Waswe, Iu Chusim Gudfala Hapitaem?
Waswe, Iu Chusim Gudfala Hapitaem?
“Gohed for mek sure iufala savve long samting wea Lord hapi long hem.”—EPH. 5:10.
1, 2. (a) Wanem nao showimaot Jehovah laekem iumi for hapi? (b) From hapitaem hem present from God, iumi shud duim wanem?
BIBLE showimaot Jehovah laekem iumi for hapi. Olsem example, Psalm 104:14, 15 sei Jehovah mekem “kaikai for grow and givim wine for pipol drinkim mekem olketa hapi. [Jehovah] givim oil for mekem feis bilong olketa luk gud and bred for strongim olketa.” Tru tumas, Jehovah givim kaikai for mekem iumi laef. Hem mekem olketa samting long garden for grow mekem iumi garem wheat, oil, and wine. Nomata iumi no needim wine for stap laef, hem savve mekem iumi “hapi.” (Eccl. 9:7; 10:19) Jehovah laekem iumi for “hapi.”—Acts 14:16, 17.
2 Hem gud for samfala taem iumi “lukluk gud long olketa bird” and “hao olketa flaoa long bush grow.” Taem iumi duim kaen samting olsem datwan savve mekem iumi enjoyim laef. (Matt. 6:26, 28; Ps. 8:3, 4) Wei for hapi and kaikai gud hem “present from God.” (Eccl. 3:12, 13) Hapitaem tu hem present from God. So iumi shud iusim taem hia long wei wea bae mekem God hapi.
Chusim Gudfala Hapitaem
3. Why nao pipol chusim difren kaen hapitaem?
3 Olketa wea garem stretfala tingting abaotem hapitaem luksavve evriwan free for chusim wanem olketa laekem. Bat olketa savve samfala hapitaem hem gud and samfala savve spoelem iumi. Why nao pipol chusim difren kaen hapitaem? For savve long ansa, tingim kaikai. Pipol long olketa difren kantri kaikaim olketa difren kaikai. Semsem tu, olketa Christian wea stap long olketa difren kantri duim olketa difren kaen hapitaem. Nomata pipol long sem ples tu maet chusim difren kaen hapitaem. Olsem example, maet samfala tingse wei for lisin long music hem mekem man relax bat narawan maet tingse datwan hem boring. Maet samfala laek padolem kanu for go picnic long island bat narawan maet tingse datwan savve mekem man taed. So pipol savve chusim hapitaem wea olketa laekem long sem wei wea man seleva savve chusim kaikai wea hem laekem.—Rom. 14:2-4.
4. Why nao iumi mas tingting gud firstaem bifor iumi chusim hapitaem? Storyim example.
4 Nomata iumi free for chusim hapitaem wea iumi laekem, iumi shud no tingse iumi free for duim eni samting nomoa. Tingim moa kaikai. Maet iumi laek for kaikaim olketa difren kaen kaikai bat hard for iumi kaikaim kaikai wea rotten. Datwan savve mekem iumi sik. Semsem tu, maet iumi laek duim olketa difren kaen hapitaem bat bae iumi no duim olketa rabis samting, samting wea raf, or wea mekem laef bilong iumi stap long danger. Olketa samting hia savve mekem iumi for no followim olketa Bible principle and spoelem wei wea iumi fren witim Jehovah and health bilong iumi tu. So iumi mas tingting gud firstaem abaotem wanem iumi laek for duim and then chusim hapitaem wea savve strongim iumi and mekem Jehovah hapi. (Eph. 5:10) Wanem nao bae helpem iumi for chusim gudfala hapitaem?
5. Hao nao bae iumi luksavve sapos hapitaem wea iumi duim hem mekem Jehovah hapi?
5 Sapos iumi laek duim hapitaem wea strongim iumi and wea Jehovah hapi long hem, hapitaem wea iumi chusim mas followim standard bilong Jehovah. (Ps. 86:11) For helpem iu disaedem hapitaem wea fitim, tingim thrifala kwestin hia. Wanem kaen hapitaem nao mi chusim? Haomas taem nao mi iusim long hapitaem? And hu nao mi laek duim hapitaem witim? Bae iumi storyim thrifala kwestin hia.
