Iriba Kitang Maggayagaya!

AN KAOGMAHAN asin kagayagayahan orog nang nagigin depisil makamtan. Para sa dakol, garo baga imposible an pagsabi sa iba nin positibong mga saboot. An buhay sa presenteng panahon, nangorogna sa darakulang siudad, iyo an dahelan na isinusuway nin mga tawo an saindang sadiri asin nagsosolosolo.

“An pagigin mamondo ordinaryo na sana,” an sabi kan Propesor sa Psychobiology na si Alberto Oliverio, asin “mayong duda na an buhay sa darakulang siudad nakakakontribwir sa pagsolosolo. Sa dakol na situwasyon, an pagsolosolo nagigin dahelan na kita magin daing pakiaram sa buhay nin kaopisina, kataed, o sarong kahera sa kaharaning supermarket.” Sa parate, an siring na pagsolosolo minaresulta sa depresyon.

Minsan siring, laen dian an situwasyon kan mga kapwa Kristiano, pati an saindang atitud. Si Pablo nagsurat: “Pirmeng maggayagaya.” (1 Tes. 5:16, NW) Dakol kitang dahelan na iribang maggayagaya. Sinasamba niato an Kaharohalangkaweng Dios, si Jehova; nasasabotan niato an mensahe nin katotoohan na nasa Biblia; may paglaom kita na kaligtasan asin buhay na daing  sagkod; saka makakatabang man kita sa iba na makamtan an parehong mga bendisyon.—Sal. 106:4, 5; Jer. 15:16; Roma 12:12.

An paggayagaya asin paghiras kaiyan sa iba karakteristiko nin tunay na mga Kristiano. Kaya bakong makangangalas na nagsurat si Pablo sa mga taga Filipos: “Ako nagoogma, asin nararagña [“nakikigayagaya,” NW] sa kaibahan nindo gabos: Asin sa siring man sanang paagui kamo man nagoogma, asin nararagña [‘nakikigayagaya,’ NW] sa kaibahan ko.” (Fil. 2:17, 18) Sa halipot sanang pananaram na ini ni Pablo, duwang beses niang sinambit an pag-ogma asin iribang paggayagaya.

Siempre, kaipuhan nin mga Kristiano na mag-ingat tanganing makalikay sa ano man na tendensia na isuway an sadiri. An saro na isinusuway an sadiri dai makakapaggayagaya kaiba kan mga kapagtubod. Kaya paano niato masusunod an sadol ni Pablo na padagos na ‘mag-ogma sa Kagurangnan’ kaiba kan mga tugang niato?—Fil. 3:1.

Makigayagaya sa mga Kapagtubod

Kan magsurat si Pablo sa mga taga Filipos, sia posibleng bilanggo sa Roma huli sa paghuhulit. (Fil. 1:7; 4:22) Pero, an pagigin bilanggo dai nakapaluya sa saiyang entusiasmo sa ministeryo. Sa kabaliktaran, naggayagaya sia sa paglilingkod ki Jehova sa pinakalubos na makakaya nia asin na sia garo ‘ibinubo na siring sa dolot na inomon.’ (Fil. 2:17, NW) Ipinapaheling kan saboot ni Pablo na an kagayagayahan dai nakadepende sa kamugtakan nin saro. Dawa nakabilanggo, sia nagsabi: ‘Ako [“padagos man na,” NW] mag-oogma.’—Fil. 1:18.

Si Pablo an nag-establisar kan kongregasyon sa Filipos, kaya may espesyal na kapadangatan sia sa mga tugang duman. Aram nia na makakaparigon man sa sainda an paghiras kan saiyang kagayagayahan sa paglilingkod ki Jehova. Huli kaini, sia nagsurat: “Gñunian, boot ko, magña tugang, na kamo makaaram na an magña bagay na nangyari sa sako, naguin orog pang nakapalakop kan evangelio; mala ta an sakong magña gapos . . . ki Cristo nahayag sa gabos na bantay sa pretorio, asin sa gabos na iba pa.” (Fil. 1:12, 13) An paghiras ni Pablo kan nakakaparigon na eksperyensiang ini sarong paagi nin pag-ogma asin pakigayagaya sa mga tugang. An mga taga Filipos seguradong nakigayagaya man ki Pablo. Minsan siring, tanganing magibo iyan, kaipuhan na dai sinda pangluyahan nin boot huli sa naeeksperyensiahan kaidto ni Pablo. Imbes, kaipuhan nindang arogon an halimbawa nia. (Fil. 1:14; 3:17) Apuera dian, puedeng padagos na ipamibi si Pablo kan mga taga Filipos asin itao sa saiya an ano man na tabang saka suporta na kaya ninda.—Fil. 1:19; 4:14-16.

