¿Allinchu kusirikuyninchikkuna?

“Maskaychikqa Señorninchik agradaytayá” (EFE. 5:10).

1, 2. a) ¿Bibliapi ima textokunam qawachin Jehová Dios kusikunanchikta munasqanta? b) Kusirikunapaq tiempo ‘Diosmanta hamusqanrayku’, ¿imaynatam servichikunanchik?

BIBLIAPIM sutillata qawachiwanchik Jehová Diosqa kusikunanchikta munasqanmanta. Payqa ‘wiñachichkanmi [. . .] allpamanta kawsaykunata [. . .]. Vinotam horqon sonqonchikta kusichinanpaq. Aceitetam horqon uyanchikta llusikunanchikpaq. Tantatañataqmi horqon kallpanchakunanchikpaq’ (Sal. 104:14, 15, NM). Arí, Diosqa tarpusqanchikkunatam wiñachin chaymanta kawsayta, aceiteta hinaspa vinota horqospa mikunanchikpaq. Qawasqanchikman hinaqa vinoqa ‘sonqonchiktapas kusichinmi’ (Ecl. 9:7; 10:19). Sutillatamá qawanchik Jehová Diosqa kusisqa kananchikta munasqanta, chaymi “chani-chaninta qowanchik chaynapi kusisqa kawsananchikpaq” (Hech. 14:16, 17).

² Chaymi mana hukmanyananchikchu wakinpi kusirikunapaq tiempota rakispaqa. Wakinpim “alton pawaq urpikunata” hinaspa ‘purun waytakunata’ qawayqa allinta sientichiwanchikman (Mat. 6:26, 28; Sal. 8:3, 4). Chayna kusisqa hinaspa allin kawsakuyqa “Diosmantam hamun” (Ecl. 3:12, 13). Kusirikunapaq tiempo Diosmanta hamusqanraykum, paypa munasqanman hina rurananchik.

Allinta tanteasun kusirikunapaq

3. ¿Imapim reparananchik kusirikuykunamanta rimaspaqa?

³ Allin tanteaq cristianoqa yachanmi sapakama ima kusikuytapas akllakunanmanta, ichaqa manam lliwtachu akllakunan, chaymantam qatiqninpi qawasunchik. Chaynallataqmi mikuywanpas pasan, wakin llaqtakunapim miskillaña wakinpiñataq mana. Wakin llaqtapi cristianokunapaq imayna kusirikusqankum wakin llaqtapiqa mana kusirikunapaq hina kanman. Chaynam kanman chay llaqtallapi yachaqkunapaqpas. Wakinkum kusirikunku librota leespanku, wakinkuñataqmi qellapakunku chayta ruraspanku, wakinkuqa kusikunku bicicleta manejaspa wakinkuñataqmi mana munankuchu pisipasqankurayku. Imaynam mikuypas wakin llaqtakunapi miski wakinpiñataq mana, chayman kusirikuykunawanpas pasan (Rom. 14:2-4).

4. ¿Imanasqataq imawanpas kusikunapaq akllayqa ancha allin? Rimarimuy huk rikchanachiywan.

⁴ Imawanpas kusirikunapaq nispaqa manam nichkanchikchu mana allinninchikpaq kaqkunawan kusirikuymantachu. Kaqmanta rimasun mikuymanta. Tukuyta mikuq kaspanchikpas manam haykapipas mikuchwanchu puchuchuruptinqa ¿aw? Chayta mikuspaqa onqoruchwanmi. Chaynallataqmi imawanpas kusirikuspaqa, qalalla kaqkunatawan maqanakuqkunataqa mana qawanachu hinaspa Bibliapa contranpi kaqkunawanpas kusirikunachu nitaq iñiyninchiktawan cuerponchikta yanqachaqkunawanpas. Chaymi allinta akllananchik imawanpas kusirikuyta munaspaqa.  Chaypaqmi puntata yachana chay kusikuyqa allin otaq mana allin kasqanta (Efe. 5:10). Qatiqninpi chaymanta astawan yachasun.

5. ¿Imaynatam yachachwan kusirikuyninchikta Jehová Dios allinpaq qawasqanta?

