?Amun ɲin su yiyilɛ wafa’n ti kpa?
?Amun ɲin su yiyilɛ wafa’n ti kpa?
“An mian amun nyin an yo sa ng’ɔ yo e Min’n i fɛ’n.”—EFƐ. 5:10.
1, 2. (a) ?Wafa sɛ yɛ Ɲanmiɛn Ndɛ’n kle kɛ Zoova klo kɛ e di fɛ ɔ? (b) ?Kɛ mɔ blɛ nga e fa yiyi e ɲin su’n, ɔ o ninnge nga Ɲanmiɛn fa man e’n, be nun wie’n ti’n, ngue yɛ ɔ fata kɛ e fa blɛ sɔ’n, e yo ɔ?
KƐ Ɔ fɛ i Biblu’n i bobolɛ nun lele m’ɔ́ fá jú i awieliɛ’n, e wun ndɛ wie mɔ be kle kɛ Zoova kunndɛman kɛ e tran nguan nun sa ngbɛn ɔn. Ɔ kunndɛ kɛ e di fɛ wie. I wie yɛle kɛ Jue Mun 104:14,15 kan Zoova i ndɛ se kɛ: “Wɔ maan be nyan ninnge be fie’m be su di. Wɔ maan be nyan nzan b’ɔ maan be wun nyrɛn be nin-ɔn. A man be nyanngo b’ɔ maan be nyrun’n yo mlanmlan nin-ɔn, ɔ nin aliɛ bɔ be fa tra be anwlɛn nin-ɔn.” Ninnge kwlaa nga e ko fa ko ta e wun naan y’a tran nguan nun’n, Zoova yɛ ɔ fa be man e ɔ. Ɔ yo maan fie’m be su ninnge’m be su mma. Yɛ ɔ yo maan e ɲan ngo nin nzan. Nán kɛ sran’m b’a nɔnman nzan’n ti yɛ bé wú ɔ. Sanngɛ nzan kusu “maan be wun nyrɛn be.” (Aku. 9:7; 10:19) Nanwlɛ Zoova klo kɛ e di aklunjuɛ. Ɔ klo kɛ e “klun jɔ” leleele.—Yol. 14:16, 17.
2 Ɔ maan, sɛ e fa blɛ kan e ko “nian anunman’m bɔ be tu sin’n,” nin “waka nyrɛ bɔ be o blo lɔ’n,” ɔ timan tɛ. Ninnge kɛ ngalɛ sa’m be yolɛ’n kwla man e wunmiɛn yɛ ɔ kwla yo naan y’a wun e wun fɛ kpa ekun. (Mat. 6:26, 28; Jue. 8:4, 5) Kɛ sran kun i wun kpɛjɛ i mɔ kusu ɔ di aklunjuɛ’n, “Nyanmiɛn yɛ ɔ fɛ i sɔ’n mɛn i-ɔ.” (Aku. 3:12, 13) Blɛ nga e fa yiyi e ɲin su’n, ɔ o ninnge nga Ɲanmiɛn fa man e’n, be nun wie. I sɔ’n ti’n, maan e fa blɛ sɔ’n e yo like ng’ɔ jɔ Ɲanmiɛn klun’n.
Maan e fa ajalɛ kpa e ɲin su yiyilɛ’n nun
3. ?Ngue ti yɛ sran’m be kwlaa be faman like kunngba’n be yiyiman be ɲin su ɔ?
