Why Nao Hem Important for “Gohed for Lukaot”?

“WANEM nao saen wea bae showimaot iu stap and world hem gogo for finis?” (Matt. 24:3) For ansarem kwestin bilong olketa disaepol, Jesus storyim saen wea bae isi for olketa luksavve long hem. Olketa difren part long saen hia hem stap long Matthew chapter 24, Mark chapter 13, and Luke chapter 21. Jesus sei tu: “Gohed for lukaot.”—Matt. 24:42.

Sapos hem isi for olketa disaepol luksavve long datfala saen, why nao Jesus talem olketa for “gohed for lukaot”? Maet Jesus talem datwan bikos hem luksavve samting wea pipol busy long hem savve mekem olketa for no tingim datfala saen, no fren witim God, and no gohed for lukaot. Or maet wanfala Christian luksavve long samfala part bilong datfala saen bat olketa samting hia no affectim hem bikos datwan no happen long ples wea hem stap. Maet hem tingse “bigfala trabol” farawe yet and hem no need for “gohed for lukaot.”—Matt. 24:21.

“Olketa Nating Tinghae”

Jesus story abaotem pipol wea stap long taem bilong Noah. Nomata olketa lukim Noah preach, wakem bigfala ark, and wei wea pipol raf tumas, olketa “nating tinghae long samting wea Noah talemaot.” (Matt. 24:37-39) Pipol distaem tu duim sem samting. Olsem example, nomata pipol lukim saen long road for no speed, staka no followim. From datwan pipol savve putim samting long road for mekem olketa trak no speed. Long sem wei, maet wanfala Christian luksavve long saen abaotem olketa last day bat hem gohed busy long olketa nara samting. Hem nao samting wea kasem Arielle, wanfala teenager long West Africa.

Arielle laekem tumas for lukluk long TV taem olketa woman pleim wanfala game wea olketa kolem handball. Taem skul bilong Arielle organizem wanfala team for pleim handball, hem chance nao for hem plei. So hem joinim team and hem nao goalkeeper. Wanem nao happen? Hem sei: “Samfala long team garem boyfren wea smoke and iusim drug. Nomata olketa mekfani long mi from mi difren, mi tingse bae mi olraet nomoa. Bat gogo datfala game start for spoelem wei wea mi fren witim Jehovah. Evritaem nomoa mi tingim handball. Long taem bilong meeting, mi no tingim samting wea olketa storyim long Kingdom Hall bat tingim nomoa datfala game. Wei bilong mi start for change tu. Firstaem mi laek for plei nomoa bat then mi start for garem tingting for laek winim narawan. From mi training evritaem, mi savve wari tumas. Mi no interest tu long olketa fren bilong mi bikos mi tingim nomoa datfala game.

“Long wanfala taem wea mifala plei, nara team kasem penalty. Taem mi redi for blokem ball, mi seke nao bikos mi prea long Jehovah  for helpem mi! Mi luksavve datfala game spoelem wei wea mi fren witim Jehovah. So mi disaed for duim samting for fren bak witim hem.

“Nomata mi lukim datfala DVD Young People Ask—What Will I Do With My Life? * mi disaed for lukim moa and followim wanem mi lanem. Mi tu olsem André, datfala young man long DVD. Mi tingim samting wea datfala elder encouragem André for duim. Hem encouragem hem for readim and ting raonem Philippians 3:8. Mi duim datwan and mi stop for plei.

“Mi kasem gud samting from wanem mi disaedem! Mi no garem tingting for laek winim narawan and mi no savve wari nao. Mi hapi and fren gud moa witim olketa fren bilong mi long kongregeson. Mi laekem tumas for duim olketa samting for Jehovah firstaem. Mi lisin gud and enjoyim olketa meeting. Mi kasem gud samting tu long ministry. Staka taem mi savve auxiliary pioneer.”

