A Rolel a Omilil Ngngar er Ngii a Lerellii el Kirem?

“Mo morriter el kmo ngngera ikel metechii a rengul a Rubak.”​—EFESUS 5:10.

1, 2. (a) Ngmekerang a Tekingel a Dios a lolecholt el kmo a Jehovah a soal a bo ledeu a rengud er a klengar? (b) A temel a ulengull er kid a “sengk er a Dios” a uchul, me ngrullid el mo meruul er a ngerang?

NGAR er a chelsel a Biblia, e kede metik a tekoi el olecholt el kmo a Jehovah a soal a dekiei e doldeu a rengud er a klengar. El uai tiang, a Psalm 104:14, 15 a melekoi el kmo a Jehovah a remuul a “dellomel el kirel a chad el ousbech, me ng sebechel el omekeroul a dellemelel, e omekdubech a bilong el meruul er ngii el mo ungil a rengul, ma cheluchul olib el meruul er ngii me ng blekebek a medal ma blauang el omsa klisichel.” Nguaisei, a Jehovah a omekdubech a dellomel el mo meskid a wheat me a cheluch me a bilong el sebeched el ousbech. A bilong a ungil er a bedenged e dirrek el sebechel el mo uchul a deuil a rengud. (Olisechakl 9:7; 10:19) Nguaisei, a Jehovah a soal a bo lemukeek a rengud er a “deourreng.”​—Rellir 14:16, 17.

² Ngdiak el kired el omdasu el kmo ngmekngit a docheuekl a bebil er a temed el “omes a suebek el charm ra milidiul” me a “bung ra ked” me a lechub e kede meruul a bebil er a omilil el smisiich a bedenged el mo uchul a deuil a rengud. (Matteus 6:26, 28; Psalm 8:3, 4) A ungil el klengar el mui er a deurreng a “sengk er a Dios” el mei er kid. (Olisechakl 3:12, 13) A temel a ulengull er kid a telengtengil tia el sengk me ngsebeched el ousbech er ngii er a rolel el odeuir a rengul Ngike el milskid tia el sengk. *

Kakerous el Bedengel a Omilil me a Telkelel

3. Ngera me ngkirel el mo tabesul a osenged el kirel a kakerous el rolel a omilil el sebeched el melilt?

³ Tirke el oba tabesul el osengir el kirel a tekoi er a omilil a kongei el kmo ngngar er ngii a kakerous el bedengel a omilil, engdi ngkirel el ngar er ngii a telkelel. E ngera uchul? A bo donger, e ngsebeched el omekesiu er a rolel a dolilt a ongelaod el mo er a rolel a dolilt a kall. A rechad el kiei er a kakerous el beluu a sorir el mengang a kakerous el bedengel a kall. Me nguai seikid, a Rekristiano el kiei er a kakerous el beluu a oldeu a rengrir er a kakerous el bedengel a omilil. Ngmo lmuut er a Rekristiano el kiei er a chelsel a ta el beluu, a dirrek el kakerous a osengir el kirel a rolel a lolengull, (a tang a soal el menguiu a babier), e a kuk tang a seselk a rengul er a omenguiu; e a ta el chad a soal el ousbech er a klisichel a bedengel (el omais er a beluu el ngar er a rrat), e a kuk tang a mesaik a rengul el ngar a rrat. Me nguaisei, engdi kede kongei el kmo ngngar er ngii a kakerous el bedengel a kall me a rolel a omilil el sebechel a derta el chad el di ngii el melilt er a soal.​—Rom 14:2-4.

