?Pleplei We Yu Yu Jusum i Mekem i Gud Long Yu?

“Yufala i mas traehad blong faenemaot ol fasin we Masta blong yumi i glad long hem.”—EFES. 5:10.

1, 2. (a) ?From wanem yumi save se Jehova i wantem we yumi harem gud long laef blong yumi? (b) ?Yumi mas tingbaot wanem samting long saed blong pleplei mo spel?

BAEBOL i talem klia se Jehova i wantem we yu- mi harem gud long laef blong yumi. Ol Sam 104:14, 15 i talem se Jehova i mekem “ol samting we man i save planem. From samting ya, man i save wokem ol garen blong hem, nao i save mekem waen blong mekem hem i glad, mo i save tekem olifoel blong mekem fes blong hem i saen, mo i save tekem kakae blong mekem hem i strong.” Jehova nao i givim kakae long yumi blong yumi save laef. Hem i mekem se ol samting we yumi planem i gru, blong yumi gat kakae, oel, mo waen. I tru se yumi no nidim waen, be waen i save mekem yumi “glad.” (Pri. 9:7; 10:19) Yes, Jehova i wantem se yumi glad mo yumi “harem gud” long laef blong yumi.—Wok 14:16, 17.

² Taswe yumi no mas ting se i rong blong yusum sam taem blong yumi blong “tingbaot ol pijin ya we oli stap flae olbaot” mo blong “tingbaot ol flaoa ya we oli stap gru olbaot.” Sipos yumi mekem sam samting olsem blong pleplei mo spel, hemia i save givim paoa long yumi, mo i save mekem yumi harem gud moa long laef blong yumi. (Mat. 6:26, 28; Sam 8:3, 4) Laef we man i harem gud long hem i wan presen we i “kam long God.” (Pri. 3:12, 13) Taem we yumi yusum blong pleplei mo spel i haf blong presen ya we God i givim long yumi. Taswe yumi mas yusum taem ya, long fasin we God i glad long hem. *

Yumi Mas Jusum Gud Ol Pleplei

3. ?From wanem ol man oli jusum ol defdefren pleplei?

³ Olgeta we oli gat stret tingting long saed blong pleplei mo spel, oli save se oli fri blong jusum wanem samting we oli wantem mekem. Mo oli save tu se i nogud we oli jusum enikaen pleplei nomo. ?From wanem ol man oli jusum ol defdefren pleplei? Yu traem tingbaot. Ol man long ol defren ples long wol oli laekem kakae ol defren kakae. Long sem fasin, ol Kristin we oli stap long ol defren ples long wol oli laekem blong mekem ol defren samting blong pleplei mo spel. Nating se samfala oli stap long sem ples, be oli jusum ol defren pleplei. Maet wan Kristin i harem gud taem hem i ridim wan buk from we tingting blong hem i kwaet. Be narafala i no laekem blong mekem olsem. Wan narafala i laekem blong mekem sam samting afsaed, olsem blong ron long baskel. Be sam narafala oli no laekem samting olsem. Olsem we yumi save jusum kakae we yumi laekem, yumi save jusum tu wanem pleplei we yumi laekem.—Rom 14:2-4.

4. ?From wanem i nogud we yumi jusum enikaen pleplei nomo? Yu traem yusum wan pijatok.

⁴ Nating se yumi fri blong jusum pleplei we yumi laekem, i nogud yumi jusum enikaen pleplei we yumi wantem. I sem mak long saed blong kakae. Maet yumi laekem kakae ol defdefren kakae. Be bambae yumi no jusum ol kakae we oli sting finis. Sipos yumi mekem olsem bambae yumi sik. Long sem fasin, maet yumi laekem blong traem ol defren pleplei we oli gud. Be bambae yumi no mekem fasin nogud mo ol raf fasin, mo eni narafala samting we i save spolem laef blong yumi. Ol samting olsem oli no stret long tingting blong Jehova. Oli save spolem gudfala fasin fren blong yumi wetem Jehova, mo oli save spolem helt blong yumi. Taswe yumi no mas jusum enikaen pleplei nomo. Yumi mas tingting gud long saed blong ol pleplei we yumi  laekem. Biaen yumi mas jusum ol pleplei we oli mekem i gud long yumi mo oli mekem Jehova i glad long yumi. (Efes. 5:10) ?Olsem wanem blong jusum ol pleplei we oli mekem i gud long yumi?

5. ?Olsem wanem blong save sipos Jehova i glad long ol pleplei we yumi jusum?

⁵ Ol pleplei we yumi jusum oli save mekem i gud long yumi mo oli save mekem Jehova i glad, sipos oli stret folem ol rul blong Baebol. (Sam 86:11) Yu save folem wan smol lis blong givhan long yu blong jusum gud ol pleplei. Lis ya i gat tri kwestin we yumi save tingbaot. Trifala kwestin ya se: ?wanem? ?wetaem? mo ?hu? Bambae yumi tokbaot trifala kwestin ya.

