¿Wem ba jiñi lac ñusaqʼuin tac?
¿Wem ba jiñi lac ñusaqʼuin tac?
«Chʌn qʼuelela chuqui miʼ mulan lac Yum» (EFES. 5:10).
1, 2. a) ¿Baqui tac bʌ texto miʼ pʌs chaʼan Jehová yom chaʼan mi lac ñusan lac bʌ ti laj cuxtʌlel? b) Come «lac majtañʌch tilem bʌ ti Dios» jiñi lac tiempo, ¿bajcheʼ la com laj cʼʌn?
JIÑI Biblia miʼ pʌs chaʼan Jehová mach yomic chaʼan cheʼ jach toʼol añonla, yom chaʼan mi lac ñusan lac bʌ ti laj cuxtʌlel. Jumpʼejl ejemplo, jiñi Salmo 104:14, 15 miʼ yʌl: «Maʼ wʌcʼ [...] chaʼan mic taj lojon i bʌl lojon c ñʌcʼ ti chajp ti chajp, yicʼot vino muʼ bʌ i tijicñesʌbeñon lojon c pusicʼal, yicʼot aceite chaʼan tijicña lojon c wut, yicʼot waj chaʼan mic taj lojon c pʼʌtʌlel». Dios miʼ yʌcʼ ti pasel jiñi lac pʌcʼʌb chaʼan mi lac taj i bʌl lac ñʌcʼ, aceite yicʼot vino chaʼan mi lac weʼsan lac bʌ. Anquese mucʼʌch lac mejlel ti chumtʌl cheʼ maʼañic mi lac jap vino, Jehová tsiʼ yʌcʼʌ chaʼan mi lac tijicñesan lac pusicʼal (Ec. 9:7, TNM; 10:19). Tsiquilʌch chaʼan Jehová yom chaʼan tijicña mi lac chumtʌl, come woliʼ butʼbeñonla lac pusicʼal ti tijicñʌyel (Hech. 14:16, 17).
2 Jin chaʼan, jiñi i wiñicob Dios mach yomic lecoj miʼ qʼuelob cheʼ bʌ miʼ bixel aqʼueñob i yorajlel jiñi ñusaqʼuin tac. Jumpʼejl ejemplo, cheʼ miʼ wen qʼuelob «jiñi xmateʼmut am bʌ ti panchan» yicʼot «jiñi ñichteʼ tac muʼ bʌ i colel ti jamil», miʼ mejlel i wen aqʼueñob i tijicñʌyel (Mat. 6:26, 28; Sal. 8:3, 4). Tiʼ sujm, «lac majtañʌch tilem bʌ ti Dios» cheʼ tijicña chumulonla yicʼot cheʼ cʼocʼoñʌchla (Ec. 3:12, 13). Mucʼʌch lac ñaʼtan chaʼan jiñi lac tiempo jumpʼejlʌch lac majtan aqʼuebil bʌ i chaʼañonla Dios, jin chaʼan la comʌch laj cʼʌn cheʼ bajcheʼ miʼ mulan.
An jach baqui jaxʌl librejonla
3. ¿Chucoch yom mi lac chʼʌm ti ñuc chaʼan mach junlajalic jiñi ñusaqʼuin tac muʼ bʌ lac mulan?
3 Cheʼ bajcheʼ mi caj laj qʼuel, juntiquil xñoptʼan am bʌ i ñaʼtʌbal yujil chaʼan jujuntiquil miʼ mejlel i yajcan i ñusaqʼuin, pero mach yomic miʼ ñumelob ti pʼis. Jiñi ñusaqʼuin tac lʌcʼʌ lajal bajcheʼ jiñi bʌlñʌcʼʌl, ti jumpʼejl tejclum miʼ mejlel i wen mulañob junchajp bʌlñʌcʼʌl pero ti yambʌ maʼañic. Jiñi xñoptʼañob ti yambʌ tejclum an i tajol miʼ yajcañob ñusaqʼuin mach bʌ añic miʼ mulañob ti yambʌ tejclum. Ili muʼto i yujtel jaʼel tiʼ tojlelob jiñi lajal bʌ baqui chumulob. An muʼ bʌ i wen mulañob i pejcan jumpʼejl libro, pero an yañoʼ bʌ muʼ bʌ i yotsʌbeñob i wʌyel. An muʼ bʌ i wen mulañob i ñijcan bicicleta, pero yañoʼ bʌ miʼ lujbʼañob miʼ yubiñob. Ti lac pejtelel yom mi lac chʼʌm ti ñuc chaʼan, cheʼ bajcheʼ jiñi bʌlñʌcʼʌl tac, cabʌlʌch ñusaqʼuin tac wem bʌ jaʼel (Rom. 14:2-4).
