Ita hili atividade halimar nian neʼebé lori diʼak ba ita ka lae?

“Buka-hatene buat neʼebé Naʼi hakarak husi imi.”—EF 5:10.

1, 2. (a) Oinsá mak Bíblia hatudu katak Jeová hakarak ita atu moris kontente? (b) Haree atividade halimar nian nuʼudar “prezente husi Maromak”, neʼe book ita atu halo saida?

IHA Bíblia laran, ita bele hetan liafuan barak neʼebé hatudu katak Maromak Jeová hakarak ita atu moris kontente. Porezemplu, Salmo 104:14, 15 hatete katak Jeová “halo ai-han sira sai husi rai, no tua-uvas neʼebé halo ema nia laran haksolok, atu halo ema nia oin nabilan tanba mina, no paun neʼebé halo ema hetan forsa”. Loos duni, Jeová fó ai-han mai ita atu moris. Nia halo ai-horis oioin atu ita bele han, atu halo mina no tua-uvas. Maski ita la presiza tua-uvas atu moris, maibé ida-neʼe bele halo ema nia “laran kontente”. (Ecle 9:7; 10:19) Sin, Jeová hakarak ita atu ‘haksolok iha ita-nia moris’.—Apos 14:16, 17.

² Tan neʼe, lalika hanoin katak ita halo sala se ita uza ita-nia tempu balu atu “haree manu sira iha lalehan” ka “ai-funan líriu sira neʼebé moris iha rai” ka atu halo atividade oioin neʼebé halo ita sente kmaan no kontente. (Mt 6:26, 28; Sal 8:3, 4) Moris neʼebé kontente mak “prezente husi Maromak”. (Ecle 3:12, 13) Nuneʼe, kuandu ita haree atividade halimar nian nuʼudar parte husi Maromak nia prezente, ida-neʼe sei book ita atu uza prezente neʼe iha dalan neʼebé halo Maromak kontente.

Atividade halimar nian oioin

3. Tanbasá mak ema ida-idak hili atividade halimar nian la hanesan?

³ Ema neʼebé iha hanoin neʼebé loos kona-ba atividade halimar nian hatene katak iha atividade oioin neʼebé sira bele hili, maibé sira mós hatene katak iha atividade balu neʼebé sira labele halo. Tanbasá? Atu hatene, mai ita kompara atividade halimar nian ho ai-han. Buat neʼebé ema gosta han iha rai ida karik la hanesan ho buat neʼebé ema iha rai seluk gosta han. Hanesan neʼe mós ho atividade halimar nian, atividade neʼebé ema kristaun iha rai ida gosta, karik ema kristaun iha rai seluk ladún gosta. Maski ema kristaun hela iha área hanesan, maibé ema kristaun ida karik gosta halo buat neʼebé ema kristaun ida seluk la gosta. Porezemplu, karik ema ida gosta lee livru ida neʼebé diʼak, maibé ema seluk karik sente baruk atu halo ida-neʼe. Iha mós ema neʼebé gosta saʼe bisikleta, maibé ema seluk karik hanoin katak ida-neʼe halo sira kole. Nuneʼe, hanesan ema bele hili ai-han neʼebé sira gosta, ema mós bele hili atividade halimar nian neʼebé sira gosta tuir ida-idak nia hakarak.—Rom 14:2-4.

