Ha lu Tabeñi Hamoho!

KU TAATA hahulu ku ba ni tabo ni nyakalalo. Batu ba bañata ku ba belanga taata ku bulelela ba bañwi lika ze nde. Batu ba ba pila mwa litolopo ze tuna ba ikutwanga buinosi mi ba ha ba latangi ku ina ni batu ba bañwi.

Caziba ya bizwa Alberto Oliverio naa bulezi kuli batu ba bañata ba ikutwanga buinosi kacenu ni kuli ku pila mwa litolopo ze tuna ku kona ku tahisa kuli ba bañwi ba ikutwange bulutu. Bulutu bu kona ku tahisa kuli ba si ke ba isa pilu ku be ba beleka ni bona, be ba yahile ni bona, kamba ba ba belekela mwa lintolo mo ba lekanga lika. Bulutu bo bu cwalo bu kona ku tisa kuli mutu a ciwe ki ndiulu.

Kono Bakreste ba na ni mubonelo o shutana. Muapositola Paulusi naa ñozi kuli: “Mu be ba ba tabile kamita.” (1 Mates. 5:16) Ku na ni mabaka a mañata ha lu swanela ku ba ni tabo ni ku taba hamoho ni mizwale ba luna. Lu lapela Jehova Mulimu ya li Muambakani ya Pahami; lwa utwisisa niti ya mwa Bibele; lu na ni sepo ya ku pila ku ya ku ile; mi lwa kona ku  tusa ba bañwi kuli ni bona ba fumane limbuyoti zeo.—Samu 106:4, 5; Jer. 15:16; Maro. 12:12.

Bakreste ba niti ba tabanga mi ba tabanga hamoho. Ki lona libaka Paulusi ha naa ñolezi Mafilipi kuli: “Ni ka taba, ni tabe ni mina kamukana. Mi ni mina mu ka taba cwalo, mu tabe ni na.” (Mafil. 2:17, 18) Mwa litimana feela ze peli zeo, Paulusi naa bulezi habeli ka za ku ba ni tabo ni ku taba hamoho.

Bakreste ba swanela ku tokomela kuli ba si ke ba ikambusa ku ba bañwi. Mutu ya ikambusa kwa mizwale ba hae ha koni ku taba hamoho ni bona. Paulusi u lu susueza ku zwelapili ku ba “ba ba tabile ku Mulena” hamoho ni mizwale ba luna. Lu kona cwañi ku eza cwalo?—Mafil. 3:1.

Lu Tabe Hamoho ni Mizwale ba Luna

Ku bonahala kuli Paulusi ha naa ñolezi Mafilipi liñolo, naa li mwa tolongo mwa Roma kabakala ku kutaza. (Mafil. 1:7; 4:22) Niha naa li mwa tolongo cwalo, naa tukufalezwi ku kutaza. Naa tabezi ku sebeleza Jehova ka mwa naa konela kaufela ni ku “sululwa sina mpo ye sululelwa fa sitabelo.” (Mafil. 2:17, NW) Moya wa naa na ni ona Paulusi u bonisa kuli lwa kona ku ba ni tabo ku si na taba ni muinelo o lu li ku ona. Niha naa li mwa tolongo, naa ize: “Ni ka na ni taba cwalo.”—Mafil. 1:18.

Paulusi naa tomile puteho ya Mafilipi mi naa lata hahulu mizwale ba mwa puteho yeo. Naa ziba kuli naa kona ku ba susueza ka ku ba bulelela za tabo ya naa na ni yona mwa sebelezo ya Jehova. Ki lona libaka ha naa ñozi kuli: “Banabahesu, ni lata kuli mu zibe kuli ze ni tahezi, ki zona ze tusize Evangeli ku i zwiseza pili. Mane ku zibahalile mwa ndu ya malena kaufela, kai ni kai, kuli ha ni li mwa mawenge ki kabakala Kreste.” (Mafil. 1:12, 13) Paulusi naa susuelize Mafilipi ha naa ba bulelezi taba yeo. Naa tabile hamoho ni mizwale ba hae ba mwa Filipi, mi ni bona ne ba tabile ni yena. Mafilipi ne ba lukela ku hupula mabaka ha ne ba tokwa ku ba ni tabo mi ne ba sa swaneli ku zwafa kabakala ku tamiwa kwa Paulusi. Ne ba tokwa ku likanyisa moya wa hae. (Mafil. 1:14; 3:17) Mafilipi hape ne ba kona ku zwelapili ku lapelela Paulusi ni ku mu tusa ka mo ne ba konela kaufela.—Mafil. 1:19; 4:14-16.

Kana ni luna lu na ni moya wa tabo o swana ni wa naa na ni ona Paulusi? Kana lwa kona ku nahana lika ze nde ze ezahala mwa bupilo ni mwa bukombwa bwa luna? Ha lu li ni mizwale  ba luna lwa kona ku ikambota ka za lika ze nde ze lu ezize mwa bukombwa. Ha lu swaneli ku litela kuli konji ha ku ka ezahala nto ye ñwi ye tabisa hahulu mwa bukombwa kihona lu ka i kandekela ba bañwi. Ka mutala, mwendi mutu yo muñwi naa teelelize kwa litaba za Mubuso kabakala mo ne lu ambolezi ni yena. Mwendi ne lu ikambotile hande ni mutu yo muñwi ka za timana ye ñwi ya mwa Bibele. Kamba mwendi ha ne lu li mwa bukombwa batu ne ba lu lemuhile kuli lu Lipaki za Jehova, mi nto yeo ne i bile bupaki ku bona. Ku bulelela mizwale lika ze cwalo, ki ye ñwi ya linzila ze lu kona ku taba ka zona hamoho ni bona.

