Дӕ ирхӕфсӕнтӕ дын пайда хӕссынц?
Дӕ ирхӕфсӕнтӕ дын пайда хӕссынц?
«Ӕппынӕдзух бӕлвырд кӕнут, нӕ Хицауы зӕрдӕмӕ цы цӕуы, уый» (ЕФ. 5:10).
1, 2. а) Кӕцӕй йӕ зонӕм, Йегъовӕйы кӕй фӕнды, цӕмӕй нын цард циндзинад хӕсса? ӕ) Ирхӕфсӕнтӕн цы рӕстӕг рахицӕн кӕнӕм, уый дӕр Хуыцауы лӕвар кӕй у, уымӕ гӕсгӕ нӕ хъуамӕ цы фӕнда?
ЙЕГЪОВӔЙЫ фӕнды, цӕмӕй ӕнӕуи нӕ бонтӕ ма ’рвитӕм, фӕлӕ ма нын цӕмӕй цард циндзинад дӕр хӕсса. Уый тыххӕй Библийы бирӕ рӕтты ис фыст. Зӕгъӕм, Йегъовӕйы тыххӕй Псаломы 104:14, 15 фыст ис, зӕгъгӕ, афтӕ бакӕны, «цӕмӕй зӕхх дӕтта хӕринаг». Дарддӕр та дзы кӕсӕм: «Дӕттыс сӕн, цӕмӕй адӕймаджы зӕрдӕ хъӕлдзӕг кӕна, ӕмӕ оливӕйы сой, цӕмӕй дзы цӕсгом ӕрттива, ӕмӕ дзул, цӕмӕй дзы адӕймаг йӕ зӕрдӕ фидар кӕна». О, Йегъовӕ нын дӕтты хӕринаг, цӕмӕй цӕрӕм. Уый ратты тыллӕг, ӕмӕ нын вӕййы хор, сой ӕмӕ сӕн. Зӕгъӕм, сӕн цӕрынӕн ӕнӕмӕнг нӕ хъӕуы, фӕлӕ дзы адӕймаджы зӕрдӕ бахъӕлдзӕг вӕййы (Еккл. 9:7; 10:19). Йегъовӕйы фӕнды, цӕмӕй уӕм хъӕлдзӕг, зӕрдӕрухс, цӕмӕй нӕ зӕрдӕтӕ цинӕй ӕфсӕст уой (Хъуыд. 14:16, 17).
2 Уӕдӕ-иу хатт «уӕларвон мӕргътӕм» кӕнӕ «быдыры дидинджытӕм» кӕсынӕн рӕстӕг куы рахицӕн кӕнӕм, уӕд уым ӕвзӕрӕй ницы уыдзӕн. Ахӕм хъуыддӕгтӕ нӕ бауадзынц ног хъарутӕ ӕмӕ нын нӕ цард кӕнынц рӕсугъддӕр (Матф. 6:26, 28; Пс. 8:3, 4). Дӕ зӕрдӕ кӕмӕй райа, ахӕм цард та у «Хуыцауы лӕвар» (Еккл. 3:12, 13). Ӕмӕ ирхӕфсӕнтӕн кӕй рахицӕн кӕнӕм, уыцы рӕстӕг дӕр хауы уыцы лӕвармӕ. Уымӕ гӕсгӕ нӕ хъуамӕ фӕнда ахӕм ирхӕфсӕнтӕ равзарын, цӕмӕй Хуыцауы зӕрдӕмӕ цӕуой.
Алыхуызон – фӕлӕ алкӕцы хорз нӕу
3. Алыхуызон адӕм алыхуызон ирхӕфсӕнтӕ цӕмӕн равзарынц?