Wanem Kaen Hapitaem Nao Mi Chusim?
6. Wanem kaen hapitaem nao iumi bae nating duim, and why nao olsem?
6 Bifor iumi duim eni hapitaem, iumi need for tingim diswan: ‘Wanem kaen hapitaem nao mi laek for duim?’ Hem gud for tingim tufala difren kaen hapitaem nao stap. First wan hem hapitaem wea iumi bae nating duim and narawan hem hapitaem wea maet iumi chus for duim. Wanem kaen hapitaem nao bae iumi nating duim? Staka hapitaem wea pipol duim long world nating followim olketa Bible principle and olketa law bilong God. (1 John 5:19) Olketa tru Christian mas no chusim kaen hapitaem olsem. Olketa bae nating duim hapitaem wea join witim devildevil, or wea man sleep witim nara man, lukluk long olketa rabis piksa, or hapitaem wea raf. Olketa bae no lukluk long samting wea mekem pipol tingse nogud samting hem gud nomoa. (1 Cor. 6:9, 10; readim Revelation 21:8.) Nomata iumi stap witim pipol or stap seleva, iumi bae nating chus for duim kaen hapitaem olsem. Iumi laek for showimaot long Jehovah iumi “barava heitim olketa rabis samting.”—Rom. 12:9; 1 John 1:5, 6.
7, 8. Wanem nao savve helpem iumi for chusim gudfala hapitaem? Storyim example.
7 Narakaen hapitaem hem hapitaem wea iumi mas tingting gud firstaem bifor iumi duim. Maet Bible no storyim datfala hapitaem bat olketa Bible principle bae helpem iumi for minim tingting bilong Jehovah abaotem samting wea stret and samting wea no stret. So bifor iumi disaed for duim kaen hapitaem olsem, iumi shud mek sure hem no againstim olketa Bible principle. (Prov. 4:10, 11) Hapitaem wea iumi chusim mas no spoelem konsens bilong iumi. (Gal. 6:5; 1 Tim. 1:19) Wanem nao bae helpem iumi for chusim gudfala hapitaem? Tingim diswan. Bifor iu kaikaim eni kaikai wea iu no kaikaim bifor, bae iu laek for savve firstaem wanem nao datfala kaikai. Long sem wei tu, bifor iumi duim eni hapitaem, iumi need for luksavve wanem kaen hapitaem nao datwan mekem iumi chusim hapitaem wea fitim wanfala Christian.—Eph. 5:17.
8 Olsem example, maet iu interest long sport bikos hem samting wea staka pipol enjoyim. Bat samfala sport hem raf, mekem man garekil, or mekem laef bilong man stap long danger. Long olketa nara sport, pipol wea kam for lukluk nao savve raf and laek faet or tingse team or kantri bilong olketa nao gud winim narawan. Wanem nao iu shud duim sapos iu laekem kaen sport olsem? Iu bae luksavve kaen hapitaem olsem no followim tingting bilong Jehovah and no followim wanem iumi preach abaotem for garem peace and lovem narawan. (Isa. 61:1; Gal. 5:19-21) Bat sapos hapitaem wea iu chusim hem fitim, bae iu kasem gud samting from datwan.—Gal. 5:22, 23; readim Philippians 4:8.
Haomas Taem Nao Mi Iusim Long Hapitaem?
9. Taem iu ting raonem haomas taem nao iu iusim long hapitaem, datwan bae helpem iu for luksavve long wanem?
9 Firstfala kwestin wea iumi storyim helpem iumi for luksavve long kaen hapitaem wea iumi interest long hem and hapitaem wea fitim. Bat nara kwestin for tingim hem ‘Haomas taem nao mi iusim long hapitaem?’ Disfala kwestin bae helpem iumi for luksavve long samting wea important long laef bilong iumi. So wanem nao savve helpem iumi for luksavve sapos hapitaem nao hem main samting long laef bilong iumi?