4. ¿Chucoch mach yomic mi lac ñumel ti pʼis cheʼ mi lac yajcan lac ñusaqʼuin? Alʌ jumpʼejl ejemplo.
4 Pero mach tiʼ caj jach librejonla mi caj lac yajcan ñusaqʼuin tac mach bʌ wentaquic. Laʼ lac chaʼ al jiñi bʌlñʌcʼʌl. Anquese mach junchajpic jach jiñi bʌlñʌcʼʌl muʼ bʌ lac mulan, maʼañic mi caj laj cʼux jiñi mach bʌ wentaquix. Maʼañic mi caj laj cʼux come mach tontojoñicla, come mi lac mejlel ti cʼamʼan. Cheʼ jaʼel, anquese an cabʌl ñusaqʼuin tac, maʼañic mi lac yajcan jiñi an tac bʌ i chaʼan tsʼiʼlel, jontolil o bʌbʌqʼuen tac bʌ, come miʼ ñusan ti pʼis jiñi principio tac, miʼ yʌsiñonla yicʼot miʼ ñajtʼesañonla ti Jehová. Tsiquil chaʼan mach yomic mi lac ñumel ti pʼis. Jin chaʼan, yomʌch mi lac wen qʼuel mi weñʌch jiñi ñusaqʼuin muʼ bʌ lac mulan (Efes. 5:10). Mi cajel laj qʼuel bajcheʼ miʼ mejlel lac mel.
5. ¿Bajcheʼ miʼ mejlel lac ñaʼtan mi mucʼʌch i mulan Jehová jiñi lac ñusaqʼuin tac?
5 Mucʼʌch caj i yʌqʼueñonla lac tijicñʌyel jili lac ñusaqʼuin mi jiñʌch muʼ bʌ i mulan Jehová. ¿Bajcheʼ mi lac ñaʼtan mi jiñi muʼ bʌ lac mel maʼañic miʼ ñusan ti pʼis jiñi i Tʼan? (Sal. 86:11.) Yomʌch mi lac melben lac bʌ uxpʼejl cʼajtiya, «chuqui tac, jala yicʼot majqui». Laʼ laj qʼuel jujumpʼejl.
¿Chuqui tac miʼ chʼʌm tilel?
6. ¿Baqui tac bʌ ñusaqʼuin mi lac tsʼaʼlen, i chucoch?
6 Jiñi ñaxam bʌ cʼajtiya yom bʌ mi lac melben lac bʌ cheʼ woli lac yajcan lac ñusaqʼuin jiñʌch iliyi: «¿Chuqui tac miʼ chʼʌm tilel jiñi muʼ bʌ c mulan?». Ti yambʌ tʼan: ¿Bajcheʼ yilal jiñi lac ñusaqʼuin? An chaʼchajp yom bʌ miʼ ñaʼtan jiñi i wiñic Dios: Ñaxam bʌ jiñʌch chaʼan an ñusaqʼuin tac mach bʌ junyajl yomic mi lac yajcan, i chaʼchajplel jiñʌch muʼ bʌ i yʌqʼueñonla lac yajcan laj conciencia. ¿Baqui tac bʌ jiñi mach bʌ junyajl yomic mi lac yajcan? Jin tacʌch pejtelel muʼ bʌ i ñusan ti pʼis jiñi i principio tac o i mandar tac Dios (1 Juan 5:19). Anquese ti ili jontol bʌ pañimil an muʼ bʌ i wen mulañob baqui wen an ticʼlʌntel, i chaʼan tac bʌ xiba, jiñi homosexualidad, pornografía, jiñi jontolil yicʼot yan tac bʌ muʼ bʌ i yʌl jiñi Biblia chaʼan mach weñic, jiñi xñoptʼañonbʌla mucʼʌch lac tsʼaʼlen pejtelel jiñi (1 Cor. 6:9, 10; pejcan Apocalipsis 21:8). Mach yʌlʌyic baqui añonla, maʼañic mi lac wis otsan lac bʌ ti ili melbalʌl tac, i cheʼ bajcheʼ jiñi mi caj lac pʌsben Jehová chaʼan mucʼʌch lac jacʼ ili mandar: «Tsʼaʼlenla chuqui mach bʌ weñic» (Rom. 12:9; 1 Juan 1:5, 6).