?Pleplei We Yumi Jusum i Soemaot Wanem Fasin?

6. ?Wanem ol pleplei we yumi no mas jusum? ?From wanem yumi no mas jusum olgeta?

⁶ Bifo yumi jusum samting we bambae yumi mekem blong pleplei mo spel, i gud yumi askem kwestin ya se: ?Pleplei ya i soemaot wanem fasin? I gud yumi tingbaot se ol samting we man i mekem blong pleplei, oli seraot long tu grup. Ol samting long fas grup, yumi no mas mekem. Ol samting long seken grup, maet yumi save mekem. ?Wanem ol samting we oli stap long fas grup? Plante pleplei long rabis wol ya oli no stret nating folem ol rul blong Baebol mo oli brekem ol loa blong God. (1 Jon 5:19) Ol tru Kristin oli no mas jusum ol pleplei olsem. Hemia ol pleplei we oli tokbaot wok blong rabis spirit, man we i slip wetem man no woman we i slip wetem woman, ol rabis pija, mo raf fasin. Ol tru Kristin oli no mas jusum ol pleplei ya tu we oli soemaot ol man we oli givim kil long narafala, no eni narafala pleplei we i soemaot ol nogud fasin blong man wetem woman, olsem se oli gud nomo. (1 Kor. 6:9, 10; ridim Revelesen 21:8.) Nomata yumi stap weples, bambae yumi neva jusum ol pleplei olsem. Yumi wantem soemaot long Jehova se yumi no laekem nating “ol rabis fasin.”—Rom 12:9; 1 Jon 1:5, 6.

7, 8. ?Wanem i save givhan long yumi blong mekem desisen we i gud long saed blong ol pleplei? ?Wanem eksampol i save givhan long yumi?

⁷ Yumi mas tingting gud long ol pleplei we oli stap long seken grup, bifo we yumi mekem wan desisen. Maet Baebol i no tokbaot ol pleplei ya stret. Be ol rul we oli stap long Baebol oli givhan long yumi blong kasem save tingting blong Jehova long saed blong wanem pleplei i gud mo wanem pleplei i nogud. Taswe, bifo we yumi mekem desisen long saed blong ol pleplei ya, yumi mas meksua se oli stret folem ol rul blong Baebol. (Prov. 4:10, 11) Biaen yumi mas mekem desisen we i givhan long yumi blong gat tingting we i klin long fored blong Jehova. (Gal. 6:5; 1 Tim. 1:19) ?Yumi save mekem gudfala desisen olsem wanem? Yu traem tingbaot taem yu wantem traem wan niu kakae. Fastaem yu wantem save wanem i stap insaed long kakae ya. Long sem fasin, bifo we yu jusum wan pleplei, i gud yu faenemaot se pleplei ya i olsem wanem. Nao yu save jusum sipos i gud blong yu yu mekem.—Efes. 5:17.

⁸ Yu traem tingbaot eksampol ya. Plante man oli laekem spot. Maet yu tu yu laekem. Ol spot oli save mekem yu laf mo yu harem gud. Be long sam spot, ol man oli wantem tumas blong win, ale oli save kam raf tumas mo oli save ded from tu. Mo long sam spot, man i spolem bodi blong hem mo i kasem kil. Long sam narafala spot, taem oli win, ol man oli mekem bigfala lafet. Long taem olsem oli rao, oli faet, mo oli ting se kantri blong olgeta i moa gud long narafala kantri. ?Yu mas mekem wanem sipos yu yu laekem ol spot olsem? Yu mas tingbaot se ol spot ya oli soemaot wanem fasin. Ale bambae samting ya i givhan long yu blong mekem desisen se pleplei olsem i no stret long tingting blong Jehova. Mo ating bambae yu luk se pleplei olsem i no stret long ol tok we yumi stap talemaot long narafala, se oli mas gat pis mo oli mas lavem narafala. (Aes. 61:1; Gal. 5:19-21) Sipos yu save se pleplei we yu jusum i stret long tingting blong Jehova, samting ya bambae i mekem i gud long yu mo i givim paoa long yu.—Gal. 5:22, 23; ridim Filipae 4:8.

 ?Wetaem i Stret Blong Pleplei Mo Spel?

9. ?Ansa blong yu long seken kwestin i soemaot wanem?