10, 11. Toktok bilong Jesus long Matthew 6:33 helpem iumi for luksavve long wanem samting abaotem hapitaem?
10 Jesus Christ sei: “Iu mas lovem God bilong iu Jehovah long full heart bilong iu. And iu mas iusim full soul, full strong, and evri savve bilong iu for lovem hem tu.” (Mark 12:30) Iumi showimaot iumi lovem Jehovah taem iumi obeyim wanem Jesus talem. Hem sei: “Evritaem Kingdom and olketa samting wea God sei hem stret mas first samting long laef bilong iufala. Sapos olsem, God bae givim iufala olketa samting hia wea iufala needim.” (Matt. 6:33) Samting wea Jesus talem bae helpem iumi for luksavve haomas taem iumi shud iusim long hapitaem and sapos hapitaem hem main samting long laef bilong iumi.
11 Jesus talem iumi ‘Kingdom nao mas first samting long laef.’ Hem no sei iumi shud no duim eni nara samting. Jesus savve iumi mas duim olketa nara samting tu long laef and no olketa samting for Kingdom nomoa. Iumi needim ples for stap, kaikai, kaleko, education, waka for selen, hapitaem, and olketa nara samting. Olketa samting hia no first samting long laef bilong iumi bat Kingdom nao first samting. (1 Cor. 7:29-31) Taem iumi luksavve long datwan, bae iumi ting long hapitaem and olketa nara samting olsem mek-tu samting long laef. Sapos iumi duim olsem bae iumi kasem gud samting from hapitaem.
12. Luke 14:28 helpem iumi for disaedem wanem samting saed long hapitaem?
12 Bifor iumi chus for duim hapitaem, hem gud for tingim haomas taem nao bae iumi iusim long hapitaem. (Luke 14:28) Tingim diswan. For baem samting, iumi needim selen. Semsem tu, for garem hapitaem iumi needim taem for duim datwan. Iumi need for disaedem haomas taem nao bae iumi iusim long hapitaem. Iumi shud no iusim staka taem tumas long hapitaem gogo iumi no garem taem nao for duim olketa important samting olsem study seleva, Famili Worship, go long olketa meeting, or for duim preaching waka. (Mark 8:36) Bat sapos iumi luksavve hapitaem wea iumi laek duim bae strongim iumi for gohed duim olketa samting hia, maet iumi disaed for duim datfala hapitaem.
Hu Nao Mi Laek Duim Hapitaem Witim?
13. Why nao iumi shud tingting gud abaotem hu nao iumi duim hapitaem witim?
13 Mek-thri kwestin wea iumi need for tingim hem ‘Hu nao mi laek duim hapitaem witim?’ Hem important for tingim diswan bikos pipol wea iumi laek for duim hapitaem witim bae helpem iumi for disaedem gud samting or nogud samting. Tingim diswan. Iumi savve enjoyim wei for kaikai witim olketa narawan. Semsem tu, iumi laek for duim hapitaem witim olketa gud fren. Dastawe olketa young wan and staka long iumi laek for duim hapitaem witim narawan. Bat bifor iumi chusim hapitaem, hem gud for tingim hu nao iumi bae kaban witim and hu nao iumi shud no kaban witim. Datwan bae helpem iumi for chusim hapitaem wea bae mekem iumi kasem gud samting.—2 Chron. 19:2; readim Proverbs 13:20; Jas. 4:4.
14, 15. (a) Wanem example nao Jesus showimaot? (b) Taem iumi chusim olketa fren, olketa wanem kwestin nao iumi shud tingim?
