Nyɛhaa Wɔfea Ekome Kɛnáa Miishɛɛ!

EWA waa akɛ mɔ aaaná miishɛɛ ni emli afili lɛ, ni shihilɛ nɛɛ miiya nɔ emli miiwo wu. Mɛi pii susuɔ akɛ amɛnyɛŋ amɛná saji ni tswaa mɔ emaa shi ni amɛkɛ mɛi agba. Bɔ ni shihilɛ lɛ etsɔ ŋmɛnɛ, titri lɛ yɛ maji wuji amli lɛ haa mɛi tseɔ amɛhe ni amɛsumɔɔ ni amɛ pɛ amɛhi shi.

Alberto Oliverio ni ji jwɛŋmɔ he nilelɔ kpanaa lɛ kɛɛ akɛ: “Mɛi babaoo nuɔ shoofeemɔ he, ni ŋwanejee ko bɛ he akɛ maji wuji amli shihilɛ haa mɛi tseɔ amɛhe. Yɛ shihilɛi pii amli lɛ, enɛ haaa wɔfó mɛi ni wɔkɛtsuɔ nii yɛ ɔfis kome, wɔkutsoŋbii, loo mɛi ni tsuɔ nii yɛ shwapoi ni wɔyaheɔ nii yɛ mli lɛ amli lɛ anɔ̃ mli.” Bei pii lɛ, shoofeemɔ ni tamɔ nɛkɛ lɛ haa mɛi náa jwɛŋmɔŋ haomɔ.

Shi jeee nakai kwraa shihilɛ lɛ ji yɛ wɔnanemɛi Kristofoi lɛ agbɛfaŋ, ni esoro bɔ ni amɛfeɔ amɛnii amɛhaa. Bɔfo Paulo ŋma akɛ: “Nyɛnáa miishɛɛ daa.” (1 Tes. 5:16) Wɔyɛ yiŋtoi babaoo ahewɔ ni esa akɛ wɔná miishɛɛ, ni wɔkɛ mɛi krokomɛi afee ekome kɛnya. Wɔjáa Yehowa, ni ji Nyɔŋmɔ Ofe lɛ; wɔnuɔ Biblia mli anɔkwalei  lɛ ashishi; wɔyɛ yiwalaheremɔ kɛ naanɔ wala he hiɛnɔkamɔ lɛ; ni wɔbaanyɛ wɔye wɔbua mɛi krokomɛi ni amɛ hu amɛná jɔɔmɔi nɛɛ eko.—Lala 106:4, 5; Yer. 15:16; Rom. 12:12.

Anɔkwa Kristofoi náa miishɛɛ, ni amɛkɛ mɛi krokomɛi hu feɔ ekome kɛnáa miishɛɛ. No hewɔ lɛ ebɛ naakpɛɛ mɔ akɛ Paulo ŋma Filipibii lɛ akɛ: “Miyɛ . . . tsuijurɔ ni mikɛ nyɛ fɛɛ aaaná tsuijurɔ; nakai nɔŋŋ kɛ̃ nyɛ hu nyɛnáa tsuijurɔ ni nyɛkɛ mi anáa tsuijurɔ.” (Fil. 2:17, 18) Yɛ ŋmalɛ kukuji enyɔ nɛɛ pɛ mli lɛ, Paulo wie shii enyɔ sɔŋŋ akɛ eyɛ tsuijurɔ loo miishɛɛ ni ekɛ mɛi krokomɛi náa tsuijurɔ.

Esa akɛ Kristofoi akwɛ jogbaŋŋ ni amɛkatse amɛhe kɛmiijɛ mɛi ahe. Kɛ́ mɔ ko tse ehe lɛ, enyɛŋ ekɛ enanemɛi héyelilɔi lɛ aná miishɛɛ. Belɛ, te wɔɔfee tɛŋŋ wɔkɛ Paulo ŋaawoo akɛ “nyɛmii ashɛa [daa] yɛ Nuŋtsɔ lɛ mli” lɛ atsu nii lɛ?—Fil. 3:1.

