Iyazuzisa Yini Indlela Lotijabulisa Ngayo?

“Yetamani kufundza lokutfokotisa iNkhosi.”—EF. 5:10.

1, 2. (a) LiVi laNkulunkulu likuveta njani kutsi Jehova ufuna sikujabulele kuphila? (b) Kutsatsa sikhatsi sekuphumula njengaleso ‘lesisipho saNkulunkulu’ kutasibangela kutsi senteni?

 EBHAYIBHELINI, sitfola emavi laveta kutsi Jehova akafuni sigcine ngekuphila kuphela kodvwa uphindze afune kutsi sikujabulele. Sibonelo saloku kutsi Tihlabelelo 104:14, 15 titsi Jehova uhlumisa “lokumilako kusitakale bantfu, kuze kuvele kudla emhlabeni, neliwayini lelijabulisa tinhlitiyo tabo, nemafutsa ekugcobisa buso bakhe buze bucwebetele, nekudla lokuyinsika yemphilo yemuntfu.” Jehova wenta titjalo tikhule kute tisivetele kudla, emafutsa kanye neliwayini. Kodvwa liwayini liphindze ‘lente kutsi inhlitiyo ijabule.’ Lokusho kutsi lenta lokungetulu kwekusinakekela, ngobe lisenta sijabule. (Shu. 9:7; 10:19) Kuyacaca kutsi Jehova ufuna sijabule, netinhlitiyo tetfu tigcwaliswe “ngenjabulo” lenkhulu.—Imis. 14:16, 17.

² Ngako-ke, kute sizatfu sekutiva sinelicala nangabe ngaletinye tikhatsi sihlela ‘kubuka tinyoni temoya’ kanye ‘netimbali temhlaba,’ nobe senta tintfo letitsite letisenta sicabuleke nobe sijabulele kuphila. (Mat. 6:26, 28; Hla. 8:3, 4) Imphilo lemnandzi ‘isipho saNkulunkulu.’ (Shu. 3:12, 13) Kutsatsa sikhatsi sekuphumula njengaleso lesiyincenye yalesipho, kutasenta sisisebentise ngendlela letawujabulisa uMuphi waso. a

Inkhululeko Kanye Nemikhawulo Ekutijabuliseni

3. Kungani kufanele semukele kutsi kutawuba nemehluko endleleni lesikhetsa ngayo tekutijabulisa?

³ Bantfu labanembono lofanele ngekutijabulisa bayati kutsi banenkhululeko yekutikhetsela, kodvwa ngesikhatsi lesifananako bayati kutsi kunemikhawulo. Kungani kunjalo? Kute siphendvule lombuto, ase sifananise kutijabulisa nekudla. Kudliwa kudla lokungafanani emaveni lehlukehlukene. Kudla lokutsandvwa bantfu bakuletinye tindzawo, bangase bangakujabuleli bantfu bakuletinye. Ngendlela lefananako, intfo lejabulisa emaKhristu akulamanye emave ingase ingawajabulisi emaKhristu akuletinye tindzawo. Ngisho nakumaKhristu lahlala endzaweni lefananako, intfo lomunye kuwo langase ayibone ijabulisa (njengekufundza incwadzi lemnandzi), lomunye angase angayijabuleli; intfo lomunye langase ayibone icabula (njengekuhambahamba ngelibhayisikili), lomunye angase ayibone ikhatsata. Nangetulu kwaloko, siyati kutsi etintfweni letinjengekudla kanye nekutijabulisa, umuntfu angatikhetsela lakutsandzako.—Rom. 14:2-4.