14 Wei for followim example bilong Jesus bae helpem iumi for garem olketa gud fren. Jesus lovem pipol. (Prov. 8:31) Taem hem stap long earth hem lovem and respectim evri difren kaen pipol. (Matt. 15:29-37) Bat Jesus luksavve wei for kaen long narawan hem difren from wei for barava fren gud witim olketa. Hem kaen long evriwan bat no evriwan hem olketa gudfala fren bilong hem. Samting wea Jesus talem long 11-fala faithful aposol showimaot datwan. Hem sei: “Sapos iufala duim samting wea mi talem long iufala, iufala olketa fren bilong mi.” (John 15:14; lukim tu John 13:27, 30.) Jesus fren gud witim olketa wea followim hem and worshipim Jehovah.
15 So bifor iu chusim hu nao bae iu fren gud witim, hem gud for tingim wanem Jesus talem. Tingim olketa kwestin hia: ‘Waswe, samting wea fren bilong mi talem and duim showimaot hem obeyim Jehovah and Jesus? Waswe, hem laekem tumas for duim gud samting and heitim nogud samting? Waswe, bae hem helpem mi for duim samting for Kingdom firstaem and for faithful long Jehovah?’ Sapos fren bilong iu duim olketa samting hia datwan showimaot hem gudfala fren for kaban witim.—Readim Psalm 119:63; 2 Cor. 6:14; 2 Tim. 2:22.
Waswe, Hapitaem wea Mi Chusim Followim Standard Bilong Jehovah?
16. Wanem nao iumi shud tingim abaotem hapitaem?
16 Iumi storyim thrifala kwestin abaotem hapitaem. Bifor iumi chusim hapitaem, iumi need for tingim wanem kaen hapitaem nao iumi chusim and haomas taem nao iumi iusim for duim datwan. Iumi need for tingim tu hu nao iumi laek duim hapitaem witim. Sapos iumi laek kasem gud samting, hapitaem wea iumi chusim mas followim standard bilong Jehovah. Tingim diswan: ‘Wanem kaen hapitaem nao mi laek for duim? Waswe, bae Jehovah hapi long hapitaem wea mi chusim, or waswe, datfala hapitaem hem raf and mekem mi laek duim rabis samting?’ (Prov. 4:20-27) ‘Waswe, bae mi iusim staka taem for duim datfala hapitaem or nomoa?’ (1 Tim. 4:8) ‘Hu nao bae mi kaban witim? Waswe, bae olketa helpem mi or bae olketa spoelem gudfala wei bilong mi?’—Eccl. 9:18; 1 Cor. 15:33.
17, 18. (a) Wanem nao bae helpem iumi for luksavve sapos hapitaem wea iumi chusim followim standard bilong Jehovah? (b) Wanem nao bae iu disaedem saed long hapitaem?
17 Sapos hapitaem wea iumi duim no followim standard bilong Jehovah long thrifala samting wea iumi storyim finis, datfala hapitaem bae spoelem iumi. Bat sapos hapitaem wea iumi chusim followim standard bilong Jehovah, bae iumi kasem gud samting and datwan bae mekem pipol praisem Jehovah.—Ps. 119:33-35.
18 So iumi mas traem best for chusim gudfala hapitaem, duim long taem wea fitim, and witim olketa wea garem gudfala wei. Tru tumas, iumi laek followim disfala advaes long Bible: “Nomata iufala kaikai or drink or duim eni nara samting, evri samting wea iufala duim mas givim glory long God.”—1 Cor. 10:31.
Waswe, Iu Tingim Yet?
Long wanem wei nao olketa scripture hia savve helpem iu for chusim gudfala hapitaem?
[Olketa Kwestin]
[Piksa long page 9]
(For ful text, lukim pablikeson)
✔Wanem
[Piksa long page 10]
(For ful text, lukim pablikeson)
✔Haomas
[Piksa long page 12]
(For ful text, lukim pablikeson)
✔Hu
[Piksa long page 10]
Example bilong Jesus savve helpem iumi for chusim gudfala hapitaem and olketa gud fren!
