e bego e kwešišega, e hlalosa ntlha e nngwe le e nngwe gabotse, e lemogega gabonolo e bile e ka se aketše yeo e begilwego go Mateo kgaolo 24, Mareka kgaolo 13 le Luka kgaolo 21. O okeditše ka gore: “Dulang le phakgame.”—Mat. 24:42.

Ge e ba pontšho yeo e be e tla ba molaleng ka tsela ye, ke ka baka la’ng a ile a oketša ka temošo ye? Ela hloko dikgonagalo tše tše pedi. Ya pele, ditšhitišo di ka dira gore ba bangwe ba hlokomologe pontšho ye, e lego seo se feleletšago ka gore ba lahlegelwe ke bomoya bja bona le go dula ga bona ba phakgame. Ya bobedi, Mokriste a ka lemoga dikarolo tše dingwe tša pontšho eupša ka baka la tikologo ye a dulago go yona a bona di sa mo kgome ka go lebanya. Ke moka a ka ipotša gore “masetlapelo a magolo,” e lego seremo sa boporofeta bja Jesu, a sa le kgole kudu, ka gona a ka bona ga bjale go sa hlokagale gore ‘a dule a phakgame.’—Mat. 24:21.

“Ba se Ele Hloko”

Jesu o ile a gopotša balatedi ba gagwe ka batho ba mehleng ya Noa. Modiro wa Noa wa boboledi, wa go aga areka e kgolo gotee le bošoro bja mehleng yeo di be di ka se hlokomologwe. Lega go le bjalo, ba bantši ba be ‘ba sa ele hloko.’ (Mat. 24:37-39) Boemo bjo bjalo bja kgopolo bo apareditše lehono. Ka mohlala, maswao a tsela a go bontšha gore batho ba fokotše lebelo a bolela molaetša woo o kwagalago gabotse, lega go le bjalo ba bantši ba a a hlokomologa. Gantši balaodi ba gapeletšega go dira mebotwana ditseleng tša ditoropong go gapeletša baotledi go fokotša lebelo. Ka mo go swanago, Mokriste a ka ba a lemoga pontšho ya mehla ya bofelo eupša a tšwela pele a dira mediro yeo e sa dumelelanego le seo bofelo bo se bolelago. Arielle, e lego mofsa yo a lego mahlalagading wa Afrika Bodikela, o bile le phihlelo ye.

Arielle o be a thabela go bogela kgwele ya basadi ya diatla thelebišeneng. Ge sekolo sa gabo se be se rulaganya gore go be le sehlopha sa papadi yeo, kganyogo ya gagwe ya go bapala e ile ya dira gore a se sa phakgamela dikotsi tšeo di ka kgomago bomoya bja gagwe. O ile a saenela go ba mothibadino. Ke’ng seo se ilego sa latela? O hlalosa gore: “Tše dingwe tša dibapadigotee le nna di be di na le masogana ao a bego a kgoga le go diriša dihlaretagi. Di be di nkwera ka ge ke be ke sa swane le tšona, eupša ke ile ka nagana gore nka kgotlelela. Papadi e ile ya thoma go senya bomoya bja ka go sa letelwa. Kgwele ya diatla e be e ntsene mading. Ge ke le dibokeng tša Bokriste, gantši kgopolo ya ka e be e lelera go tloga Holong ya Mmušo go ya lebaleng la kgwele ya diatla. Semelo sa ka sa Bokriste le sona se ile sa fokola. Go rata go bapala papadi ye go ile gwa godiša kganyogo ya ka ya go nyaka go thopa papadi e nngwe le e nngwe. Ke ile ka itlwaetša ka thata go kgotsofatša moya wo wa ka o mofsa wa phenkgišano. Ke ile ka gateletšega le go feta. Ke ile ka ba ka lahla bagwera ba ka ka baka la kgwele ya diatla.

