Sunngiffimmi sammisartakkatit ilinnut iluaqutaappat?

“Qulakkeertuartarsiuk Naalakkamut suut iluarinartuunersut.” — EFESOSIMIUT 5:10, NV.

1, 2. (a) Qanoq ililluta nalunngilarput Guutip inuunermik nuannaarutiginnitsikkusukkaatigut? (b) Sunngiffimmik ‘Guutip tunissutaatut’ isiginninnerput sunissamut kajumississutigissavarput?

BIIBILIMI erseqqippoq Jehovap inuunitsinnik nuannaarutiginninnissarput kissaatigigaa. Assersuutigalugu Tussiaat 104:14, 15-imi allassimavoq Jehovap pilersikkai ‘timiusat nunamit viinnilu inunnik nuannaalersitsisartoq. Inuit kiinaat qillertisippai uuliamik, timiusallu inuk nutaamik nukeqalersippaa.’ Jehovap inuuinnarnissatsinnut pisariaqartitatsinnik nerisassaqartippaatigut. Nunap inerititai naatittarpai karrit uulialu inuussutigisinnaaniassagatsigit viinnisortarsinnaaniassagattalu. Viinni inuuinnarnissamut pisariaqanngikkaluartoq ‘inunnik nuannaalersitsisinnaavoq’. (Oqaluussisartup oqaasii 9:7; 10:19) Jehovap nuannaartikkusuppaatigut, ‘uummativut nuannaartikkusuppai’. — Apustilit Suliaat 14:16, 17.

² Taamaattumik piffissatta ilaanik ‘qilaap timmiaanik isiginnaarnermut’ ‘narsaatillu naasuinik liljanik’ qimerluuinermut atuisarnitta eqqunngitsuliornerusorinissaanut pissutissaqanngilaq. Tamakkuninnga sammisaqarneq nukissaqalissutigisinnaallugulu inuunitsinnik nuannernerulersitsisinnaavoq. (Matthæusi 6:26, 28; Tussiaat 8:4, 5) Nuannaarluni peqqissuullunilu inuuneq tassaavoq “Guutip tunissutaa”. (Oqaluussisartup oqaasii 3:12, 13) Piffissaq sunngiffimmi sammisartakkanut atortagarput Guutip uagutsinnut tunissutaanut ilaavoq, tamannalu piffissap Guutip iluarisaatut atortarnissaanut kajumississutigissavarput. *

Aliikkutassanut tunngatillugu silatusaartumik aalajangiisarit

3. Sooq inuit sunngiffimmi sammiumasaat assigiinneq ajorpat?

³ Aliikkutassanut oqimaaqatigiissumik isiginnittaasillit nalunngilaat sunik aliikkutaqarusunnerlutik namminneq aalajangersinnaallugu. Aamma nalunngilaat aliikkutarineqarsinnaasut killeqartut. Sooq inuit assigiinngitsunik toqqagaqartarpat? Tamanna paasiumallugu aliikkutassat nerisassanut assersuuteriartigit. Mamarisat nunamiit nunamut assigiinneq ajorput. Taamatuttaaq kristumiut nunami aalajangersimasumi aliikkutarissallugit nuannarisaat nunami allami immaqa nuannarineqarpianngillat. Nunaqqatigiikkaluilluunniit assigiinngitsunik toqqaasinnaapput. Assersuutigalugu inuit ilaasa atuarneq qasukkarsimaarnarigaat ilaasa pikkunaagisinnaavaat. Allat sikkilerneq inuummarissinarigaat, allat qasunarisinnaavaat. Soorlu inuit mamarisaat assigiinneq ajortut, taamatuttaaq aliikkutarerusutat assigiinneq ajorput. — Romamiut 14:2-4.