Batu ba Jehova ba bañata ba itombozi kuli ba kutaze taba ye nde, mi ni kacenu ba bañwi ba bañata ba sa eza cwalo. Mapaina, baokameli ba maeto, ba ba sebeleza fa Betele, balumiwa, ni ba ba sebeleza mwa linaha li sili, ba banga ni tabo ha ba nze ba sebeza ka taata mwa sebelezo ya bona ya nako kaufela. Kana lwa tabanga hamoho ni bona? Lwa kona ku bonisa kuli lwa itebuha musebezi wa bona ni kuli lu tabile ku sebeza hamoho ni bona ku za Mubuso wa Mulimu. (Makolo. 4:11) Lwa kona ku ba susueza ha lu li hamoho ni bona kwa mikopano ya puteho kamba kwa mikopano ya Sikreste ye mituna. Mi lwa kona ku nahana ka za tukufalelo ya bona ni ku ba likanyisa. Ha lu ba memela kwa sico, lwa kona ku fumana “sibaka” sa ku teeleza ha ba lu kandekela ze ezahezi mwa bupilo bwa bona ni ha ba lu bulelela manzwi a tiisa.—Mafil. 4:10.

Mu Tabe ni ba ba Talimana ni Miliko

Ku itiisa mwa manyando ni ku tula miliko ne ku tusize Paulusi kuli a tundamene ku sepahala ku Jehova. (Makolo. 1:24; Jak. 1:2, 3) Naa ziba kuli mwendi mizwale ba mwa Filipi ne ba ka talimana ni miliko ye swana. Naa tabile ku ziba kuli ka ku itiisa mwa miliko naa ka kona ku susueza mizwale ba hae. Ki lona libaka ha naa ñozi kuli: “Mu filwe sishemo kabakala Kreste, isi feela sishemo sa ku lumela ku yena, kono ni sa ku utwiswa butuku kabakala hae; mu nze mu na ni ndwa i liñwi ni ye mu boni ku na, ye mu utwa kuli i sa li teñi ku na.”—Mafil. 1:29, 30.

Ni kacenu Bakreste ba lwaniswanga kabakala musebezi wa bona wa ku kutaza. Fokuñwi ba lwaniswanga ka ku ezwa maswe. Kono hañata ba konwa ku lwaniswa ka ku tamelezwa litaba za buhata ki bakwenuheli, ku hanyezwa ki ba lubasi, kamba ku shubulwa ki be ba beleka ni bona kamba be ba kena ni bona sikolo. Jesu naa bulezi kuli ha lu swaneli ku komokiswa kamba ku zwafiswa ki miliko yeo. Kono lu swanela ku ba ba ba tabile ha lu talimana ni yona. Jesu naa ize: “Mu ka ba ni mbuyoti ha ba mi tapaula kabakala ka, ha ba mi nyandisa, ba mi tameleza bumaswe kamukana ka buhata. Mu wabelwe mi mu nyakalale, kakuli mupuzo wa mina ikaba o mutuna kwa lihalimu.”—Mat. 5:11, 12.

Ha lu swaneli ku saba ha lu utwa kuli mizwale ba luna mwa linaha ze ñwi ba nyandiswa maswe. Kono lu swanela ku wabelwa kabakala ku itiisa kwa bona. Lwa kona ku ba lapelela ku Jehova kuli a ba tuse ku zwelapili ku ba ni tumelo ye tiile ni ku itiisa. (Mafil. 1:3, 4) Mwendi yeo ki yona feela nto ye lu kona ku ezeza mizwale ba luna ba ba nyandiswa. Kono mwa puteho ya luna ku na ni mizwale ba ba talimana ni miliko ili be lu kona ku tusa. Lwa kona ku bonisa kuli lwa ba tokomela ka likezo za luna. Ka mutala, lwa kona ku taba hamoho ni bona ka ku ba kupa kuli lu kutaze hamoho ni bona kamba kuli ba to swalisana ni luna ka Nako ya ku Lapela Sina Lubasi kamba ku itabisa hamoho ni bona.

Lu na ni mabaka a mañata ha lu swanela ku taba hamoho! Lu tokolomoheñi moya wa lifasi le wa ku ikambusa ku ba bañwi kono lu zweleñipili ku taba hamoho ni mizwale ba luna. Ha lu eza cwalo, lu ka tusa kuli mwa puteho ku be ni kozo ni swalisano. Mi lu ka ikola ku swalisana hamoho ni mizwale ba luna ba Sikreste. (Mafil. 2:1, 2) Paulusi u lu susueza cwana, u li: “Mu be ba ba tabile kamita ku Mulena; hape ni kutela ni li: Mu be ba ba tabile.”—Mafil. 4:4.

[Manzwi a bañi ba siswaniso fa likepe 6]

Globe: Courtesy of Replogle Globes