4. Ngera me ngkirel el ngar er ngii a telkelel a rolel a omilil el soad el mo meruul? Momekesiu.

⁴ Me nguaisei el ngar er ngii a llemelted el melilt a rolel a omililed, engdi ngdiak el belkul a kmo ngkired el melasem a bek el bedengel a omilil el doureng el mo meruul. El uai tiang, ka me deluut el mesaod a tekoi el ousbech a kall. Alta e ngsebeched el mengang a betok el bedengel a kall, engdi ngdiak el soad el menga er a kall el mla mo mekngit, el sebechel el mo uchul a sechered. Me nguai seikid, ngbetok a rolel a ungil el ongelaod el sebeched el melilt, engdi ngdiak el soad aike el omilil el sebechel tomellii a klengar er kid, me a lechub e ngkmal kengaol me a lechub e ngomtok er a llechul a Dios. A lsekum kede mo meruul chouaike el tekoi el omtok a omellach er a Biblia, e ngsebechel tomellii a bedenged e dirrek el tomellii a deleuill  er kid me a Dios. Me ngkired el mo kerekikl el melebedebek el kirel aike el soad el mo meruul e sola e ngiltii a omilil el ungil el kired, e dirrek el odeuir a rengul a Jehovah. (Efesus 5:10) Ngmekerang a doruul el uaisei?

5. Kede mekerang e merriter el kmo a rolel a omilil ngoltirakl a llechul a Dios me a lechub e ngdiak?

⁵ A rolel a omilil el ungil el kired e dirrek el ungil er a osengel a Jehovah a kirel el mo oltirakl a llechul a Dios el llechukl er a Tekingel. (Psalm 86:11) Me a bo dorriter el kmo a rolel a omilil el soad a uaisei, e ngungil a bo dosaod aika el edei el ker el ua ikang el kmo, ngerang, ngoingerang, me a techang. Ka me bo dosaod a derta er aika el ker.

Ngerang a Uldimukl er Ngii?

6. Ngera el rolel a ongelaod a kired el oltngakl, e ngera uchul?

⁶ Uchei er a omosiik a rolel a omilil el soam, e a kot el ker el kirem el oker a kmo, Ngerang? el belkul a kmo, ‘Ngera el rolel a omilil a kmal soak?’ Me sel mosiik er a nger er kau, e lak mobes el kmo ngdi ngar er ngii a eru el rolel a ongelaod er chelechang. Sel kot el rolel a ongelaod a doltngakl er ngii, e sel ongeru el rolel a locha sebeched el meruul er ngii. Me ngngera sel kot el rolel? Ngar er a chelsel tia el kmal mekngit el beluulechad, e a betok el rolel a ongelaod a di olecholt a omeruul el kmal omtok a omellach er a Biblia me a lechub e ngmelemall a llechul a Dios. (1 Johanes 5:19) A remera el Kristiano a oltngakl a chouaika el rolel a ongelaod, el uldimukl er ngii a rechad el oldeu a rengrir el omekcharm er a rebebil, me a oltuubladek, me a remengolchotaor, me a siasing er a remeau, me a kdekudel el omeruul el melisiich a tekoi er a deleboes. (1 Korinth 6:9, 10; monguiu er a Chocholt 21:8.) A doltngakl a chouaika el rolel a ongelaod, er a ngii di leker el dengar ngii, a ochotii el mo er a Jehovah el kmo kede “ouketui a mekngit.”​—Rom 12:9; 1 Johanes 1:5, 6.

7, 8. Ngmekerang a dorriter a ungil el rolel a omilil? Momekesiu.

⁷ Ongeru el bedengel a omilil el sebeched el melilt el mo meruul er a temel a ulengull, aike el omilil el diak el bleketakl el omtok er a Tekingel a Dios. Ngar er a chelsel aika el blekeradel, e a uchei er a dolilt a ongelaod, e ngkired el kerekikl el merriter el kmo tia el rolel a ongelaod ngoltirakl er a osengel a Jehovah el mocholt er a omellach er a Biblia. (Osisechakl 4:10, 11) E a uriul, e kede mo meruul a omelilt er kid el diak el temellii a ungil el ukltked. (Galatia 6:5; 1 Timoteus 1:19) Ngmekerang a doruul el uaisei? Ka molatk er tiang: A uchei er a omongarm er a kall el dirkak a ta el monga er ngii, e ngkmal kirem el mo medengei el kmo ngerruul er a ngerang. Me ngdi osisiu, a uchei er a dolilt a rolel a omilil, e ngungil a bo dodengei el kmo tiang ngungil el kirir a Rekristiano me a lechub e ngdiak.​—Efesus 5:17.

