Omw Mehn Kamweit oh Mwadong Kin Wia Kamwahu ong Uhk?

“Kumwail kin song rapahki dahme Kaun-o kin ketin kupwurperenki.”​—EP. 5:10.

1, 2. (a) Ia duwen atail ese me Siohwa ketin kupwurki atail mour en peren? (b) Pwehki atail ahnsou ong mwadong eh wia kisakis ehu sang Koht, dahme met pahn kahrehiong kitail en men wia?

PAIPEL kawehwehda mwahu me Siohwa ketin kupwurki kitail en perenki atail mour. Karasepe, Melkahka 104:14, 15 mahsanih me Siohwa ketin wiahda “wahntuhke oh werentuhke, pwe aramas en kin kakairada wahnsahpw, oh kapwarehda wain mehn kaparanda nan kapehde, lehn olip mehn kansenamwahwihada, oh pilawa mehn kakehlahda paliwere.” Siohwa me ketikihong kitail mwenge me kitail anahne pwe kitail en mour. E ketin kawosada wahnsahpw akan pwe en mie pilawa, leh, oh wain ong kitail. Mendahki kitail sohte anahne wain pwe kitail en mour, e kak ‘kaparanda nan kapehdatail.’ (Ekl. 9:7; 10:19 a) Siohwa ketin kupwurki kitail en peren. E ketin kupwurki mohngiongitail kan en audaudkihda “peren.”​—Wiewia 14:16, 17.

² Eri kitail en dehr medewe me e sapwung kitail en doadoahngki atail ahnsou ong “tehk mwahu menpihr en pahnlahng kan” oh “kilang kiopw en nansapw akan.” Soahng pwukat pahn kak kakehlaka oh kalaudehla atail peren. (Mad. 6:26, 28; Mel. 8:3, 4) Mour nsenamwahu oh ahneki roson mwahu iei “kalahngan en Koht.” (Ekl. 3:12, 13) Atail ahnsou me kitail kin doadoahngki ong mwadong wia kisehn kisakis me Koht ketikihong kitail. Eri kitail anahne doadoahngki met ni ahl ehu me pahn kaperenda Koht.

Pilada Mwahu Mwadong oh Mehn Kamweit kan

3. Dahme kahrehda en aramas akan arail pilipil kan ong mwadong wekpeseng?

³ Irail kan me ahneki madamadau pwung me pid mwadong ese me re kak wiahda pilipil kan. Re pil ese me mie mwadong kan me sohte konehng. Dahme kahrehda ahn aramas pilipil kan wekpeseng? Pwe kitail en wehwehki met, kitail kak kapahrekihong atail pilipil en mwadong ong dahme kitail kin men kang. Aramas akan sang soangsoangen wasa kan mwahuki kang soangsoangen mwenge kan. Pil duwehte met, Kristian kan sang soangsoangen wasa kan kin perenki soangsoangen mwadong kan. Pil irail me kin mi wasa tehieu ele kak pilada wia soahng kan me wekpeseng. Karasepe, emen kak medewe me wadek pwuhk mwahu ehu kaperen, ahpw emen kak medewe me e kasangat. Emen pil kak perenki wia soahng kan me pahn kak kamwakamwakid paliwere duwehte kohla alu de tang, ahpw ekei sohte pahn perenki. Duwehte aramas ar kak pilada soangen mwenge kan me re iouki, re pil kak pilada soangen mwadong kan me re mwahuki.​—Rom. 14:2-4.

4. Dahme kahrehda kitail anahne kanahieng soangen mehn kamweit oh mwadong kan me kitail pilada? Karasaras dahieu me sewese kitail en wehwehki met?

