Puapinga Ainei Taau Tamataoraanga?

“Kia kitea ia kotou te mea mareka na te Atu.”​—EPHE. 5:10.

1, 2. (a) Akapeea te Tuatua a te Atua te akakite mai anga e te inangaro ra a Iehova kia mataora to tatou oraanga? (e) Eaa ta te tamataoraanga tei ‘o maiia mai e te Atua,’ ka akakeu ia tatou kia rave?

KA KITE tatou i roto i te Pipiria te au tuatua e te inangaro ra a Iehova ia tatou kare e kia ora ua, inara kia mataora to tatou oraanga. Ei akatauanga, te akakite maira a Salamo 104:14, 15 e te oronga maira a Iehova i te “kai no roto i te enua; E te wina, e rekarekaʼi te ngakau o te tangata nei, te manongi, e inuinu ei tona mata, e te manga e maroiroi ei te ngakau tangata nei.” Tika rai, te akatupu ra a Iehova i te au kai kia rauka mai te titona, te manongi, e te uaina ei angai ia tatou. Ka akakeu katoa te uaina i te ‘ngakau kia rekareka.’ No reira, noatu e kare te uaina e anoanoia kia tauturu ia tatou kia ora, ka rauka ra i te reira i te akarekareka i to tatou ngakau. (Kohe. 9:7; 10:19) Ae, te inangaro ra a Iehova kia rekareka tatou e kia ki to tatou ngakau i te “rekareka.”​—Anga. 14:16, 17.

² No reira, eiaa tatou e manako e e tarevake i te akanoo i tetai tuatau i te ‘akara i te au manu o te reva’ e te “au lili o te enua” me kore kia rekareka i te au angaanga tamataoraanga te ka akaoraora e ka akameitaki mai i to tatou oraanga. (Mata. 6:26, 28; Sala. 8:3, 4) ‘E mea o maiia mai e te Atua’ te oraanga meitaki. (Kohe. 3:12, 13) Na te akamanako anga i te tuatau tamataoraanga ei mea orongaia mai, ka akakeuia tatou kia taangaanga meitaki i te reira ei akarekareka i Tei Oronga mai, ko te Atua. *

Ikianga Tukeke e te Au Kotingaanga

3. Eaa ra i tau ei kia tukeke te ikianga no te tamataoraanga?

³ Te aronga e manako tau ra no runga i te tamataoraanga, ka ariki ratou i te ikianga tukeke inara kua kite katoa ratou i te au kotingaanga. Eaa te tumu? Ei pau atu i te reira, ka akaaite tatou i te tarekarekaanga ki te kai. I roto i tetai au tuanga o te enua e tukeke te au kai e rekaia ra mei tetai enua ke mai. E tika, te au kai e reka ana te tangata i tetai ngai, kare e rekaia ana e te aronga i tetai ngai ke atu. Mei te reira katoa rai te tamataoraanga, ta te au Kerititiano i tetai tuanga o teianei ao e reka ana, penei kare te au Kerititiano i tetai ngai ke e mareka ana. Pera katoa, no te au Kerititiano e noo ra e tai ngai, ka manako tetai e e akangaroianga (penei te tatau anga i tetai puka), inara, kare tetai e reka ana i te reira; ka manako tetai e e akaoraora anga (penei te akarakara aere anga na runga i te patikara takatakai), inara, ka manako tetai e e angaanga roiroi te reira. Inara, ka ariki tatou e e mea tau e kia tukeke te ikianga a tetai uaorai tangata no te kai e te tamataoraanga.​—Roma 14:2-4.

4. Eaa tatou ka kotinga ai i te tu tamataoraanga ta tatou e iki ra? Akatutu mai.

⁴ Inara, kua kite katoa tatou e kare te ikianga tukeke no te tamataoraanga i te tikaanga kia maata roa ta tatou tamataoraanga. Ei akatutuanga, akamanako akaou i te akaraanga no te kai. Noatu e e inangaro ana tatou i te kai i te au kai tukeke, kare ra tatou e kai i te au kai pe. Kare e tau kia kai i taua au kai ra no te mea ka takino te reira i to tatou oraanga. No reira, kare tatou e rave i te au tamataoraanga viivii tikai, ka takino e ka tamamae i te oraanga, noatu e  ka rauka ia tatou i te rave i te au tamataoraanga tukeke. Ka takinoia to tatou oraanga pae kopapa e te pae vaerua me piri atu tatou ki taua au angaanga ra kare e aru ana i te au kaveinga Pipiria. Ei akapapu e ka rauka i te kotinga i ta tatou tamataoraanga, e akamanako meitaki na mua me ka puapingaia tatou e tetai au tamataoraanga e reka ra tatou me kare. (Ephe. 5:10) Akapeea tatou me rave i te reira?

