‘Qawan-qawanlla kayqa’ ¡Ancha allinmi kunanqa!

HUK kutipim Jesuspa qatiqninkuna kaynata tapurqaku: “¿Imaynataq yachasaqku kutimunaykimantaqa hinaspa kay pacha puchukananmantaqa?”, nispa (Mat. 24:3). Payñataqmi tukuy imakunapas pasakunanmanta nirqa Mateo 24, Marcos 13 hinaspa Lucas 21 capitulokunapa nisqanman hina. Chaymantapas nirqam: “Qawan-qawanllayá kaychik”, nispa (Mat. 24:42).

Tukuy imakunapas sutilla kananmanta nispanqa, ¿imanasqataq qawan-qawanllayá kaychik nirqa? Kaykunaraykum. Payqa yacharqam wakin cristianokunata iñiyninpi imapas hukmanyarachinanmanta, chaykunam rikchan-rikchanlla kasqankuta yanqacharunman. Chaymantapas nisqankuna imayna cumplikusqanta mana kaqpaqpas hapinankumantam yacharqa. Chayna kaptinqa yaqapaschá piensanmanku karqa “llumpa-llumpay ñakariy” punchaw manaraq chayamunanmanta hinaspa qawan-qawanlla kaytapas saqerunankumanta (Mat. 24:21).

Manam kasukurqakuchu

Jesusqa qatiqninkunawan rimaspanqa, rimachkarqam sinchi paramanta ñawpaqtaraq kawsaqkunamanta. Chay runakunaqa rikurqakum hatun buqueta rurachkaqta, Noeypa willakusqanta hinaspa wañuchinakuy kasqantapas, ichaqa yaqa llapallankum mana kasukurqakuchu (Mat. 24:37-39). Kunanpas runakunaqa manam kasukunkuchu imapas willakuykunataqa. Piensasun kaypi, carro manejaqkunapas yachankum carreterapi willakuykuna kasqanta. Ichaqa achkam mana kasukunkuchu. Chaymi autoridadkunaqa ñankunapi letrerota churanku allillamanta rinankupaq. Chaynallataqmi wakin cristianokunapas tukupay tiempopi kawsasqankuta yachanku, ichaqa imapas ruraypi afanakuspankum Dios serviyninkuta saqenku. Chaynam pasarqa África lawmanta Arielle sutiyoq sipasta.

Paymi anchata munaq pelotawan pukllayta hinaspapas manam televisionpi qawaytaqa saqeqchu. Huk punchawmi escuelanmanta pukllanankupaq nisqankuta yacharurqa. Chay rurasqankum paypaqqa ancha allin rikchakurqa chaymi mana piensarispan pukllananpaq chaylla nirqa. ¿Imapim tukurqa? Hina kikinmi nin: “Pukllaqmasiykunapa yananmi drogakurqaku hinaspa cigarrota pitarqaku. Mana paykuna hina kasqaymanta burlakuwaptinkupas piensarqanim mana hukmanyanaymanta. Ichaqa hina pukllayllam iñiyniypiqa yanqacharuwarqa. Llumpayta pukllayman qokuruspaymi chayllapiña piensaq kani huñunakuymantaqa. Ñoqaqa huñunakuypim karqani ichaqa pukllayllapiñam piensaq kani. Chaymantapas manam ñawpaqpi hinachu karqani. Manataqmi pukllayllatañachu munarqani aswanqa ganaytañam, chaymi anchata ensayarqani gananaypaq. Llumpaytamá hukmanyarurqani. Chaymantapas wakin amistadniykunam saqeruwarqa.

”Huk kutipim pukllaptiyku ñoqayku lawman pelotata yaykuchimunankupaq tuparurqa,  ichaqa chay pelotata harkarunaypaqmi Diostaraq mañakuyta qallaykurqani. Hinaptinmi chaylla musyakurqani iñiyniypi mana allin kasqayta. ¿Imaynatam Dioswan amistadniyta kaqmanta wiñachirqani?

”Yuyarirqanim Los jóvenes preguntan... ¿Qué haré con mi vida?, niq video qawasqayta. * Ñawpaqtaqa qawarurqaniñam ichaqa kaqmantam qawarqani hinaspam chaypi yuyaymanarqani. Hinaptinmi imayna tarikusqayqa, qawasqay Andy sutiyoq mozowan tuparqa. Chay ancianopa consejasqan Filipenses 3:8 nisqanpim yuyaymanarqani. Chaymi sonqoyman chayarurqa, hinaspam chay pukllasqayta saqenaypaq tantearurqani.

”Chaymi imayna kasqayta cambiarurqa. Manañam gananaypaqñachu pukllarqani, hinaptinmi hawkayayta qallaykurqani. Kusisqam tarikurqani iñiqmasiykunapa hichpanpi. Dios servisqaypi ruraykunam kallpanchawarqa. Huñunakuykunaman risqaymi astawan yanapawarqa. Chaymantapas aswan allintañam predicarqani. Arí, kunanqa precursor auxiliarmi sapa killa predicachkani”, nispa.