⁴ Mendahki kitail ahneki saledek en wiahda pein atail pilipil kan ong mwadong, kitail en dehr wia soahng koaros me kitail men wia. Pwurehng medewehla karasaras en mwenge. Mwein kitail iouki soangsoangen mwenge. Ahpw kitail sohte pahn pilada kang mwenge kitei. Kitail kak soumwahukihda. Duwehte met, kitail kak pilada soangsoangen mwadong oh mehn kamweit mwahu kan. Ahpw kitail sohte pahn wia tiahk samin de wiewia lemei kan de soahng kan me kak keper ong atail mour. Soahng pwukat kin uhwong kaweid en Paipel kan. Re kak kauwehla atail nanpwungmwahu rehn Siohwa oh atail roson  mwahu. Eri kitail anahne kanahieng mehn kamweit oh mwadong kan me kitail pilada. Kitail anahne medewe mwahu duwen soahng kan me kitail men wia oh pilada mwadong oh mehn kamweit kan me pahn mwahu ong kitail oh kak kaperenda Siohwa. (Ep. 5:10) Ia duwen atail kak pilada mehn kamweit oh mwadong me pahn mwahu ong kitail?

5. Ia duwen atail kak ese ma atail mehn kamweit oh mwadong kan kin kaperenda Siohwa?

⁵ Pwe atail mwadong oh mehn kamweit kan en kak wia kamwahupatail oh kaperenda Siohwa, e anahne pahrekiong kaweid en Paipel kan. (Mel. 86:11) Pwehn sewese iuk ken wiahda pilipil kan ong mwadong oh mehn kamweit, ke kak doadoahngki ehu doaropwe oh ntingihedi peidek siluh me ke kak pein idek rehmw. Peidek pwukat iei: dahme? iahd? oh ihs? Met kitail pahn koasoiapene peidek pwukat.

Dahme E Kin Pidada?

6. Soangen mehn kamweit dah me kitail en dehr pilada? Dahme kahrehda?

⁶ Mwohn atail pahn pilada mehn kamweit kan, kitail anahne idek rehtail: Dahme e kin pidada? E mwahu en tamataman me mie soahng riau me pid mehn kamweit kan. Keieu e kin pidada mehkan me kitail sohte pahn wia. Keriau e kin pidada mehkan me kitail kakete pilada wia. Ia keieun mehn kamweit kan? Mehn kamweit tohto nan sampah suwed wet kin pidada wiewia kan me uhdahn uhwong kaweid en Paipel de kosonned en Koht. (1 Sohn 5:19) Kristian mehlel kan sohte pahn pilada soangen mehn kamweit pwukat. Met wehwehki soahng kan me pidada kilang kilel suwed, wunahni, ohl mwahuki ohl de lih mwahuki lih, oh wiewia lemei. E pil kin pidada mehn kamweit kan me kin kasalehda tiahk en kamedekihala meteikan pwehn kaperenda aramas kan me kin kilang, de soahng teikan me kahrehda tiahk samin en mwomwen mwahu. (1 Kor. 6:9, 10; wadek Kaudiahl 21:8.) Sohte lipilipil ma kitail kelekelehpw de kitail mi rehn meteikan, kitail uhdahn sohte pahn pilada soangen mehn kamweit pwukat. Kitail men kasalehiong Siohwa me kitail tatki “me suwed.”​—Rom 12:9; 1 Sohn 1:5, 6.

7, 8. Dahme kak sewese kitail en wiahda pilipil mwahu kan me pid mwadong oh mehn kamweit kan? Dahme kitail kak medewe ni atail pahn wiahda pilipil kan?

⁷ Keriaun soangen mehn kamweit kan kin pidada wiewia kan me kitail anahne medewe kanahieng mwohn atail pahn pilada. Mwein Paipel sohte kin koasoia duwen uhdahn soangen mehn kamweit pwukat. Ahpw kaweid en Paipel kan pahn sewese kitail en wehwehki dahme Siohwa kin ketin medewe me mwahu oh pwung. Eri, mwohn atail pahn wiahda pilipil kan duwen mehn kamweit pwukat, kitail anahne uhdahn ese me re sohte kin uhwong kaweid en Paipel kan. (Lep. Pad. 4:10, 11) Mwuri, kitail anahne wiahda pilipil kan me pahn sewese kitail en kolokol nsenmwakelekel. (Kal. 6:5; 1 Tim. 1:19) Ia duwen atail kak wiahda pilipil mwahu kan? Pwurehng medewehla mwenge. Mwohn atail pahn song mwenge kapw ehu, kitail men ese dahme mi loale. Duwehte met, mwohn atail pahn pilada mwadong oh mehn kamweit kan, kitail men ese dahme re pidada pwe kitail en kak pilada ma e mwahu ong Kristian men.​—Ep. 5:17.