⁸ El uai tiang, nglocha soam el tekoi a klekool, el di ua rebetok el chad, e le ngoldeu er a rengud e dirrek el ungil el kired. Engdi ngkuk mekerang a lsekum ngsoam a bebil er a klekool e le ngii el melisiich a klaisichai, e sebechel el mo uchul a tellemall me a klou el cherrodech me a klaiuediu, e melisiich er a bliongel er a klechad, me a chouaika el tekoi? Me sel morriter a teletelel aika el klekool, e ke locha mo medengei el kmo chouaika el klekool a diak loltirakl er a uldesuel a Jehovah me tia el klumech er a budech me a bltikerreng el domerk er ngii el mo er a rebebil. (Isaia 61:1; Galatia 5:19-​21) Engdi a lsekum a rolel a omilil el dengiltii a oltirakl aike el tekoi el ungil er a osengel a Jehovah, e ngsebechel el mo uchul a klungioled e dirrek el melisiich er kid.​—Galatia 5:22, 23; monguiu er a Filipi 4:8.

Ngoingerang e ak Meruul er Ngii?

9. Ngerang ngolecholt er ngii a nger er kid el mo er sel ker el kmo, ‘Ngoingerang e ak meruul er tia el omilil?’

⁹ A ongerung el ker el di kid el oker er kid a kmo, Ngoingerang?​—el belkul a kmo, ‘Ngoingerang e ak meruul er tia el omilil? Ngua ngera el klungel a taem ak kuusbech er ngii el milil? A  nger er kid el kirel a ker el kmo ngerang? a olecholt aike el tekoi el ngar er a rengud, el ike el ungil me aike el mekngit. Engdi a nger er kid el mo er a ker el kmo ngoingerang? a kuk olecholt aike el meklou a ultutelel me aike el diak el sal ngar er ngii a ultutelel el tekoi. Me a leuaisei, e ngngera sebechel el ngosukid el mo medengei el kmo ngua ngerang a klungel a ultutelel a omilil er a chelsel a klengar er kid?

10, 11. Ngmekerang a tekingel a Jesus el ngar er a Matteus 6:33 a lengesukid el mo melilt er a klungel a taem el dongoit er ngii el kirel a omilil?

¹⁰ A Jesus Kristus a dilu el kmo: “Me bo le betik a rengum ra [Jehovah] el Dios er kau, era rengum el rokir, ma chomeltkem el rokir, ma chomelebedebekem el rokir, ma klisichem el rokir.” (Markus 12:30) Me a bltkil a rengud el mo er a Jehovah a kirel el mo kot el tekoi er a chelsel a klengar er kid. Kede olecholt er tiang sel doltirakl a tekingel a Jesus el kmo: “Mo momuchel losiik ra rengedel a Dios ma llemeltel, ma ika le medchel el rokui lekor kemiu.” (Matteus 6:33) Ngmekera tia el tekoi e ngosukid el merriter er a klungel a ultutelel a omilil er a chelsel a klengar er kid me a taem el dongoit el kirel?

¹¹ Ka momtab er tiang: A Jesus a milengelechel er kid el kmo ‘momuchel losiik ra rengedel a Dios.’ Engdi ngdimlak lolekoi el  kmo ‘momuchel losiik er a di ta el rengedel a Dios.’ Me a Jesus a mle medengei el kmo kede ousbech a betok el tekoi er a klengar, e a ta er ngii a Rengedel a Dios. Kede ousbech a blai me a kall me a omesuub er a skuul, me a ureor, me a omilil, me a lmuut el bebil. Engdi a tekoi er a Renged a kirel el mo kot er a klengar er kid er a uchei er aika el rokui el tekoi. (1 Korinth 7:29-​31) Tia el klemerang el tekoi a kirel el rullid el mo melilt a rolel a omilil el ngosukid el mo oltaut er sel ngaruchei el urered el kirel a Rengedel a Dios. A doruul el uaisei, e a ungil a telkelel el omilil a sebechel el mo uchul a klungioled.

