Eriyitsemesya Lyawu Linemwendi Kughasira?
Eriyitsemesya Lyawu Linemwendi Kughasira?
“Mwighe eriminya ebikatsemesaya Omukama.”—EFE. 5:10.
1, 2. (a) Ekinywe kya Nyamuhanga kikakanganaya kithi ngoku Yehova anzire ithwatsemera engebe? (b) Erilhangira eriyitsemesya ng’olhusunzo kutse ekihembo kya Nyamuhanga kikendi leka ithwakolhaki?
OMWA Biblia eyosi thukabanamo ebinywe ebikakanganaya ngoku Yehova anzire ithwabyaho kandi ithwatsemera engebe. Ng’eky’erileberyako, Esyonyimbo 104:14, 15 hakabugha hathi Yehova akalhasaya ebyalya busana n’omundu, ‘n’ebinyu eby’erimutsemesya, n’amaghutha w’erihakabya obusu biwe, n’obundu bw’erimuha akaghalha.’ Ni kwenene, Yehova akalhasaya ebirimwa nuku bihulhukaye esyonguma, amaghutha, n’ebinyu [evini] nuku thubyeho. Aliwe kandi evini ‘yikaleka omuthima iniatsema.’ Bikakolha ekirengire aho ekikayithaghisibawa engebe eribyaho kandi bikongera okwa tseme yethu. (Omu. 9:7; 10:19) Omo kwenene, Yehova anzire ithwatsema, emithima yethu iyosulhamo “obutseme.”—Emib. 14:16, 17.
2 Kwesi, sihali enzumwa eyanga leka thukayowa nabi thwamabana endambi ‘y’erisamalira esyonyonyi sy’omo kyanya n’ebiranga-ranga by’omoli’ kutse thukatsemera eyindi mibiiri eyikathulhuhukaya n’eryuwania engebe yethu. (Mt. 6:26, 28; Esy. 8:3, 4) Engebe eyuwene ni “lhusunzo lhwa Nyamuhanga.” (Omu. 3:12, 13) Erilhangira endambi y’eriyitsemesya ng’ekitsweka ky’okwa lhusunzo [ekihembo] olho kikendi leka ithwakolesyayo omo nzira eyikatsemesaya Oyuwathuhakyo.
Obunene n’Olhubibi
3. Busana naki ni ky’amenge eriminya ngoku eby’eriyitsemesyamo ni binene?
3 Abawithe amalengekania awatholere okwa by’eriyitsemesya bangana yitsemesya omwa bindu bingyi aliwe ibanawithe olhubibi. Busana naki? Erithoka erisubirya ekyo, leka thulinganisaye eby’eriyitsemesya n’ebyalya. Obuli kihugho kiwithe ebyalya byakyo ebyasibwe. Ni kwenene, ebyalya ebyo abandi bakatsemera ehandi abandi banganabya isibali bitsemera. Omwa nzira iyan’eyo, Abakristayo ab’omwa kindi kihugho eby’abakalhangira nga ni by’eriyitsemesya ebyuwene byanganabya isibiritsemesaya Abakristayo ab’omwa kindi kihugho. Nibya n’okwa Bakristayo aban’ikere omwa kitsweka kighumerere, ekyo wundi akalhangiramo nga n’ilhuhuka (obundi ng’erisoma ekitabu), owundi angakilhangira ng’ekitha bulhundu; ekya owundi akalhangira nga ni yitsemesya (obundi ng’eriyibungya-bungya omw’ighendya eggali), owundi ng’ekikalhuhaya. Nomwabine, thukaligha ngoku oko myatsi y’ebyalya n’ey’eriyitsemesya, eby’eriyitsemesyamo ni binene kandi obuli mundu awithe ekyanzire.—Abar. 14:2-4.