3 Be nga be si be ɲin su yiyi’n, be si kɛ like nga be kwla fa yiyi be ɲin su’n, ɔ sɔnnin. Sanngɛ nán i ngba yɛ ɔ ti kpa ɔ. ?Ngue ti yɛ sran’m be kwlaa be faman like kunngba’n be yiyiman be ɲin su ɔ? Kɛ ɔ ko yo naan y’a wun i wlɛ’n, maan e fa e ɲin su yiyilɛ’n, e sunnzun aliɛ. Nán aliɛ kunngba’n yɛ sran’m be klo i dilɛ lika kwlaa ɔ. Yɛle kɛ aliɛ ng’ɔ yo sran’m be fɛ kpa lika kun nun’n, lika uflɛ nun’n, ɔ yoman sran’m be fɛ. I kunngba’n, like nga lika kun nun Klistfuɛ’m be klo i yolɛ be ɲin su yiyilɛ nun’n, ɔ kwla yo lika uflɛ nun Klistfuɛ’m be paloo sa. I kpa bɔbɔ’n, Klistfuɛ nga be tran lika kunngba nun’n, ɔ le kun nin i ɲin su yiyilɛ like m’ɔ klo i ɔ. I wie yɛle kɛ be nun kun kwla kanngan fluwa kpa wie nun fa yiyi i ɲin su. Sanngɛ i niaan uflɛ kwla bu i aɲrunkoun like. Be nun uflɛ kwla klo ale tolɛ i kpa. Sanngɛ i niaan uflɛ kwla bu i be wun yalɛ klelɛ like. Wafa kunngba nga sran kun i aliɛ ng’ɔ klo i’n yɛ ɔ di’n, sran kun i like ng’ɔ klo i’n yɛ ɔ fa yiyi i ɲin su kusu ɔ.—Rɔm. 14:2-4.
4. ?Ngue ti yɛ ɔ fata kɛ e kpa ninnge nga e kwla fa yiyi e ɲin su’n be nun ɔn?
4 Kannzɛ bɔbɔ ninnge nga e kwla fa yiyi e ɲin su be ti fanunfanun’n, nán i sɔ’n ti yɛ é fɛ́ i ngba nga e konvi’n kɔ su niɔn. Kɛ ɔ ko yo naan y’a wun i wlɛ’n, maan e fa aliɛ’n i sunnzun ase ekun e nian. E kwla klo aliɛ fanunfanun. Sanngɛ nɛ́n i sɔ’n ti yɛ é kó dí ng’ɔ ti saciwa’n niɔn. Afin i sɔ yolɛ’n nin i fataman, yɛ ɔ kwla man e tukpacɛ. I kunngba’n, e kwla klo e ɲin su yiyilɛ ninnge fanunfanun. Sanngɛ e ɲin su yiyilɛ ninnge nga be yo sran’m be kpokokpoko nun annzɛ m’ɔ fa e sie i wie nuan’n, e su yoman wie. Afin ninnge sɔ’m be yolɛ’n nin Biblu’n nun mmla’m be kɔman likawlɛ. Be kwla yo maan e nin Zoova e afiɛn’n saci. Kɛ ɔ ko yo naan y’a fɔnman Zoova i mmla mun’n, ɔ ti mɔ e bu akunndan. Yɛle kɛ kannzɛ bɔbɔ e konvi o be ɲin su yiyilɛ wafa wie su’n, maan e nian nun kpa sɛ ɔ ti kpa o. (Efɛ. 5:10) ?Ngue yɛ ɔ kwla uka e i sɔ’n liɛ’n nun ɔn?
5. ?É yó sɛ naan y’a si kɛ e ɲin su yiyilɛ wafa’n ɔ nin Ɲanmiɛn i mmla’m be kɔ likawlɛ?
5 Kɛ ɔ ko yo naan e ɲin su yiyilɛ wafa kun w’a yo e wun sa ye naan w’a jɔ Zoova klun’n, ɔ fata kɛ ɔ nin Ɲanmiɛn Ndɛ’n be ɔ likawlɛ. (Jue. 86:11) Sɛ e waan é fá ajalɛ kpa e ɲin su yiyilɛ nun’n, maan e bu kosan nsan akunndan. Be yɛ: ?Like benin yɛ n fa yiyi min ɲin su ɔ? ?I yolɛ nun’n, dɔ nɲɛ yɛ n di ɔ? ?Yɛ wan mun yɛ e nin be e yiyi e ɲin su likawlɛ ɔ? Maan e tɛ be su kunngunngun.
?Like benin yɛ n fa yiyi min ɲin su ɔ?