 Ipinapaheling man daw niato an siring na magayagayang saboot arog ni Pablo? Nagmamaigot daw kitang maheling an positibong mga aspekto kan satong kamugtakan sa buhay asin ministeryo bilang Kristiano? Kun kita nakikiasosyar sa satong mga tugang, marahay na maggayagaya manongod sa gibohon na pagpatotoo. Dai niato kaipuhan maghalat nin pambihirang mga eksperyensia tanganing magibo ini. Tibaad napukaw niato an interes nin saro sa mensahe kan Kahadean paagi sa epektibong introduksion o pangangatanosan. Tibaad nagin marahay an pakikipag-olay niato sa sarong kagharong manongod sa napili tang teksto sa Biblia. O tibaad namidbid sana kita sa teritoryo bilang Mga Saksi ni Jehova, asin ini saro nang marahay na patotoo. An paghiras nin siring na mga eksperyensia sarong paagi nin iribang paggayagaya.

Dakol sa banwaan ni Jehova an nagsakripisyo asin nagsasakripisyo pa tanganing makapaghulit. An mga payunir, nagbibiaheng paraataman, Bethelite, misyonero, asin internasyonal na lingkod ginigibo an makakaya ninda sa bilog na panahon na paglilingkod saka naggagayagaya sa paggibo kaiyan. Kita daw naoogma asin nakikigayagaya sa sainda? Kun siring, ipaheling niato na nagpapasalamat kita huli sa namomotan na mga kapwa trabahador na ini o “katabang sa kahadean nin Dios.” (Col. 4:11) Kun kita nag-iiribanan sa mga pagtiripon o mas darakulang asamblea, puede tang maogmang dagkahon sinda. Puede man niatong arogon an saindang halimbawa nin kaigotan. Asin puede kitang ‘magtao nin lugar’ sa paghinanyog sa mga eksperyensia saka nakakapakosog na mga tataramon ninda paagi sa pagigin mapagpasakat niato, na tibaad iniimbitaran sinda na magkakan kaiba niato.—Fil. 4:10.

Makigayagaya sa mga Binabalo

An pagtagal sa persekusyon asin pakapanggana sa mga pagbalo nakapakosog sa determinasyon ni Pablo na magdanay na maimbod ki Jehova. (Col. 1:24; Sant. 1:2, 3) Sa pakaaram na posible nanggad na mapaatubang sa kaagid na mga pagbalo an mga tugang sa Filipos asin na mapaparigon an boot ninda huli sa pagtagal nia, may dahelan siang mag-ogma asin makigayagaya sa sainda. Huli kaini, sia nagsurat: “Ini itinogot saindo dahel ki Cristo, bako sanang magtubod sa saiya, kundi na magtios man dahel saiya: Na igua man kan kahorasaan na nahiling nindo sako, asin gñunian nadadagñog nindo na nasa sako.”—Fil. 1:29, 30.

An mga Kristiano man ngonyan napapaatubang sa pagtumang huli sa pagpapatotoo ninda. Kun minsan madahas iyan, alagad sa parate mas tuso. Iyan puedeng paagi sa falsong akusasyon nin mga apostata, pagkaongis nin mga kapamilya, pag-olog-olog nin mga katrabaho o kaeskuela. Nagpatanid si Jesus na dai kita maninigong mabigla o pangluyahan nin boot huli sa mga pagbalong iyan. Imbes, mga dahelan iyan nin paggayagaya. Sia nagsabi: “Paladan [“maogma,” NW] kamo kun pagpakaraoton kamo, asin paglamagon kamo, patin pagsabihon sa saindo an manlaenlaen na maraot sa kaputikan, dahel sako. Magogma kamo asin magogma nin labilabi: huli ta dakula an balos sa saindo sa lagñit.”—Mat. 5:11, 12.

Dai kita dapat matakot o masindak kun nababaretaan niato na sa nagkapirang lugar an satong mga tugang napapaatubang sa maringis na persekusyon. Sa kabaliktaran, maninigo kitang maggayagaya huli sa pagtagal ninda. Puede tang ipamibi ki Jehova na logod mapagdanay ninda an pagtubod asin pakatagal. (Fil. 1:3, 4) Minsan ngani mayo na kitang gayong magigibo para sa namomotan na mga tugang na iyan, makakatabang kita sa mga kakongregasyon niato na binabalo. Puede kitang magpaheling nin personal na interes asin suporta sa sainda. Puede man kitang gumibo nin mga oportunidad na makigayagaya sa sainda paagi sa paminsanminsan na pag-imbitar sa sainda sa satong Pampamilyang Pagsamba, pakikipartner sa sainda sa paghuhulit, asin pag-aling-aling kaiba ninda.

Dakol kitang dahelan na iribang maggayagaya! Labanan niato an atitud kan kinaban na pagsuway kan sadiri asin padagos na ihiras sa mga tugang an kagayagayahan niato. Sa paggibo kaiyan, dai sana kita makakakontribwir sa pagkamoot asin pagkasararo kan kongregasyon kundi lubos man niatong ikakaogma an Kristianong pagkasararo bilang magturugang. (Fil. 2:1, 2) Iyo, “magorogma kamo nin danay dian sa Kagurangnan: Ako masabi liwat, magorogma kamo.”—Fil. 4:4.

[Picture Credit Line sa pahina 6]

Globo: Sa karahayan nin boot kan Replogle Globes