4. Tansá mak ita presiza hatene didiʼak atividade halimar nian saida mak ita bele no labele halo? Fó toʼok ezemplu.

⁴ Maski ita bele hili atividade halimar nian neʼebé ita gosta, neʼe la dehan katak ita bele hili atividade naran deʼit. Atu komprende ida-neʼe, mai ita hanoin filafali ezemplu kona-ba ai-han. Maski ita bele han ai-han oioin, ita lakohi han ai-han neʼebé sai aat ona tanba ida-neʼe bele halo ita moras. Hanesan neʼe mós ho atividade halimar nian. Maski ita bele halo atividade halimar nian oioin, maibé ita labele hili atividade neʼebé envolve hahalok imorál, violénsia, ka lori perigu ba ita-nia moris. Atividade sira-neʼe kontra Bíblia nia matadalan, no bele estraga ita-nia saúde no mós ita-nia relasaun ho Jeová. Tan neʼe, ita presiza hatene didiʼak atividade halimar nian saida mak ita bele no labele halo. Depois, ita presiza hili  atividade halimar nian neʼebé lori diʼak ba ita no halo kontente Jeová. (Ef 5:10) Oinsá mak ita bele hatene atividade halimar nian neʼebé lori diʼak ba ita?

5. Saida mak bele ajuda ita atu hili atividade halimar nian neʼebé tuir Bíblia nia matadalan?

⁵ Atividade halimar nian neʼebé lori diʼak ba ita no halo kontente Jeová mak atividade neʼebé tuir Bíblia nia matadalan. (Sal 86:11) Atu ajuda ita hili ho didiʼak atividade halimar nian, diʼak atu hanoin kona-ba pergunta tolu. Pergunta sira-neʼe mak: saida? bainhira? no ho sé? Agora, mai ita koʼalia kona-ba pergunta sira-neʼe.

Atividade neʼe envolve saida?

6. Ita labele hili atividade halimar nian saida deʼit? Tanbasá?

⁶ Antes halo atividade halimar nian ruma, ita presiza husu ita-nia an: ‘Atividade neʼe envolve hahalok saida?’ Diʼak atu hanoin-hetan katak iha atividade halimar nian oin rua. Ida envolve hahalok neʼebé ita labele halo, no ida seluk envolve hahalok neʼebé karik ita bele halo. Atividade halimar nian saida mak ita labele halo? Iha mundu aat neʼe, iha atividade halimar nian barak neʼebé envolve hahalok neʼebé kontra Bíblia nia matadalan ka kontra Maromak nia ukun-fuan. (1 Joao 5:19) Ema kristaun loos sei la hili atividade hanesan neʼe. Neʼe inklui atividade halimar nian neʼebé hatudu anju aat no matan-dook nia hahalok, violénsia, pornografia, sala-foʼer entre mane ho mane ka feto ho feto, ka hahalok foʼer seluk. (1 Kor 6:9, 10; lee Apokalipse 21:8.) Maski ita mesak ka hamutuk ho ema seluk, ita hadook an husi atividade hanesan neʼe hodi hatudu ba Jeová katak ita odi “buat aat”.—Rom 12:9; 1 Joao 1:5, 6.

7, 8. Oinsá mak ita bele hatene se atividade halimar nian ruma diʼak ba ita? Fó toʼok ezemplu.

⁷ Kona-ba atividade halimar nian neʼebé karik ita bele halo, ita presiza hanoin didiʼak antes atu hili. Maski Bíblia la fó sai atividade saida mak ita bele halo, maibé Bíblia fó matadalan neʼebé ajuda ita atu komprende Jeová nia haree kona-ba buat neʼebé diʼak no ladiʼak. Tan neʼe, antes atu hili atividade ruma, ita presiza hanoin didiʼak se atividade neʼe tuir Bíblia nia matadalan. (Prov 4:10, 11) Depois, ita presiza halo desizaun neʼebé ajuda ita atu nafatin iha laran neʼebé moos. (Gal 6:5; 1 Tim 1:19) Oinsá mak ita bele halo nuneʼe? Hanoin fali kona-ba ai-han. Antes atu koko hahán ruma neʼebé ita seidauk han, ita hakarak hatene hahán neʼe halo husi saida deʼit. Hanesan neʼe mós, antes atu hili atividade halimar nian, ita presiza buka-hatene didiʼak se atividade neʼe diʼak ba ita nuʼudar ema kristaun.—Ef 5:17.