4. Kungani kufanele sibeke imikhawulo endleleni lesikhetsa ngayo tekutijabulisa? Fananisa.

⁴ Nanobe kunjalo, siyacaphela kutsi kuba nenkhululeko yekutikhetsela akusho kutsi sekufanele secise. Kute sifananise, asesiphindze sicabange ngesibonelo sekudla. Ngisho nobe singadla kudla lokwehlukehlukene, kodvwa angeke sikudle ngemabomu kudla lokubolile. Kwenta kanjalo bekungaveta kutsi asicabangi kahle, futsi loko bekungabeka imphilo yetfu engotini. Ngendlela lefananako, singakwati kukhetsa nobe ngabe nguluphi luhlobo lwekutijabulisa lolukahle, kodvwa loko akusho kutsi sitawutijabulisa ngetintfo letingafaka kuphila kwetfu engotini, letinebudlova nobe kutiphatsa lokungcolile. Kuhlanganyela emikhubeni  lenjalo kungashayisana netimiso teliBhayibheli futsi kungalimata buhlobo betfu naNkulunkulu kanye nemphilo yetfu. Kute siciniseke kutsi sitijabulisa ngendlela lefanele, senta kahle ngekuhlola kusengembili kutsi indlela lesitijabulisa ngayo iyazuzisa yini nobe cha. (Ef. 5:10) Singakwenta njani loko?

5. Singakwati njani kubona kutsi kutijabulisa kwetfu kuyavumelana netimiso taNkulunkulu?

⁵ Kute kutijabulisa kwetfu kusizuzise futsi kujabulise naJehova, kufanele kuvumelane netimiso leticacile letibekwe eVini laKhe. (Hla. 86:11) Kute ubone kutsi kutijabulisa kwakho kuyahambisana yini naloko, ungase wente luhla lwemibuto yekutihlola. Loluhla luhlanganisa imibuto lemitsatfu letsi: Ini, nini, kanye nalotsi bobani. Ase sicoce ngayo nyalo.

Kuhlanganisa Ini?

6. Ngukuphi kutijabulisa lokufanele singahlanganyeli kuko, futsi kungani kufanele sente kanjalo?

⁶ Ngembikwekutsi uhlanganyele eluhlotjeni lolutsite lwekutijabulisa, umbuto wekucala lokufanele utibute wona utsi: Ini?—lokusho kutsi ‘lokutijabulisa lengifuna kuhlanganyela kuko kuhlanganisa ini?’ Njengobe ufuna imphendvulo yalombuto, kuhle kukhumbula kutsi ngalokuyinhloko kunetinhlobo letimbili tekutijabulisa. Luhlobo lwekucala luhlanganisa tintfo lokungakafaneli sitente, kantsi lwesibili luhlanganisa leto lesingase sikhetse kutenta. Luyini loluhlobo lwekucala? Kulelive lelibi lesiphila kulo, kutijabulisa lokunyenti kugcwele tento letiphula timiso teliBhayibheli nobe imitsetfo yaNkulunkulu. (1 Joh. 5:19) EmaKhristu eliciniso akukafaneli alukhetse loluhlobo lwekutijabulisa. Lufaka ekhatsi kutijabulisa lokuveta bantfu labajabula ngekulimata labanye, budimoni, bunkonkoni, titfombe letingcolile, budlova, nobe kutijabulisa lokukhutsata kutiphatsa lokungcolile kanye nalokubi. (1 Khor. 6:9, 10; fundza Sembulo 21:8.) Ngekungavumi kusondzela ekutijabuliseni lokunjalo ngisho nobe sikuphi, sitabe sivetela Jehova kutsi ‘siyakutondza lokubi.’—Rom. 12:9; 1 Joh. 1:5, 6.

7, 8. Yini lesingayenta kute sihlole luhlobo lolutsite lwekutijabulisa? Fanekisa.

⁷ Luhlobo lwesibili lwekutijabulisa lufaka ekhatsi kutijabulisa lokungalahlwa ngalokucondzile liVi laNkulunkulu. Etimeni letinjalo, ngembikwekutsi sikhetse loluhlobo lwekutijabulisa, kufanele sihlatiye ngekucophelela umbono waJehova wetintfo latsi tiyakha letivetwa timiso teliBhayibheli. (Taga 4:10, 11) Ngemuva kwaloko, kufanele sente sincumo lesitasishiya sinanembeza lomuhle. (Gal. 6:5; 1 Thim. 1:19) Singakwenta njani loko? Ase ucabange nganaku: Ngembikwekutsi sidle kudla lesingakake sikudle, sicala ngekuhlola kutsi kunongwe ngani. Ngalokufananako, ngembikwekutsi sihlanganyele eluhlotjeni lolutsite lwekutijabulisa kufanele sicale sihlole kutsi luhlanganisani.—Ef. 5:17.

