“Sigui hasi sigur di loke ta agradá Señor.”—EFE. 5:10.

1, 2. (a) Kon e Palabra di Dios ta indiká ku Yehova ke pa nos disfrutá di bida? (b) Si nos ta mira rekreo komo un “regalo di Dios,” kiko esei lo motivá nos pa hasi?

DEN Beibel, nos ta haña deklarashonnan ku ta indiká ku Yehova no ke pa nos djis biba so sino tambe disfrutá di bida. Por ehèmpel, Salmo 104:14 i 15 ta bisa ku Yehova ta pone ‘vegetashon krese pa hende kultivá, pa asina e por saka pan for di e tera, i biña ku ta hasi kurason di hende kontentu, zeta pa hasi su kara lombra, i pan ku ta fortalesé kurason di hende.’ Sí, ta Yehova ta pone mata krese pa produsí grano, zeta i biña pa nos por biba. Pero maske biña no ta estriktamente nesesario pa hende biba, e ta “hasi kurason di hende kontentu.” (Ekl. 9:7; 10:19) Sí, Yehova ke pa nos ta kontentu, pa nos kurason ta yená “ku alegria.”—Echo. 14:16, 17.

² P’esei, nos no tin nodi di sinti nos kulpabel ora ku nos saka poko tempu pa “opservá e paranan di shelu” i “e flornan di mondi” òf pa disfrutá di un òf otro aktividat ku ta refreská nos i enrikesé nos bida. (Mat. 6:26, 28; Sal. 8:3, 4) Un bida sano i felis ta un “regalo di Dios.” (Ekl. 3:12, 13) Si nos ta mira e tempu ku nos ta usa pa rekreo komo parti di e regalo ei, esei lo motivá nos pa us’é na un manera ku ta agradá Dios. *

Variedat i Límite den Rekreo

3. Dikon ta rasonabel pa aseptá ku por tin vários tipo di aktividat rekreativo?

³ Rumannan ku tin un punto di bista balansá di rekreo ta aseptá ku por tin vários tipo di aktividat rekreativo, pero a la bes nan ta rekonosé ku mester tin sierto límite. Dikon? Pa kontestá esei, laga nos kompará entretenimentu ku kuminda. E tipo di kuminda ku hende gusta kome den un parti di mundu ta distinto for di loke hende di otro parti gusta. De echo, loke hende di un área ta gusta sinfin, kisas hende di otro área no ta haña niun tiki gana di kome. Meskos tambe, loke kristiannan den un parti di mundu ta konsiderá rekreo agradabel, kisas no ta atraé kristiannan di otro parti. Asta entre kristiannan ku ta biba den e mesun área, loke un kisas ta haña relahante (podisé sinta lesa un bon buki), un otro ta haña laf; loke un ta haña refreskante (podisé kore keiru riba baiskel), un otro kisas ta haña ta un kansansio. Pues, meskos ku hende por skohe ki tipo di kuminda nan gusta, nan por skohe tambe ki tipo di rekreo nan gusta.—Rom. 14:2-4.

4. Dikon nos tin ku pone límite pa e tipo di rekreo ku nos ta skohe? Ilustrá esei.

⁴ Sinembargo, nos ta realisá tambe ku e echo ku por tin variedat den rekreo no ke men ku nos tin lus bèrdè pa hasi kiko ku nos ke. Pa ilustrá esaki, laga nos bolbe konsiderá e ehèmpel di kuminda. Aunke kisas nos ta dispuesto pa kome un variedat di kuminda, nos lo no skohe pa kome kuminda dañá. Esei no tin sentido; ta malu so e por hasi nos. Asina tambe, aunke kisas nos ta dispuesto pa purba diferente forma di entretenimentu sano, nos lo no partisipá den aktividatnan ku ta violento, inmoral òf ku ta pone nos bida na peliger. E tipo di aktividatnan ei ta bai kontra di prinsipionan di Beibel i ta un peliger pa nos salú i pa nos  relashon ku Yehova. Pa hasi sigur ku nos rekreo ta keda denter di e límitenan di loke ta rasonabel, lo ta bon pa nos determiná di antemano si algun rekreo ku nos ta gusta lo benefisiá nos òf nò. (Efe. 5:10) Kon nos por hasi esei?