Okɛ Nyɛmimɛi Héyelilɔi lɛ Anáa Miishɛɛ

Beni Paulo ŋma ewolo lɛ kɛyaha Filipibii lɛ, eeenyɛ efee akɛ no mli lɛ eji gboklɛfonyo yɛ Roma yɛ sanekpakpa lɛ ni eshiɛɔ lɛ hewɔ. (Fil. 1:7; 4:22) Kɛlɛ, tsuŋ ni awo lɛ lɛ haaa miishɛɛ kɛ ekãa ni ekɛtsuɔ sɔɔmɔ nitsumɔ lɛ naa aba shi. Moŋ lɛ, ená miishɛɛ akɛ ekɛ enyɛmɔ fɛɛ miisɔmɔ Yehowa, ni ená miishɛɛ po akɛ ‘afɔse lɛ ashwie tamɔ afɔseɔ lá afɔle ashwieɔ lɛ.’ (Fil. 2:17) Paulo nifeemɔ lɛ tsɔɔ akɛ miishɛɛ ni mɔ aaaná lɛ damɔɔɔ shihilɛ mli ni eyɔɔ lɛ nɔ. Beni eyɔɔ kpabuŋ po lɛ, ekɛɛ akɛ: ‘Maya nɔ maná miishɛɛ.’—Fil. 1:18.

Paulo ni to asafo ni yɔɔ Filipi lɛ shishi, no hewɔ lɛ esumɔɔ nyɛmimɛi ni yɔɔ jɛmɛ lɛ waa. Ele akɛ kɛ́ egba amɛ miishɛɛ ni ená yɛ Yehowa sɔɔmɔ mli lɛ, no baawo amɛ hu hewalɛ. No hewɔ lɛ, eŋma akɛ: “Shi, anyɛmimɛi, miisumɔ akɛ nyɛle akɛ saji ni ba minɔ lɛ eha sanekpakpa lɛ eshwere moŋ, ni eha mikpãi lɛ eje shi faŋŋ yɛ Kristo mli yɛ Pretorio (Kaisare asraafoi amɔɔ) lɛ mli fɛɛ kɛ mɛi ni eshwɛ lɛ fɛɛ ateŋ.” (Fil. 1:12, 13) Niiashikpamɔ ni woɔ mɔ hewalɛ nɛɛ ni Paulo gba nyɛmimɛi lɛ ji gbɛ kome ni etsɔ nɔ ená miishɛɛ, ni ekɛ nyɛmimɛi lɛ fɛɛ amli fili amɛ. Eyɛ faŋŋ akɛ enɛ baaha Filipibii lɛ hu kɛ Paulo anya. Shi esa akɛ amɛha yiŋtoi ahewɔ ni amɛnya lɛ ahi amɛjwɛŋmɔ mli, ní amɛnijiaŋ akaje wui yɛ amanehulu ni Paulo naa lɛ hewɔ. Yɛ no najiaŋ lɛ, esa akɛ amɛkase Paulo nɔkwɛmɔnɔ lɛ. (Fil. 1:14; 3:17, Ga Biblia hee) Kɛfata he lɛ, Filipibii lɛ baanyɛ aya nɔ atsĩ Paulo tã yɛ sɔlemɔ mli, ni amɛfee bɔ fɛɛ bɔ ni amɛaanyɛ kɛye amɛbua lɛ.—Fil. 1:19; 4:14-16.

Ani wɔ hu wɔjieɔ miishɛɛ kpo tamɔ Paulo fee lɛ? Ani wɔbɔɔ mɔdɛŋ ni wɔná shihilɛ mli ni wɔyɔɔ  lɛ, kɛ wɔ-Kristofoi asɔɔmɔ nitsumɔ lɛ he jwɛŋmɔ ni ja? Kɛ́ wɔyɛ wɔnyɛmimɛi Odasefoi lɛ ateŋ lɛ, ehi jogbaŋŋ akɛ wɔɔgba amɛ niiashikpamɔi ni yɔɔ miishɛɛ ni wɔná yɛ shiɛmɔ nitsumɔ lɛ mli lɛ. Ebiii ni wɔmɛ ni wɔná niiashikpamɔi ni nɔ bɛ dani wɔgba amɛ. Ekolɛ wɔnyɛ wɔha mɔ ko ná Maŋtsɛyeli shɛɛ sane lɛ he miishɛɛ kɛtsɔ hiɛkpamɔ wiemɔ ko ni mɔɔ shi ni wɔkɛtsu nii loo gbɛ ni wɔtsɔ nɔ wɔkɛ lɛ susu nii ahe lɛ nɔ. Ekolɛ wɔkɛ shĩatsɛ ko susu ŋmalɛ ko ni wɔhala lɛ he, ni sanegbaa lɛ mɔ shi jogbaŋŋ. Aloo ekolɛ mɛi ni yɔɔ akutso lɛ mli lɛ yɔse akɛ wɔji Yehowa Odasefoi, ni enɛ sɔŋŋ po fee odaseyeli kɛha amɛ. Niiashikpamɔi ni tamɔ nɛkɛ ni wɔgbaa nyɛmimɛi lɛ ji gbɛ kome ni wɔtsɔɔ nɔ wɔkɛ amɛ feɔ ekome kɛnáa miishɛɛ.