⁸ Sibonelo saloko kutsi ungahle utitsandze temidlalo, futsi kukhangeka lokunjalo kuyacondzakala. Temidlalo tingasijabulisa. Kodvwa kutsiwani nangabe sikhangwa ngumdlalo lotsite ngesizatfu sekutsi unekuncintisana lokukhulu, ufaka badlali bawo engotini, uyabalimata, unebudlova, ushisekela buve, nobe unaletinye tintfo letifanana naleti? Ngemuva kwekuhlola kutsi lomdlalo uhlanganisa ini, ungase uncume kutsi awuhambisani nekucabanga kwaJehova, futsi awuwusekeli umlayeto wekuthula kanye newelutsandvo lesiwushumayelako. (Isa. 61:1; Gal. 5:19-21) Ngakulokunye, nangabe luhlobo lolutsite lwekutijabulisa lwemukeleka emehlweni aJehova, loko kungasho kutsi lungakuzuzisa luphindze lukucabule.—Gal. 5:22, 23; fundza Filiphi 4:8.

Ngitijabulisa Nini?

9. Yini leyembulwa yimphendvulo yetfu embutweni lotsi: ‘Ngitawutijabulisa nini?’

⁹ Umbuto wesibili lesingatibuta wona utsi: Nini?—lokusho kutsi, ‘ngitawutijabulisa nini?  Ngitawucitsa sikhatsi lesingakanani ngitijabulisa?’ Imphendvulo yalombuto lotsi ini? iveta umgomo lesitibekele wona—lokunguloko lokwemukelekako kitsi kanye naloko lokungemukeleki. Nanobe kunjalo, imphendvulo yembuto lotsi nini? iveta loko lokuta kucala kitsi—lokusho tintfo letibalulekile kitsi kanye naletingakabaluleki. Ngako-ke, singatfola njani kutsi lizinga lesikutsatsa ngalo kutijabulisa kwetfu lifanele?

10, 11. Emavi aJesu lakuMatewu 6:33 asisita njani sibone kutsi singakanani sikhatsi lokufanele sisicitse ekutijabuliseni?

¹⁰ Jesu Khristu watjela balandzeli bakhe: “Uboyitsandza iNkhosi Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Mak. 12:30) Ngako-ke, lutsandvo lwetfu ngaJehova luta kucala ekuphileni kwetfu. Sikhombisa kutsi loku kuliciniso ngekulalela umyalo waJesu lotsi: “Kodvwa funani kucala umbuso waNkulunkulu kanye nekulunga kwakhe, khona tonkhe letintfo titakwengetelwa kini.” (Mat. 6:33) Lomyalo ungasisita njani kute sibone kutsi singakanani sikhatsi lesisicitsa sitijabulisa kanye nekubaluleka kwaloko kutijabulisa?

¹¹ Naka naku lokulandzelako: Jesu wasiyala kutsi ‘sifune kucala umbuso.’ Akazange atsi ‘sifune umbuso kuphela.’ Kuyacaca kutsi Jesu  bekati kutsi kutawudzingeka sifune naletinye tintfo ekuphileni ngetulu kweMbuso. Sidzinga indzawo yekuhlala, kudla, kwekwembatsa, imfundvo lesisekelo, umsebenti wekutiphilisa, kutijabulisa kanye nalokunye. Nanobe kunjalo, kuto tonkhe letintfo lesitifunako, kunye kuphela lokuta kucala—tintfo letimayelana neMbuso. (1 Khor. 7:29-31) Leliciniso kufanele lisente kutsi tintfo letingakabaluleki kangako, letihlanganisa kutijabulisa, sitifune ngendlela letasivumela kutsi sifeze kucala tintfo letimayelana neMbuso. Nasenta kanjalo, kutijabulisa lokulingene kungasizuzisa.