5. Kon nos por determiná si nos rekreo ta kumpli ku e normanan di Dios?

⁵ Pa nos rekreo benefisiá nos i agradá Yehova, e tin ku kumpli ku normanan spesífiko deskribí den e Palabra di Dios. (Sal. 86:11) Pa haña sa si esei ta e kaso ku un tipo di rekreo ku kisas nos ta gusta, nos por djis konsultá un lista simpel. E lista ta konsistí di tres pregunta ku nos por resumí ku e palabranan kiko, kuantu i ku ken. Laga nos konsiderá nan ún pa ún.

Kiko e Rekreo Ta Enserá?

6. Ki tipo di entretenimentu nos tin ku rechasá, i dikon?

⁶ Promé ku nos partisipá den kualke forma di entretenimentu, nos mester puntra nos mes: Kiko?, esta, ‘Kiko presis e aktividat di rekreo ku mi ta sinti mi atraí na dje ta enserá?’ Ta bon pa ora bo ta buska e kontesta, bo kòrda ku tin básikamente dos kategoria di entretenimentu. Na e promé kategoria nos ta bisa nò; na e di dos, kisas. Kiko ta kai bou di e promé kategoria? Den e mundu malbado akí, gran parti di entretenimentu tin di aber ku kosnan ku ta kompletamente kontra di prinsipionan di Beibel òf ku ta kibra e leinan di Dios. (1 Huan 5:19) Kristiannan berdadero ta nenga rotundamente di ta enbolbí den tur e tipo di entretenimentunan ei. Esaki ta inkluí entretenimentu ku ta kontené sadismo, demonismo, homoseksualidat, pornografia, violensia òf entretenimentu ku ta glorifiká práktikanan baho i inmoral. (1 Kor. 6:9, 10; lesa Revelashon 21:8.) Sin importá unda nos ta biba, nos ta mustra Yehova ku nos ta “odia loke ta malu” ora nos ta nenga di enbolbé nos mes den tal entretenimentu.—Rom. 12:9; 1 Huan 1:5, 6.

7, 8. Kon nos por evaluá e kalidat di un sierto tipo di entretenimentu? Ilustrá esei.

⁷ E di dos kategoria di aktividatnan di rekreo ta konsistí di formanan di entretenimentu ku no ta konsentrá riba práktikanan ku e Palabra di Dios ta kondená spesífikamente. Den tal kaso, promé ku nos skohe e entretenimentu, nos mester kompará e aktividat ku loke Yehova ta haña sano, konforme prinsipionan di Beibel. (Pro. 4:10, 11) Despues nos tin ku tuma un desishon personal ku ta laga nos ku un bon konsenshi. (Gal. 6:5; 1 Tim. 1:19) Kon nos por hasi esei? Pensa riba esaki: Promé ku nos kome un plato nobo, nos lo ke sa ta kiko ta su ingredientenan prinsipal. Asina tambe, promé ku nos partisipá den un rekreo, nos tin ku investigá ta kiko ta su rasgonan prinsipal.—Efe. 5:17.

⁸ Por ehèmpel, podisé bo gusta deporte, i esei ta di komprondé. Deporte por ta dibertido i eksitante. Pero den algun deporte e kompetensia ta violento, bida di e deportistanan ta kore demasiado peliger, hopi di nan ta sufri leshon, selebrashon di viktoria ta kousa disturbio, tin hopi despliegue di fervor nashonalista òf otro “ingredientenan” similar. Kiko si bo ta gusta e tipo di deportenan ei? Despues di analisá kiko nan ta enserá, kisas bo ta yega na e konklushon ku bo manera di pensa no ta armonisá ku e manera di pensa di Yehova ni ku e mensahe di pas i amor ku nos ta prediká na otro hende. (Isa. 61:1; Gal. 5:19-21) Di otro banda, si un sierto rekreo ta konsistí di “ingredientenan” ku ta sano den bista di Yehova, e ora ei bo por tin sigur ku tal rekreo lo benefisiá bo i refreská bo.—Gal. 5:22, 23; lesa Filipensenan 4:8.

 Kuantu Tempu Lo Mi Dediká na Rekreo?

9. Kiko nos kontesta riba e pregunta: ‘Kuantu tempu lo mi dediká na rekreo’ ta revelá?

⁹ E di dos pregunta ku nos mester hasi nos mes ta: Kuantu?, esta, ‘Kuantu tempu lo mi dediká na rekreo? Ki ora lo mi partisipá den dje?’ Loke nos a kontestá riba e pregunta kiko? a bisa hopi tokante nos inklinashonnan: loke nos ta haña aseptabel i inaseptabel. Sinembargo, loke nos ta kontestá riba e pregunta kuantu? ta reflehá kiko ta nos prioridatnan: loke nos ta haña importante òf nò. Pues, kon nos por determiná si e grado di importansia ku nos ta duna nos entretenimentu ta korekto?