⁵ Kusirikuyninchik allinninchikpaq kananpaqqa hinaspa Jehová Diosta kusichinanpaqqa, Diospa Palabranpa nisqanman hinam kanan (Sal. 86:11). Chaypaqmi yanapawasunchik kay tapukuykuna: ¿Imawanmi chaqrusqa kachkan? ¿Haykapitaq rurasaq?, hinaspa ¿piwantaq risaq?, nisqakuna. Qatiqninpim qawasun sapakamamanta.

¿Imawanmi chaqrusqa kachkan?

6. ¿Ima kusirikuykunatam qalaypaq qepanchanchik hinaspa imanasqa?

⁶ Kusirikuykunata akllananchikpaqqa puntatam kaynata tapukunanchik: “¿Imakunawanmi chaqrusqa kachkan?”, nispa. Allinmi kanman kay yachayninchikqa: Diospa serviqninqa wakin kusirikuytam qalaypaqta qepanchanan wakintañataqmi conciencianman hina ruranan. ¿Mayqantaq qalaypaqta qepanchanapaq kaqkunaqa? Chayqa Bibliapa contranpi mana allin ruraykunawan qawaykunam (1 Juan 5:19). Runakunapa kusirikuyninkupi layqa ruraykuna, huchapakuykuna, qalalla qawaykuna hinaspa Biblia contranpi huk ruraykuna qawakuptinpas, cristianokunaqa mana iskayrayaspam chaykunataqa qepanchananchik (1 Cor. 6:9, 10; leey Apocalipsis 21:8). Maypi kaspapas chaykunawanqa manam tumpallatapas kusirikunachu. Chaynata ruraspam kasukuchkanchik Jehová Diospa kayna nisqanta: ‘Mana allin kaqkunatayá cheqniychik’ (Rom. 12:9; 1 Juan 1:5, 6).

7, 8. ¿Imaynatam cristianoqa yachanman kusirikusqan Jehová Diospaq allin kasqanta? Willamuy huk rikchanachiywan.

⁷ Kunanñataq rimasunchik conciencianchikman hina akllanapaq kusirikuykunamanta. ¿Imaynatam cristianoqa yachanman kusirikuy munasqanqa Jehová Diospaq allin kasqanta? Diospa Palabranpa nisqankunapi yuyaymanaspanmi (Pro. 4:10, 11). Chayta ruraspam concienciaykipas hawka kananpaq allinta akllanki (Gal. 6:5; 1 Tim. 1:19). ¿Imataq yanapasunki allinta akllanaykipaq? Chaypaqqa kaqmanta rimasun mikuymanta. Mana reqsisqanchik mikuyta manaraq mallichkaspam tapunchik imakunawan rurasqa kasqanmanta. Chaynallataqmi manaraq imawanpas kusirikuchkaspa puntataqa yachananchik chay kusirikuypi imakuna kasqanmanta (Efe. 5:17).

⁸ Kaypi piensarisun. Wakiqninchiktam gustawanchik pukllaykuna kusikuypaq kasqanrayku. Ichaqa, ¿gustawanchikchu maqanakuykuna, atipanakuykuna hinaspa nacionninchik kuyaypas? Munasqanchikkunapi yuyaymanaspaqa yaqapaschá musyakusun Jehová Diospa piensasqanwan nitaq hawkayaymantawan kuyakuymanta predicasqanchikwan mana tupasqanta, hinaspam chaykunata qepanchanapaq tantearuchwan (Isa. 61:1; Gal. 5:19-21). Ichaqa kusirikusqanchikkuna Bibliapa nisqanwan tupaptinqa, kallpanchawananchikpaq hinam kanman (Gal. 5:22, 23; leey Filipenses 4:8).

¿Haykapitaq rurasaq?

9. ¿Imapim yanapawasun haykapi kusirikuymanta tanteayqa?

⁹ Chaymantapas kay qatiqnin tapukuytam lliw rurakuchwan: “¿Haykapitaq chay  kusirikuytaq rurasaq?”, nispa. Chaypaqqa tanteananchikmi hayka tiempopi hinaspa haykapi kusirikunamanta. Imawan kusirikunamanta piensayqa qawachiwanchikmi allin otaq mana allin kasqanta, hinaspa haykapi kusirikunamanta rimaptinchikñataqmi qawachiwasun imata puntapi churasqanchikta. Chaynaqa, ¿imaynatam yachachwan kusirikuykunata vidanchikpi mana puntapi churasqanchikta?