4. Busana naki thutholere ithwahiraho olhubibi bikahika okwa by’eriyitsemesya ebya thukasombolha? Iha eky’erileberyako.
4 Aliwe, kandi thunasi ngoku eriminya ngoku ni binene eby’eriyitsemesyamo ekyo sikirileka thukabya n’obwiranda bw’eribisangiramo. Ng’eky’erileberyako, thuthasyalebaya eky’erileberyako ky’ebyalya. Nomwakine indi thwanganabya ithunanzire erirya ebyalya muthina-muthina, sithwangalya ebyalya ebitsandire omw’ikighenderera. Erirya ebyalya ng’ebyo ikikendi kangania kithi si thuwithe menge kandi kyangana tsandya amaghalha wethu. Kuthya, nomuthwangabya ithuwithe eby’eriyitsemesyamu muthina-muthina ebyuwene, sithwanga sangira omwa by’eriyitsemesya ebyangahira engebe yethu y’omwakabi, eby’obwithi, kutse eby’esyongeso ebitsandire. Erisangira omwa bindu ng’ebyo iwukendibya iwamathwa emisingyi ye Biblia kandi ibyangana thutsandya kinyamubiri na bunyakirimu. Erithoka eribya ithunawithe olhubibi olhuwene, thukakolha ndeke thukatsuka erilebya eby’eriyitsemesyamo birebe ebya thukatsemera nga byangana thughasira kutse eyihi. (Efe. 5:10) Thwanga kolha ekyo kya thuthi?
5. Thwanga minya thuthi eby’eriyitsemesya byethu nga binahambene n’ebihano bya Yehova?
5 Eriyitsemesya erithoka erithughasira n’eritsemesya Yehova, litholere iryahambangana n’ebihano birebe ebiri omwa Kinywe kya Nyamuhanga. (Esy. 86:11) Erithoka eriminya omulingo mulebe w’eby’eriyitsemesyamo ebya wanzire ng’anahambene n’ekyo, iwanganahandika elisti. Elisti eyo hirako ebibulyo bisathu bino mwamuliki, mughulhu wahi, kandi ni bahi. Leka thulebaye kighuma okwa kighuma.
Mwamuliki?
6. N’iyitsemesya lyahi erya thutholere ithwaghana, kandi busana naki?
6 Wuthe wasangira omwa mulingo mulebe w’eriyitsemesya, tsuka eriyibulya, Mwamuliki?—ni bugha ambu, ‘Eriyitsemesya erya nganzire lisosire lithi?’ Wukasondya eky’erisubirya, ni kibuya eribya iwun’ibukire ngoku hali emiringo ibiri ey’eby’eriyitsemesya. Ow’erimbere, thukabugha thuthi eyihi; owakabiri, ithwabugha thuthi obundi. Ow’erimbere w’owahi? Omwa kihugho kibi kino, ebingyi eby’eriyitsemesyamo byoswire mw’emyatsi eyikathwa emisingyi ye Biblia kutse ebihano bya Nyamuhanga. (1 Yn. 5:19) Abakristayo ab’okwenene bakaghanira ighuma eby’eriyitsemesya ebyosi ebyo. Ebi mwamuli eriyitsemesya eririmo amalhwa, esyombinga, ab’olhubutho olhusosene erikolhanako emyatsi y’engyingo, eponografe, kutse eby’obwithi kutse ebikahalhamba eyindi mitse mibi ey’obutswatswa. (1 Kor. 6:9, 10; soma Eribisulirwa 21:8.) Nomuthwangabya ithuli hayi, thukakanganaya Yehova ngoku ‘thukakwa ekibi kyo nye’ omw’ighana erisangira omw’iyitsemesya ng’eryo.—Abar. 12:9; 1 Yn. 1:5, 6.
7, 8. Thwanga lebya thuthi ndeke omulingo mulebe w’eriyitsemesya? Iha eky’erileberyako.
7 Omulingo wakabiri w’eeriyitsemesya muli eby’eriyitsemesya ebithaseghemere okwa bindu ebilhangirikire ngoku Ekinywe kya Nyamuhanga kikabithanga. Omwa mibere ng’eyo, thuthe thwasombolha eby’eriyitsemesya, thutholere ithwatsuka erilebya ndeke emisingyi ye Biblia nuku thuminye nga binahambene n’amalengekania wa Yehova. (Emi. 4:10, 11) Neryo thutholere ithwayithwiramo ebikendi leka ithwasighalha ithune n’obunyamuthima-thima obuwene. (Gal. 6:5; 1 Tim. 1:19) Ekyo thwanga kikolha thuthi? Thalengekania oku kino: Thuthe thwalya ebyalya ebya thuthasi, thutholere ithwatsuka eriminya ebikulhu-bikulhu ebiri omo byalya ebyo. Kuthya, thuthe thwasangira omwa mulingo mulebe w’eriyitsemesya, thutholere ithwatsuka eriminya ebikulhu-bikulhu ebirimo.—Efe. 5:17.
