Guiechenenu xcaadxi binni

RA ZIDIʼDIʼ dxi jma ziyaca nagana para guibani binni galán ne chuʼ nayecheʼ. Raca nagana para stale binni guidxela cosa galán gabi sti binni. Modo nabani binni ndaaniʼ stale guidxi roʼ zanda gucaani laacaʼ guni sentircaʼ nuucaʼ stúbicaʼ, ne guiníʼ íquecaʼ qué zanda guidxaagacaʼ stobi.

Ti profesor de Psicobiología ni láʼ Alberto Oliverio guníʼ: «Nabé maʼ stale binni runi sentir nuu stubi ndaaniʼ ca guidxi roʼ ca. Cumu zacá nuucabe la? maʼ huaxiéʼ rizaaláʼdxicabe ca binni runinécabe dxiiñaʼ, xpecínucabe, cani runi dxiiñaʼ ndaaniʼ luguiaa o ra tienda ra risícabe». Stale de ca binni ni runi zacá raca huaracaʼ de depresión.

Peru laanu, ca xpinni Cristu, maʼ gadxé modo nabáninu, nga runi, qué rúninu casi runi ca binni ca. Apóstol Pablu cayabi laanu: «Cadi usaana tu de guieche tu» (1 Tes. 5:16). Nápanu stale razón para chuʼnu nayecheʼ ne para guiechenenu ca bíʼchinu ne ca bizáʼnanu. Cayuni adorarnu Jiobá, Dios ni jma nandxóʼ, riénenu ni rusiidibe laanu lu Biblia, runi crenu zulabe laanu ne zudiibe laanu guendanabani  ni qué zaluxe, ne laaca nuunu nayecheʼ purtiʼ zanda gacanenu xcaadxi binni guicaa ca ndaayaʼ ni nápanu (Sal. 106:4, 5; Jer. 15:16; Rom. 12:12).

Tobi de ca cosa ni rusihuinni xpinni Cristu laanu nga nuunu nayecheʼ ne riechenenu xcaadxi binni. Nga runi, qué ridxagayaadinu ni gudxi Pablu ca xpinni Cristu de Filipos: «Ti guieche nu tobi si. Purti racaladxe guieche tu, ne laatu, cadi naa siaʼ» (Fili. 2:17, 18). Lu guiropaʼ versículo riʼ, bizeeteʼ Pablu chuʼnu nayecheʼ ne guiechenenu ca bíʼchinu ne ca bizáʼnanu.

Ti xpinni Cristu naquiiñeʼ gapa laa para cadi guixeleʼ de xcaadxi binni, purtiʼ pa gúnibe zacá, maʼ qué zanda chuʼbe nayecheʼ né ca xpinni Cristu. Pablu bidii conseju riʼ: «Lauyubi enda nayeche ra nuu Señor» (Fili. 3:1). Ximodo zanda gúninu ni na conseju riʼ yaʼ.

Guiechenenu ca xpinni Cristu

Dxi bicaa Pablu carta stiʼ ra nuu ca Filipenses, zándaca nuseguyoocabe laabe Roma pur rucheechebe diidxaʼ (Fili. 1:7; 4:22). Peru neca deguyoobe, qué nusaana de nucheechebe diidxaʼ né stale gana. Laabe guyuube nayecheʼ purtiʼ caquiiñebe guendanabani stibe «casi ti ofrenda» para Dios (Fili. 2:17). Ejemplu stiʼ Pablu rusiidiʼ laanu ti cosa: cadi ora si nabani binni galán nga riuu nayecheʼ, purtiʼ neca deguyoobe guniʼbe: «Qué ziaana dxie de guiecheʼ» (Fili. 1:18).

Pablu gucané para bizulú ti neza binni ridagulisaa Filipos ne nabé nadxiibe ca binni que. Ne nánnabe zaguube gana ca binni que ora güínebe laacaʼ pabiáʼ nayecheʼ nuube ra cayúnibe xhiiñaʼ Jiobá. Ngue runi, bicaabe ca diidxaʼ riʼ ra nuucaʼ: «Racaladxe ganna tu, cadi cucueeza irá ni cazaaca ri de ireeche stiidxa Cristu, sínuque laga cayacané ni para ireeche ni jma. Purti ma nanna irá ca dxu ni rapa ralidxi rey yeguayuaa purti rune xhiiña Cristu» (Fili. 1:12, 13). Ora gudxi apóstol riʼ laacabe ni bizaaca, laaca cayacané laacabe para chúʼcabe nayecheʼ. Ne nánnanu biechené ca filipenses laabe. Peru bíʼnicabe stipa para cadi chúʼcabe triste pur modo nuu Pablu ne jma gucuá íquecabe chinándacabe ejemplu stibe (Fili. 1:14; 3:17). Neca deguyoo Pablu, zanda guni orárcabe pur laabe ne guseendacabe biaʼ nuu lu nácabe para gacanécabe laabe (Fili. 1:19; 4:14-16).

Ñee laaca nuunu nayecheʼ cásica Pablu la? Ñee zanda guiníʼ íquenu lu ca cosa galán ni rizaacanu ora rucheechenu diidxaʼ ne lu xquendanabáninu la? Ora maʼ nuunu ra nuu ca xpinni Cristu, galán güínenu laacaʼ de ca cosa sicarú ni bisiecheʼ laanu ora yegucheechenu diidxaʼ. Cadi caquiiñepeʼ cuézanu dede ora guizaacanu xiixa ni gucaa laacabe guidxagayaacabe  para güínenu ni laacabe. Zanda gábinu laacabe xi guninu para guyuulaʼdxiʼ tuuxa gucaadiaga laanu o ximodo bisiénenu xiixa ora bicheechenu diidxaʼ. Laaca zanda gábinu laacabe pabiáʼ galán modo guninenu tuuxa de ti versículo stiʼ Biblia. Laaca zanda guzéʼtenu ximodo bidii binni cuenta testigu stiʼ Jiobá laanu ora zigucheechenu diidxaʼ. Cada biaje guininu de cani bizéʼtenu ca, cayechenenu ca xpinni Cristu.

