“Kia Matakite”​—Eaa ra i Puapinga Maata Ai?

“EAA te akairo o toou ra parutia e te akaopengaanga o te akatereanga o te au mea nei?” (Mata. 24:3, NW) Te pauanga aia i taua uianga ra, kua oronga a Iesu i tetai akairo taka meitaki, kitea meitakiia, e te papu tikai ki tana au pipi tei rekotiia i roto ia Mataio pene 24, Mareko pene 13, e Luka pene 21. Kua akakite katoa aia e: “Kia matakite.”​—Mata. 24:42.

Me ka kite meitakiia te akairo, eaa ra ka anoanoia ai tetai atu akamatakiteanga? Akamanako ana i teia nga tumu. Mea mua, kare tetai pae e aru ana i te akairo no te au akavare anga, e kare i matakite i te pae vaerua. Te rua, penei ka kite tetai Kerititiano i te au mea puapinga o te akairo no te au mea e tupu ra takapini iaia, kare ra aia e manako e ka tupu te reira kiaia. E ka manako aia e te mamao atura te “mate maata,” te openga o ta Iesu totou, e kare aia e anoanoia “kia matakite.”​—Mata. 24:21.

‘Kare Rava Ratou i Kite’

Kua akamaara a Iesu ki tana au pipi no runga i te uki i to Noa tuatau. Kua kite ana ratou ia Noa te tutu aere anga, te maani anga i te araka maatamaata, e te takinokino anga e tupu ra i taua tuatau ra. Inara, ‘kare rava te maataanga i kite’ me kore i akarongo ana. (Mata. 24:37-39) Te tupu nei rai taua au tu i teia tuatau. Ei akaraanga, te oronga maira te au akairo no te akaoro anga viviki i te au akakite anga taka meitaki, kare ra te manganui e aru ana i te reira. No reira kua akakeuia te aronga mana kia maani i te au puku maunga rikiriki i runga i te mataara kia akamarie mai i te aronga akaoro viviki. Penei te kite ra tetai Kerititiano i te akairo o te tuatau openga, inara te piri ra rai aia ki te au angaanga ke atu e kare e akamanako ana i te akairo. Kua tupu teia kia Arielle, tetai tamaine mapu i Aperika Opunga.

E reka ana a Arielle i te akarakara i te pepei poro a te vaine i runga i te tivi. Te akanoo anga tana apii i tetai pupu, kua inangaro tikai aia i te tomo atu, e kua ngaropoina iaia te kino ka tupu mai ki tona turanga pae vaerua. Kua iki aia kia tiaki i te kingi. Eaa tei tupu mai? Kua akamarama aia e: “Tetai o toku au oa e tane ta ratou e kai ana i te apinga akakona e te avaava. Kua aviri mai ratou iaku no toku tu tuke, inara kua manako au e ka rauka iaku i te akono atu i te reira. Tei tupu mai, kua takino te tarekareka i toku turanga pae vaerua. Maata toku manako i runga i te pepei poro. Te tuatau o te uipaanga Kerititiano, tei runga toku manako i te ngai pepei anga poro. Kua kino katoa toku tu Kerititiano. No toku inangaro maata i te pepei poro kua inangaro ua rai au kia re. Kua tereni pakari tikai au ei akamerengo i toku inangaro kia re. Kua maata atu toku taitaia. E no te maata o toku inangaro i te pepei poro kare oku taime no toku au oa.

“Tae anga ki te taime te orongaia anga tetai atianga ki tetai mai pupu kia pei i te poro ki roto i te kingi, kua papa au no te arai atu i te  poro. E kua kite mai au e, kua pure ana au kia Iehova kia tauturu mai iaku kia arai atu i te poro! Na teia i kite mai ei au e kua kino roa toku turanga pae vaerua. Akapeea au i maroiroi akaou mai ei?

“Kua akara ana au i ta tatou DVD Young People Ask​—What Will I Do With My Life? * Kua akara akaou au i te reira e i teia taime kua akamanako pakari au i te reira. Aiteite ua toku turanga ki to André, te tamaiti mapu i roto i te teata. Kua akamanako meitaki tikai au i ta tetai tangata pakari i akamaroiroi ia André kia rave​—e tatau e e akamanako meitaki ia Philipi 3:8. Kua tauturu mai te reira iaku e kua akaruke au i taua pupu ra.

“E tauianga maata ta te reira i akatupu! Kua ngaro toku inangaro kia re e te tu taitaia. Kua rekareka mai au e kua piri vaitata atu au ki toku au oa Kerititiano. Kua maata atu te puapinga o te au angaanga pae vaerua. Kua akamou au i toku manako ki runga i te au uipaanga e kua mataora akaou au i te reira. Kua meitaki katoa mai taku angaanga orometua. Teianei te tavini putuputu nei au ei painia tauturu.”