“Ditaba di ile tša senyega ge malokwane a be a  šupa kgwele moloreng ka morago ga ge re bapetše sebapadi se sengwe gampe. Ke be ke eme ke itokišeleditše go thiba kgwele yeo. Pele ga ge nka lemoga, ke ge ke šetše ke rapetše Jehofa gore a nthuše ke kgone go thiba kgwele yeo! Tiragalo ye e ile ya ntira gore ke lemoge kamoo bomoya bja ka bo bego bo fokola ka gona. Ke ile ka bo tsošološa bjang?

“Ke be ke ile ka bogela DVD ya Young People Ask—What Will I Do With My Life? * Ke ile ka phetha ka gore ke e bogele gape, gomme mo nakong ye ke e bogele ka kelohloko. Go ba gona, ke be ke le boemong bja go swana le bja André, e lego lesogana leo le lego terameng ye. Ke ile ka tšeela godimo keletšo yeo mogolo yo a lego moo a ilego a e nea André—gore a bale Bafilipi 3:8 gomme a naganišiše ka yona. Seo se ile sa nthuša. Ke ile ka tlogela sehlopha seo.

“Ruri seo se ile sa fetoša bophelo bja ka! Moya wa ka wa phenkgišano le kgatelelo ya monagano di ile tša nyamelela. Ke ile ka ikwa ke thabile kudu gomme ke batamelane le bagwera ba ka ba Bakriste. Mediro ya bomoya e ile ya ba le bohlokwa bjo bogolo. Ke ile ka tsepamiša kgopolo ge ke le dibokeng gomme ka boela ka di thabela. Le bodiredi bja ka bo ile bja kaonefala. Ga bjale ke hlankela ka mehla ke le mmulamadibogo wa go thuša.”

Ge e ba tšhitišo e go goga ka matla gore o hlokomologe pontšho ya bofelo yeo Jesu a boletšego ka yona, gata megato go etša ge Arielle a dirile. O ka leka e mengwe ya yeo e latelago. Hlahloba Watch Tower Publications Index, yeo e ilego ya bitšwa gore ke mmapa woo o lebišago mahumong ao a fihlilwego. O letetšwe ke keletšo e kwagalago le batho bao ba bolelago diphihlelo tša bona mabapi le kamoo ba ilego ba lebeletšana le diteko. Holwa ka botlalo ke diboka tša Bokriste ka go lokišetša e sa le pele le ka go ngwala dintlha. Ba bangwe ba thušitšwe ke go dulela ka pele dibokeng. Ge e ba e le karolo ya seboka yeo batheetši ba tšeago karolo go yona, leka go araba di sa tloga fase. Go tlaleletša moo, tšwela pele o phafogile moyeng ka go tswalanya ditiragalo tše di tšwelelago ditabeng gona bjale le dibopego tše dingwe tša pontšho gotee le dika tše dingwe tšeo di hlaolago ‘mehla ya bofelo.’—2 Tim. 3:1-5; 2 Pet. 3:3, 4; Kut. 6:1-8.

“Le Itlhatsele le le ba Itokišitšego”

Pontšho ya mehla ya bofelo e direga “lefaseng ka moka.” (Mat. 24:7, 14) Batho ba dimilione ba phela mafelong ao a hlasetšwego ke leuba la malwetši, tlhaelelo ya dijo, ditšhišinyego tša lefase le ditiragalo tše dingwe tšeo go boletšwego ka tšona e sa le pele. Go fapana le bona, ba bangwe ba bantši ba phela mafelong ao a nago le khutšo le boiketlo. Ge e ba o se wa tšwa o bona tše dingwe tša dibopego tša pontšho ye, na o swanetše go phetha ka gore masetlapelo a magolo a sa le kgole kudu? Seo se ka se bontšhe bohlale.