Sapos samting wea iu busy long hem mekem iu no tingim saen wea Jesus talem, hem gud for changem samfala samting olsem Arielle duim. Tingim samting wea iu savve duim. Maet iu savve lukluk long Watch Tower Publications Index. Iu savve lanem gud samting from kaonsel wea stap long olketa magasin and experience bilong olketa wea kasem test. Bae iu kasem gud samting tu sapos iu prepare gud for olketa meeting and raetem olketa main point. Samfala sei wei for sidaon long front long Kingdom Hall barava helpem olketa. Trae for givim olketa koment long kwestin and ansa part. Nara samting wea savve helpem iu for gohed lukaot hem for tingim olketa samting wea happen long world and comparem witim saen wea Jesus talem and olketa nara profesi abaotem “olketa last day.”—2 Tim. 3:1-5; 2 Pet. 3:3, 4; Rev. 6:1-8.

“Mas Redi Gudfala”

Saen wea showimaot iumi stap long olketa last day hem kasem “evri ples long world.” (Matt. 24:7, 14) Plande million pipol long world stap long ples wea bigfala sik, hangre, earthquake, or olketa nara samting kasem olketa. Bat staka narawan stap long ples wea samting olsem no happen. Sapos samfala samting long datfala saen no happen long ples wea iu stap, waswe, datwan minim bigfala trabol hem farawe yet? Hem no stret for ting olsem.

Tingim wanem Jesus talem abaotem “olketa barava nogud sik and olketa taem bilong bigfala hangre.” (Luke 21:11) Hem no sei diswan bae happen semtaem long evri ples or evri ples bae kasem sem samting. Bat hem sei datwan bae “kasem plande pipol.” So iumi shud no tingse sem samting bae kasem evri ples long semtaem. Bihaen Jesus storyim wei wea bigfala hangre bae kamap, hem sei samfala wea followim hem mas careful for no kaikai tumas. Hem sei: “Iufala mas lukluk gud long iufala seleva nogud wei for kaikai tumas . . . mekem iufala for no garem stretfala tingting.” (Luke 21:34) Dastawe evri Christian shud no tingse evri part long datfala saen bae happen long ples wea olketa stap. Bat Jesus sei: “Taem iufala lukim evri samting hia hem happen, iufala bae  savve Kingdom bilong God hem klosap kam nao.” (Luke 21:31) Nomata wea nao iumi stap, iumi savve evri samting wea Jesus storyim long datfala saen kamap tru bikos iumi lukim long TV, Internet, niuspepa, or herem long radio.

Tingim tu hao Jehovah markem finis “day and taem” wea bigfala trabol bae start. (Matt. 24:36) Olketa samting wea happen distaem bae no changem datwan.

Jesus talem evri Christian: “Iufala tu mas redi gudfala.” (Matt. 24:44) Iumi mas redi evritaem. Hem tru, hard for iumi iusim full day for duim olketa spiritual samting. No eniwan long iumi savve wanem iumi bae duim taem bigfala trabol hem start. Maet samfala long iumi waka long garden or duim waka long haos. (Matt. 24:40, 41) So wanem nao iumi savve duim for showimaot iumi redi?

Emmanuel and Victorine garem sixfala gele and olketa stap long wanfala ples long Africa wea staka samting long saen wea Jesus storyim hem no kasem olketa. So for helpem olketa stap redi, olketa storyim spiritual samting evriday. Emmanuel sei: “Hem no isi for markem taem wea fitim evriwan. Gogo mifala markem six klok go kasem haf pas six long morning for storyim text and preparem tu-thri paragraf long buk wea kongregeson bae studyim long datfala week.” Datfala schedule helpem olketa for redi gud. Emmanuel hem chairman bilong olketa elder long kongregeson. Plande taem Victorine auxiliary pioneer and hem helpem staka for savve long Jehovah and worshipim hem. Evri gele bilong tufala tu gohed for worshipim Jehovah.

Jesus talem iumi for “gohed for lukaot, gohed for wekap.” (Mark 13:33) No letem nara samting long world for mekem iu no gohed for lukaot long spiritual wei. Olsem Arielle, traem best for followim kaonsel wea iu readim long olketa buk bilong iumi and wea iu herem long kongregeson meeting. Trae for duim samting evriday wea bae helpem iu for redi gud and “gohed for lukaot” olsem famili bilong Emmanuel duim.

[Footnote]

[Piksa long page 4]

Wei for storyim spiritual samting evriday helpem Emmanuel and famili for “redi gudfala”