Kia Rekareka Kapiti Tatou!

E NGATA tikai kia mataora e kia rekareka. E ngata ana i te manganui i te akakite i to ratou manako ki tetai e tetai. Te akatupu ra te oraanga o teia tuatau i te au tangata kia kore e piri atu ki tetai e tetai e kia akatakake ia ratou uaorai, i roto tikai i te au oire mamaata.

“E mea matauia te kite i te tu maromaroa,” i karanga ai te Poropeta no te Apiianga Manako, ko Alberto Oliverio, e “kare ekoko e ka riro te oraanga i roto i te au oire mamaata i te akakeu i te tu akatakake. I roto i te au turanga e manganui, ka akariro te reira ia tatou kia kore e manako atu i te oraanga o tetai oa angaanga opati, tangata tupu, me kore te tangata tiaki toa mamaata.” E akatupu ana te akatakake anga i te manako taitaia.

Inara, tuke te turanga e te tu o te au taeake Kerititiano. Kua tata te apotetoro ko Paulo e: “Auraka e tukutuku i te rekareka.” (1 Tesa. 5:16) E maata te au tumu kia mataora e kia rekareka kapiti tatou. Te akamori ra tatou i te Atua Teitei Rava, ko Iehova; kua marama tatou i te karere tuatua mou o te Pipiria; tei ia tatou te manakonakoanga no te ora e te oraanga mutu kore; e ka  rauka katoa ia tatou i te tauturu i tetai ke kia rauka mai taua au akameitakianga ra.​—Sala. 106:4, 5; Iere. 15:16; Roma 12:12.

Te mataora anga e te akakite anga i toou rekareka, e tu ia no te au Kerititiano mou. No reira kare tatou e poitirere e kua tata a Paulo ki to Philipi e: “E rekareka ïa au, ko tatou katoa te ka rekareka i reira. E na reira kotou i te rekareka, kotou e ko au katoa i te rekareka anga.” (Phili. 2:17, 18) I roto i teia au tuatua, e a taime te tuatua mai anga a Paulo no runga i te rekareka ma tetai e tetai.

Ae, te anoanoia ra te au Kerititiano kia kopae i tetai ua atu tu te ka akatakake ia ratou uaorai. Kare tetai tei akatakake iaia uaorai e rekareka i tetai pirianga ma te au taeake irinaki. No reira, akapeea tatou me aru i ta Paulo akoanga ‘kia rekareka i te Atu’ ma to tatou au taeake?​—Phili. 3:1.

Rekareka Kapiti ma te Au Taeake Irinaki

Te tata anga a Paulo i tana reta ki to Philipi, penei e mouauri aia i Roma no tana au angaanga tutu anga. (Phili. 1:7; 4:22) Inara, kare tona tapekaia anga i akaparuparu ana i tona tu maroiroi no te angaanga orometua. Kua rekareka ra aia i te tavini pu tikai ia Iehova ‘e kia akamaringi i tona toto ki rungao i te atinga apai.’ (Phili. 2:17) Te akaari maira to Paulo tu e kare te rekareka i akatumuia ki runga i to tetai uaorai turanga. Noatu kua tapekaia aia, kua tuatua aia e: “E rekareka rai oki au.”​—Phili. 1:18.

Kua akanoo a Paulo i te putuputuanga i Philipi e kua kite aia i tona inangaro tikai no tona au taeake. Kua kite aia e na te akakite anga i tona rekareka tei rauka mai no te tavini anga ia Iehova, ka riro ei akamaroiroi anga ia ratou. No reira, kua tata aia e: “Te inangaro nei ra au, e te au taeake, kia kite kotou e, kua riro te au mea i rokoia mai ei au nei ei akatupu i te evangelia nei; E kua kitea oki toku nei tapeka angaia i te Mesia nei e kako rava ake te are ariki, e te au ngai katoa nei.” (Phili. 1:12, 13) Na te akakite anga i teia tupuanga akamaroiroianga, i rekareka kapiti ei a Paulo ma tona au taeake. Papu e kua rekareka kapiti a Paulo e te au taeake i Philipi. Na te rave anga i te reira, kare ratou e taitaia i ta Paulo e na roto ra. Mari ra, kia aru ratou i tona akaraanga. (Phili. 1:14; 3:17) Pera katoa, ka taiku ua rai to Philipi ia Paulo i roto i ta ratou pure e te oronga anga i te tauturu e te akamaroiroi anga kiaia i te ka rauka ia ratou.​—Phili. 1:19; 4:14-16.