5. Akapeea tatou me akapapu e te rotai ra ta tatou tamataoraanga ki te au turanga o te Atua?

⁵ No tetai tamataoraanga te ka akapuapinga ia tatou e te ka akamareka ia Iehova, ka anoanoia te reira kia aru i te au turanga taka meitaki i roto i te Tuatua a te Atua. (Sala. 86:11) Ei akapapu e te rotai ra taau tamataoraanga e reka ra ki te reira, penei ka akara koe i tetai papaanga mama ua. E toru uianga i roto i te papaanga ka ui tatou kia tatou, eaa, aea, e koai ma. Ka akara tataki tai tatou i te reira.

Eaa te O Maira?

6. Eaa te tarekareka ta tatou ka kopae atu, e no teaa ra?

⁶ Mua ake ka piri ei ki tetai tu tarekarekaanga, e ui i te uianga mua, Eaa?​—koia oki, ‘Eaa te tu o te tamataoraanga taku e reka ra? Ia koe e kimi ra i te pauanga, e mea meitaki kia akamaara e e rua tu tarekarekaanga. Ka karanga tatou ki te mea mua e, kare; ki te rua, penei paa. Eaa te mea mua? I roto i teia ao kino, te akaari maira te maataanga o te tarekarekaanga i te au mea te patoi pakari ra i te au kaveinga Pipiria me kore te aati ra i te au ture a te Atua. (1 Ioa. 5:19) Ka patoi pakari te au Kerititiano mou i taua au tarekareka ra. Te kapiti maira i te tarekareka no runga i te tamamae tangata, angaanga temoni, pirianga tane e te tane, vaine e te vaine, ravenga ainga viivii, ta ua me kore tetai atu au angaanga tau kore. (1 Kori. 6:9, 10; e tatau ia Apokalupo 21:8.) Na te kopae anga kia kore e piri atu ki taua tu tarekareka, noatu teiea tatou, te akapapu ra tatou kia Iehova e te ‘rikarika ra tatou i te kino.’​—Roma 12:9; 1 Ioa. 1:5, 6.

7, 8. Akapeea tatou me iki meitaki i tetai tu tarekarekaanga? Akatutu mai.

⁷ Te rua o te tamataoraanga, te o maira te au tu tarekareka kare te Tuatua a te Atua e patoi ana. No reira, i mua ake ka iki ei i tetai tarekarekaanga, e akaaite meitaki tatou i te au angaanga ka raveia e me te tau ra ki to Iehova manako mei tei akakiteia i roto i te au kaveinga Pipiria. (Mase. 4:10, 11) E ka anoanoia tatou kia rave i tetai ikianga te ka oronga mai i tetai akava ngakau meitaki. (Gala. 6:5; 1 Timo. 1:19) Akapeea tatou me rave i te reira? Akamanako ana i teia: Mua ake ka kai ei i tetai kai ou, ka inangaro tatou i te kite eaa te au mea i roto. Pera katoa, mua ake ka piri ei tatou ki tetai tu tamataoraanga, ka akara meitaki tatou i te au tu o te reira.​—Ephe. 5:17.

⁸ Ei akatauanga, penei e reka ana koe i te angaanga tipoti, te marama uaia atura te reira inangaro. E mea mataora te angaanga tipoti. Akapeea me e reka ana koe i tetai tu angaanga tipoti no te tu akarere, te ka takino i toou oraanga, maata te kino ka tupu ki te kopapa, maata te ta anga e te akaepaepaanga enua e tetai atu “au tu”? Muri ake te akara meitaki anga e eaa te o maira, penei ka kite mai koe e ka ngata i te akarotai i toou manako ki to Iehova e ki te karere no te au e te aroa ta tatou e tutu aere ra ki tetai ke. (Isa. 61:1; Gala. 5:19-21) Tetai tua ra, me te o maira te “au tu” o tetai angaanga tamataoraanga te tau meitaki ra kia Iehova, ka riro taua tamataoraanga ei mea puapinga tikai e ei akaoraora anga kia koe.​—Gala. 5:22, 23; e tatau ia Philipi 4:8.

Aea Au e Piri Atu ei ki Roto?

9. Eaa te akaari maira mei ta tatou pauanga ki te uianga, ‘Aea au e piri atu ei ki roto i te tamataoraanga?’

⁹ Te rua o te uianga ka ui koe kia koe uaorai e, Aea?​—koia oki, ‘Aea au e piri atu ei ki roto i te tamataoraanga? Eaa te maata o te taime ka akapou au ki te reira?’ Te akaari maira ta tatou  pauanga ki te uianga eaa? i te maata o ta tatou e inangaro ra​—ta tatou e ariki ana e kare e ariki ana. Inara, te akaari maira te pauanga ki te uianga aea? i te mea maata kia tatou​—te mea puapinga kia tatou e te kare e puapinga ana. No reira, akapeea tatou e akapapu ei e eaa te tarekarekaanga puapinga tikai kia tatou?