6. ?Ninnge benin yɛ ɔ fataman kɛ e fa yiyi e ɲin su le ɔ? ?Yɛ ngue ti ɔ?
6 Kwlaa naan y’a fa e wun y’a wla be ɲin su yiyilɛ wafa kun nun’n, kosan klikli ng’ɔ fata kɛ e fa usa e wun’n yɛ: ‘?Like benin yɛ n konvi’n o su kɛ ń fá yíyí min ɲin su ɔ?’ Maan ɔ tran e klun kɛ be ɲin su yiyilɛ’n ti wafa nɲɔn. I kliklifuɛ’n, ɔ fɔn Biblu’n nun mmla’n. I yɛ e wun i mɛn tɛ nga nun kpɛ sunman ɔn. (1 Zan 5:19) Be ɲin su yiyilɛ sɔ’m be nun’n, be yi ninnge kɛ nzaje sa yolɛ annzɛ bae dilɛ annzɛ be wiengu yasua annzɛ bla kunndɛlɛ annzɛ bian nin bla nna nga be fa fite nzra nun’n, annzɛ sran’m be kpokokpoko yolɛ’n be nglo. Ninnge kɛ ngalɛ sa mun’n, Klistfuɛ’m be su fa yiyiman be ɲin su mlɔnmlɔn. (1 Kor. 6:9, 10; an kanngan Sa Nglo Yilɛ 21:8 nun.) Ɔ maan, ɔ leman kɛ e o lika nga sa ti’n, é yó i sɔ ninnge mun. Afin e waan é klé Zoova kɛ ‘e kpɔ sa tɛ’n naan e nianman.’ (Rɔm. 12:9; 1 Zan 1:5, 6) Sanngɛ be ɲin su yiyilɛ i nɲɔn sufuɛ’n, atrɛkpa’n, é fá e wun wlá nun.
7, 8. ?Ngue yɛ é yó naan y’a wun i kɛ be ɲin su yiyilɛ ngowa kun ti kpa ɔ? An fa sunnzun ase kun yiyi nun.
7 Kwlaa naan y’a fa e wun y’a wla be ɲin su yiyilɛ i nɲɔn sufuɛ’n i nun’n, ɔ fata kɛ e tran e bu akunndan kpa. Wie nun ɔn, Biblu’n w’a kanman be ɲin su yiyilɛ wafa sɔ’m be ndɛ weinwein sa. Sanngɛ akunndan nga ɔ o Biblu’n nun mmla’m be sin’n, ɔ kwla uka e naan y’a wun like nga ɔ ti kpa annzɛ ɔ ti tɛ Zoova ɲrun’n. I sɔ’n ti’n, kwlaa naan y’a se kɛ é fá e wun wlá be ɲin su yiyilɛ wafa sɔ’m be nun’n, ɔ fata kɛ e nian nun kpa sɛ be nin akunndan ng’ɔ o Biblu’n nun mmla’m be sin’n be kɔ likawlɛ o. (Nya. 4:10, 11) Kpɛkun maan e fa ajalɛ ng’ɔ su yoman naan e klun w’a titi e kasiɛn su’n. (Gal. 6:5; 1 Tim. 1:19) ?Wafa sɛ yɛ é yó naan y’a fa ajalɛ kpa ɔ? Maan e se kɛ wie nun ɔn, b’a tɔn aliɛ kun mɔ e simɛn i’n, b’a man e. Kwlaa naan y’a di aliɛ sɔ’n, é dún mmua úsa like nga be fa tɔnnin’n. ?Nɛ́n i ɔ? I sɔ kunngba’n, kwlaa naan y’a fa e wun y’a wlɛ i be ɲin su yiyilɛ wafa kun nun’n, ɔ ti mɔ e usausa nun kpa.—Efɛ. 5:17.