8 Ng’eky’erileberyako, wanganabya iwanzire eby’amasatha, kandi ekyo kikayitheghereribawa. Eby’amasatha byangana tsemesya. Aliwe ibbwa, wamabya iwanzire eby’amasatha birebe kundi birimo amalingwatha, eritsama esyongebe, abandu erihuthangalha, emikonga y’amalhwa, erihalhamba erihanga, kutse ebindi ng’ebyo? Enyuma w’erilebya ebirimo, iwangana thwamu wuthi kyangana kalha erihambania amalengekania wawu n’awa Yehova kandi n’omwatsi w’obuholho n’olhwanzo ogho thukathulira abandi. (Isa. 61:1; Gal. 5:19-21) Okwa lhundi lhuhandi, omulingo mulebe w’eriyitsemesya amabya inialimo ebikatsemesaya Yehova, neryo eriyitsemesya ng’eryo iryangana kughasira kandi iryakuhumulikania.—Gal. 5:22, 23; soma Abanya Filipi 4:8.
Nanga Sangira Mubyo Mughulhu Wahi?
9. Eky’erisubirya okwa kibulyo kyethu, ‘Nanga sangira omw’iyitsemesya mughulhu wahi, kikabisulhaki?’
9 Ekibulyo ekyakabiri ly’eriyibulya wuthi, Mughulhu wahi?—ni bugha ambu, ‘Nanga sangira omwa by’eriyitsemesya mughulhu wahi? Ngendi ghunza ndambi nyingahi?’ Ebya thukasubiraya okwa kibulyo mwamuliki? bikabisulha bingyi okwa bya thukalengekanaya—ebya thutholere ithwaligha n’ebya thutholere ithwaghana. Aliwe, eky’erisubirya okwa kibulyo mughulhu wahi? kikakanganaya ebya thukahira embere—ekya thukalhangira ini ky’omughaso n’ekya thukalhangira isi ky’omughaso. Neryo kwesi, thwanga minya thuthi olhulengo lhw’ebya thukayitsemesayamo nga lhunatholere?
10, 11. Ebinywe bya Yesu ebiri omu Matayo 6:33 byanga thuwathikya bithi erithwamu nga thughunze ndambi nyingahi omwa by’eriyitsemesya?
10 Yesu Kristo mwabwira abigha biwe athi: “Wanze Omukama Nyamuhanga wawu n’omuthima wawu wosi, n’ekirimu kyawu kyosi, n’obulengekania bwawu bwosi, n’amaaka wawu wosi.” (Mk. 12:30) Busana n’ekyo, thukahira olhwanzo olhwa thuwithire Yehova lhw’embere omo ngebe yethu. Thukakanganaya eki omw’ighendera okw’ihabulha lya Yesu lino: “Nikwa mutsuke erisonda Obwami bwa Nyamuhanga n’erithunganene liwe, nayu asyabaha ebindu byosi ebi.” (Mt. 6:33) Ebinywe ebi byanga thuwathikya bithi eriminya eriyitsemesya nga ni ly’omughaso mungahi embere syethu kandi nga thutholere ithwalighunzako ndambi nyingahi?
11 Thalhangira kino: Yesu mwathubwira athi ‘thulhole embere eritsuka erisondya obwami.’ Mwathathubwira athi ‘thulhole embere erisondya obwami busa.’ Ahathe erithika-thika, Yesu abya inianasi ngoku thwangayithaghire erisondya ebindu bingyi eryongera okwa Bwami. Thukayithagha ah’erikalha, ebyalya, eky’eriambalha, esukuru y’omusingyi, omubiiri, eriyitsemesya, n’ebindi n’ebindi. Aliwe, omwa byosi ebya thukasondaya, ekighuma kisa ky’ekitholere eribya embere—emyatsi y’Obwami. (1 Kor. 7:29-31) Ekwenene ngulhu eyo yitholere iyathuhira mw’omuhwa w’erikwamirira ebindi, imwamuli eriyitsemesya, omwa nzira eyikendi thuthokesya erikolha omubiiri wethu mukulhu—eritsomana emyatsi y’Obwami. Thwamakolha ekyo, ithwangana ghasirwa thwamayitsemesya okwa lhulengo olhutholere.