⁸ Karasepe, mwein ke kin perenki mwadong duwehte aramas tohto. Mwadong kak kaperen. Ahpw nan ekei mwadong kan siaipene kak wiahla tiahk lemei oh kak keper ong mour en aramas. Ekei mwadong kan keper oh kin kauwehla paliwar. Nan ekei mwadong, aramas akan kin kapinga arail kana ni mwohmw lemei oh kak medewe me arail wehi mwahusang meteikan. Dahme ke anahne wia ma soahng pwukat wiawi nan mwadong me ke perenki? Ni omw kin medewe duwen dahme kin pidada mwadong pwukat, ke pahn pwungkier me mwadong pwukat sohte kin pahrekiong sapwellimen Siohwa madamadau oh popohl oh limpoak me kitail kin kalohkihong meteikan. (Ais. 61:1; Kal. 5:19-21) Ahpw ma ke kamehlele me mwadongo pahrekiong sapwellimen Siohwa kaweid kan, eri, e pahn mwahu ong uhk oh kakehleiuk.​—Kal. 5:22, 23; wadek Pilipai 4:8.

 Iahd me I Kin Iang Mwadong?

9. Dahme ke kak sukuhlki sang omw pasapeng en peidek: Iahd me I pahn iang mwadong?

⁹ Keieun peidek me kitail koasoiapene iei: Dahme? Atail sapengala peideko kasalehda dahme kitail mwahuki oh pwungki. Met, keriaun peidek iei: Iahd? Eri kitail anahne idek rehtail: Iahd me I pahn iang mwadong, oh ia uwen werei? Atail pasapeng ong keriaun peideko kin kasalehda dahme kitail kin medewe me keieu kesempwal. Eri, dahme kak sewese kitail en ese uwen mwadong eh kesempwal nan atail mour?

10, 11. Ia duwen sapwellimen Sises mahsen kan me mi nan Madiu 6:33 eh sewese kitail en ese ia uwen werei atail kin doadoahngki atail ahnsou ong mwadong oh mehn kamweit?

¹⁰ Sises Krais mahsanihong sapwellime tohnpadahk ko: “Ke uhdahn pahn poakohng Kaun-o, amwail Koht, nan kapehdomw unsek, [“omw mour,” NW] unsek, omw lamalam koaros unsek, oh omw kehl unsek.” (Mark 12:30) Kitail kin kasalehda me atail limpoak ong Siohwa me keieu kesempwal nan atail mour sang ni atail kin peikiong dahme Sises mahsanih: “Kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn ketikihong kumwail.” (Mad. 6:33) Sapwellimen Sises mahsen kan kak sewese kitail en pilada ia uwen  mwadong eh kesempwal nan atail mour oh ia uwen werei atail kin doadoahngki atail ahnsou.

¹¹ Tehk me Sises mahsanihong kitail en “rapahki mahs Wehin Koht.” E sohte mahsanihong kitail en rapahki ihte Wehin Koht. Sises ketin mwahngih me kitail pahn anahne apwalih soahng tohto nan atail mour likin atail rapahki Wehio. Kitail anahne ahnsou ong rapahki doadoahk en mwohni, mwenge, ihmw, likou, sukuhl, mwadong oh soahng teikan. Ahpw kaidehn mepwukat me keieu kesempwal nan atail mour. Wehio me keieu kesempwal. (1 Kor. 7:29-31) Ni atail wehwehkihla dahme keieu kesempwal, kitail pahn rapahki mahs Wehio oh kihong mwadong oh wiewia teikan en keriau. Ma kitail kin wia met, kitail kak paiekihda mwadong oh mehn kamweit kan.