8 Atrɛkpa’n, e klo be wun kpinngbinlɛ ngowa mun. I yo, sran sunman be klo i sɔ ninnge mun, afin be yo fɛ. Kpɛkun be yo maan sran wun fɛ i feke. Sanngɛ be wun kpinngbinlɛ ngowa wie mɔ akplowa silɛ o nun’n, akatua’n i ɲanlɛ’n ti’n, be kwla yo nzaje sa mun, annzɛ be yo be wiengu like yaya annzɛ be fa be wiengu nguan’n be sie i wie nuan. Wie mun ekun be nun’n, be yo sinnzin ninnge kekleekle’m be fa kle kɛ be klun ti jɔwa. Annzɛ kusu akatua mɔ b’a ɲɛn i’n ti’n, be kwla bu i kɛ be nvle’n i kpa tra be wiengu liɛ’n. ?Sɛ i sɔ ninnge tɛtɛ mun yɛ be o be wun kpinngbinlɛ ngowa nga e klo i’n nun’n, ajalɛ benin yɛ ɔ fata kɛ e fa ɔ? Maan e bu akunndan. Atrɛkpa’n, é wún kɛ Zoova kloman be ɲin su yiyilɛ wafa sɔ’n. Naan ɔ nin jasin nga e bo’n be kɔman likawlɛ. Afin kɛ e bo jasin’n, e se sran’m be kɛ be klo be wiengu naan be nin be tran fɔun. (Eza. 61:1; Gal. 5:19-21) Sanngɛ sɛ e bu i akunndan naan e wun kɛ be ɲin su yiyilɛ wafa sɔ’n, ɔ fɔnman Zoova i mmla mun’n, nn be ɲin su yiyilɛ sɔ’n kwla yo e ye yɛ ɔ man e wunmiɛn.—Gal. 5:22, 23; an kanngan Filipfuɛ Mun 4:8 nun.
?Dɔ nɲɛ yɛ n fa yiyi min ɲin su ɔ?
9. ?Wafa nga é tɛ́ kosan’n i nɲɔn su i su’n, ɔ́ klé sɛ?
9 Kosan klikli nga e yiyili nun icra’n yɛ: ‘?Like benin yɛ n fa yiyi min ɲin su ɔ?’ Wafa nga e tɛ kosan sɔ’n su’n, ɔ kle like nga e klo i’n ɔ nin nga e bu i like kpa’n. Kosan’n i nɲɔn su nga ɔ fata kɛ e fa usa e wun’n yɛ: ‘?Dɔ nɲɛ yɛ n fa yiyi min ɲin su ɔ?’ Wafa nga é tɛ́ kosan sɔ’n su’n, ɔ́ klé like nga ɔ ti e cinnjin kpa’n. ?Sanngɛ yoo, é yó i sɛ naan y’a si wafa nga ɔ fata kɛ e ɲin su yiyilɛ’n ɔ yo e cinnjin ju’n?
10, 11. ?Wafa sɛ yɛ ndɛ nga Zezi kɛnnin i Matie 6:33 nun’n, ɔ uka e naan y’a si dɔ ng’ɔ fata kɛ e fa yiyi e ɲin su’n i nuan ɔn?
10 Zezi Klist seli i sɔnnzɔnfuɛ mun kɛ: “Amun klo amun Nyanmiɛn’n kpa, amun fa amun wla’n kwlaa guɛ i su, maan amun akunndan’n kwlaa trɛn i su, yɛ amun fa amun wunmiɛn’n kwlaa yo like ng’ɔ kle kɛ amun klo i’n.” (Mar. 12:30) Kɛ e fa ndɛ yɛ mɔ Zezi kannin’n su’n, e kle kɛ klolɛ mɔ e klo Zoova’n ti e cinnjin kpa tra like kwlaa. Ɔ seli kɛ: “An dun mmua fa amun wun man Nyanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa úka su mán amun.” (Mat. 6:33) Ndɛ sɔ’n kwla uka e naan y’a si wafa nga ɔ fata kɛ e ɲin su yiyilɛ’n ɔ yo e cinnjin ju’n. Naan y’a si dɔ nga ɔ fata kɛ e fa yiyi e ɲin su’n, i nuan.