10, 11. Akapeea te au tuatua a Iesu i roto ia Mataio 6:33 me tauturu ia tatou kia iki eaa te maata o te taime ka akapou tatou ki te tamataoraanga?

¹⁰ Kua akakite a Iesu Karaiti ki tana au pipi e: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mare. 12:30) No reira, to tatou inangaro ia Iehova ko te mea mua ia i roto i to tatou oraanga. Ka akaari tatou e ko te reira rai to tatou tu na te aru anga i ta Iesu akoanga e: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mata. 6:33) Akapeea taua au tuatua ra me tauturu ia tatou kia akapapu i te maata o te taime e te puapinga ka akapou tatou ki te tamataoraanga?

¹¹ Akara ana i teia akakiteanga: Kua ako mai a Iesu ia tatou e ‘e na mua i te kimi i te basileia.’ Kare aia i akakite mai ana kia tatou e kia ‘kimi anake ua i te basileia.’ Taka ua ra e kua kite a Iesu e ka inangaro tatou i te kimi i te au  apinga o te oraanga e te Patireia. Ka inangaro tatou i tetai are, kai, kakau, apii tau, angaanga moni, tamataoraanga e te vai atura. Inara, i roto i te au mea ravarai ta tatou ka kimi, e tai ua mea ta tatou ka aruaru na mua​—te au anoano o te Patireia. (1 Kori. 7:29-31) Ka akakeu taua tuatua mou puapinga ra ia tatou kia tuku i te tamataoraanga ei tuanga rua, ei tauturu ia tatou kia rave i ta tatou angaanga puapinga​—te akono anga i te au anoano o te Patireia. Me rave tatou i te reira, ka puapingaia te tamataoraanga tei kotingaia.

12. Akapeea me taangaanga i te kaveinga i roto ia Luka 14:28 ki te tamataoraanga?

¹² No reira me tae te tuatau no te akapou anga i te taime ki te tamataoraanga, e akamanako meitaki tatou na mua i te taime e te moni ka pou no te reira? (Luka 14:28) Ka anoanoia tatou kia akamanako meitaki i te maata o to tatou taime ka akapou ki te angaanga tamataoraanga. Aru mai, ka akamanako tatou e me ka puapingaia to tatou taime. Me te aruaru ra tatou i tetai tu tamataoraanga te ka akangaropoina atu i te au angaanga puapinga mei taau uaorai apii Pipiria, akamorianga a te ngutuare, aere anga ki te au uipaanga Kerititiano, me kore te piri atu anga ki roto i te angaanga tutuanga i te Patireia, kare te reira e puapingaia. (Mare. 8:36) Inara, me te akamaroiroi ra tetai au angaanga tamataoraanga ia tatou kia aruaru i te au anoano o te Patireia, ka puapingaia to tatou taime ki taua tu tamataoraanga.

Koai Ma Toku Au Oa?

13. Eaa ra tatou ka akamanako meitaki ei e koai ma ta tatou ka piri atu ki roto i te tamataoraanga?

¹³ Te toru o te uianga ka ui koe kia koe uaorai e, Koai ma?​—koia oki, ‘Koai ma taku ka inangaro kia piri mai ki te angaanga tamataoraanga?’ E puapinga tikai kia akamanako i teia tu tamataoraanga. Eaa te tumu? No te mea ka riro to tatou au oa i te akakeu maata i te tu o ta tatou tamataoraanga. Mei tetai kaikai kapitianga rai, ka mataora atu koe i te kaikai ki te au oa meitaki, pera katoa ka mataora atu koe me piri atu ki tetai tamataoraanga ma te au oa meitaki. No reira, te marama uaia atura e e maata i rotopu ia tatou, te au mapu tikai, e rekareka ana i te tamataora kapiti atu ki tetai ke. Inara, ei akapapuanga e e puapinga tetai tamataoraanga, e mea meitaki kia akamanako na mua e koai ma ta tatou ka iki ei au oa e koai ma ta tatou ka kopae.​—2 Para. 19:2; e tatau ia Maseli 13:20; Iako. 4:4.

14, 15. (a) Eaa te akaraanga ta Iesu i akanoo mai no te ikianga i te au oa meitaki? (e) Eaa te au uianga ka ui tatou kia tatou uaorai no runga i to tatou au oa?