4. Sooq sunngiffimmi sammineqarsinnaasut killeqartariaqarpat? Assersuuteqarit.

⁴ Sunngiffimmi sunik sammisaqarnissatsinnut tunngatillugu nammineq aalajangiisinnaatitaagatta imaanngilaq ussernartorsiorfigisavut tamaasa nakkaannarfigissagivut. Eqqarsaatigeqqeriaruk nerisassanut tunngatillugu assersuut. Immaqa nerisassat assigiinngitsorpassuit mamarigaluarlutigit nerisassat ajortissimasut nererusunnavianngilavut. Napparsimalissutigisinnaavavummi. Taamatuttaaq sunngiffimmi sammerusussinnaasavut ineriartornartut assigiinngitsorpassuugaluartut kinguaassiuutitigut inuunerlukkusunnavianngilagut nakuuserumanaviarnataluunniit inuunitsinnilluunniit navianartorsiortitsisumik iliuuseqarusunnaviarata. Taamaaliorneq najoqqutassianut Biibilimiittunut akerliuvoq. Jehovamut ikinngutaajunnaassutigisinnaavarput, aamma peqqissutsitsinnut ajoqutaasinnaavoq. Taamaattumik sunngiffimmi sunik sammisaqarusunnerluta eqqarsaatigeqqissaartariaqarparput taavalu sammisassanik uagutsinnut iluaqutaasunik Jehovallu iluarisaanik  toqqaalluta. (Efesosimiut 5:10, NV) Qanoq ililluta taamaaliorsinnaavugut?

5. Qanoq ililluta paasisinnaavarput sunngiffimmi sammisavut Jehovamit iluarisaanersut?

⁵ Sunngiffimmi sammisartakkavut uagutsinnut iluaqutaassappata Jehovallu iluarissappagit najoqqutassianut Biibilimiittunut naapertuuttariaqarput. (Tussiaat 86:11) Sunngiffimmi sammisassanut tunngatillugu aalajangiinissannut iluaqutigisinnaavat apeqqutinik pingasunik ukuninnga eqqarsaatiginninnerit: Suut? Piffissaq qanoq atsigisoq? aamma Kikkut? Taakku maanna sammissavavut.

Aliikkutariniakkat suuppat?

6. Suut aliikkutariumanngilluinnarpavut, aamma sooq?

⁶ Aliikkutassatsinnik toqqaannginnitsinni imminut ima aperisariaqarpugut: Aliikkutariniakkakka suuppat? Pitsaassaaq eqqaamassallugu aliikkutassat marlunnut immikkoortinneqarsinnaanerat. Siullernut ilaapput aliikkutariumanngilluinnakkavut, aappaannullu ilaapput immaqa aliikkutariumasavut. Siullernut ilaasut suuppat? Silarsuarmi ajortumi matumani aliikkutarineqartartut ilarpassui iliuutsinut najoqqutassianut Biibilimiittunut naapertuutinngilluinnartunut Guutilluunniit inatsisaanik unioqqutitsinerusunut tunngasortaqartarput. (1 Johannesi 5:19) Kristumiut ilumoortut tamakkuninnga aliikkutaqarumanngilluinnarput. Tamakku tassaapput suulluunniit anersaapilussiornertallit, anguteqammik arnaqammilluunniit atoqateqartortallit, pornografeertallit nakuusernertallillu. Aamma nuannariinnarlugu allanik naalliutsitsinertaqartarput imaluunniit kinguaassiuutitigut inuunerlunnermik ajunngippasilersitsisarlutik. (1 Korinthimiut 6:9, 10; atuaruk Saqqummersitat 21:8). Kisimiikkaluarutta allanilluunniit peqateqaraluarutta tamakkuninnga aliikkutaqarusunnavianngilluinnarpugut. Jehova paasitikkusupparput ‘ajussutsimik maajuginnilluta’. — Romamiut 12:9; 1 Johannesi 1:5, 6.

7, 8. Aliikkutassanut tunngatillugu silatusaartumik aalajangiinissamut suna iluaqutigisinnaavarput? Assersuuteqarit.

⁷ Aliikkutassat aappaat aliikkutarissanerlugit aalajanginnginnitsinni eqqarsaatigeqqissaaqqaartariaqarpavut. Imaassinnaavoq aliikkutassat taakku Biibilimi eqqartorneqanngitsut. Najoqqutassialli Biibilimiittut Jehovap sunik ajunngitsutut eqqortutullu isiginninneranik paasinninnissamut iluaqutigissavavut. Taamaattumik taakku aliikkutariniarlugit aalajanginnginnitsinni taakku najoqqutassianut Biibilimiittunut naapertuunnersut qulakkeertariaqarparput. (Ussatit 4:10, 11) Taava ilerasuuteqannginnissamut iluaqutigisatsinnik aalajangiisariaqarpugut. (Galatiamiut 6:5; 1 Timotheusi 1:19) Qanoq ililluta silatusaartumik aalajangiisinnaavugut? Nerisassat eqqarsaatigeqqeriakkit. Siornatigut ussernikuunngisavut neritinnagit sunik akoqarnersut paaserusuttarparput. Taamatuttaaq aalajangersimasumik aliikkutaqalinnginnitsinni paasiniartariaqarparput aliikkutarerusutarput kristumiumut naleqquttuunersoq. — Efesosimiut 5:17.