⁹ Yumi tokbaot finis fas kwestin ya: ?Wanem? Ansa blong yumi i soemaot wanem samting we yumi laekem mo wanem samting we i stret blong yumi mekem. Seken kwestin hemia: ?Wetaem? I gud yumi askem se: ?Wetaem i stret blong mi pleplei mo spel? ?Mo bambae mi spenem hamas taem long pleplei mo spel? Ansa blong seken kwestin ya i soemaot wanem i stap long fasples long laef blong yumi, no wanem i impoten long tingting blong yumi. Ale, ?wanem i save givhan long yumi blong mekem desisen se pleplei mo spel i impoten olsem wanem long yumi?

10, 11. ?Olsem wanem Matiu 6:33 i givhan long yumi blong tingbaot hamas taem we yumi spenem long pleplei?

¹⁰ Jisas Kraes i talem long ol man blong hem se: “Yufala i mas lavem Hae God ya we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.” (Mak 12:30) Yumi soemaot se lav blong yumi long Jehova i impoten samting long laef blong yumi, taem yumi obei long ol tok we Jisas i talem, se: “Yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya tu long yufala.” (Mat. 6:33, NW) Ol tok ya blong Jisas oli save givhan long yumi blong mekem desisen se ol pleplei oli impoten olsem  wanem long yumi, mo blong yumi save hamas taem blong spenem long ol pleplei.

¹¹ Jisas i talem se yumi mas ‘lukaot kingdom fastaem.’ Hem i no talem se yumi mas lukaot Kingdom nomo. Jisas i save se yumi mas tingbaot plante samting long laef blong yumi. Yumi nidim wok, haos, klos, edukesen, pleplei, mo sam narafala samting bakegen. Be ol samting ya oli no stap long fasples long laef blong yumi. Kingdom nao i stap long fasples. (1 Kor. 7:29-31) Taem yumi kasem save wanem i mas stap long fasples long laef blong yumi, bambae yumi putum ol pleplei mo ol narafala samting long seken ples. Yes bambae yumi lukaot kingdom fastaem. Ale bambae ol samting we yumi mekem blong pleplei mo spel oli mekem i gud long yumi.

12. ?Luk 14:28 i givhan long yumi olsem wanem blong mekem gudfala desisen long saed blong ol pleplei?

¹² Bifo we yumi jusum wan pleplei, yumi mas “sidaon fastaem blong wokemaot praes” blong hem. Hemia i min se yumi mas faenemaot hamas taem bambae yumi spenem long pleplei ya. (Luk 14:28) Olsem we yumi nidim mane blong pem samting, yumi nidim taem blong pleplei. Yumi mas mekem desisen se bambae yumi yusum hamas taem long pleplei. I nogud yumi yusum tumas taem blong pleplei, nao yumi no moa gat taem blong mekem ol impoten samting. Yumi no moa mekem prapa Baebol stadi blong yumi mo famle wosip, yumi no moa go long ol Kristin miting mo long wok blong prij. (Mak 8:36) Be sipos yumi luk se wan pleplei i givim paoa long yumi blong gohed long wok blong God, ating yumi save mekem desisen se pleplei ya i stret from we i mekem i gud long yumi mo i no westem taem blong yumi.

?Hu Ol Fren Blong Mi?

13. ?From wanem yumi mas jusum gud ol fren we bambae yumi joen wetem olgeta blong pleplei mo spel?

¹³ Namba tri kwestin hemia: ?Hu ol fren we mi joen wetem olgeta blong pleplei mo spel? Ansa blong kwestin ya i impoten tumas, from we ol man we yumi joen wetem olgeta oli save gat paoa long ol desisen we yumi mekem. Ating yumi harem gud taem yumi joen wetem ol narafala blong kakae. Hemia i sem mak olsem ol pleplei. Yumi harem gud moa long ol pleplei taem yumi joen wetem ol gudfala fren. Taswe yumi kasem save from wanem plante long yumi, speseli ol yangfala, oli harem gud taem oli joen wetem ol narafala long ol pleplei. Be bifo we yumi jusum wan pleplei, i gud blong tingbaot hu ol fren we bambae oli stap wetem yumi. Ol fren ya, ?oli gudfala fren no oli rabis fren? Sipos yumi tingbaot samting ya, bambae yumi luk se pleplei we yumi jusum i mekem i gud long yumi.—2 Kron. 19:2; ridim Ol Proveb 13:20; Jem. 4:4.

14, 15. (a) ?Fasin blong Jisas i givhan long yumi olsem wanem, blong yumi jusum ol gudfala fren? (b) Taem yumi jusum ol fren, ?wanem ol kwestin we yumi mas tingbaot?