3 Ирхӕфсӕнтӕм ӕмӕ фӕллад уадзынмӕ раст цӕстӕй чи кӕсы, уыдон ӕй зонынц, сӕ бон кӕй у, сӕ фӕллад куыд уадздзысты, уый равзарын. Фӕлӕ ма уый дӕр зонынц, ӕмӕ ирхӕфсӕнтӕй алкӕцы хорз нӕу. Цымӕ алыхуызон адӕм алыхуызон ирхӕфсӕнтӕ цӕмӕн равзарынц? Нӕ бон у ацы хъуыддаг, хӕринаг куыд февзарӕм, уыимӕ абарын. Зӕгъӕм, иу бӕстӕйы адӕм цы хӕринаг уарзынц, уый, гӕнӕн ис, ӕндӕр бӕстӕйы адӕммӕ фӕкӕса ӕнад. Афтӕ алы бӕстӕты цӕрӕг чырыстӕттӕ дӕр сӕ фӕллад алыхуызон фӕуадзынц. Суанг ма, иу бӕстӕйы чи цӕры, уыдон дӕр иухуызон ирхӕфсӕнтӕ нӕ равзарынц. Зӕгъӕм, чидӕр чингуытӕ кӕсын уарзы ӕмӕ йӕ фӕллад афтӕмӕй суадзы, чидӕр та чингуытӕй тыхсгӕ кӕны. Кӕмӕдӕр хорз кӕсы велосипедыл цӕуын, кӕмӕдӕр та – нӕ. Уӕдӕ алчидӕр, цы хӕринаг уарзы, уый куыд равзары, афтӕ нӕ бон у, нӕ зӕрдӕмӕ чи цӕуы, ахӕм ирхӕфсӕнтӕ равзарын (Ром. 14:2–4).
4. Нӕхи куыд ирхӕфсӕм, ууыл цӕмӕн хъуамӕ хъуыды кӕнӕм? Ӕрхӕсс цӕвиттон.
4 Фӕлӕ кӕд нӕ бон ирхӕфсӕнтӕ ӕвзарын у, уӕддӕр уый ууыл дзурӕг нӕу, ӕмӕ нӕ цыдӕриддӕр фӕнды, уый аразӕм. Ногӕй та хӕринаджы цӕвиттоныл ахъуыды кӕнӕм. Кӕд алыхуызон хӕринӕгтӕ уарзӕм, уӕддӕр, чи сӕвзӕр, ахӕм хӕринаг зонгӕ-зонын нӕ бахӕрдзыстӕм. Уый уаид ӕнӕзонд ми, стӕй ма рынчын дӕр фӕуиккам. Афтӕ у ирхӕфсӕнты хабар дӕр. Нӕ зӕрдӕмӕ фӕцӕуы алыхуызон хорз ирхӕфсӕнтӕ. Фӕлӕ кӕд ирхӕфсӕнтӕ баст сты ӕнӕгъдаудзинадимӕ, тыхмиимӕ ӕмӕ цардӕн тӕссаг сты, уӕд сӕ нӕ равзардзыстӕм. Ахӕм хъуыддӕгтӕ сты Библийы уагӕвӕрдты ныхмӕ. Стӕй уыдоны тыххӕй Йегъовӕйӕ адард уыдзыстӕм ӕмӕ ма не ’низдзинадӕн дӕр зиан ӕрхӕсдзысты. Уӕдӕ хъуамӕ ӕмбарӕм, алкӕцы ирхӕфсӕн хорз кӕй нӕу, ӕмӕ сӕ ӕвзаргӕ дӕр уымӕ гӕсгӕ кӕнӕм. Хъуамӕ-иу лӕмбынӕг ахъуыды кӕнӕм, нӕ фӕллад суадзын нӕ куыд фӕнды, ууыл, ӕмӕ-иу уый фӕстӕ равзарӕм, пайда нын чи ’рхӕсдзӕн ӕмӕ Йегъовӕйы зӕрдӕмӕ чи фӕцӕудзӕн, ахӕм ирхӕфсӕн (Еф. 5:10). Нӕ бон куыд у хорз ирхӕфсӕн равзарын?
5. Нӕ ирхӕфсӕнтӕ Йегъовӕйы зӕрдӕмӕ цӕуынц ӕви нӕ, уый куыд ис базонӕн?
5 Цӕмӕй нын ирхӕфсӕнтӕ пайда хӕссой ӕмӕ Йегъовӕйы зӕрдӕмӕ цӕуой, уый тыххӕй хъуамӕ Библийы уагӕвӕрдты ныхмӕ ма уой (Пс. 86:11). Ирхӕфсӕн ӕвзаргӕйӕ дӕ бон у ӕртӕ хуымӕтӕг фарстайыл ахъуыды кӕнын: цавӕр ирхӕфсӕн у? Цас рӕстӕг ыл бахардз кӕндзынӕ? Ӕмӕ дӕ рӕстӕг кӕимӕ ӕрвитдзынӕ? Ныртӕккӕ сыл аныхас кӕндзыстӕм.