7, 8. ¿Bajcheʼ miʼ ñaʼtan jiñi xñoptʼan mi weñʌch miʼ qʼuel Jehová jiñi muʼ bʌ caj i mel? Alʌ jumpʼejl ejemplo.
7 Wʌle laʼ la cʌl jiñi i chaʼchajplel: Jiñi ñusaqʼuin tac mach bʌ añic miʼ jamʌ ajlel ti Biblia chaʼan mach weñic. ¿Bajcheʼ miʼ ñaʼtan jiñi xñoptʼan mi weñʌch miʼ qʼuel Jehová jiñi i ñusaqʼuin? Jiñʌch cheʼ miʼ wen qʼuel jiñi principio tac (Pr. 4:10, 11). Cheʼ bajcheʼ jiñi mi caj i yajcan chuqui wem bʌ i maʼañic mi caj i ticʼlan i conciencia (Gál. 6:5; 1 Tim. 1:19). ¿Chuqui mi caj i coltañet chaʼan wen chuqui maʼ mel? Laʼ lac chaʼ al chaʼan bʌ jiñi bʌlñʌcʼʌl. Cheʼ bʌ muʼto caj lac ñop bʌlñʌcʼʌl mach bʌ laj cʌñʌyic, mi laj cʼajtin chuqui tac tsaʼ otsʌbenti. Cheʼ jaʼel, cheʼ mi caj lac yajcan lac ñusaqʼuin yom mi lac wen qʼuel chuqui tac miʼ chʼʌm tilel (Efes. 5:17).
8 Jumpʼejl ejemplo, cabʌlonla muʼ bʌ lac mulan alas tac muʼ bʌ i yʌqʼueñonla lac tijicñʌyel. I tilelʌch jiñi. Pero, ¿chuqui yom maʼ mel mi maʼ mulan alas «baqui an» jontolil, bʌbʌqʼuen tac bʌ o maʼ mulan cheʼ jiñi lac piʼʌlob miʼ melob lecojax bʌ qʼuiñijel cheʼ bʌ miʼ mʌl jumpʼejl equipo tiʼ país? Laʼ lac wen qʼuel lac bʌ. Tajol mi laj qʼuel chaʼan jiñi lac melbal maʼañic miʼ laj i bʌ yicʼot jiñi muʼ bʌ i mulan Jehová mi yicʼotic jiñi wen tʼan chaʼan bʌ ñʌchʼtʌlel yicʼot cʼuxbiya muʼ bʌ lac sub i tajol mi laj cʌy jiñi muʼ bʌ lac mel (Is. 61:1; Gál. 5:19-21). Pero mi tsaʼ laj qʼuele chaʼan jiñi lac ñusaqʼuin maʼañic miʼ ñusan ti pʼis muʼ bʌ i yʌl jiñi Biblia, tijicña mi caj i mejlel lac ñusan lac bʌ (Gál. 5:22, 23; pejcan Filipenses 4:8).
¿Jala mi caj c mel?
9. Alʌ chuqui mi caj i pʌs cheʼ bʌ mi lac melben lac bʌ ili cʼajtiya: «¿Jala mi caj c mel?».
9 I chaʼpʼejlel yom bʌ mi laj cʼajtiben lac bʌ jiñʌch: «¿Jala mi caj c mel?». Yom mi lac wen qʼuel jala mi caj lac mel yicʼot bajcheʼ cʼamel i yorajlel mi caj la cʌqʼuen. Cheʼ bʌ mi laj cʼajtiben lac bʌ chuqui tac ochem ti lac ñusaqʼuin miʼ pʌs chuqui tac mi lac mulan o chuqui tac jiñi wem bʌ mi laj qʼuel, i cheʼ bʌ mi laj cʼajtiben lac bʌ jala mi caj lac mel miʼ pʌs chuqui tac jiñi ñumen ñuc bʌ i cʼʌjñibal lac chaʼan. ¿Chuqui miʼ mejlel lac mel chaʼan jiñi ñusaqʼuin mach jiñic ñumen ñuc bʌ ti laj cuxtʌlel?