12. Simiso lesikuLukha 14:28 singasetjentiswa njani endzabeni yekutijabulisa?

¹² Ngako-ke, nakutiwa endzabeni yesikhatsi lesisicitsa sitijabulisa, kubalulekile kutsi sisihlele kusengembili sikhatsi lesitasicitsa kuko. (Luk. 14:28) Kudzingeka sitfole kutsi kutijabulisa lokutsite kutawudla sikhatsi lesingakanani. Ngemuva kwaloko, kufanele sincume kutsi singakanani sikhatsi lesitasicitsa sitijabulisa. Nangabe kutijabulisa lokutsite kutasenta singasayinaki imisebenti lebalulekile lefaka ekhatsi sifundvo seliBhayibheli umuntfu latichubela sona, kukhonta kwemndeni, kuya emihlanganweni yebuKhristu nobe kuba nencenye ekushumayeleni ngeMbuso, kusho kutsi kufanele sikuyekele. (Mak. 8:36) Kodvwa nangabe kutijabulisa lesihle sikwenta kusiniketa emandla ekuchubeka simatasatasa ngetintfo letimayelana neMbuso, singase sincume kutsi sikhatsi lesisisebentisa kuko siyasizuzisa.

Bobani Lengitijabulisa Nabo?

13. Kungani kufanele sinake kutsi bobani lesitijabulisa nabo?

¹³ Umbuto wesitsatfu longatibuta wona utsi: Bobani?—lokusho kutsi ‘bobani lengifuna kutijabulisa nabo?’ Kubalulekile kuhlola lesici sekutijabulisa. Kungani kunjalo? Kungobe indlela lesitijabulisa ngayo itsintfwa kakhulu bantfu lesitijabulisa nabo. Njengobe nekudla kujabulisa kakhulu nasinebangani labakahle, nekutijabulisa kuvame kuba mnandzi nangabe sinebantfu labakahle. Kungako kucondzakala kutsi bantfu labanyenti, ikakhulukati labasebasha batsandza kutijabulisa nalabanye. Ngako-ke, kute siciniseke kutsi indlela lesitijabulisa ngayo itasizuzisa, kukuhlakanipha kuhlola kusenesikhatsi kutsi bobani lesitatihlanganisa nabo nalesingeke.—2 Khr. 19:2; fundza Taga 13:20; Jak. 4:4.

14, 15. (a) Jesu wasibekela siphi sibonelo ekukhetseni bangani labakahle? (b) Ngumiphi imibuto lokufanele sitibute yona ngebangani betfu?

¹⁴ Kulandzela sibonelo  saJesu sekukhetsa bangani kungasisita kakhulu. Kusukela ekudalweni kwetintfo kuchubeke, Jesu bekabatsandza bantfu. (Taga 8:31) Ngesikhatsi alapha emhlabeni, bekaticabangela tonkhe tinhlobo tebantfu. (Mat. 15:29-37) Nanobe kunjalo, Jesu waveta umehluko lokhona emkhatsini wekuba nebungani kanye nekuba ngumngani losedvute. Nanobe abenebungani kubo bonkhe bantfu, abengumngani losedvute kuphela nalabo labebasebentisa timiso teliBhayibheli. Ngesikhatsi akhuluma nebaphostoli bakhe labangu-11, watsi: “Nine [nibangani bami], nanenta loku lenginiyale ngako.” (Joh. 15:14; hlola naJohane 13:27, 30.) Bantfu Jesu lababita ngekutsi bangani bakhe ngulabo kuphela labebamlandzela futsi bakhonta Jehova.