10, 11. ¿Imaynatam Mateo 6:33 nisqan yanapawanchik kusikuykunapi hayka tiempota servichikunamanta?

¹⁰ Jesucristom kaynata niwarqanchik: “Diosnikitam kuyanki tukuy sonqoykiwan, tukuy vidaykiwan, tukuy yuyaynikiwan hinaspa tukuy kallpaykiwan”, nispa (Mar. 12:30). ¿Imaynatam qawachichwan Jehová Diosta chayna kuyasqanchikta? Jesuspa kayna nisqanta kasukuspam: “Puntataqa maskaychik Diospa munaychakusqantawan paypa munasqan allin ruraytayá hinaptinqa qosunkichikmi tukuy ima pisipusuqnikichikta” (Mat. 6:33). Qawasqanchikman  hinaqa kay nisqankunam yanapawanchik hayka tiempo hinaspa haykapi kusirikunamanta.

¹¹ Diospa munaychakusqanta puntata maskanamanta Jesus kamachispanqa, manam nichkarqachu Diospa munaychakusqanta maskanallatachu. Payqa yachanmi wasinchikpaq, mikuyninchikpaq, pachanchikpaq, estudiananchikpaq, llamkananchikpaq hinaspa kusirikuykunapaqpas tiempochakunanchikmanta. Ichaqa Diospa munaychakusqanta maskaymi punta piqa kanan (1 Cor. 7:29-31). Bibliapa kayna nisqanta entiendespanchikqa manam imawanpas harkachikusunchu Jehová Dios serviyninchikpiqa. Kusirikuykunapipas kayta kasukuspaqa allintam tanteasun, chaymantapas allinninchikpaqmi kanqapas.

12. ¿Imaynatam Lucas 14:28 nisqan yanapawanchik kusirikuypi?

¹² Puntatam tanteananchik kusirikuykunapi hayka tiempota ‘gastasqanchikmanta’ otaq servichikusqanchikmanta (Luc. 14:28). Chaymi allin kanman hayka tiempota servichikunamanta tanteayqa, hinaspa allinninchikpaq otaq mana allinninchikpaq kasqanpi piensaypas. Sichum chayrayku harkachikusunchik Bibliata estudiananchikpaq, familianchikwan Diosta yupaychananchikpaq, huñunakunanchikpaq hinaspa predicanapaq hinaptinqa manachá allinchu kanman (Mar. 8:36). Ichaqa Diospa munaychakusqanta puntata maskananchikpaq yanapawaptinchikqa allinmi kanman.

¿Piwantaq risaq?

13. ¿Imanasqataq tanteananchik pikunawan kusirikunapaq risqanchikpi?

¹³ Chaymantapas tapukunanchiktaqmi: “¿Piwantaq risaq?”, nispa. Pikunawan risqanchikmanta yachayqa allinpunim, chaynapim kusirikusqanchikqa allin kanqa amistadninchikkunapas allin kaptin. Imaynam allin amistadninchikkunawan mikuyqa sumaq, chaynataqmi allin amistadninchikkunawan kusirikuypas. Chayraykum yaqa llapallanchikta gustawanchik hukkunawanpas kusirikuyta, astawanraqmi mozo-sipaskunataqa. Chaypaqmi allinta amistadninchikkunata akllananchik kusirikusqanchik allin kananpaq  (2 Cro. 19:2; leey Proverbios 13:20; Sant. 4:4).

14, 15. a) ¿Imaynatam Jesusqa amistadninkunata akllarqa? b) ¿Ima tapukuykunatam rurakunanchik amistadninchikkunata akllanapaq?