10, 11. ¿Bajcheʼ miʼ coltañonla Mateo 6:33 chaʼan mi laj qʼuel jaypʼejl i yorajlel yom mi la cʌqʼuen jiñi ñusaqʼuin?
10 Laʼ laj cʼajtesan chaʼan Jesucristo tsiʼ yʌlʌ: «Cʼuxbin a Dios Jehová tiʼ pejtelel a pusicʼal, tiʼ pejtelel a cuxtʌlel, tiʼ pejtelel a ñaʼtʌbal yicʼot tiʼ pejtelel a pʼʌtʌlel» (Mar. 12:30). ¿Bajcheʼ mi lac pʌs chaʼan jiñi ñumen ñuc bʌ ti laj cuxtʌlel jiñʌch cheʼ mi laj cʼuxbin Jehová? Jiñʌch cheʼ mi lac jacʼ ili i ticʼojel Jesús: «Chʌn sʌclanla ti ñaxan jiñi Yumʌntel yicʼot chuqui toj tiʼ wut Dios, cheʼ jiñi mi caj laʼ wʌqʼuentel jaʼel pejtelel ili yan tac bʌ» (Mat. 6:33). Cheʼ bajcheʼ mi caj laj qʼuel, ili tʼan tac miʼ coltañonla laj qʼuel bajcheʼ cʼamel i yorajlel mi la cʌqʼuen jiñi ñusaqʼuin yicʼot bajcheʼ cʼamel mi laj qʼuel ti ñuc.
11 Jesús mach muqʼuic jach i subeñonla chaʼan mi lac «sʌclan jiñi Yumʌntel». Miʼ yʌl chaʼan yom mi la cʌcʼ «ti ñaxan jiñi Yumʌntel». Yujil chaʼan yom mi la cʌqʼuen i yorajlel yicʼot lac pʼʌtʌlel yan tac bʌ eʼtel, come i cʼʌjñibal lac chaʼan la cotot, lac waj, lac pislel, mi lac chaʼlen clase, eʼtel, ñusaqʼuin yicʼot yan tac bʌ. Pero jiñi ñumen ñuc bʌ i cʼʌjñibal tiʼ pejtelel ora jiñʌch jiñi Yumʌntel (1 Cor. 7:29-31). Mi mucʼʌch lac jacʼ ili principio, maʼañic mi caj la cʌcʼ chaʼan an chuqui miʼ mʌctan jiñi ñumen ñuc bʌ i cʼʌjñibal: Cheʼ mi lac melben i yeʼtel Jehová. Cheʼ mi lac chʼʌm ti ñuc ili principio tac ti jiñi lac ñusaqʼuin, maʼañic mi caj lac ñumel ti pʼis yicʼot mi caj la cubin lac tijicñʌyel.
12. ¿Bajcheʼ miʼ coltañonla muʼ bʌ i yʌl Lucas 14:28 mi woli lac ñaʼtan chaʼan bʌ jiñi ñusaqʼuin?
12 ¿Jaypʼejl hora mi caj la cʌqʼuen jiñi ñusaqʼuin? Yomʌch mi lac ñaʼtan jaypʼejl tiempo mi caj lac jisan (Luc. 14:28). Tiʼ sujm, yom mi laj qʼuel bajcheʼ cʼamel i yorajlel mi caj la cʌqʼuen jumpʼejl ñusaqʼuin i mi laj qʼuel mi yomʌch mi lac mel jiñi. Mi tsaʼ laj qʼuele chaʼan mi caj i mʌctañonla chaʼan mi lac chaʼlen estudio, chaʼan mi lac mel lac chʼujutesaya ti familia, jiñi tempa bʌ tac yicʼot subtʼan, mucʼ jach caj lac «toʼol jisan» jiñi lac tiempo i mach yomic mi lac mel jiñi (Mar. 8:36). Pero mi tsaʼ laj qʼuele chaʼan bixel tic jach jiñi lac ñusaqʼuin yicʼot mucʼʌch caj i chaʼ chʼejlʼesañonla i mi caj i yʌqʼueñonla lac bej acʼ ti ñaxan jiñi Yumʌntel, «weñʌch bajcheʼ mi caj laj cʼʌn» jiñi lac tiempo.