Цавӕр ирхӕфсӕн у?
6. Нӕхи бынтондӕр цавӕр ирхӕфсӕнтӕй хъуамӕ хизӕм ӕмӕ цӕмӕн?
6 Ирхӕфсӕн равзарыны размӕ-иу ахъуыды кӕн: цавӕр ирхӕфсӕн у? Дӕ зӕрдыл дар, ирхӕфсӕнтӕ дыууӕ хуызы кӕй сты. Фыццӕгтӕм хауынц, нӕхи бынтондӕр кӕмӕй хъуамӕ хизӕм, ахӕм хъуыддӕгтӕ. Иннӕтӕ та ахӕмтӕ сты, ӕмӕ сӕ кӕнӕ ис равзарӕн, кӕнӕ – нӕ. Фыццӕгтӕм цы хауы? Ацы фыддунейы бирӕ ирхӕфсӕнтӕ сты комкоммӕ Библийы уагӕвӕрдты кӕнӕ Хуыцауы закъӕтты ныхмӕ (1 Иоан. 5:19). Ӕцӕг чырыстӕттӕ ахӕм ирхӕфсӕнтӕй хъуамӕ сӕхи бынтондӕр хизой. Уыдонмӕ хауынц, садизмимӕ, хинтӕ-кӕлӕнтимӕ, гомосексуализмимӕ, порнографиимӕ, тыхмиимӕ, алы фыдмитимӕ, стӕй ӕндӕр ӕнӕгъдау митимӕ баст чидӕриддӕр у, ахӕм ирхӕфсӕнтӕ (1 Кор. 6:9, 10; бакӕс Раргомад 21:8). Иунӕгӕй уӕм ӕви искӕимӕ – ахӕм ирхӕфсӕнтӕ никуы равзардзыстӕм. Мах фӕнды, цӕмӕй йӕ Йегъовӕ уына, ӕвзӕрдзинадӕй не сӕфт кӕй уынӕм (Ром. 12:9; 1 Иоан. 1:5, 6).
7, 8. Цы нын баххуыс кӕндзӕн хорз ирхӕфсӕн равзарынӕн? Уый цавӕр цӕвиттонӕй ис равдисӕн?
7 Иннӕ ирхӕфсӕнтӕм чи хауы, уыдоны тыххӕй Библийы комкоммӕ ницы ис фыст. Ахӕм ирхӕфсӕнтӕй цалынмӕ искӕцы равзарӕм, уӕдмӕ нӕ хъӕуы дзӕбӕх ахъуыды кӕнын. Библийы уагӕвӕрдтӕй базонӕн ис, Йегъовӕ хорзыл ӕмӕ растыл цы нымайы, уый. Ӕмӕ хъуамӕ сбӕлвырд кӕнӕм, уыцы ирхӕфсӕнтӕ Библийы уагӕвӕрдты ныхмӕ кӕй не сты (Ӕмб. 4:10, 11). Уый фӕстӕ хъуамӕ равзарӕм, нӕ цӕсгом кӕй тыххӕй нӕ фӕчъизи уыдзӕн, ахӕм ирхӕфсӕн (Гал. 6:5; 1 Тим. 1:19). Уый нӕ къухы куыдӕй бафтдзӕн? Ногӕй та хӕринагыл ахъуыды кӕнӕм. Исты ног хӕринаг бахӕрыны размӕ нӕ фӕфӕнды базонын, цӕмӕй конд у, уый. Раст афтӕ-иу цавӕрдӕр ирхӕфсӕн равзарыны размӕ хъуамӕ базонӕм, цавӕр у ӕмӕ чырыстонӕн йӕхи афтӕ ирхӕфсын ӕмбӕлы ӕви нӕ (Еф. 5:17).