11 Maan e fa e ɲin e sie i ndɛ nga su. Yɛle kɛ Zezi seli e kɛ: ‘An dun mmua fa amun wun man Nyanmiɛn maan ɔ sie amun.’ W’a seman e kɛ nán maan e yoli like uflɛ fi kun. Afin Zezi bɔbɔ si kɛ kannzɛ ɔ fata kɛ e fa e wun man Ɲanmiɛn naan ɔ sie e’n, sanngɛ ɔ fata kɛ e yo ninnge uflɛ wie mun ekun. Yɛle kɛ ɔ fata kɛ e kunndɛ sua nin aliɛ nin tralɛ nin junman. Naan kusu e suan fluwa kan, e yiyi e ɲin su yɛ e yo ninnge uflɛ wie mun ekun. Sanngɛ nɛ́n i sɔ ninnge mun yɛ ɔ fata kɛ e dun mmua e kunndɛ ɔ. Ɔ fata kɛ e dun mmua e fa e wun e man Ɲanmiɛn naan ɔ sie e. (1 Kor. 7:29-31) Kɛ e ko wun like nga ɔ fata kɛ ɔ yo e cinnjin kpafuɛ’n i wlɛ’n, é fá e ɲin su yiyilɛ’n ɔ nin ninnge onga’m be kunndɛlɛ’n é síe i siɛn. Yɛ é dún mmua fá e wun é mán Ɲanmiɛn naan ɔ sie e. Sɛ e yo sɔ’n, e ɲin su yiyilɛ’n yó e ye.
12. ?Wafa sɛ yɛ akunndan ng’ɔ o Lik 14:28 nun’n, ɔ kwla uka e naan y’a fa e ɲin su yiyilɛ’n i wun ajalɛ kpa ɔ?
12 Ka naan y’a fa like wie y’a yiyi e ɲin su’n, ɔ fata kɛ e tran e bu i sin e nian. (Lik 14:28) Yɛle kɛ maan e bu dɔ nga é fá yíyí e ɲin su’n i akunndan. I sin’n, dɔ nga sɛ e fa yiyi e ɲin su ɔ ti kpa’n, maan e kle i nuan. Ninnge cinnjin wie m’ɔ fata kɛ e yo be’n yɛle e bɔbɔ e Biblu’n nun like suanlɛ’n, ɔ nin e nin e awlobofuɛ mun e Ɲanmiɛn sulɛ’n, ɔ nin aɲia’m be bo kɔlɛ’n yɛ jasin fɛ’n i bolɛ’n. Sɛ é nían naan e ɲin su yiyilɛ wafa wie ɔ́ yó maan e ɲin kpá i sɔ ninnge’m be su’n, nn ɔ nin yolɛ fataman. (Mar. 8:36) Sanngɛ sɛ e wun kɛ e ɲin su yiyilɛ wafa kun ɔ́ mán e wunmiɛn naan y’a kwla di Ɲanmiɛn junman’n, e kwla se kɛ ɔ nin yolɛ fata.
?Wan mun yɛ e nin be e san nun ɔn?
13. ?Ngue ti yɛ kɛ é kpá be nga e nin be é yíyí e ɲin su likawlɛ’n, ɔ ti mɔ e nian nun kpa ɔ?
13 Kosan’n i nsan su nga ɔ fata kɛ e fa usa e wun’n yɛ: ‘?Wan mun yɛ e nin be e yiyi e ɲin su likawlɛ ɔ?’ Kosan sɔ’n ti cinnjin afin sɛ é fá like kpa é yíyí e ɲin su’n, ɔ fin be nga e nin be e san nun’n. Kɛ e nin e janvuɛ mun e wla asa’n, ɔ yo maan aliɛ i dilɛ’n yo fɛ kpa ekun. I kunngba’n, sɛ e nin e janvuɛ mun e yiyi e ɲin su likawlɛ’n yɛ e ɲin su yiyilɛ’n ɔ́ yó fɛ kpa ekun ɔn. E nun kpanngban e klo i sɔ yolɛ. I li gbanflɛn nin talua mun yɛ be klo i sɔ kpa’n niɔn. Sanngɛ kɛ ɔ ko yo naan e ɲin su yiyilɛ’n w’a yo e ye’n, kɛ é kpá be nga e nin be é yíyí e ɲin su likawlɛ’n, ɔ ti mɔ e nian nun kpa.—2 Nyo. 19:2; an kanngan Nyanndra Mun 13:20 nun; Zak 4:4.