¿Majqui quicʼotob?
13. ¿Chucoch yomʌch mi laj qʼuel majqui mi caj la cajñel la quicʼotob ti jiñi lac ñusaqʼuin?
13 Jiñi i yuxpʼejlel cʼajtiya yom bʌ mi lac melben lac bʌ jiñʌch iliyi: «¿Majqui mi caj cajñel quicʼotob ti jiñi ñusaqʼuin?». Wen ñuc i cʼʌjñibal cheʼ mi lac wen qʼuel majqui mi caj lac ñochtañob, come chaʼan jiñi ñusaqʼuin miʼ coltañonla yom mi la cajñel la quicʼot wem bʌ la camigojob. Cheʼ bajcheʼ mi lac ñumen ñusan lac bʌ ti cʼux waj cheʼ an la quicʼot wem bʌ la camigojob, mi lac ñumen ñusan lac bʌ jaʼel ti ñusaqʼuin cheʼ bʌ an la quicʼot wem bʌ la camigojob. Jin chaʼan, i tilelʌch cheʼ yonlelonla, i ñumento jiñi xcolelob, mi lac mulan ñusaqʼuin cheʼ cabʌlonla. Muʼ bʌ i caj i coltañonla jiñʌch cheʼ mi lac yajcan la camigojob muʼ bʌ i mejlel i coltañoñobla, i mach jiñic muʼ bʌ i mejlel i ticʼlañoñobla (2 Cr. 19:2; pejcan Proverbios 13:20; Sant. 4:4).
14, 15. a) ¿Chuqui ti wem bʌ ejemplo tsiʼ pʌsbeyonla Jesús cheʼ bʌ tsiʼ yajca i yamigojob? b) ¿Chuqui ti cʼajtiya tac yom mi lac melben lac bʌ cheʼ bʌ mi caj lac yajcan la camigojob?
14 Weñʌch cheʼ mi lac lajiben i yejemplo Jesús cheʼ bʌ mi caj lac yajcan majqui mi caj la cajñel la quicʼotob. Jesús mucʼʌch i cʼuxbiñonla cʼʌlʌl tiʼ cajibal jiñi Pañimil (Pr. 8:31, TNM). Cheʼ bʌ tsajñi ila ti Pañimil tsiʼ pʌsbe i yutslel yambʌlob yicʼot tsaʼʌch i chʼʌmʌyob ti ñuc (Mat. 15:29-37). Pero yujil chaʼan mach lajalic cheʼ utsonla la quicʼot yambʌlob yicʼot cheʼ miʼ sujtelob ti la camigo. Wen tsiʼ pejca pejtelel lac piʼʌlob, pero jin jach tsiʼ yajca tiʼ yamigojob jiñi mucʼʌch bʌ i tsʼʌctesañob jiñi muʼ bʌ i cʼajtintel. ¿Chuquiyes? Jiñʌch tsaʼ bʌ i sube jiñi 11 i yapóstolob: «Jatetla camigojetla mi mucʼʌch laʼ mel muʼ bʌ c subeñetla» (Juan 15:14; qʼuele jaʼel Juan 13:27, 30). Tsiquil chaʼan Jesús jin jach tsiʼ chʼʌmʌ tiʼ yamigojob jiñi xcʌntʼañoʼ bʌ i chaʼan yicʼot i wiñicoʼ bʌ Jehová.
15 Cheʼʌch yom mi lac mel joñonla jaʼel. Chaʼan mi lac ñaʼtan mi juntiquil lac piʼʌl yomʌch miʼ sujtel ti la camigo, laʼ laj cʼajtiben lac bʌ: «¿Muʼ ba i pʌs ti chuqui miʼ yʌl yicʼot ti chuqui miʼ mel chaʼan miʼ jacʼben i mandar Jehová yicʼot Jesús? ¿Lajal ba jiñi lon c ñopbal yicʼot miʼ chʼʌm ti ñuc chuqui miʼ yʌl jiñi Biblia? ¿Muʼ ba caj i pʌsbeñon chuqui wem bʌ i mi caj i coltañon chaʼan xucʼul mi cajñel ti Jehová yicʼot chaʼan mic chʌn acʼ ti ñaxan jiñi Yumʌntel?». Mi tsaʼ laj qʼuele chaʼan cheʼʌchi, miʼ mejlel lac ñop chaʼan juntiquilʌch wem bʌ la camigo tiʼ yorajlel jiñi ñusaqʼuin (pejcan Salmo 119:63; 2 Cor. 6:14; 2 Tim. 2:22).