12. Ia duwen Luk 14:28 eh kak sewese kitail en wiahda pilipil kan duwen atail mwadong oh mehn kamweit kan?

¹² Mwohn atail pahn wiahda pilipil kan duwen mwadong oh mehn kamweit kan, kitail anahne medewe kanahieng duwen “uwen pweine,” de ahnsou me pahn pidada. (Luk 14:28) Duwehte ekei soahng kan anahne mwohni, mwadong oh mehn kamweit kan kin anahne de doadoahngki ahnsou. Kitail anahne koasoanehdi ia uwen werei atail pahn doadoahngki atail ahnsou ong mwadong oh mehn kamweit kan. Kitail en dehr doadoahngki ahnsou laud ong mwadong oh mehn kamweit kan me kahrehda sohla itar ahnsou ong mehkan me kesempwal duwehte pein onop Paipel, kaudok en peneinei, iang towehda mihting en Kristian kan de kalohk. (Mark 8:36) Ahpw ma mwadong pahn kihong kitail kehl en pousehlahte atail papah Koht, kitail ese me atail ahnsou ong mwadongo pahn mwahu ong kitail.

Ihs Kompoakepahi kan?

13. Dahme kahrehda kitail anahne medewe mwahu duwen ihs me kitail pahn iangih mwadong?

¹³ Kesiluhn peidek iei: Ihs me pahn iang ie mwadong? Pasapengpen peidek wet kin kesempwal pwehki aramas akan me kitail werekiong pahn kamwakid kitail ma kitail pahn wiahda pilipil mwahu kan. Karasepe, kitail kin perenki mwenge rehn meteikan. Met duwehte ahnsoun atail mwadong. Atail kin mwadong rehn kompoakepatail mwahu kan kaperen. Eri kitail kak wehwehki me me tohto rehtail, ahpw mehlel me pwulopwul kan, kin perenki mwadong rehn meteikan. Ahpw, mwohn atail pahn pilada mwadong kan, kitail anahne ese soangen aramas dah me mwahu de suwed en werekiong. Met pahn sewese kitail en ese me mwadongo pahn wia kamwahu ong kitail.​—2 Kron. 19:2; wadek Lepin Padahk 13:20; Seims 4:4.

14, 15. (a) Ia duwen sapwellimen Sises mehn kahlemeng eh kin sewese kitail en pilada kompoakepatail mwahu kan? (b) Ni atail kin pilada kompoakepatail kan, peidek dah kan kitail anahne idek rehtail?

 ¹⁴ Atail idawehn sapwellimen Sises mehn kahlemeng pahn sewese kitail en pilada kompoakepatail mwahu kan. Sises kin ketin ahnsou koaros poakohng aramas akan. (Lep. Pad. 8:31) Ni eh ketiket nin sampah, e ketin kasalehda limpoak oh wahu ong koaros. (Mad. 15:29-37) Ahpw Sises ketin mwahngih wekpeseng en kasalehda kadek oh wia kompoakepah keren men. Mendahki Sises ketin kadek ong aramas koaros, e sohte ketin kompoakepahnki koaros. Sapwellime mahsen ong sapwellime wahnpoaron lelepek 11 ko kasalehiong kitail ia duwen eh ketin pilada kompoakepah kan. E ketin mahsanih: “Kumwail iei kompoakepahi, ma kumwail kin wia dahme I padahkihong kumwail.” (Sohn 15:14; pil kilang Sohn 13:27, 30.) Sises ketin piladahte kompoakepahnki irail kan me kin idawehn ih oh papah Siohwa.