⁸ Assersuutigalugu imaassinnaavoq timersorneq nuannarigit. Tassami timersorneq nuannertaqaaq, aamma inuppassuarnit nuannarineqarpoq. Timersoriaatsilli ilaat peqqarniissinnaasarput inuunermilluunniit navianartorsiortitsisinnaasarlutik. Ilaat ajoqusissutaasinnaapput. Ilaallu peqqarniitsumik persuarsiutigineqartarput inuiaassutsimillu pingaartitsivallaarnermut pissutaasarlutik. Qanoq iliussavit timersoriaatsit tamakku nuannarigukkit? Timersoriaatsini tamakkunani qanoq pisoqartarnera eqqarsaatigitillugu, immaqa paasilissavat illit eqqarsartaatsit Jehovap eqqarsartaasianut aamma eqqissinermik asanninnermillu tusarliussamut oqaluussissutigisatsinnut naapertuutinngitsoq. (Esaja 61:1; Galatiamiut 5:19-21) Aliikkutariniakkavilli Jehovap najoqqutassiaanut naapertuunnerat qularutiginngikkukku, taava taakku ilinnut iluaqutaallutillu nukissaqalissutaasinnaassapput. — Galatiamiut 5:22, 23; atuaruk Filippimiut 4:8.

Piffissaq qanoq atsigisoq aliikkutassanut atortarpara?

9. Apeqqummut matumunnga akissutinnit suna paasisinnaaviuk: Piffissaq qanoq atsigisoq aliikkutassanut atussavara?

⁹ Apeqqut siulleq sammisarput tassaavoq: Suut? Apeqqummut tamatumunnga akissutitsinnit paasinarsissaaq suut nuannarinerivut suullu akuerisinnaanerivut. Apeqqutit aappaat imaappoq:  Piffissaq qanoq atsigisoq? Taamaammat imminut ima aperisariaqarpugut: Piffissaq qanoq atsigisoq aliikkutassanut atussavara? Apeqqutit aappaannut tamatumunnga akissutitsinnit paasinarsissaaq sunik pingaarnerpaatitsinersugut. Taava aliikkutassanik inuunitsinni qanoq pingaartitsitiginitta paasinissaanut suna iluaqutigisinnaavarput?

10, 11. Jiisusip oqaasii Matthæusi 6:33-miittut sunngiffimmi sammisassanut piffissamik qanoq atsigisumik atuisarnissamik aalajangiinissamut qanoq iluaqutigaavut?

¹⁰ Jiisusi ima oqarpoq: “[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit nukitillu tamakkerlugit.” (Markusi 12:30) Ersersittarparput Jehovamik asanninnerput inuunitsinni pingaarnerpaatillugu Jiisusip oqaasiinik ukuninnga maleruaanitsigut: “Naalagaaffik naapertuilluassuserlu taassuma pia siulliullugit noqqaassutigiuarsigit, taava tamakku tamaasa ilanngullugit ilissinnut tunniunneqarumaarput.” (Matthæusi 6:33, NV) Jiisusip oqaasii iluaqutigalugit paasisinnaavarput sunngiffimmi sammisassat inuunitsinni qanoq pingaartitsiginerlutigit piffissarlu qanoq atsigisoq tamatumunnga atortassanerlutigu.

¹¹ Maluginiaruk Jiisusip peqqugaatigut ‘naalagaaffik siulliullugu noqqaassutigeqqullugu’. Peqqunngilaatigut Naalagaaffik kisiat noqqaassutigeqqullugu. Jiisusip nalunngilaa Guuti naalagaaffianik noqqaassutiginninnitta saniatigut inuunermi allarpassuarnik isumagisassaqartugut. Suliffik, nerisassaqarniarneq, inissarsinissaq, atisassaqarniarneq,  tunngaviusumik ilinniagaqarnissaq, sunngiffimmi sammisaqarnissaq allallu piffissaqarfigisariaqarpavut. Taakkuli inuunitsinni pingaarnerpaajunngillat; Guutip naalagaaffia pingaarnerpaatipparput. (1 Korinthimiut 7:29-31) Sunik pingaarnerpaatitsinissatsinnik paasinninnerput kajumississutigalugu aliikkutassat sammisassallu allat tamaasa salliunnagit Guutip naalagaaffia siulliullugu noqqaassutigissavarput. Taamaaliorutta aliikkutassat uagutsinnut iluaqutaassapput.