Te akaari ra ainei tatou i taua tu rekareka mei ia Paulo rai? Te akara ra ainei tatou i te au turanga papu o to tatou oraanga e ta tatou angaanga  Kerititiano? Me kapiti tatou ki to tatou au taeake, e mea meitaki kia pukapuka rekareka no runga i te angaanga tutuanga. Kare tatou e tiaki roa kia tupu mai tetai tupuanga umere e rave ei tatou i teia. Penei kua akakeu ana tatou i te inangaro no te karere o te Patireia na roto i tetai tuatua akamataanga me kore uriurianga meitaki. Penei kua pukapuka meitaki ana tatou ki tetai tangata ngutuare no runga i tetai irava Pipiria. Me kore kua kiteaia mai tatou i te ngai tutuanga ei Au Kite no Iehova, e kua riro teia ei akakitekite anga meitaki. Na te akakite anga i taua au tupuanga ra, ko tetai mataara ia e rekareka kapiti ei tatou.

Kua rave ana e te rave nei rai te maataanga o te iti tangata o Iehova i te au akaatinga anga kia raveia te angaanga tutuanga. Te oronga maata nei te au painia, au akaaere tutaka, aronga i Betela, au mitinari, e te au tavini i te pa enua ia ratou uaorai i roto i te angaanga tamou e te rekareka ra ratou i te rave i te reira. Te rekareka kapiti ra ainei tatou kia ratou? No reira, e akaari atu i to tatou tu rekareka no teia au taeake ‘rave angaanga akaperepere no te basileia o te Atua.’ (Kolo. 4:11) Me taokotai tatou i ko i te au uipaanga putuputuanga me kore te au akaputuputuanga Kerititiano, e akamaroiroi pumaana atu tatou ia ratou. Ka rauka katoa ia tatou i te aru i to ratou akaraanga maroiroi. Ka rauka ia tatou i te akatupu i tetai “ravenga” kia akarongo ki to ratou au tupuanga e te au tuatua akamaroiroi anga, na te akaari anga i te tu takinga meitaki, penei kia kaikai kapiti atu kia ratou.​—Phili. 4:10.

Rekareka Kapiti e te Aronga e na Roto ra i te Au Timataanga

Na te akakoromaki anga i te takinokino anga e te autu anga i te au timataanga, i akaketaketaia ai a Paulo kia vai tiratiratu kia Iehova. (Kolo. 1:24; Iako. 1:2, 3) Te kite anga e ka na roto te au taeake i Philipi i taua au timataanga ra, e ka akamaroiroiia ratou e tona tu akakoromaki, i rekareka kapiti ei aia e ratou. No reira, kua tata aia e: “E mea orongaia mai oki ia kotou ia Iesu Mesia nei, to kotou mate iaia ra, auraka te akarongo anake ua ra: E tei ia kotou oki taua mate ta kotou i kite iaku ra, ta kotou i akarongo ra e te vai nei oki iaku nei.”​—Phili. 1:29, 30.

Pera katoa i teia tuatau, te patoiia maira te au Kerititiano no ta ratou angaanga orometua. Tetai taime e kino ana teia patoi anga, maata ra te taime e na roto ana i te tu kikite. Penei ka na roto mai i te akaapa anga pikikaa a te au apoteiti, takinokino anga a te au mema pamiri, e te aviri anga a te au oa angaanga me kore au oa apii. Kua akamatakite mai a Iesu e auraka tatou e poitirere me kore e taitaia i teia au timataanga. Mari ra, e tumu anga te reira no te rekareka. Kua tuatua aia e: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei: E rekareka kotou, e kia rere ua i te rekareka; e tutaki maata oki ta kotou i te ao [me kore, i te rangi] ra.”​—Mata. 5:11, 12.

Kare tatou e mataku me akarongo tatou e te na roto ra to tatou au taeake i te takinokino anga pakari i tetai au enua. Mari ra, kia rekareka tatou no to ratou tu akakoromaki. E pure tatou no ratou, te pati anga kia Iehova kia akaketaketa i to ratou akarongo e kia akakoromaki. (Phili. 1:3, 4) Noatu kare e maata ta tatou ka rauka i te tauturu atu i te reira au taeake akaperepere, e tauturu atu tatou i te aronga i roto i to tatou uaorai au putuputuanga te na roto ra i te au timataanga. E akaari atu e te manako ra tatou ia ratou e kia turuturu ia ratou. E kimi tatou i te au atianga kia kapiti rekareka kia ratou na te pati anga ia ratou kia piri mai ki ta tatou Akamorianga a te Ngutuare i te aiai, te piri anga kia ratou i roto i te angaanga tutuanga, e te kapiti anga kia ratou i roto i te tamataoraanga.

E maata te au tumu ka kapiti rekareka ai tatou! E kopae tatou i te tu akatakake anga o teianei ao e kia rekareka kapiti e to tatou au taeake. Na te rave anga i teia, ka maata atu te aroa e te taokotaianga o te putuputuanga, e ka rekareka pu tikai tatou i te taokotaianga taeake Kerititiano. (Phili. 2:1, 2) Ae, te raurau maira a Paulo ia tatou e: “E rekareka i te Atu ra, aua e tivata, e te tuatua akaou atu nei au, Kia rekareka rai kotou.”​—Phili. 4:4.

[Akameitakianga no te Tutu i te kapi 6]

Globe: Courtesy of Replogle Globes