¹⁵ Mwohn omw pahn pilada ken kompoakepahnki emen, e pahn mwahu en tamataman dahme Sises mahsanih. Idek rehmw peidek pwukat: Aramas menet kin kasalehda sang eh koasoi oh wiewia me e kin peikiong sapwellimen Siohwa oh Sises kehkehlik kan? E kin poakohng me pwung oh tatki me suwed? E pahn sewese ie en mwohneki mahs Wehio nan ei mour oh lelepek papah Siohwa? Ma omw pasapeng ong peidek pwukat, ei, eri ke kompoakepahnki emen me ke kak iangih mwadong.​—Wadek Melkahka 119:63; 2 Kor. 6:14; 2 Tim. 2:22.

Atail Mehn Kamweit oh Mwadong kan Konehng?

16. Dahme kitail anahne idek rehtail duwen mehn kamweit oh mwadong kan?

¹⁶ Kitail koasoiapenehr peidek siluh duwen mehn kamweit oh mwadong kan: dahme? iahd? oh ihs? Mwohn atail pahn iang mwadong de pilada mehn kamweit, kitail anahne medewe mwahu audepe kan oh ia uwen lauden ahnsou me kitail pahn doadoahngki oh pil kompoakepatail kan me kitail pahn pilada en iang. Pwe kitail en paiekihda atail mwadong oh mehn kamweit kan, e anahne pahrekiong kaweid en Paipel kan. Ni atail kin medewe audepen atail mehn kamweit oh mwadong, kitail anahne idek rehtail: Dahme e kin pidada? Siohwa ketin kupwurki mwadong de mehn kamweit wet, de e kasalehda wiewia lemei de samin? (Lep. Pad. 4:20-27) Ni atail kin medewe uwen laud en ahnsou, kitail anahne idek rehtail: Ia uwen ahnsou me I pahn doadoahngkihong mehn kamweit de mwadong wet? Mie katepen ei pahn doadoahngki ei ahnsou ong met? (1 Tim. 4:8) Oh ni atail kin medewe kompoakepatail kan me pahn iang kitail mwadong, kitail anahne idek rehtail: Ihs me pahn iang ie? Irail pahn wia kompoakepah mwahu kei, de re wia werek suwed kei?​—Ekl. 9:18; 1 Kor. 15:33.

17, 18. (a) Ia duwen atail kak tehk ma atail mehn kamweit oh mwadong kan kin pahrekiong kaweid en Paipel kan? (b) Pilipil dahieu ke pahn wiahda me pid mehn kamweit oh mwadong kan?

¹⁷ Ma atail mehn kamweit de mwadong kan sohte pahrekiong kaweid en Paipel ong ire siluh pwukat, eri re sohte konehng. Ahpw ma re pahrekiong kaweid en Paipel ong ire siluh me kitail koasoiapenehr, eri re pahn kalinganahda Siohwa oh wia kamwahu ong kitail.​—Mel. 119:33-35.

¹⁸ Eri ni atail kin wiahda pilipil kan duwen atail mehn kamweit oh mwadong kan, kitail anahne wia uwen atail kak en wia me pwung ni ahnsou me konehng oh rehn aramas mwahu kan. Kitail anahne men peikiong dahme Paipel padahkihong kitail: “Eri, mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht.”​—1 Kor. 10:31.

Ke Kak Kawehwehda?

Ia duwen kaweid en iren Paipel pwukat ar kak sewese iuk ken wiahda pilipil duwen mehn kamweit oh mwadong kan?

• Pilipai 4:8

• Madiu 6:33

• Lepin Padahk 13:20

[Peidek en Onop]

[Kilel nan pali 9]

(Pwehn kilang nting kan ni soandi mwahu, kilang pwuhk wet)

✔Dahme

[Kilel nan pali 10]

(Pwehn kilang nting kan ni soandi mwahu, kilang pwuhk wet)

✔Iahd

[Kilel nan pali 12]

(Pwehn kilang nting kan ni soandi mwahu, kilang pwuhk wet)

✔Ihs

[Kilel nan pali 12]

Ia duwen sapwellimen Sises mehn kahlemeng eh kin sewese kitail en pilada kompoakepatail kan oh atail mehn kamweit oh mwadong kan?