¹⁵ Ngako-ke, nawucabanga ngekutsi umuntfu lotsite angaba yini ngumngani wakho nobe cha, utawube wenta kahle kukhumbula emavi aJesu. Tibute imibuto lefanana nalena: ‘Indlela lomuntfu lakhuluma futsi latiphatsa ngayo iyaveta yini kutsi ulalela imitsetfo yaJehova kanye neyaJesu? Uyatihlonipha yini timiso teliBhayibheli aphindze atiphatse ngendlela mine lengitiphatsa ngayo? Kutihlanganisa naye kutangikhutsata yini kutsi ngifune uMbuso kucala ekuphileni kwami futsi ngibe yinceku yaJehova letsembekile?’ Nangabe uciniseka kutsi timphendvulo talemibuto tinguyebo, kusho kutsi sewumtfolile umngani lokahle futsi longatijabulisa naye.—Fundza Tihlabelelo 119:63; 2 Khor. 6:14; 2 Thim. 2:22.

Indlela Lesitijabulisa Ngayo—Iyafaneleka Yini?

16. Yini lokufanele siciniseke ngayo mayelana nendlela lesitijabulisa ngayo?

¹⁶ Sesicoce kafishane ngetici letintsatfu tekutijabulisa—indlela lesitijabulisa ngayo, sikhatsi lesisicitsa sitijabulisa kanye nebantfu lesitijabulisa nabo. Kute indlela yetfu yekutijabulisa isizuzise, kufanele kutsi sici ngasinye sihambisane netimiso teliBhayibheli. Ngako-ke, ngembikwekutsi sihlanganyele ekutijabuliseni lokutsite, kufanele sicale sikuhlolisise. Nakutiwa endleleni yekutijabulisa, kufanele sati kutsi ‘ihlanganisa ini? Yinhle yini nobe yimbi?’ (Taga 4:20-27) Mayelana nesikhatsi lesisicitsa sitijabulisa, kufanele sihlole kutsi ‘singakanani sikhatsi lengitasicitsa kuko? Leso sikhatsi sinyenti kakhulu yini nobe cha?’ (1 Thim. 4:8) Mayelana nebantfu lesitijabulisa nabo, kufanele siciniseke kutsi ‘bobani lesitatijabulisa nabo? Labo bantfu babangani labakahle yini nobe cha?’—Shu. 9:18; 1 Khor. 15:33.

17, 18. (a) Singatihlola njani kute sibone kutsi indlela lesitijabulisa ngayo iyavumelana netimiso teliBhayibheli? (b) Yini lotimisele kuyenta endleleni lokhetsa ngayo tekutijabulisa?

¹⁷ Nangabe luhlobo lolutsite lwekutijabulisa lungavumelani netimiso teliBhayibheli kuletici letintsatfu, kusho kutsi alukalungi. Ngakulokunye, nangabe siciniseka ngekutsi indlela yetfu yekutijabulisa ivumelana netimiso teliBhayibheli kuletici letintsatfu, kusho kutsi itamdvumisa Jehova futsi isizuzise.—Hla. 119:33-35.

¹⁸ Ngako-ke, nakutiwa endleleni yekutijabulisa, asetame kwenta lokulungile ngaso sonkhe sikhatsi, sikanye nebantfu labakahle. Akube sifiso setfu sonkhe kulalela leseluleko seliBhayibheli lesitsi: “Nome niyadla, nome niyanatsa, nome nentani-ke lokunye, konkhe akwentelwe ludvumo lwaNkulunkulu.”—1 Khor. 10:31.

[Umbhalo longentansi]

Ungachaza?

Mayelana nekutijabulisa, ungatisebentisa njani letimiso letitfolakala ku . . .

• Filiphi 4:8?

• Matewu 6:33?

• Taga 13:20?

[Imibuto Yesihloko Lesifundvwako]

[Umdvwebo ekhasini 9]

(Kute ubone kwatiswa lokuhlelwe kahle, fundza incwadzi)

✔Ini

[Umdvwebo ekhasini 10]

(Kute ubone kwatiswa lokuhlelwe kahle, fundza incwadzi)

✔Nini

[Umdvwebo ekhasini 12]

(Kute ubone kwatiswa lokuhlelwe kahle, fundza incwadzi)

✔Bobani

[Sitfombe ekhasini 10]

Singasilandzela njani sibonelo saJesu endleleni lesikhetsa ngayo bangani kanye netekutijabulisa?