 ¹⁴ Sipos yumi folem fasin blong Jisas, hemia bambae i givhan long yumi blong jusum ol gudfala fren. Oltaem Jisas i lavem ol man. (Prov. 8:31) Taem hem i stap long wol ya, hem i soemaot lav mo respek long olgeta man. (Mat. 15:29-37) Be Jisas i save se taem man i kaen long narafala, hemia i no sem mak olsem taem man i fren gud wetem narafala. Nating se Jisas i kaen long olgeta man, be hem i no fren gud wetem evriwan. Tok we hem i talem long ol 11 aposol we oli stap tru long hem, i soemaot olsem wanem hem i jusum ol gudfala fren blong hem. Hem i talem se: “Sipos yufala i stap mekem ol samting we mi mi talem long yufala, yufala i fren blong mi.” (Jon 15:14; mo lukluk Jon 13:27, 30.) Jisas i jusum olgeta ya nomo we oli biaen long hem mo oli mekem wok blong Jehova, blong oli kam ol gudfala fren blong hem.

¹⁵ Bifo we yu jusum wan man blong i kam wan gudfala fren blong yu, i gud yu tingbaot wanem we Jisas i talem. Traem tingbaot ol kwestin ya: ?Man ya i soemaot long ol toktok blong hem mo long ol samting we hem i mekem, se hem i stap obei long ol loa blong Jehova mo Jisas? ?Hem i laekem wanem we i gud, mo i no laekem nating samting we i nogud? ?Bambae hem i givhan long mi blong mi putum Kingdom long fasples mo blong mi stap tru long Jehova? Sipos yu ansa yes long ol kwestin ya, i min se yu yu faenem wan gudfala fren we yu save spenem taem wetem hem long ol pleplei.—Ridim Ol Sam 119:63; 2 Kor. 6:14; 2 Tim. 2:22.

?Olsem Wanem Long Ol Pleplei We Yumi Jusum?

16. ?Wanem ol kwestin we yumi mas askem long saed blong pleplei we yumi jusum?

¹⁶ Yumi tokbaot tri kwestin we yumi mas tingbaot taem yumi jusum ol pleplei: ?wanem? ?wetaem? mo ?hu? Bifo yumi joen long wan pleplei, yumi mas tingting gud se pleplei ya i soemaot wanem fasin, hamas taem bambae yumi spenem long pleplei ya, mo bambae yumi jusum hu blong harem gud wetem olgeta long pleplei ya. Sipos yumi wantem se pleplei we yumi jusum i mekem i gud long yumi, yumi mas jekem sipos pleplei ya i stret folem ol rul blong Baebol. Taem yumi tingbaot kwestin ya ?wanem? yumi mas askem se: ?Pleplei ya i soemaot wanem fasin? ?Jehova i glad long hem? ?Pleplei ya i raf mo i soemaot nogud fasin blong man wetem woman? (Prov. 4:20-27) Taem yumi tingbaot kwestin ya ?wetaem? yumi mas askem se: ?Bambae mi spenem hamas taem long pleplei mo spel? ?Pleplei ya i mekem i gud long mi, no mi stap westem taem blong mi nomo long hem? (1 Tim. 4:8) Mo taem yumi tingbaot kwestin ya ?hu? yumi mas askem se: ?Hu bambae i joen wetem mi long pleplei ya? ?Oli ol gudfala fren no oli ol rabis fren?—Pri. 9:18; 1 Kor. 15:33.

17, 18. (a) ?Olsem wanem blong save sipos yumi jusum pleplei we i stret folem ol rul blong Baebol? (b) ?Bambae yu yu mekem wanem desisen long saed blong ol pleplei?

¹⁷ Sipos pleplei we yumi jusum i no stret folem ol rul blong Baebol long saed blong trifala kwestin ya, hemia i no wan gudfala pleplei blong yumi mekem. Be sipos yumi jusum pleplei we i stret folem ol rul blong Baebol long saed blong trifala kwestin ya, hemia i soemaot se yumi ona long Jehova, mo bambae pleplei ya i mekem i gud long yumi.—Sam 119:33-35.

¹⁸ Taswe, taem yumi mekem desisen long saed blong ol pleplei, yumi mas traehad oltaem blong mekem ol samting we i stret, long stret taem blong hem, mo wetem ol gudfala fren. Yumi mas gat strong tingting blong obei long ol tok blong Baebol we i se: “Long olgeta samting we yufala i kakae, mo we yufala i dring, mo long olgeta fasin blong yufala, oltaem yufala i mas leftemap nem blong God.”—1 Kor. 10:31.

[Futnot]

?Yu Yu Save Eksplenem?

Taem yu jusum ol pleplei, ?yu save folem ol advaes we i stap long ol vas ya olsem wanem?

• Filipae 4:8

• Matiu 6:33

• Ol Proveb 13:20

[Kwestin]

[Foto blong pija long pej 11]

(Lukluk niuspepa)

✔Wanem

[Foto blong pija long pej 12]

✔Wetaem

[Foto blong pija long pej 14]

✔Hu

[Tok blong pija long pej 12]

Taem yumi jusum ol fren mo ol pleplei, ?yumi save folem fasin blong Jisas olsem wanem?