10, 11. Kon e palabranan di Hesus na Mateo 6:33 ta yuda nos disidí kuantu tempu nos mester dediká na rekreo?

¹⁰ Hesukristu a bisa su siguidónan: “Bo tin ku stima Yehova bo Dios ku henter bo kurason, ku henter bo alma, ku henter bo mente i ku tur bo forsa.” (Mar. 12:30) Pues, nos amor pa Yehova ta na promé lugá den nos bida. Nos ta demostrá esei ora nos ta sigui e konseho akí di Hesus: “Sigui buska anto promé e Reino i e hustisia di Dios, i lo e duna boso tur e kosnan akí.” (Mat. 6:33) Kon e palabranan ei di Hesus por yuda nos determiná kuantu tempu mester usa pa rekreo i kon importante rekreo mester ta pa nos?

 ¹¹ Tuma nota di e detaye akí: Hesus a konsehá nos pa ‘sigui buska promé e Reino.’ E no a bisa nos pa ‘sigui buska solamente e Reino.’ Ta bisto ku Hesus tabata sa ku nos lo tabatin ku buska hopi kos mas den bida fuera di e Reino. Nos tin mester di kas, kuminda, paña, edukashon básiko, trabou, rekreo i otro kosnan mas. Sinembargo, di tur e kosnan ku nos ta buska, ta un so ta bini na promé lugá: interesnan di e Reino. (1 Kor. 7:29-31) E bèrdat fundamental ei mester motivá nos pa atendé nos aktividatnan sekundario, inkluso rekreo, di tal manera ku nan ta yuda nos kumpli ku nos aktividat prinsipal: perkurá pa interesnan di e Reino. Si nos hasi esei, rekreo por benefisiá nos.

12. Kon nos por apliká e prinsipio ku nos ta haña na Lukas 14:28 na rekreo?

¹² Pues, ora ta trata di e tempu ku nos ta dediká na rekreo, ta bon pa nos kalkulá “e gastu” di antemano, esta, kalkulá e tempu ku sierto aktividat di rekreo lo kosta nos. (Luk. 14:28) Despues, nos tin ku disidí kuantu di nos tempu e rekreo ei ta bal. Si nos partisipashon den un sierto rekreo ta nifiká ku nos lo neglishá aktividatnan importante manera nos estudio personal di Beibel, adorashon di famia, asistensia na reunion kristian òf predikashon di e Reino, e rekreo ei no ta bal esei. (Mar. 8:36) Pero si un aktividat di rekreo ku de bes en kuando nos ta partisipá den dje ta duna nos e energia pa sigui den nos sirbishi na Dios, nos por disidí ku e tempu ku nos ta dediká na e rekreo ei ta bale la pena.

Ken Ta Mi Amigunan?

13. Dikon nos mester pensa bon ku ken nos ta partisipá den rekreo?

¹³ E di tres pregunta ku nos mester hasi nos mes ta: Ku ken?, esta, ‘Ku ken mi ke partisipá den mi aktividatnan di rekreo?’ Ta importante pa nos konsiderá e aspekto akí di rekreo. Dikon? Pasobra e kalidat di nos rekreo ta dependé hopi di e kalidat di nos amigunan. Meskos ku por lo general ta mas dushi pa kome un kuminda den kompania di bon amigu, asina tambe partisipá den rekreo hopi biaha ta mas dushi ora bo hasié ku bon amigu. Pues, ta di komprondé ku hopi di nos, spesialmente hóbennan, ta gusta rekreo ku nan por hasi huntu ku otro hende. Sinembargo, pa nos hasi sigur ku un aktividat lo benefisiá nos, ta sabí pa nos determiná di antemano ki sorto di hende nos ta skohe komo kompañero i ki sorto nos mester evitá.—2 Kró. 19:2; lesa Proverbionan 13:20; Sant. 4:4.

14, 15. (a) Ki ehèmpel Hesus a pone den skohe bon amigu? (b) Menshoná algun pregunta ku nos mester hasi nos mes enkuanto nos amistatnan.