Ka mohlala, naganišiša ka seo Jesu a se boletšego e sa le pele ka “malwetši le tlhaelelo ya dijo.” (Luka 21:11) Sa pele, ga se a bolela gore dilo tše di tla direga mafelong ka moka ka nako e tee goba ka tekanyo e swanago. Go e na le moo, o boletše gore di tla direga “lefelong le lengwe ka morago ga le lengwe.” Ka gona re ka se letele gore ditiragalo tše di direge gohle ka nako e tee. Sa bobedi, nakwana ka morago ga gore Jesu a bolele ka tlhaelelo ya dijo, o ile a bontšha gore ba bangwe ba balatedi ba gagwe ba swanetše go ba šedi gore ba se je kudu, ge a be a re: “Itlhokomeleng gore dipelo tša lena di se ke tša imelwa ke bojagobe.” (Luka 21:34) Ka gona, Bakriste ga se ba swanela go letela gore ba welwe ke sebopego se sengwe le se sengwe sa pontšho  ye. Go e na le moo, Jesu o itše: “Ge le bona dilo tše di direga, le tsebe gore Mmušo wa Modimo o batametše.” (Luka 21:31) Didirišwa tša poledišano tša mehleng yeno di dira gore re bone dibopego ka moka tša pontšho ye, go sa šetšwe ge e ba di re wela tikologong ya gabo rena.

Le gona, gopola gore Jehofa o šetše a beile ‘letšatši le iri’ yeo masetlapelo a magolo a tlago go thoma ka yona. (Mat. 24:36) Tsela yeo dilo di diregago ka yona lefaseng e ka se fetoše go tla ga letšatši le.

Jesu o lemošitše Bakriste kae le kae gore: “Le itlhatsele le le ba itokišitšego.” (Mat. 24:44) Re swanetše go dula re itokišitše ka mehla. Ke therešo gore re ka se dule re tšea karolo medirong ya pušo ya Modimo letšatši ka moka. Ge e le gabotse, ga go le o tee wa rena yoo a tsebago seo re tla bego re se dira ge masetlapelo a magolo a thoma. Ba bangwe ba tla be ba šoma tšhemong goba ba šoma ka gae. (Mat. 24:40, 41) Ka gona, ke’ng seo re ka se dirago go itlhatsela re le ba itokišitšego?

Emmanuel, Victorine le barwedi ba bona ba tshelelago ba dula tikologong e nngwe ya Afrika moo ba sa welwego ke ditiragalo ka moka tšeo di swayago pontšho ye. Ka gona ba ile ba phetha ka gore ba boledišane ka dilo tša moya letšatši le letšatši e le go ba thuša gore ba itlhatsele ba itokišitše. Emmanuel o hlalosa gore: “Go be go le thata go hwetša nako yeo e re loketšego ka moka ga rena. Re ile ra feleletša re kgethile metsotso e masometharo ya magareng ga iri ya botshelela le seripagare go tšwa iring ya botshelela mesong. Ka morago ga go ahlaahla temana ya letšatši, re lokišetša dirapa tše sego kae kgatišong yeo e tlago go dirišwa dibokeng bekeng yeo.” Na lenaneo le le ile la ba thuša go dula ba phakgame? Go bjalo! Emmanuel ke molomaganyi wa sehlopha sa bagolo ka phuthegong. Victorine o hlankela gantši e le mmulamadibogo wa go thuša gomme o thušitše batho ba bantši go amogela therešo. Barwedi ba bona ka moka ba tšwela pele gabotse moyeng.

Jesu o re lemoša gore: “Dulang le lebeletše, dulang le phakgame.” (Mareka 13:33) O se ke wa dumelela tšhitišo e fokotša go dula ga gago o phakgametše dilo tša moya. Go e na le moo, go swana le Arielle, diriša keletšo e kwagalago yeo re e hwetšago ka dikgatišong tša rena le dibokeng tša phuthego. Go swana le lapa la Emmanuel, leka go ba le selo seo o ka se dirago letšatši le letšatši go itlhatsela o itokišitše le go ‘dula o phakgame.’

[Mongwalo wa tlase]

[Seswantšho go letlakala 4]

Dipoledišano tša moya tša letšatši le letšatši di thuša Emmanuel le lapa la gagwe go ‘itlhatsela ba itokišitše’