 ¹⁴ Ka riro te aru anga i to Iesu akaraanga no te ikianga i te au oa ei mea meitaki. Mei te tuatau o te anga mai anga e aere ua atu, e inangaro tikai to Iesu i te au tangata. (Mase. 8:31) Iaia i te enua nei, kua akaari aia i te aroa no te au tu tangata katoatoa. (Mata. 15:29-37) Inara, kua akakite mai a Iesu i te tuke i rotopu i te tu oaoa e te riro anga ei oa piri vaitata. Iaia e akaari ra i te tu oaoa ki te au tangata, te riro ra aia ei oa piri vaitata ki te aronga ua te aru tikai ra i te au akauenga. Te tuatua anga ki tana 11 au pipi akarongo mou, kua karanga a Iesu e: “Ko kotou toku oa, [me] akono kotou i te au tuatua katoa taku i akaue atu ia kotou na.” (Ioa. 15:14; akara katoa ia Ioa. 13:27, 30.) Te aronga anake ua ta Iesu i ariki ana ei au oa nona ko te aronga tei aru iaia e tei tavini ia Iehova.

¹⁵ Me manako koe e ka iki koe i tetai tangata ei oa noou me kare, e mea meitaki kia akamaara i ta Iesu tuatua. E ui kia koe uaorai e: ‘Te akaari maira ainei teia tangata mei tana tuatua e tana e rave ra e te akarongo ra aia ki te au akauenga a Iehova raua ko Iesu? Aiteite ra ainei tana au mea inangaro tei akatumuia i roto te Pipiria e tona au tu akono tau ki toku? Ka riro ainei te piri atu kiaia ei akamaroiroianga iaku kia tuku i te Patireia ei mea mua i roto i toku oraanga e kia riro ei tavini tiratiratu no Iehova?’ Me papu ia koe e ko te au pauanga ki teia au uianga e ae, kua rauka ia koe tetai oa meitaki ka mataora koe i te tamataora kapiti atu.​—E tatau ia Salamo 119:63; 2 Kori. 6:14; 2 Timo. 2:22.

Tau Ainei ta Tatou Tamataoraanga?

16. Eaa ta tatou ka akamanako no runga i ta tatou tarekarekaanga?

¹⁶ E toru tu tamataoraanga ta tatou i uriuri poto ana​—te tu, maata o te taime, e te au oa. E puapingaia ai, kia rotai meitaki ta tatou tarekarekaanga ki te au turanga akatumuia ki runga i te Pipiria no teia au tu. No reira, i mua ake ka piri ei ki tetai tu tamataoraanga, ka anoanoia tatou kia akara meitaki i te reira. No runga i te tu, ka inangaro tatou kia kite e: ‘Eaa te o maira ki roto? E mea meitaki tikai ainei me e mea kino?’ (Mase. 4:20-27) Te akamanako anga no te maata o te taime, ka ui tatou e: ‘Eaa te maata o toku taime ka akapou ki runga i te reira? Te tau ra ainei teia me kare?’ (1 Timo. 4:8) E no runga i te au oa, ka ui tatou e: ‘Koai ma taku ka piri atu ki roto i te tamataoraanga? E meitaki me kore e kino ainei taua au oa ra?’​—Kohe. 9:18; 1 Kori. 15:33.

17, 18. (a) Akapeea tatou e kite ei e te rotai ra ta tatou tarekarekaanga ki te au turanga o te Pipiria? (e) Eaa taau ka tauta i te rave me iki koe i tetai tarekarekaanga?

¹⁷ Me kare tetai tu tarekareka e rotai ana ki te au turanga akatumuia ki runga i te Pipiria no tetai o teia au tu e toru, kare te reira e tau ana. Tetai tua ra, me papu ia tatou e te rotai ra ta tatou angaanga tamataoraanga ki te au turanga akatumuia ki runga i te Pipiria no teia au tu e toru, ka akangateitei te reira ia Iehova e ka puapingaia tatou.​—Sala. 119:33-35.

¹⁸ No reira me ka piri tatou ki tetai tamataoraanga, e tauta tatou i te rave i te mea tika i te tuatau tau e ma te au tangata tau. Ae, kia inangaro ngakau tae tatou tataki tai i te aru i te akoanga Pipiria e: “E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.”​—1 Kori. 10:31.

[Tataanga Rikiriki i Raro]

Ka Rauka Ainei ia Koe te Akataka?

No te tamataoraanga, akapeea koe me taangaanga i te au kaveinga i roto ia . . .

• Philipi 4:8?

• Mataio 6:33?

• Maseli 13:20?

[Au Uianga Apii]

[Tutu i te kapi 9]

(No runga i teia, akara i te puka)

✔Eaa

[Tutu i te kapi 10]

(No runga i teia, akara i te puka)

✔Aea

[Tutu i te kapi 12]

(No runga i teia, akara i te puka)

✔Koai ma

[Tutu i te kapi 10]

Akapeea tatou me aru i to Iesu akaraanga me iki i te au oa e te angaanga tamataoraanga?