12. Lukasi 14:28-mi allassimasoq sunngiffimmi sammisassanut tunngatillugu aalajangiinissamut qanoq iluaqutigisinnaavarput?

¹² Sunngiffimmi sammisassanut aliikkutassanullu tunngatillugu aalajangiinnginnitsinni tamatuma piffissamik qanoq atuinartiginissaa eqqarsaatigeqqissaartariaqarpoq. Soorlu napasulialiortussaatilluni taamaattoqartartoq, ‘aningaasartuutissat naatsorsortariaqarput’. (Lukasi 14:28) Aalajangertariaqarpugut piffissaq qanoq atsigisoq aliikkutassanut atortassanerlutigu. Sunngiffimmi sammisassanut ima piffissaqarniartigissanngilagut nammineq Biibilimik atuaqqissaarnissamut, ilaqutariittut atuaqqissaaqatigiinnissamut, kristumiut ataatsimiinnerinut najuunnissamut oqaluussinissamulluunniit piffissaarulluta. (Markusi 8:36) Sunngiffimmili sammisartagarput Guutimut kiffartornitsinni nukissaqalissutigisarutsigu imaassinnaavoq isummertugut tamatuminngarpiaq sammisaqarnissamut piffissamik atuinerput uagutsinnut iluaqutaasoq.

Kikkut ikinngutigaakka?

13. Sooq sunngiffitsinni kikkut peqatigisarnerlutigit eqqarsaatigeqqissaartariaqarparput?

¹³ Apeqqutit pingajuat imaappoq: Sunngiffinni kikkut peqatigisarpakka? Apeqqummut tamatumunnga akissuterput pingaaruteqarpoq inuit peqatigisartakkavut sunngiffimmi sammisatta pitsaassusiannut sunniuteqangaarsinnaammata. Assersuutigalugu inunnik allanik nereqateqarnissarput nuannarisarparput. Sunngiffimmi sammisartakkanut tunngatillugu aamma taamaappoq. Ikinngutigilluakkavut ilagigaangatsigit sunngiffimmi sammisaqarnitsinni nuannisarnerusarpugut. Taamaattumik paasinarpoq ilarpassuatta, ingammik inuusuttortatta, sunngiffimmi allanik sammisaqaqateqarnissartik nuannarisarmassuk. Sunngiffimmili sammisassanik toqqaannginnitsinni kikkut peqatigisarusunnerlugit kikkullu ilaginaveersaassanerlugit aalajangertariaqarpugut. Tamanna sunngiffimmi sammisariniakkatta uagutsinnut iluaqutaanerata qulakkeernissaanut iluaqutigissavarput. — 2 Nalunaarsuutit 19:2; atuaruk Ussatit 13:20; Jaaku 4:4.

14, 15. (a) Jiisusip maligassiaa ikinngutinik pitsaasunik toqqaanissamut qanoq iluaqutigissavarput? (b) Ikinngutinik toqqaassatilluta imminut qanoq aperisariaqarpugut?

¹⁴ Jiisusip maligassiaanik malinninnerput ikinngutinik pitsaasunik toqqaanissamut iluaqutigissavarput. Jiisusip pinngortitsisoqarmalli  inuit nuannaarutigai. (Ussatit 8:31) Nunarsuarmiikkallarami kikkunnik tamanik asannittumik isumassuisarlunilu ataqqinnittarpoq. (Matthæusi 15:29-37) Jiisusilli nalunngilaa ikinngutinnersuuneq qanimullu ikinngutaaneq assigiinngissuteqartut. Jiisusip kikkut tamaasa ikinngutinnerfigisarpai, piumasaqaatinilli aalajangersimasunik eqqortitsisut kisiisa qanimut ikinngutigisarpai. Apustilini aalajaatsut aqqanillit saaffigalugit Jiisusi ima oqarpoq: “Inassutikka malillugit iliorussi tassaassaasi ikinngutikka.” (Johannesi 15:14; aamma takuuk Johannesi 13:27, 30) Jiisusip imminik malinnittut Jehovamullu kiffartortut kisiisa qanimut ikinngutissamisut toqqartarpai.

¹⁵ Arlaannik qanimut ikinngutissattut toqqaannginninni silatusaassaatit Jiisusip oqaasii eqqaamagukkit. Imminut ima aperigit: ‘Inuup taassuma oqaatsimigut iliuutsimigullu ersersippaa Jehovap Jiisusillu peqqussutaannut naalattarluni? Ajunngitsut nuannarai ajortullu uumigalugit? Guutip naalagaaffianik inuuninni pingaarnerpaatitsinissamut Jehovamullu kiffartorninni ilumoorfiginnittuunissannut ikiorsinnaavaanga?’ Apeqqutit taakku aappimik akigukkit, pitsaasumik sunngiffinnilu peqatigisinnaasannik ikinnguteqarsimassaatit. — Atuaruk Tussiaat 119:63; 2 Korinthimiut 6:14; 2 Timotheusi 2:22.