12. Omusingyi owali omu Luka 14:28 angakolesibwa athi bikahika okw’iyitsemesya?
12 Neryo kwesi bikahika okwa ndambi eya thukaghunza omw’iyitsemesya, thukakolha ndeke thukasangwa thwalebya ebikayithaghisibawa. (Lk. 14:28) Thutholere ithwaminya eby’eriyitsemesya birebe nga bikendi thuyithaghako bingahi. N’ekindi, thutholere ithwalebya endambi yethu nga ni ya bughuli bungahi. Erisangira omwa mulingo mulebe w’eby’eriyitsemesya lyamabya irikendi leka ithwaghalhaghandya emibiiri mukulhu ng’eriyeghesya, eriramya ly’eka, erihindana okwa mihindano, kutse erisangira omw’ithulhughania Obwami, ebyo ibikendibya isibitholere. (Mk. 8:36) Aliwe eriyitsemesya ery’obuthuku bulebe lyamabya irikendi thuhiramo omuhwa w’erikwamirira emyatsi y’Obwami, ithwangana thwamu thuthi endambi eyathukaghuzna okw’iyitsemesya eryo yitholere.
Ni Bahi Abo Ngendibya Nabo?
13. Busana naki thutholere ithwalengekania ndeke okwa abo thwanga sangira nabo omw’iyitsemesya?
13 Ekibulyo ekyakasathu ky’eriyibulya kyakino, Ni bahi?—ni bugha ambu, ‘Ni bahi abo nganzire erisangira nabu omw’iyitsemesya?’ Ni kikulhu erilengekania okw’eki bikahika okw’iyitsemesya. Busana naki? Kundi abo wukendi sangira nabo omw’iyitsemesya babakendi leka iryuwana. Ngoku mughulhu mungyi erirya ebyalya likatsemesaya wamabirya iwune n’abanywani abuwene, kuthya n’eriyitsemesya mughulhu mungyi likatsemesaya wamalisangiramo iwune n’abanywani abuwene. Kwesi ni kwenene abangyi omw’ithwe, kutsibu-tsibu abalere, bakatsemera eriyitsemesya ibane n’abandi. Aliwe, erilhangira thuthi eriyitsemesya lirebe likathughasira, ni ky’amenge erisangwa thwalebya nga ni bandu mulingoki abo thwanga sombolha eribya nabo thukayitsemesya kandi nga ni bahi abo thwanga yihighulhako.—2 Emy. 19:2; soma Emisyo 13:20; Yak. 4:4.
14, 15. (a) Ni ky’erileberyako kyahi ekya Yesu ahiraho bikahika okw’isombolha abanywani abuwene? (b) Ni bibulyo byahi ebya thwanga yibulya bikahika okwa banywani bethu?
14 Erikwama eky’erileberyako kya Yesu bikahika okw’isombolha abanywani kikendi thughasira kutsibu. Eritsuka okw’ihangika, Yesu inianzire abandu. (Emi. 8:31) Iniane okwa kihugho, Yesu mwakangania kw’anzire abandu b’emisindo yosi. (Mt. 15:29-37) Aliwe Yesu mwakangania embaghane eyiri ahakathi-kathi k’eriyihira okwa bandu n’eribya munywani w’okwa ndungo. Nomwakine indi mwayihira okwa bandu bosi, abya munywani w’okwa ndungo ow’abo ababya bakaghendera okwa bihano birebe basa. Akakania n’abakwenda biwe 11 abathaleghulha, Yesu mwabugha athi: “Nenyu muli bira baghe, mwamakolha ebyo ngabahana.” (Yn. 15:14; lebaya na Yoane 13:27, 30.) Abandu abo Yesu angirira ng’abanywani bwiwe babo abamukwama n’erikolera Yehova.