8 Чи зоны, уарзыс спорт, ӕмӕ уым диссагӕй ницы ис, уымӕн ӕмӕ спортивон хъӕзтытӕ адӕймаджы уӕнгрогдӕр ӕмӕ хъӕлдзӕгдӕр кӕнынц. Фӕлӕ иуӕй-иу хатт, адӕймаджы рамбулын кӕй фӕфӕнды, уый тыххӕй свӕййы ӕгъатыр. Кӕнӕ ис ахӕм спорт, ӕмӕ суанг адӕймаджы цардӕн дӕр тӕссаг вӕййы, гӕнӕн ис, ӕмӕ адӕймаг йӕхи тынг ныццӕва кӕнӕ дзы исты асӕтта. Хатт афтӕ вӕййы, ӕмӕ, исчи куы рамбулы, уӕд уыцы хабар афтӕ фӕбӕрӕг кӕнынц, ӕмӕ сӕ уромӕг нал вӕййы, науӕд сӕ бӕстӕйӕ сӕрыстыр свӕййынц. Кӕд дӕ зӕрдӕмӕ ахӕм спорт цӕуы, уӕд куыд хъуамӕ бакӕнай? Цӕимӕ баст у, ууыл куы ахъуыды кӕнай, уӕд, ӕвӕццӕгӕн, ахӕм хатдзӕгмӕ ӕрцӕудзынӕ, ӕмӕ дӕ зондахастӕн Йегъовӕйы зондахастимӕ, стӕй, адӕмӕн фарны ӕмӕ уарзондзинады тыххӕй кӕй хъусын кӕнӕм, уыимӕ иумӕйагӕй ницы ис (Ис. 61:1; Гал. 5:19–21). Фӕлӕ йӕ иугӕр сбӕлвырд кодтай, уыцы ирхӕфсӕн Йегъовӕйы уагӕвӕрдты ныхмӕ кӕй нӕу, уӕд дын пайда ӕрхӕсдзӕн ӕмӕ дӕ ног хъарутӕ бауадздзӕн (Гал. 5:22, 23; бакӕс Филиппӕгтӕм 4:8).
Цас рӕстӕг ыл бахардз кӕндзынӕ?
9. Дыккаг фарстайӕн цавӕр дзуапп ратдзынӕ, уымӕй цы базондзынӕ?
9 Фыццаг кӕуыл аныхас кодтам, уыцы фарста уыд ахӕм: цавӕр ирхӕфсӕн у? Ацы фарстайӕн цавӕр дзуапп ратдзыстӕм, уымӕй бӕрӕг уыдзӕн, цы уарзӕм, раст ӕмӕ нӕм хорз цы кӕсы, уый. Дыккаг фарста у ахӕм: цас рӕстӕг ыл бахардз кӕндзынӕ? Ацы фарстайӕн цавӕр дзуапп ратдзынӕ, уымӕй та бӕрӕг уыдзӕн, царды дын сӕйрагдӕр ӕмӕ ахсджиагдӕр цы у, уый. Ирхӕфсӕнтӕ нӕ царды цавӕр бынат ахсынц, уый нӕ бон куыд у базонын?
10, 11. Матфейы 6:33 фыст ныхӕстӕ нын куыд баххуыс кӕндзысты, ирхӕфсӕнтыл цас рӕстӕг хъуамӕ хардз кӕнӕм, уый сбӕлвырд кӕнынӕн?
10 Йесо Чырысти загъта: «Дӕ Хуыцау Йегъовӕйы уарз ӕппӕт зӕрдӕйӕ, ӕппӕт удӕй, ӕппӕт зондӕй ӕмӕ ӕппӕт хъаруйӕ» (Мар. 12:30). Йегъовӕйы кӕй уарзӕм, уый нын царды хъуамӕ уа ӕппӕты ахсджиагдӕр. Афтӕ кӕй у, уый бӕрӕг уыдзӕн, Йесойы ныхӕстӕм гӕсгӕ куы архайӕм, уӕд: «Уӕдӕ фыццаджыдӕр агурут Хуыцауы паддзахад ӕмӕ йӕ рӕстдзинад, ӕмӕ уын ӕппӕт уыдӕттӕ дӕр уыдзӕни» (Матф. 6:33). Ацы ныхӕстӕ нын куыд баххуыс кӕндзысты, ирхӕфсӕнтӕ нӕ царды цавӕр бынат хъуамӕ ахсой ӕмӕ сыл цас рӕстӕг хъуамӕ хардз кӕнӕм, уый сбӕлвырд кӕнынӕн?