Sunngiffimmi samminiakkavut najoqqutassianut Biibilimiittunut naapertuuppat?

16. Sunngiffimmi sammisassanik aliikkutassanillu toqqaannginnitsinni imminut qanoq aperisariaqarpugut?

¹⁶ Sunngiffimmi sammisassat aliikkutassallu pillugit apeqqutit pingasut uku sammereerpavut: Suut? Piffissaq qanoq atsigisoq? aamma Kikkut? Aliikkutaqannginnitsinni eqqarsaatigeqqissaaqqaartariaqarparput aliikkutariniakkatta pitsaassusia, qanoq piffissartornartiginera kikkullu peqatigalugit aliikkutarissanerivut. Sunngiffimmi sammisavut aliikkutavullu uagutsinnut iluaqutaassappata najoqqutassianut Biibilimiittunut naapertuuttariaqarput. Aliikkutatta pitsaassusia eqqarsaatigalugu ima aperisariaqarpugut: Aliikkutariniakkavut suuppat? Jehovap akuerai, imaluunniit nakuusertortaqarlutillu kinguaassiuutitigut inuunerluttortaqarpat? (Ussatit 4:20-27) Aamma imminut ima aperisariaqarpugut: Piffissaq qanoq atsigisoq aliikkutassanut atortassavara? Piffissaq tamakkununnga atortagara qanorluunniit atsigaluniluunniit annikitsigigaluarpat, piffissamik silatusaartumik atuinerua? (1 Timotheusi 4:8) Peqatigisartakkanullu tunngatillugu imminut ima aperisariaqarpugut: Kikkut aliikkutaqaqatiginiarpakka? Taakku uannut ikinngutaalluarsinnaappat, imaluunniit ikinngutipalaajuppat? — Oqaluussisartup oqaasii 9:18; 1 Korinthimiut 15:33.

17, 18. (a) Qanoq ililluta paasisinnaavarput aliikkutariniakkavut najoqqutassianut Biibilimiittunut naapertuunnersut? (b) Sunngiffimmi sammisassanut tunngatillugu illit suna aalajangiusimaviuk?

¹⁷ Aliikkutariniakkavut pingasunut taakkununnga tunngatillugu najoqqutassianut Biibilimiittunut naapertuutinngikkunik iluaqutaasimassanngillat. Sunngiffimmili samminiakkavut aliikkutariniakkavullu najoqqutassianut Biibilimiittunut naapertuuppata Jehovamut ataqqinaataasimassapput uagutsinnullu iluaqutaasimassallutik. — Tussiaat 119:33-35.

¹⁸ Aliikkutassanut tunngatillugu aalajangigassaqaraangatta eqqortumik toqqaajumalluta, piffissaq silatusaartumik atorumallugu ikinngutinillu pitsaasunik toqqaajumalluta sapinngisarput tamaat iliuuseqartariaqarpugut. Biibilimi kajumissaarutigineqartoq una malillugu iliornissarput qamannga pisumik kissaatigisariaqarparput: “Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.” — 1 Korinthimiut 10:31.

[Quppernerup ataani ilanngussaq]

Eqqaamaviuk?

Aliikkutassanut tunngatillugu najoqqutassiat allassimaffinni ukunaniittut qanoq atorsinnaavigit?

• Filippimiut 4:8

• Matthæusi 6:33

• Ussatit 13:20

[Atuaqqissaarnermi apeqqutit]

[Qupp. 13-mi diagrammi]

(Allassimasut qanoq inissisimanersut naqitami takuneqarsinnaavoq)

✔Suut

[Qupp. 14-mi diagrammi]

(Allassimasut qanoq inissisimanersut naqitami takuneqarsinnaavoq)

✔Piffissaq qanoq atsigisoq

[Qupp. 16-mi diagrammi]

(Allassimasut qanoq inissisimanersut naqitami takuneqarsinnaavoq)

✔Kikkut

[Qupp. 14-mi assiliartaq]

Jiisusip maligassiaa ikinngutinik pitsaasunik sunngiffimmilu sammisassanik toqqaanissamut qanoq iluaqutigissavarput?