15 Kwesi wukathwamu nga wunasombole omundu mulebe eribya munywani wawu w’okwa ndungo kutse eyihi, ikikendibya ky’amenge eryibuka ebinywe bya Yesu. Yibulhaye ebibulyo nga bino: ‘Mbwino omundu oyu akanakanganaya omwa by’akabugha n’omwa mikolere ngoku akaghondera ebihano bya Yehova na Yesu? Mbwino anawithe emibere n’esyongeso ebiseghemere okwa Biblia ng’ingye? Mbwino erimunywana kinemwendi nyihiramo omuhwa w’erihira Obwami bw’embere n’eribya mughombe muthaleghulha wa Yehova?’ Wamabya iwunakakasirye wuthi eby’erisubirya okwa bibulyo ebi ni ee, neryo aho iwabiribana omunywani oyuwene oyo wanga sangira nayu omwa by’eriyitsemesya.—Soma Esyonyimbo 119:63; 2 Kor. 6:14; 2 Tim. 2:22.
Eriyitsemesya Lyethu —Mbwino Linuwene?
16. Ni byahi ebya thutholere ithwalebya bikahika okw’iyitsemesya lyethu?
16 Omwa bikuhi thwamabirikania okwa syonzira isathu esihambire okw’iyitsemesya—obuwane bwalyo, obunene, n’ab’eribya nabo. Eriyitsemesya lyethu erithoka erithughasira, litholere iryahambangana n’ebihano ebiseghemere okwa Biblia omwa buli nzira. Busana n’ekyo, thuthe thwasangira omw’iyitsemesya lirebe, thutholere ithwatsuka eririkolerya ndeke. Bikahika okwa obuwane bwalyo, thwanzire ithwaminya bino: ‘Eriyitsemesya eri mwamuliki? Mbwino linuwene kutse eyihi?’ (Emi. 4:20-27) Bikahika okwa bunene bwalyo, thwanzire ithwaminya bino: ‘Ngendi ghunzamo ndambi nyingahi? Mbwino nina ndambi eyitholere kutse eyihi?’ (1 Tim. 4:8) Kandi bikahika okw’abo ngendibya nabo, thutholere ithwalebya bino: ‘Ni bahi abo ngendi sangira nabo omw’iyitsemesya eri? Mbwino nina banywani abuwene kutse ni babi?’—Omu. 9:18; 1 Kor. 15:33.
17, 18. (a) Thwanga yilebya thuthi eriminya eriyitsemesya lyethu nga linahambene n’ebihano bye Biblia? (b) Iwe wamathwamu erikolhaki bikahika okw’isombolha eby’eriyitsemesya?
17 Eriyitsemesya lirebe lyamathendi hambana n’ebihano ebiseghemere okwa Biblia omwa nzira isathu esi, neryo obo isiryuwene. Okwa lhundi lhuhandi, thwamalhangira thuthi eriyitsemesya lyethu likahambana n’ebihano bye Biblia omwa syonzira syosi isathu esi, erikendi leka Yehova iniapipwa kandi iryathughasira.—Esy. 119:33-35.
18 Neryo kwesi bikahika okw’iyitsemesya, thulengeho erikolha ekitholere okwa ndambi eyitholere kandi haghuma n’abandu abatholere. Kwesi, libye eriyisunza ly’obuli mughuma w’okw’ithwe erithwamu erikwama erihabulha lye Biblia lino: “Wamalya akalyo kutse wukapulya, kutse wamakolha ekindu ki, wukole ebyosi busana n’eriha olhukengerwa oku Nyamuhanga.”—1 Kor. 10:31.
Wangana Soborera?
Bikahika okw’iyitsemesya, wanga ghendera wuthi okwa misingyi eyiri omwa . . .
• Matayo 6:33?
• Emisyo 13:20?
[Ebibulyo]
[Ekisasani]
(For fully formatted text, see publication)
✔Mwamuliki
[Ekisasani]
(For fully formatted text, see publication)
✔Mughulhu Wahi
[Ekisasani]
(For fully formatted text, see publication)
✔Ni Bahi
[Ekisasani]
Thwanga kwama thuthi eky’erileberyako kya Yesu thukasombolha abanywani bethu n’eby’eriyitsemesyamo?