11 Дӕ хъус-ма ӕрдар, Йесо афтӕ кӕй загъта, «фыццаджыдӕр агурут Хуыцауы паддзахад», зӕгъгӕ. Афтӕ нӕ загъта, агурут ӕрмӕстдӕр Хуыцауы паддзахад. Йесо йӕ куыннӕ зыдта, Хуыцауы Паддзахад агурынӕй уӕлдай ма нӕ ӕндӕр хъуыддӕгтӕ дӕр кӕй хъӕудзӕн аразын, зӕгъӕм, кусын, хӕринаг ӕмӕ уӕлӕдарӕс амал кӕнын, кӕм цӕрӕм, ууыл батыхсын, скъолайы ахуыр кӕнын, нӕ фӕллад уадзын ӕмӕ ӕндӕр ахӕм хъуыддӕгтӕ. Фӕлӕ уыдӕттӕ нӕ царды фыццаг бынаты не сты – фыццаг бынаты нын ис Хуыцауы Паддзахад (1 Кор. 7:29–31). Сӕйрагдӕр нын цы хъуамӕ уа, уый куы бамбарӕм, уӕд фыццаджыдӕр агурдзыстӕм Хуыцауы Паддзахад, ӕмӕ уый фӕстӕ та хъуыды кӕндзыстӕм ирхӕфсӕнтыл ӕмӕ ӕндӕр хъуыддӕгтыл. Ӕмӕ нын уӕд ирхӕфсӕнтӕ хӕсдзысты пайда.
12. Лукайы 14:28 цы фыст ис, уый нын куыд баххуыс кӕндзӕн ирхӕфсӕнтӕ ӕвзарынӕн?
12 Уӕдӕ цалынмӕ ирхӕфсӕн равзарӕм, уӕдмӕ уал хъуамӕ дзӕбӕх ахъуыды кӕнӕм, цас рӕстӕг ыл ацӕудзӕн, ууыл (Лук. 14:28). Дзаумӕттӕ балхӕнынӕн ӕхца куыд хъӕуы, афтӕ ирхӕфсӕнтӕн та хъӕуы рӕстӕг. Уымӕ гӕсгӕ хъуамӕ аскъуыддзаг кӕнӕм, цас рӕстӕг сыл хардз кӕндзыстӕм. Раст нӕ уыдзӕн, ӕмӕ нын ирхӕфсӕнты тыххӕй ахсджиагдӕр хъуыддӕгтӕн рӕстӕг куы нал баззайа, зӕгъӕм, цӕмӕй нӕхӕдӕг кӕнӕ бинонтимӕ Библи ахуыр кӕнӕм, ӕмбырдтӕм кӕнӕ уацамындмӕ цӕуӕм (Мар. 8:36). Фӕлӕ йӕ куы зонӕм, ӕмӕ нӕм ирхӕфсӕнты фӕрцы Хуыцауӕн лӕггад кӕнынӕн фылдӕр хъарутӕ фӕзындзӕн, уӕд сын нӕ бон уыдзӕн рӕстӕг рахицӕн кӕнын, ӕмӕ уый дзӕгъӕлы нӕ фӕуыдзӕн.
Дӕ рӕстӕг кӕимӕ ӕрвитдзынӕ?
13. Нӕ рӕстӕг кӕимӕ ӕрвитӕм, ууыл нӕ лӕмбынӕг хъуыды кӕнын цӕмӕн хъӕуы?