Stale xpinni Cristu nabé rúnicaʼ stipa para gucheechecaʼ diidxaʼ neca gácani nagana para laacaʼ. Ca precursor, ca binnigola ni riganna ca neza binni ridagulisaa, ca betelita, ca misioneru ne cani riguni xhiiñaʼ Dios sti guidxi roʼ, rúnicabe ni nabe de guidubi ladxidóʼcabe, ne rúnicabe ni né stale guendanayecheʼ. Ñee riechenenu laacabe purtiʼ cayacanécabe para gusíʼdinu «binni modo runi mandar Dios» la? (Col. 4:11.) Pa zacá ni la? naquiiñeʼ gusihuínninu pabiáʼ rudiʼnu xquíxepeʼ laacabe pur dxiiñaʼ ni cayúnicabe. Ora maʼ nuunenu laacabe ra Yoo stiʼ Reinu o ra raca ti guendaridagulisaa roʼ, zanda gábinu laacabe xiixa ni uguu gana laacabe. Laaca galán guiníʼ íquenu modo rúnicabe ni na Dios de guidubi ladxidóʼcabe, chinándanu ejemplu stícabe, ne cueenu ti tiempu para gucaadiáganu guiráʼ ni huadíʼdicabe purtiʼ zaguucani gana laanu, o dede zándapeca guni invitarnu laacabe ti guendaró (Fili. 4:10).

Guiechenenu cani cadiʼdiʼ lu xiixa guendanagana

Pablu biʼniʼ huantar ora guzanándacabe laa ne ora gudiʼdiʼ lu xcaadxi guendanagana, ne gucanécani laabe para quixhe íquebe cadi guixélebe de Jiobá (Col. 1:24; Sant. 1:2, 3). Ne laaca nabé nayecheʼ guyuube purtiʼ nánnabe zacané ejemplu stibe ca xpinni Cristu de Filipos, purtiʼ laaca zadxagalucaʼ guendanagana cásica ni bidxaagalube. Cumu cayechenebe laacaʼ la? bicaabe ca diidxaʼ riʼ ra nuucaʼ: «Dichoso de laatu purti cadi cayuni cre si tu Cristu, sínuque ne cayacaná tu pur laa. Ma nuu né tu naa tobi si lu enda naná ni cadide riʼ. Ma biiya tu irá ni udide pur Cristu chiqué, ne cadide ruaʼ ni de yanna» (Fili. 1:29, 30).

Yanna riʼ, laaca nuu xpinni Cristu rucaalúcabe laacaʼ pur rucheechecaʼ stiidxaʼ Reinu. Nuu biaje runinapeʼ binni laacabe, peru jma stale biaje rucaalú binni laacabe de sti modo. Nuu tiru, cani maʼ bidxiideche Dios riniʼcaʼ ni cadi dxandíʼ de laacabe, ridxiichiné ca binnilídxicabe laacabe o runi burla cani runinécabe dxiiñaʼ ne cani rinécabe scuela laacabe. Jesús guníʼ cadi naquiiñeʼ guidxagayaanu ne cadi guireʼnu gana ora guni binni zacá, sínuque guidúʼyanu cani casi razón para chuʼnu nayecheʼ. Laabe guniʼbe: «Ne dichoso laatu ora rulaa binni diidxa laatu, ne riladxi ca laatu ne ribee ca falsu luguiá tu purti xpinne laatu. Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ» (Mat. 5:11, 12).

Ora gánnanu canazanándacabe ca xpinni Cristu ndaaniʼ xcaadxi guidxi, cadi naquiiñeʼ guidxíbinu ne cadi chuʼnu xizaa, sínuque naquiiñeʼ chuʼnu nayecheʼ purtiʼ cadi cusaanacabe xquidxi Dios, ne guinábanu Jiobá guquidxi fe stícabe ne gacané laacabe guni huantárcabe (Fili. 1:3, 4). Zándaca ngasi nga ni zanda gúninu pur ca xpinni Cristu ni canazanándacabe laacaʼ, peru lade ca binni ridagulisaa ra nuunu la? zanda gacanenu guiráʼ cani cadiʼdiʼ ra nagana. Galán gusihuínninu rizaaláʼdxinu laacabe ne gacanenu laacabe. Laaca galán guyúbinu xcaadxi modo guiechenenu laacabe. Zanda guni invitarnu laacabe neca ti lade para chécabe ralídxinu gueelaʼ runi adorarnu Dios né binnilídxinu, para gucheechenenu laacabe diidxaʼ o para chuʼnu nayecheʼ ti ratu.

Nápanu stale razón para chuʼnu nayecheʼ né xcaadxi binni. Cadi gúninu casi runi stale binni ne guixélenu de ca xpinni Cristu, sínuque naquiiñeʼ chuʼnu nayecheʼ né laacabe. Pa gúninu zacá la? zacanenu gannaxhiisaa ca xpinni Cristu ne chuʼcaʼ tobi si, ne laaca ziuuláʼdxinu chuʼnu lade ca bíʼchinu ne ca bizáʼnanu (Fili. 2:1, 2). Qué chuʼ dxi guiaandaʼ laanu conseju bidii Pablu riʼ: «Laguieche irá dxi purti xpinni Señor laatu. Ne sti tiru rabe laatu, laguiecheʼ» (Fili. 4:4).

[Paraa gucuaacabe dibuju o foto ni zeeda lu yaza 6]

Globo terráqueo: ni bidii Replogle Globes