14, 15. (a) ?Janvuɛ kpa tralɛ nun’n, ajalɛ benin yɛ Zezi kle e ɔ? (b) ?Sɛ e waan é trá sran kun janvuɛ’n, kosan benin yɛ ɔ fata kɛ e fa usa e wun ɔn?
14 Zezi i ajalɛ’n kwla uka e naan y’a si sran nga ɔ fata kɛ e tra be janvuɛ’n. Kɛ ɔ fin mɛn’n i bobolɛ nun’n, Zezi klo klɔ sran mun. (Nya. 8:31) I nun ng’ɔ o asiɛ’n su wa’n, ɔ kloli sran wafa kwlaa yɛ ɔ buli be sran. (Mat. 15:29-37) Zezi nin sran kwlaa trannin klanman sɔ. Sanngɛ nán be ngba yɛ ɔ fa be kacili i janvuɛ ɔ. Ndɛ ng’ɔ kan kleli i akoto 11 mɔ be nantili ndɛnman su’n, ɔ kle e like nga ɔ niannin naan w’a se kɛ sran kun ti i janvuɛ’n. Ɔ seli kɛ: “Sɛ an fa min ndɛ’n su’n, an ti n janvuɛ.” (Zan 15:14; an nian Zan 13:27, 30 nun.) Be nga be suli Zoova mɔ b’a kpɔciman Zezi’n, be ngunmin cɛ yɛ be yoli Zezi i janvuɛ ɔ.
15 I sɔ’n ti’n, sɛ e waan é trá sran kun janvuɛ’n, ɔ fata kɛ ndɛ nga Zezi kannin’n, ɔ tran e klun. Maan e fa kosan yɛ mun e usa e wun: ‘?Sran sɔ’n i ijɔlɛ’n nin i aeliɛ’n be kle kɛ ɔ fa mmla nga Zoova nin Zezi be mannin’n su? ?Ɔ klo sa kpa’n yɛ ɔ kpɔ sa tɛ’n? ?Sɛ e nin i e san nun’n, i sɔ’n úka min naan m’an dun mmua fa min wun m’an man Zoova kɛ ɔ sie min naan m’an su i lele m’an guɛ i ti nin i bo?’ Sɛ e kwla tɛ kosan sɔ’m be su kɛ ɛɛn’n, ɔ kle kɛ sran sɔ’n ti kpa naan e nin i e kwla yiyi e ɲin su likawlɛ.—An kanngan Jue Mun 119:63 nun; 2 Kor. 6:14; 2 Tim. 2:22.
?Siɛn’n, e kwla se kɛ like nga e fa yiyi e ɲin su’n ti kpa?
16. ?Be ɲin su yiyilɛ’n i su kosan benin yɛ ɔ fata kɛ e fa usa e wun ɔn?