Me te akavareia ra koe kia kore e aru i te akairo ta Iesu i oronga mai, e rave i te au takainga papu, mei ia Arielle rai. Tauta i te rave i tetai o teia au mea i raro akenei. Akara i te Watch Tower Publications Index, tei kapikiia e ko te mapu ki te au apinganui muna. Te vai ra te au akakiteanga noou no te au akoanga meitaki e te au tua oraanga o te aronga tei aro atu i te au timataanga. Akapapa meitaki e e tata i te au manako maata kia puapingaia koe mei te au uipaanga Kerititiano. Kua kite mai tetai pae e e meitaki atu i te noo ki mua roa i te are uipaanga. E tauta i te pau vave i te tuatau no te paupau anga. Pera katoa, kia ara ua i te pae vaerua, e akaaite atu i te au nuti o teia tuatau ki te au tuanga o te akairo e ki tetai atu au totou o te “tuatau openga.”​—2 Timo. 3:1-5; 2 Pete. 3:3, 4; Apo. 6:1-8.

“Kia Vai Teateamamao rai Kotou”

Te tupu ra te akairo o te tuatau openga i te pa enua katoa, “e kako rava ake te ao katoa nei.” (Mata. 24:7, 14) Mirioni ua atu te noo ra ki te au ngai e tupu maata ra te au maki mate, onge, ngaruerue enua e tetai atu au tupuanga tei totouia mai. Tetai tua ra, manganui te noo ra i te au ngai e tupu ra te au e te tu maru. Me kare koe i kite ana i tetai au tuanga o te akairo, ka manako ainei koe e te mamao ua atura te mate maata? Kare te reira i te manako tau.

Ei akaraanga, akamanako ana i ta Iesu i totou no runga i “te onge, e te maki-mate.” (Luka 21:11) Mea mua, kare aia i tuatua ana e ka tupu teia i te au ngai ravarai. Kua akakite ra aia e ka tupu teia au mea “i tera ngai i tera ngai.” No reira kare tatou e tapapa atu e ka tupu taua au mea ra i te au ngai ravarai e i taua taime rai. Te rua, muri poto ua ake te taiku anga i te onge, kua akakite a Iesu e kia matakite tetai o tana au pipi kia kore e kaikai maata: “E matakite ra ia kotou, ko te opue aea to kotou ngakau i te maata o te kai.” (Luka 21:34) No reira eiaa te au Kerititiano katoatoa e manako e ka kite ratou i te au akairo ravarai. Mari ra, kua akakite a Iesu e: “Kia akara kotou i taua au mea nei i te tupu anga, kua vaitata ïa te basileia o te Atua, kia kite oki kotou.” (Luka 21:31) Te kite nei tatou i te au  akairo ravarai na roto i te au ravenga komunikeitianga o teia tuatau, noatu eaa ta tatou e kite ra i to tatou uaorai ngai.

Akamaara katoa e kua akanoo ke ana a Iehova i “te reira rā e te reira ora” e akamata ai te mate maata. (Mata. 24:36) Kare te au tupuanga o te au mea i runga i te enua nei e taui i teia ra.

Kua ako mai a Iesu i te au Kerititiano i te au ngai ravarai e: “Kia vai teateamamao rai kotou.” (Mata. 24:44) No reira, kia vai teateamamao ua rai tatou. E tika kare tatou e rave ua i te au angaanga teokaratiki i te ra katoa e i te au ra ravarai. No te mea, kare tetai ia tatou e kite e eaa ta tatou e rave ra me akamata mai te mate maata. Penei te angaanga moni ra tetai pae me kore te akono ra i te au angaanga o te ngutuare. (Mata. 24:40, 41) Akapeea ra tatou e vai teateamamao ei?

Te noo ra a Emmanuel e Victorine, e ta raua tamariki tamaine e ono i tetai ngai i Aperika e kare ratou e kite ana i te au akairo e tupu maata ra. No reira kua rave ratou i tetai uriurianga pae vaerua i te au ra ravarai ei tauturu ia ratou kia vai teateamamao ua. Kua akamarama mai a Emmanuel e: “E ngata tikai i te akanoo i tetai tuatau tau no te katoatoa. I te openga, kua akanoo matou e toru ngauru miniti, mei te ora ono ki te toru ngauru miniti i pati i te ora ono i te popongi. Muri ake i te akamanako anga i te tia o te reira ra, kua akapapa matou i tetai au parakarapa i roto i tetai puka no te apii a te putuputuanga no te epetoma.” Kua tauturu ainei teia porokaramu ia ratou kia vai matakite ua? Ae! Ko Emmanuel te tauturu no te pupu aronga pakari i roto i te putuputuanga. E tavini putuputu ana a Victorine ei painia tauturu e e manganui tana i tauturu ana kia ariki i te tuatua mou. Te tere meitaki ra ta raua tamariki tamaine i te pae vaerua.

Te ako maira a Iesu ia tatou e: “E matakite oki ia kotou, e akamaroiroi.” (Mare. 13:33) Auraka e akatika i tetai akavare anga kia akaiti mai i toou tu matakite i te pae vaerua. Mari ra, e aru i te akoanga i roto i ta tatou au puka e i te au uipaanga a te putuputuanga mei ia Arielle rai. E tauta tatou i te rave i tetai angaanga i te au ra ravarai kia vai teateamamao e “kia matakite” mei te pamiri rai o Emmanuel.

[Tataanga Rikiriki i Raro]

[Tutu i te kapi 4]

Kua tauturu te au uriurianga pae vaerua i te au ra ia Emmanuel e tona pamiri ‘kia vai teateamamao ua rai’