 ¹⁴ Si nos imitá e ehèmpel di Hesus, esei lo yuda nos skohe bon amigu. For di kreashon, Hesus semper a stima hende. (Pro. 8:31) Tempu ku e tabata riba tera, el a mustra amor i konsiderashon na tur tipo di hende. (Mat. 15:29-37) Ma Hesus a hasi un distinshon entre ser amigabel i ser bon amigu di un hende. Aunke e tabata amigabel ku hende en general, e tabata amigu será di solamente esnan ku a kumpli ku sierto rekisitonan spesífiko. Papiando ku su 11 fiel apòstelnan, el a bisa nan: “Boso ta mi amigunan si boso ta hasi loke mi ta manda boso.” (Huan 15:14; wak tambe Huan 13:27 i 30) E úniko personanan ku Hesus a aseptá komo amigu tabata esnan ku a siguié i ku a sirbi Yehova.

¹⁵ P’esei, ora bo ta evaluando si bo mester skohe un sierto persona pa ta bo bon amigu òf nò, lo ta sabí pa tene na mente loke Hesus a bisa. Hasi bo mes e siguiente preguntanan: ‘E persona akí ta mustra ku echo i palabra ku e ta obedesé e mandamentunan di Yehova i di Hesus? E tin e mesun norma- i balornan basá riba Beibel ku ami tin? Su amistat lo animá mi pa pone e Reino na promé lugá den mi bida i pa mi ta un sirbidó leal di Yehova?’ Si bo ta sigur ku e kontesta riba e preguntanan ei ta sí, bo a haña un bon amigu ku ken bo por disfrutá di bo rekreo.—Lesa Salmo 119:63; 2 Kor. 6:14; 2 Tim. 2:22.

Nos Rekreo Ta Pasa e Tèst?

16. Kiko nos tin ku determiná enkuanto nos entretenimentu?

¹⁶ Nos a konsiderá brevemente tres aspekto di entretenimentu: kalidat, kantidat i kompania. Pa nos entretenimentu benefisiá nos, e tin ku kumpli estrechamente ku e normanan ku tin den Beibel pa kada un di e aspektonan akí. P’esei, promé ku nos partisipá den kualke tipo di rekreo, nos tin ku pas’é un tèst. Ora nos pensa riba e kalidat di nos rekreo, nos ke sa: ‘Kiko e rekreo ta enserá? E ta sano òf degradá?’ (Pro. 4:20-27) Ora nos pensa riba e kantidat, nos ke sa: ‘Kuantu tempu lo mi dediká na dje? E kantidat ei ta apropiá òf nò?’ (1 Tim. 4:8) Anto ora nos pensa riba e kompania, nos tin ku determiná: ‘Ku ken lo mi partisipá den e entretenimentu ei? Nan ta bon òf mal kompania?’—Ekl. 9:18; 1 Kor. 15:33.

17, 18. (a) Ki tèst nos por hasi pa wak si nos entretenimentu ta kumpli ku e normanan di Beibel? (b) Kiko abo ta determiná pa hasi pa loke ta bo eskoho di entretenimentu?

¹⁷ Si un tipo di entretenimentu no ta kumpli ku e normanan di Beibel den kualke un di e tres aspektonan akí, e no a pasa e tèst bon. Di otro banda, si nos hasi sigur ku nos aktividatnan di rekreo ta kumpli ku e normanan di Beibel den tur e tres aspektonan akí, nos rekreo lo trese onor pa Yehova i benefisiá nos.—Sal. 119:33-35.

¹⁸ Pues, ora nos tin ku tuma desishonnan relashoná ku rekreo, laga nos hasi esfuerso pa skohe e aktividat korekto, dediká e kantidat di tempu korekto na dje i partisipá ku e hendenan korekto den dje. Sí, laga e deseo sinsero di kada un di nos ta pa sigui e konseho akí di Beibel: “Sea ku boso ta kome, bebe òf kiko ku boso ta hasi, hasi tur kos pa e gloria di Dios.”—1 Kor. 10:31.

[Nota]

Bo Por Splika?

Kon bo por apliká e prinsipionan di e tekstonan akí na bo rekreo?

• Filipensenan 4:8

• Mateo 6:33

• Proverbionan 13:20

[Preguntanan di Estudio]

[Diagram na página 11]

(Pa e teksto den su formato kompleto, wak e publikashon)

✔Kiko

[Diagram na página 12]

(Pa e teksto den su formato kompleto, wak e publikashon)

✔Kuantu

[Diagram na página 14]

(Pa e teksto den su formato kompleto, wak e publikashon)

✔Ku Ken

[Plachi na página 12]

Kon nos por imitá e ehèmpel di Hesus ora di skohe nos amigunan i nos rekreo?