Arielle cristianata hina imapas rurayninchikkuna Jesuspa nisqanta kasukunapaq harkawaptinchikqa, imatapas rurananchikmi. Ejemplopaq qaway Índice de las publicaciones Watch Tower nisqa qellqata chaypim tarikun tukuy imamanta yachachikuykuna. Chaypitaqmi tarisun sumaq consejokunata hinaspa huk cristianokuna ima sasachakuykunapi kasqankumanta, wakinqa ñoqanchikpa vidanchikwanmi tupan. Chaymantapas ancha allinmi llapan huñunakuyninchikkunaman riyqa, preparakuy hinaspa qellqayninchikpas. Huñunakuy yanapawananchikpaqqa ñawpaqpim tiyananchik. Chaymantapas tapukuykuna kaptinqa allinmi kanman qallariymantapacha rimariyninchik. Iñiyninchikpi qawan-qawanlla kananpaqqa leenanchiktaqmi hinaspa uyarinanchiktaqmi noticiakunata, chaymantapas imayna cumplikusqanpim piensana hinaspa ‘tukupay tiempopi’ imakuna pasasqanpipas (2 Tim. 3:1-5; 2 Ped. 3:3, 4; Apo. 6:1-8).

“Listollayá kaychik”

Tukupay tiempopi tukuy ima kasqanqa qawakunmi “enterollan kay pachapi” (Mat. 24:7, 14). Millonnintin runakunam sasachakunku onqoywan, yarqaywan, terremotowan hinaspa Bibliapa nisqan huk sasachakuykunawanpas. Chaywanpas achka runakunam hawkalla llaqtakunapi yachanku hinaspapas manam llumpaytaqa ñakarinkuchu. ¿Chaynachu tarikunchik? Chayna kaptinqa manam piensanachu hatu-hatun ñakariy unamunantaqa.

Piensasuntaq “muchuykuna hinaspa onqoykuna” kananmanta Jesuspa nisqanpi (Luc. 21:11, NM). Payqa manam nirqachu chaykuna enteron Pachapi kanantaqa nitaq chaynalla kanantapas aswanqa nirqam kaypi-chaypi kananmanta, chaymi mana nichwanchu enteron Pachapi imam kaqllata cumplikunanmantaqa. Chaymantapas Jesusqa nichkarqam chay tiempopi muchuy kaptinpas wakin qatiqninkuna mikuyllapiña afanakunankumanta, chaymi nirqa: “Allintayá qawakuychik, yanqañataqmi mikuyllapiña [. . .] afanakuchkaqta qonqayllamanta chay punchawkuna tariramusunchikman”, nispa (Luc. 21:34, NM). Manamá suyanaraqchu llapallanchikta hinaspa sapakamata chaykuna pasawananchiktaqa. Jesuspa  kayna nisqanta yuyarisun: ‘Nisqaykuna sucedekuptinqa yachankichikmi Diospa munaychakunanqa hichparamusqantaña’, nispa (Luc. 21:31). Ñoqanchik lawpi chay willakuykuna mana cumplikuptinpas, noticiantakamam yachachwanchik.

Chaymantapas Jehová Diosqa tantearunñam haykapi hatu-hatun ñakariy qallarinantaqa. Manataqmi ‘imay punchaw otaq imay hora’ kanantaqa imapas harkanmanchu (Mat. 24:36).

Jesusqa llapallan qatiqninkunatam nirqa: “Listollayá kaychik”, nispa (Mat. 24:44). Chaynaqa listollayá haykapipas kasun. Kaywanqa manam nichkanchikchu tuta-punchaw Dios serviyllapiña kanamantaqa. Manataqmi yachanchikchu hatu-hatun ñakariy imay hora qallarinantaqa, tariramuwachwanmi llamkachkaptinchik, chakrapi, wasipi otaq maypipas (Mat. 24:40, 41). Chaynaqa, ¿imatam rurachwan imaña kaptinpas hinalla suyanapaq?

Qawasunchik Emmanuel hinaspa Victorine casarasqakunamanta. Paykunaqa África lawpim soqta warmi warmankuwan mana ancha runakunapa kasqanpi hawkalla tarikunku, chaymi mana anchatachu rikunku tukupay tiempopi lliw pasakusqantaqa. ¿Imam yanapan qawan-qawanlla haykapipas kanankupaq? Iñiyninkupi yanapaq kaqkunatam sapa punchaw estudianku. Emmanuel cristianom willakun: “Qallariypiqa manam tiempochakuyta atirqanikuchu, ichaqa chaymantañam tantearurqaniku soqta horamanta soqta hora partinkama estudianaykupaq. Puntataqa Diospa Palabranta sapa punchaw estudianapaq qellqatam estudianiku, chaymantañataq huñunakuypaq qellqakunata estudianiku”, nispa. Sutillamá kachkan kunan tiempopi qawan-qawanlla kananpaq imakuna yanapasqanqa, Emmanuel iñiqmasinchikqa congregacionpi ancianom, Victorine iñiqmasinchikñataqmi sapa kuti precursor auxiliar kan hinaspam yanaparqa achka runakunata bautizakunankupaq, llapallan warmankunañataqmi iñiyninkupi ñawparichkanku.

Jesusmi kayta niwanchik: “Chaynaqa qamkunayá cuidakuychik, Diosta mañakustinyá listolla suyawaychik”, nispa (Mar. 13:33). Chaynaqa amayá imawanpas aysachikusunchu. Arielle iñiqmasinchik hinayá qellqanchikkunapi hinaspa huñunakuykunapi niwasqanchikta kasukusun. Chaymantapas Emmanuel iñiqmasinchik hinayá sapa punchaw estudianapaq tiempochakusun chaynapi qawan-qawanlla kanapaq.

[Willakuy]

[4 kaq paginapi dibujo]

Emmanuelwan familianqa qawan-qawanllam tarikunku iñiyninkupi yanapaq kaqkunata sapa punchaw estudiaspanku