12. Ngmekerang a omellach el ngar er a Lukas 14:28 a motaut el kirel a omilil?

¹² Me a uchei er a dolilt er a rolel a omilil, e ngungil a bo domes el kmo ngua ngera el klungel a taem a dousbech el kirel tia el omilil. (Lukas 14:28) Ngdi ua bebil er a klalo el dongoit a udoud el omechar, me a rolel a omilil me nguaisei el mechoit a klou el temed el kirel. Me ngkired el mo melatk el kmo ngngar er ngii a ultutelel a taem el dulengoit el kirel a omilil me a lechub e ngdiak. Me a lsekum a rolel a omilil el dengiltii a rullid el mo mengoit a meklou a ultutelel el tekoi el ua omesubed el di kid el tang, me a omengull el ongalek, me a mo er a miting er a Rekristiano, me a temed el omerk el kirel a Renged, e sel rolel a omilil a mo diak a belkul. (Markus 8:36) Engdi a lsekum a rolel a omilil a melisiich er kid el melemolem el oltaut a tekoi er a Renged, e ngsebeched el mesa el kmo a taem el dulengoit el kirel tia el omilil a mlo er ngii a belkul.

Te Rua Techang a Kubengterir?

13. Ngera me ngkired el kerekikl el melilt er a rechad el dobengterir er a temel a omilil?

¹³ A ongedei el ker el di kid el oker er kid a kmo, Te rua techang?​—el belkul a kmo, ‘Te rua techang a soak el obengterir er a temel a omilil?’ Ngklou a ultutelel a dolatk er tia el tekoi. E ngera uchul? E le a rechad el dobengterir el milil a ngar er ngii a lerellii el kirel a omelilt er kid er a omilil. Ngdi uai kid el blechoel el mo dmeu a rengud sel domengur el obengterir a resechelid, me nguaisei sel doilil el obengterir a resechelid e ngdirrek el mo uchul a deurreng. Sei a uchul me a rebetok el chad, el ileakl a rengeasek, a dmeu a rengrir el obengterir a rebebil el milil. Engdi a omilil a bo luchul a klungioled, e ngungil a dolilt er a uchei el kmo te rua techang a ungil el sechelei me a rua techang a kired el mengeroid er kid er tir.​—2 Kronika 19:2; monguiu er a Osisechakl 13:20; Jakobus 4:4.

14, 15. (a) Ngera el kerebai a lebilecherei a Jesus el kirel a dolilt er a rungil el sechelid? (b) Ngera el ker a kired el di kid el oker el kirir a resechelid?

 ¹⁴ A doltirakl a kerebil a Jesus er a rolel a dolilt er a resechelid a sebechel el ngosukid. A Jesus a mle betik a rengul er a rechad er a lekot el lobeob el me er chelechang. (Osisechakl 8:31) Me sera lengar tia el chutem, e ngullecholt er a bltikerreng el mo er a rebek el chad. (Matteus 15:29-​37) Engdi a Jesus a mle medengelii a klekakerous er a ungil el sechelei me a kmal kmeed el sechelid. Me ngmle ungil el sechelei el mo er a rebek el chad, engdi ngmle kmeed el sechelirir tirke el uleltaut a tekingel. Me a Jesus a millekoi er tirke el 11 el blak a rengrir el apostol er ngii el kmo: “Kemiu cho moruul a ikel kdu er kemiu e kom sechelik.” (Johanes 15:14; dirrek el momes er a Johanes 13:27, 30.) Me a Jesus a di mle sechelirir tirke el uleltirakl er ngii e milsiou er a Jehovah.