13 Ӕртыккаг фарста у ахӕм: дӕ рӕстӕг кӕимӕ ӕрвитдзынӕ? Ацы фарстайӕн йӕ дзуапп тынг ахсджиаг у, уымӕн ӕмӕ, нӕ рӕстӕг кӕимӕ ӕрвитӕм, уымӕй арӕх аразгӕ вӕййы, хорз ирхӕфсӕнтӕ равзардзыстӕм ӕви нӕ. Зӕгъӕм, нӕ хӕринаг нын адджындӕр вӕййы, фынгыл иунӕгӕй нӕ, фӕлӕ искӕимӕ куы фӕбадӕм. Раст афтӕ сты ирхӕфсӕнтӕ дӕр. Хорз ӕмбӕлттимӕ улӕфгӕ дӕр хуыздӕр бакӕнӕм. Ӕмӕ бирӕтӕ, уӕлдайдӕр ӕрыгӕттӕ, уый тыххӕй уарзынц сӕ рӕстӕг искӕимӕ ӕрвитын, искӕимӕ баулӕфын. Фӕлӕ нын цӕмӕй уыцы рӕстӕг пайда фӕуа, уый тыххӕй уал фыццаг хъуамӕ ахъуыды кӕнӕм, хорз ӕмбал нын чи уыдзӕн ӕмӕ нын ӕвзӕр ӕмбал чи уыдзӕн, ууыл (2 Аз. 19:2; бакӕс Ӕмбисӕндтӕ 13:20; Иак. 4:4).
14, 15. а) Йесо хорз ӕмбӕлттӕ куыд ӕвзӕрста, уымӕй йӕ нӕ бон куыд у бафӕзмын? ӕ) Ӕмбӕлттӕ ӕвзаргӕйӕ нӕ бон цавӕр фарстатыл у ахъуыды кӕнын?
14 Хорз ӕмбӕлттӕ куыд ӕвзарӕн ис, уымӕй нӕ бон у Йесойы бафӕзмын. Зӕххыл адӕм куы фӕзынд, Йесо сӕ уӕдӕй фӕстӕмӕ уарзы (Ӕмб. 8:31). Ӕмӕ зӕххыл куы уыд, уӕд дӕр алкӕй дӕр уарзта, алкӕмӕн дӕр аргъ кодта (Матф. 15:29–37). Фӕлӕ Йесо зыдта, искӕмӕ хӕларзӕрдӕ уай ӕмӕ исчи де ’ввахс хӕлар уа, уый иу кӕй нӕу. Кӕд алкӕмӕ дӕр хӕларзӕрдӕ уыд, уӕддӕр йе ’ввахс ӕмбӕлттӕ се ’ппӕт нӕ уыдысты. Йӕ иуӕндӕс иузӕрдион апостолӕн цы загъта, уымӕй базонӕн ис, ӕввахс хӕлар ын чи уыд, уый. Афтӕ сын загъта: «Цы уын фӕдзӕхсын, уый кӕд ӕххӕст кӕнут, уӕд стут мӕ хӕлӕрттӕ» (Иоан. 15:14; кӕс ма Иоанны 13:27, 30). Йесойӕн йе ’ввахс хӕлӕрттӕ уыдысты, йӕ фӕдыл чи цыд ӕмӕ Йегъовӕйӕн чи лӕггад кодта, ӕрмӕстдӕр уыдон.
15 Уӕдӕ искӕй дӕхицӕн ӕввахс ӕмбалӕн куы ’взарай, уӕд-иу Йесойы ныхӕстыл ахъуыды кӕн. Дӕхи бафӕрс: ацы адӕймагӕн йӕ ныхӕстӕй ӕмӕ йӕ хъуыддӕгтӕй бӕрӕг у, Йегъовӕйы ӕмӕ Йесойы фӕдзӕхстытӕ кӕй ӕххӕст кӕны? Уый дӕр мӕнау Библимӕ гӕсгӕ цӕры, ӕз цы ӕгъдауыл хӕст дӕн, ахӕм ӕгъдауыл хӕст у? Ӕххуыс мын кӕндзӕн, цӕмӕй Хуыцауы Паддзахад мӕ царды фыццаг бынаты ӕвӕрон ӕмӕ Йегъовӕйыл иузӕрдион уон? Кӕд ацы фарстатӕн, «о», зӕгъгӕ, зӕгъай, уӕд дӕхицӕн тынг хорз ӕмбал ссардтай ӕмӕ дӕ бон у йемӕ дӕ рӕстӕг дӕр хорз ӕрвитын (Бакӕс Псалом 119:63; 2 Кор. 6:14; 2 Тим. 2:22).
Базон, хорз у ӕви нӕ
16. Ирхӕфсӕнтӕ ӕвзаргӕйӕ нӕхимӕ цавӕр фарстатӕ хъуамӕ раттӕм?