Yehowa webii lɛ ateŋ mɛi babaoo kɛ amɛhe shã afɔle kɛtsu shiɛmɔ nitsumɔ lɛ, ni mɛi babaoo miifee nakai lolo ŋmɛnɛ. Gbɛgbalɔi, nɔkwɛlɔi gbɛfalɔi, Betelbii, maŋsɛɛ sanekpakpa shiɛlɔi, kɛ majimaji ateŋ sɔɔlɔi kɛ amɛnyɛmɔ fɛɛ tsuɔ be fɛɛ sɔɔmɔ nitsumɔ lɛ, ni amɛnáa miishɛɛ yɛ enɛ feemɔ mli. Ani wɔkɛ amɛ feɔ ekome kɛnáa miishɛɛ? Belɛ, nyɛhaa wɔjiea hiɛsɔɔ kpo wɔtsɔa mɛi ni wɔsumɔɔ amɛ waa nɛɛ, ni ji ‘wɔnanemɛi nitsulɔi yɛ Nyɔŋmɔ maŋtsɛyeli lɛ hewɔ’ lɛ. (Kol. 4:11) Kɛ́ wɔkɛ amɛ tee asafoŋ kpeei loo Kristofoi akpeei wuji lɛ, wɔbaanyɛ wɔjɛ suɔmɔ mli wɔwo amɛ hewalɛ. Wɔbaanyɛ wɔkase ekãa ni amɛyɔɔ lɛ hu. Ni wɔbaanyɛ wɔtao “hegbɛ” kɛbo amɛniiashikpamɔi kɛ amɛwiemɔi ni tswaa mɔ emaa shi lɛ toi, kɛtsɔ gbɔ ni wɔɔfee amɛ lɛ nɔ, ekolɛ wɔbaanyɛ wɔkɛ amɛ afee ekome kɛye nii.—Fil. 4:10.

Okɛ Mɛi ni kɛ Jaramɔ Shihilɛi Kpeɔ lɛ Anyaa

Yiwai kɛ jaramɔ shihilɛi ni Paulo kpee naa lɛ waje lɛ ni etee nɔ eye Yehowa anɔkwa. (Kol. 1:24; Yak. 1:2, 3) Le ni ele akɛ nyɛmimɛi ni yɔɔ Filipi lɛ kɛ jaramɔ shihilɛi ni tamɔ nakai baakpe, ni bɔ ni emia ehiɛ kɛdamɔ enɔ lɛ naa lɛ baawo amɛ hewalɛ lɛ ha ená miishɛɛ, ni ekɛ amɛ fee ekome kɛná miishɛɛ. No hewɔ lɛ, eŋma akɛ: “Nyɛ lɛ aduro nyɛ yɛ Kristo hewɔ, jeee enɔ hemɔkɛyeli kɛkɛ, shi moŋ akɛ nyɛna nɔ̃ yɛ ehewɔ hu: ni nakai ta kome lɛ nɔŋŋ ni nyɛna yɛ mihe ni agbɛnɛ nyɛnuɔ yɛ mihe hu lɛ mli nyɛyɔɔ nɛɛ.”—Fil. 1:29, 30.