¹⁵ Me sel bo dolilt er a chad el mo kmeed el sechelid, e ngungil a deblechoel el melatk a tekingel a Jesus. Me di lekau el oker er kau aika el ker el kmo: ‘Ngika el chad ngolecholt el oeak a tekingel me a omerellel el kmo ngolengesenges a omellach er a Jehovah me a Jesus? Ngika ngbetik a rengul er a ungil e ouketui a mekngit? Ngika ngsebechel el ngosukak el nguu a tekoi er a Renged el mo kot er a klengar er ngak e mo blak a renguk el mesiungel a Jehovah?’ A lsekum ngulterekokl a rengum el onger aika el ker el kmo choi, e kau a mla metik er a kmal ungil el sechelim el sebechem el milil el obengkel.​—Monguiu er a Psalm 119:63; 2 Korinth 6:14; 2 Timoteus 2:22.

A Rolel a Omilil​—Ngoltirakl a Ulekrael er a Jehovah?

16. Ngera kired el mo medengei el kirel a omilil?

¹⁶ Kede melsaod a edei el telengtengil a omilil​—ngera el rolel a omilil, me a ngua ngera el klungel el taem a dongoit el kirel, me a rua techang a dobengterir el milil. A omilil a bo luchul a klungiaol e ngkirel el oltirakl a omellach er a Biblia el kirel aika el tekoi el bla desaod. Me a uchei er a bo dolilt er a rolel a omilil e ngkired el di me a kot el tirterii. Me sel dosaod er a ngerang el kirel a omilil, e ngsoad el mo medengei el kmo: ‘Ngerang nguldimukl er ngii? Ngungil me a lechub e ngmekngit?’ (Osisechakl 4:20-​27) E a lekirel a taem el dongoit el milil, e ngsoad el mo medengei el kmo: ‘Ngua ngera klungel el taem a dongoit el milil? Ngungil a telkelel me a lechub e ngdiak?’ (1 Timoteus 4:8) E a kuk dosaod er a rechad el dobengterir, e ngkired el merriter el kmo: ‘Te rua techang a bo kubengterir el milil? Tirka te ungil sechelei me a lechub e te mekngit?’​—Olisechakl 9:18; 1 Korinth 15:33.

17, 18. (a) Ngmekerang a dorriter er kid el mesa el kmo a rolel a omilil el dengiltii a oltirakl a omellach er a Biblia? (b) Ngera el tekoi a obla moterekeklii a rengum el kirel sel molilt a tekoi er a omilil?

¹⁷ Me a lsekum a rolel a omilil a diak loltirakl a omellach er a Biblia el kirel aika el edei el tekoi, e ngdiak el ungil er a osengel a Jehovah. Engdi, a lsekum e kede oterekeklii el kmo a rolel a omilil a oltirakl a omellach er a Biblia el kirel aika el edei el tekoi, e tia el omilil a mo mengebkall er a Jehovah e dirrek el mo uchul a klungioled.​—Psalm 119:33-​35.

¹⁸ Me sel dolilt er a rolel a omilil el bo doruul er ngii, e ngkired el ngiltii a ungil el omilil er a ungilbesul el taem el obengterir a rungil a blekerdelir el sechelei. Nguaisei, e me doterekokl a rengud el mo oltirakl er a uleklatk er a Biblia el kmo: “Misei e cho molim me cho mongang, me cho moruul a ngiidi le ngerang e moruul el rokui el kirel a klebkellel a Dios.”​—1 Korinth 10:31.

[Footnote]

Ngsebechem el Mesaod?

El kirel a omilil, e ke mekerang a omoltaut a omellach el ngar er a . . .

• Filipi 4:8?

• Matteus 6:33?

• Osisechakl 13:20?

[Aike el Ker er a Suobel]

[Diagram el ngar er a 11 el llel]

(A lsoam el omes er ngii, e momes er a babier)

✔Ngerang

[Diagram el ngar er a 12 el llel]

(A lsoam el omes er ngii, e momes er a babier)

✔Ngoingerang

[Diagram el ngar er a 14 el llel]

(A lsoam el omes er ngii, e momes er a babier)

✔Ngtechang

[Siasing el ngar er a 12 el llel]

Ngmekerang a doltirakl er a kerebil a Jesus er a rolel a dolilt er a resechelid me aike el omilil el bo doruul er a temel a ulengelled?