Laʼ lac wen qʼuel jiñi lac ñusaqʼuin tac
16. ¿Chuqui tac yom mi laj qʼuel ti jiñi muʼ tac bʌ lac mel ti lac ñusaqʼuin?
16 Tsaʼix laj qʼuele uxchajp chaʼan bʌ lac ñusaqʼuin: Chuqui ti ñusaqʼuin mi lac yajcan, jala mi lac mel i majqui la quicʼotob. I tsaʼ laj qʼuele chaʼan mi la com chaʼan jiñi lac ñusaqʼuin miʼ coltañonla, mach yomic miʼ ñusan ti pʼis muʼ bʌ i yʌl jiñi Biblia. Cheʼ bʌ muʼto caj lac yajcan jiñi lac ñusaqʼuin, yom mi laj qʼuel iliyi: ¿Chuqui miʼ chʼʌm tilel? Yom mi lac wen qʼuel chaʼan maʼañic miʼ chʼʌm tilel jiñi mach bʌ weñic tiʼ tojlel juntiquil xñoptʼan (Pr. 4:20-27). ¿Jala mi caj lac mel? Mach yomic mi la cʌqʼuen i chilbeñonla cabʌl tiempo (1 Tim. 4:8). ¿Majqui mi caj la cajñel la quicʼotob? Mach yomic mi lac yajcan mach bʌ weñic la camigojob (Ec. 9:18; 1 Cor. 15:33).
17, 18. a) ¿Bajcheʼ miʼ mejlel lac ñaʼtan mi jiñi lac ñusaqʼuin maʼañic miʼ ñusan ti pʼis muʼ bʌ i yʌl jiñi Biblia? b) ¿Chuqui yom bʌ miʼ ñaʼtan jujuntiquil xñoptʼan chaʼan jiñi ñusaqʼuin?
17 Mi tsaʼ laj qʼuele chaʼan junchajp muʼ bʌ lac mel maʼañic miʼ tsʼʌctesan muʼ bʌ i yʌl jiñi Biblia chaʼan chuqui tac ochem ti lac ñusaqʼuin, jala mi lac mel yicʼot majqui la quicʼotob, yom i yʌl chaʼan mach weñic. Pero mi tsaʼ laj qʼuele chaʼan mucʼʌch i tsʼʌctesan, tijicña mi caj la cubin come jiñi lac ñusaqʼuin mucʼʌch caj i coltañonla i mi caj i yʌqʼuen i ñuclel Jehová (Sal. 119:33-35).
18 Tiʼ sujm, ti jiñi lac ñusaqʼuin yomʌch mi laj qʼuel tiʼ pejtelel ora miʼ weñʌch chuqui mi caj lac mel, jala mi caj lac mel yicʼot majqui la quicʼotob. Laʼ lac chaʼlen wersa chaʼan tiʼ pejtelel lac pusicʼal mi lac bej jacʼ ili ticʼojel: «Mach yʌlʌyic mi woliyetla ti uchʼel, mi an chuqui woli laʼ jap o jin jach chuqui woli laʼ mel, laj melela chaʼan i ñuclel Dios» (1 Cor. 10:31).
¿Bajcheʼ mi caj a jacʼ?
¿Bajcheʼ miʼ mejlel lac jacʼ ili principio tac ti jiñi lac ñusaqʼuin?
• Proverbios 13:20
[Cʼajtiya tac chaʼan estudio]
[Diagrama]
(Chaʼan maʼ qʼuel bajcheʼ yilal ti tsʼʌcʌl, jamʌ jiñi jun)
✔¿Chuqui?
[Diagrama]
(Chaʼan maʼ qʼuel bajcheʼ yilal ti tsʼʌcʌl, jamʌ jiñi jun)
✔¿Jala?
[Diagrama]
(Chaʼan maʼ qʼuel bajcheʼ yilal ti tsʼʌcʌl, jamʌ jiñi jun)
✔¿Majqui?
[Dibujo]
¿Bajcheʼ miʼ coltañonla jiñi i yejemplo Jesús chaʼan mi lac yajcan wem bʌ la camigojob yicʼot lac ñusaqʼuin tac?