Nakai nɔŋŋ ŋmɛnɛ lɛ, ateɔ shi awoɔ Kristofoi yɛ amɛshiɛmɔ nitsumɔ lɛ hewɔ. Bei komɛi lɛ, shiteekɛwoo nɛɛ baa kɛtsɔ yiwaa nɔ, shi bei pii lɛ ebaa yɛ gbɛ nigii nɔ. Ebaanyɛ efee wɔnaa ni hemɔkɛyeli kwalɔi folɔɔ, nyɛ̃ ni wɔwekumɛi nyɛ̃ɔ wɔ, wɔhe fɛo ni wɔnanemɛi nitsulɔi loo skulbii yeɔ. Yesu bɔ kɔkɔ akɛ esaaa akɛ jaramɔ shihilɛi nɛɛ feɔ wɔ naakpɛɛ, asaŋ esaaa akɛ wɔnijiaŋ jeɔ wui. Yɛ no najiaŋ lɛ, amɛji yiŋtoi ahewɔ ni esa akɛ wɔná miishɛɛ. Ekɛɛ akɛ: “Ajɔɔ nyɛ, kɛji ajɛ́ nyɛ ni awa nyɛ yi ni amale awie nyɛhe efɔŋ fɛɛ efɔŋ yɛ mihewɔ lɛ. Nyɛnyaa ni nyɛmli afilia nyɛ; shi nyɛnyɔmɔwoo fá yɛ ŋwɛi.”—Mat. 5:11, 12.

Kɛ́ wɔnu akɛ wɔnyɛmimɛi ni yɔɔ maji komɛi anɔ lɛ kɛ yiwai ni naa wa miikpe lɛ, esaaa akɛ wɔtsui fãa loo wɔsheɔ gbeyei. Yɛ no najiaŋ lɛ, esa akɛ wɔná miishɛɛ yɛ amɛhiɛ ni amɛmiaa kɛdamɔɔ naa lɛ hewɔ. Wɔbaanyɛ wɔsɔle wɔha amɛ, ni wɔbi Yehowa ni ewaje amɛhemɔkɛyeli lɛ ni eha amɛfi shi. (Fil. 1:3, 4) Eyɛ mli akɛ ekolɛ wɔnyɛŋ wɔfee nɔ ko tsɔ kɛye wɔbua wɔnyɛmimɛi ni wɔsumɔɔ amɛ nɛɛ moŋ, shi wɔbaanyɛ wɔye wɔbua mɛi ni kɛ wɔ yɔɔ asafo kome mli ni kɛ jaramɔ shihilɛi kpeɔ lɛ. Wɔbaanyɛ wɔfo amɛnɔ̃ mli, ni wɔye wɔbua amɛ. Wɔbaanyɛ wɔtao hegbɛi ni wɔkɛ amɛ afee ekome kɛná miishɛɛ kɛtsɔ nine ni wɔɔfɔ̃ amɛ yɛ be kɛ beaŋ ni amɛbafata wɔhe kɛfee wɔgbɛkɛ Weku Jamɔ lɛ, shiɛmɔ ni wɔkɛ amɛ aaaya, kɛ ekome ni wɔkɛ amɛ aaafee kɛjie wɔhiɛtserɛ lɛ nɔ.

Wɔyɛ yiŋtoi babaoo ahewɔ ni esa akɛ wɔkɛ nyɛmimɛi lɛ afee ekome kɛná miishɛɛ! Nyɛkahaa wɔtsea wɔhe taakɛ mɛi ni yɔɔ je lɛŋ lɛ feɔ lɛ, moŋ lɛ nyɛhaa wɔyaa nɔ wɔkɛ wɔnyɛmimɛi lɛ afea ekome kɛnáa miishɛɛ. Kɛ́ wɔfee nakai lɛ, wɔbaaha suɔmɔ kɛ ekomefeemɔ ahi asafo lɛ mli, ni wɔbaaná wɔ-Kristofoi anyɛmifeemɔ lɛ he sɛɛ kɛmɔ shi. (Fil. 2:1, 2) Hɛɛ, “nyɛmii ashɛa yɛ Nuŋtsɔ lɛ mli daa,” ejaakɛ Paulo woɔ wɔ hewalɛ akɛ: “Misaa miikɛɛ: Nyɛmii ashɛa!”—Fil. 4:4.

[He ni Mfoniri lɛ Jɛ ni yɔɔ baafa 6]

Globu: Courtesy of Replogle Globes