16 E kannin be ɲin su yiyilɛ’n i su kosan nsan be ndɛ. Kosan sɔ mun yɛ: ‘?Like benin yɛ n fa yiyi min ɲin su ɔ? ?Dɔ nɲɛ yɛ n fa yiyi min ɲin su ɔ? ?Yɛ wan mun yɛ e nin be e yiyi e ɲin su likawlɛ ɔ?’ Kwlaa naan y’a fa e wun y’a wlɛ i be ɲin su yiyilɛ wafa kun nun’n, ɔ ti mɔ e bu like nga é fá yíyí e ɲin su’n, ɔ nin dɔ nga é dí’n, yɛ sran nga e nin be é yó i sɔ likawlɛ’n, be akunndan kpa. Be ɲin su yiyilɛ nga ɔ kwla yo e ye’n yɛle nga ɔ fɔnman Biblu’n nun mmla mun’n. Sɛ e su bu like nga é fá yíyí e ɲin su’n i akunndan’n, ɔ fata kɛ e usa e wun kɛ: ‘?Ngue yɛ be yo i nun ɔn? ?Be ɲin su yiyilɛ nga Zoova i klun jɔ su’n i wie ɔ annzɛ nzaje sa nin sa tɛtɛ yolɛ’n o nun?’ (Nya. 4:20-27) Sɛ e su bu dɔ nga é fá yíyí e ɲin su’n i akunndan’n, ɔ fata kɛ e usa e wun kɛ: ‘?Dɔ nɲɛ yɛ ń fá yíyí min ɲin su ɔ? ?Sɛ n fɛ i sɔ dɔ n fa yiyi min ɲin su’n, ɔ nin i fata?’ (1 Tim. 4:8) Asa kusu’n, sɛ e su bu sran nga e nin be é yíyí e ɲin su’n i akunndan’n, ɔ fata kɛ e usa e wun kɛ: ‘?Wan mun yɛ e nin be é yíyí e ɲin su likawlɛ ɔ? ?Sran sɔ’m be nzuɛn’n ti kpa annzɛ ɔ ti tɛ?’—Aku. 9:18; 1 Kor. 15:33.
17, 18. (a) ?Ngue yɛ é yó naan y’a wun i wlɛ sɛ like nga e fa yiyi e ɲin su’n ɔ fɔnman Biblu’n nun mmla mun ɔn? (b) ?Be ɲin su yiyilɛ’n i wun ajalɛ benin yɛ amun a fua kpa kɛ amún fá ɔ?
17 Sɛ e jran kosan nsan sɔ’m be su e bu e ɲin su yiyilɛ wafa kun i akunndan naan e wun kɛ ɔ fɔn Biblu’n nun mmla mun’n, nn ɔ fataman kɛ e fa e wun wla nun. Sanngɛ sɛ e bu i akunndan naan ɔ nin Biblu’n nun mmla’m be kɔ likawlɛ’n, nn e ɲin su yiyilɛ wafa sɔ’n, ɔ manman Zoova yɛ ɔ́ yó e wun sa ye.—Jue. 119:33-35.
18 Ɔ maan, sɛ e waan é yíyí e ɲin su’n, maan e mian e ɲin naan e fa like ng’ɔ ti kpa’n. Asa ekun’n, nán maan ɔ saci e blɛ, yɛ kusu maan e nin sran kpa yɛ e yo i sɔ ɔ. I sɔ’n ti’n, maan Biblu’n nun afɔtuɛ yɛ’n i su falɛ’n ɔ yo e kwlakwla e nnana kpa. Afɔtuɛ sɔ’n yɛ: “Sɛ amún dí like o, sɛ amún nɔ́n nzue annzɛ nzan o, sɛ amún yó like wie o, an yo i kwlaa sɔ’n i nuan su maan Nyanmiɛn nyan nyrun.”—1 Kor. 10:31.
?Amun kwla yiyi nun?
?Wafa sɛ yɛ akunndan ng’ɔ o Biblu’n nun ndɛ mma nga’m be nun’n, be kwla uka e naan y’a fa e ɲin su yiyilɛ’n i wun ajalɛ kpa ɔ?
[Kosan mun]
[Kuku, bue 11]
(An nian fluwa bɔbɔ ba’n su)
✔?Like benin?
[Kuku, bue 12]
(An nian fluwa bɔbɔ ba’n su)
✔Dɔ’n
[Kuku, bue 14]
(An nian fluwa bɔbɔ ba’n su)
✔?Wan?
[Foto, bue 12]
?Wafa sɛ yɛ Zezi i ajalɛ’n uka e naan y’a tra janvuɛ kpa naan kusu y’a fa like kpa y’a yiyi e ɲin su ɔ?