¹⁴ Amistadninchikkunata akllanapaqqa, ancha allinmi Jesuspa imayna kasqanta qatipakuyqa. Qallariymantapacham payqa runakunata kuyarqa (Pro. 8:31). Kay Pachapi kaspanpas kuyakuywanmi runakunataqa qawarqa (Mat. 15:29-37). Jesusqa yacharqam imam reqsinakuylla kasqanta hinaspa imam allin amistad kasqantapas. Yaqa llapallan runakunawan allinta apanakuspanpas amistadtaqa rurarqa kayna nisqanta kasukuqkunallawanmi: “Qamkunaqa kankichik amistadniykunam kamachisqayta ruraspaykichikqa”, nispa (Juan 15:14; qawaytaq Juan 13:27, 30). Jesuspa amistadninkunaqa karqa apostolninkunawan Jehová Dios serviqkunallam.

¹⁵ Ñoqanchikpas chaynatam rurananchik amistadninchikkunata akllaspaqa. Chaymi kaynata tapukunanchik: “¿Rimasqanwan hinaspa rurasqankunawan qawachinchu Jehová Diosta chaynataq Jesucristota kasukusqanta? ¿Ñoqa hinachu Bibliapa nisqanpi iñin? ¿Yanapawanqachu Jehová Diosman sonqo kanaypaq hinaspa munaychakuyninta puntata maskanaypaq?”, nispa. Chayna kaptinqa allin amistadninchikmi kanqa kusirikuykunapipas (leey Salmo 119:63; 2 Cor. 6:14; 2 Tim. 2:22).

¿Imaynataq kachkan kusirikuyninchikkuna?

16. ¿Imakunatam tapukunanchik kusirikunapaqqa?

¹⁶ Qawarunchikmi kay kimsa tapukuykunamanta: ¿Imawanmi chaqrusqa kachkan? ¿Haykapitaq rurasaq?, hinaspa ¿piwantaq risaq?, nispa. Qawarqanchiktaqmi kusirikuykuna allinninchikpaq kananpaqqa Bibliapa nisqanman hina rurananmanta. Manaraq imatapas akllachkaspam tapukunanchik: ¿Imawanmi chaqrusqa kachkan?, nispa. Kallpanchakunam mana allinkunawan mana chaqrusqa kananpaq (Pro. 4:20-27). ¿Haykapitaq rurasaq? Manam tiemponchiktaqa usuchinanchikchu (1 Tim. 4:8). ¿Piwantaq risaq? Karunchakunam mana allin amistadkunamantaqa (Ecl. 9:18; 1 Cor. 15:33).

17, 18. a) ¿Imaynatam yachachwanchik kusirikusqanchik Bibliapa nisqanman hina kasqanta? b) ¿Imatam sapa cristiano tanteanan kusirikuymanta?

¹⁷ Sichu chay 3 tapukuykunaman hina mana kaptinqa, manam Bibliapa nisqanman hinachu kachkan. Ichaqa Bibliapa nisqanman hina kaptinqa allinninchikpaqmi kanqa, hinaspam Jehová Diostapas kusichinqa (Sal. 119:33-35).

¹⁸ Kusirikuyta munaspanchikqa segurom kananchik imawan, haykapi hinaspa piwan kusirikunanchikmanta. Sonqomantayá kallpanchakusun Bibliapa kayna nisqanta kasukunapaq: “Mikuspapas tomaspapas otaq huk rikchaqta ruraspapas llapantayá ruraychik Dios honrasqa kananpaq” (1 Cor. 10:31).

¿Imatam niwaq?

¿Imaynatam qatiqninpi Bibliapa nisqankuna yanapawanchikman kusirikuykunata allinta akllanapaq?

• Filipenses 4:8

• Mateo 6:33

• Proverbios 13:20

[Kay yachachikuypa tapukuyninkuna]

[9 kaq paginapi dibujo]

(Imayna kasqanmanta yachanapaq qaway kay qellqata)

✔Imawan

[10 kaq paginapi dibujo]

(Imayna kasqanmanta yachanapaq qaway kay qellqata)

✔Haykapi

[12 kaq paginapi dibujo]

(Imayna kasqanmanta yachanapaq qaway kay qellqata)

✔Piwan

[10 kaq paginapi dibujo]

¿Imaynatam Jesuspa rurasqan yanapawanchikman amistadninchikta hinaspa kusirikuyta akllanapaq?