16 Ацы статьяйы аныхас кодтам ӕртӕ фарстайыл: ирхӕфсӕн цавӕр у, цас рӕстӕг ыл бахардз кӕндзыстӕм ӕмӕ нӕ рӕстӕг кӕимӕ ӕрвитдзыстӕм. Ӕмӕ цалынмӕ ирхӕфсӕн равзарӕм, уӕдмӕ уал хъуамӕ ацы фарстатыл дзӕбӕх ахъуыды кӕнӕм. Цӕмӕй нын ирхӕфсӕн пайда фӕуа, уый тыххӕй хъуамӕ Библийы уагӕвӕрдты ныхмӕ ма уа. Ирхӕфсӕн цавӕр у, ууыл куы хъуыды кӕнай, уӕд дӕхимӕ ахӕм фарста ратт: Йегъовӕйы зӕрдӕмӕ цӕуы ӕви баст у тыхмиимӕ ӕмӕ ӕнӕгъдаудзинадимӕ? (Ӕмб. 4:20–27). Цас рӕстӕг ыл бахардз кӕндзынӕ, ууыл куы хъуыды кӕнай, уӕд та дӕхимӕ ахӕм фарста ратт: цы рӕстӕг ыл бахардз кӕндзынӕн, уый дзӕгъӕлы нӕ фӕуыдзӕн? (1 Тим. 4:8). Ӕмӕ дӕ рӕстӕг кӕимӕ ӕрвитдзынӕ, ууыл хъуыды кӕнгӕйӕ та дӕхи бафӕрс: хорз ӕмбӕлттӕ сты ӕви ӕвзӕр? (Еккл. 9:18; 1 Кор. 15:33).
17, 18. а) Нӕ ирхӕфсӕн Библийы уагӕвӕрдты ныхмӕ у ӕви нӕ, уый куыд ис базонӕн? ӕ) Ирхӕфсӕн ӕвзаргӕйӕ куыд бакӕндзынӕ?
17 Ирхӕфсӕн ӕвзаргӕйӕ ацы ӕртӕ фарстайыл куы ахъуыды кӕнӕм ӕмӕ дзы иумӕ гӕсгӕ дӕр афтӕ куы разына, ӕмӕ Библийы уагӕвӕрдты ныхмӕ у, уӕд уый у ӕвзӕр ирхӕфсӕн. Фӕлӕ кӕд Библийы уагӕвӕрдты ныхмӕ нӕу, уӕд Йегъовӕйӕн кад ӕрхӕсдзӕн ӕмӕ махӕн та фӕуыдзӕн пайда (Пс. 119:33–35).
18 Уӕдӕ ирхӕфсӕн ӕвзаргӕйӕ хъуамӕ ӕппӕт тыхтӕй бацархайӕм, цӕмӕй ирхӕфсӕн дӕр, рӕстӕг дӕр ӕмӕ ӕмбӕлттӕ дӕр раст равзарӕм. Цӕй ӕмӕ нӕ зӕрдӕйы фӕндон уӕд, Библи цы дзуры, уымӕ гӕсгӕ архайын: «Хӕргӕ кӕнат, нуазгӕ кӕнат ӕви ӕндӕр исты аразат,– алцыдӕр аразут Хуыцауы кадӕн» (1 Кор. 10:31).
Бахъуыды кодтай?
Куыд дын баххуыс кӕндзӕн ирхӕфсӕнтӕ ӕвзаргӕйӕ...
• Матфейы 6:33?
[Фарстатӕ ахуыр кӕнынӕн]
[Схемӕ 9 фарсыл]
(Мыхуыры куыд рацыд, уый фенӕн ис публикацийы)
✔Цавӕр?
[Схемӕ 10 фарсыл]
(Мыхуыры куыд рацыд, уый фенӕн ис публикацийы)
✔Цас рӕстӕг?
[Схемӕ 12 фарсыл]
(Мыхуыры куыд рацыд, уый фенӕн ис публикацийы)
✔Кӕимӕ?
[Ныв 10 фарсыл]
Ӕмбӕлттӕ ӕмӕ ирхӕфсӕнтӕ ӕвзаргӕйӕ нӕ бон куыд у Йесойы бафӕзмын?