⁸ Porezemplu, karik ita gosta desportu hanesan ema barak. Sin, desportu bele halo ema kontente. Maibé iha desportu balu neʼebé halo ema hadau malu makaʼas atu manán toʼo uza violénsia. Iha mós desportu balu neʼebé fasil atu hetan kanek, ka tau ema nia moris iha perigu laran, no balu halo ema sente katak sira-nia nasaun diʼak liu fali nasaun seluk. Oinsá se ita gosta desportu ruma neʼebé envolve buat hirak-neʼe? Hodi hanoin didiʼak desportu neʼe envolve hahalok saida deʼit, karik ita sei haree katak atividade neʼe la tuir Jeová nia dalan atu hanoin no la tuir mensajen kona-ba dame no domin neʼebé ita haklaken ba ema seluk. Nuneʼe, ita sei la hola parte iha desportu neʼe. (Isa 61:1; Gal 5:19-21) Maibé, se ita fiar katak atividade neʼe tuir Jeová nia matadalan, karik atividade neʼe diʼak ba ita no bele halo ita isin kmaan.—Gal 5:22, 23; lee Filipe 4:8.

Bainhira sei halo atividade neʼe?

9. Ita-nia resposta ba pergunta: ‘Bainhira mak haʼu halo atividade halimar nian?’, ida-neʼe hatudu saida kona-ba ita?

⁹ Pergunta segundu neʼebé ita presiza husu  ita-nia an mak: ‘Bainhira mak haʼu sei halo atividade halimar nian, no haʼu sei uza oras hira atu halo atividade neʼe?’ Ita-nia resposta ba pergunta neʼe hatudu ita-nia hanoin kona-ba buat neʼebé importante no ladún importante ba ita. Nuneʼe, saida mak ajuda ita atu hatene se atividade halimar nian ruma importante tebes iha ita-nia moris?

10, 11. Jesus nia liafuan iha Mateus 6:33 ajuda ita atu hatene saida kona-ba atividade halimar nian?

¹⁰ Jesus Kristu hatete: “Ó sei hadomi Naʼi [Jeová], ó-nia Maromak ho ó-nia fuan tomak, ho ó-nia klamar tomak, ho [ó-nia] hanoin tomak no ho ó-nia kbiit tomak.” (Mc 12:30) Tan neʼe, ita-nia domin ba Jeová mak uluk iha ita-nia moris, no ita hatudu ida-neʼe hodi halo tuir Jesus nia liafuan neʼebé dehan: “Buka uluknanain Maromak nia reinu ho nia justisa; buat hirak-neʼe sei fó tan ba imi.” (Mt 6:33) Jesus nia liafuan neʼe ajuda ita atu hatene se atividade halimar nian ruma importante liu iha ita-nia moris ka se ita uza tempu barak demais ba atividade neʼe. Maibé oinsá?

¹¹ Hanoin toʼok kona-ba ida-neʼe: Jesus haruka ita atu “buka uluknanain Maromak nia reinu”. Nia la dehan atu ita buka deʼit Maromak nia Reinu. Jesus hatene katak ita mós presiza buka buat seluk ba ita-nia moris. Porezemplu,  ita presiza ai-han, hatais, uma, serbisu, eskola, no halimar. Maibé, ita la tau uluk buat hirak-neʼe iha ita-nia moris. Buat neʼebé ita tau ulukliu iha ita-nia moris mak Maromak nia Reinu, ka ukun. (1 Kor 7:29-31) Sin, maski ita buka ita-nia presiza oioin, inklui mós atividade halimar nian, maibé lia-loos neʼe book ita atu tau uluk Maromak nia hakarak iha ita-nia moris nuʼudar buat neʼebé importante liu. Se ita halo nuneʼe, atividade halimar nian bele lori diʼak ba ita.

12. Oinsá mak Lucas 14:28 ajuda ita kona-ba hili atividade halimar nian?

¹² Tan neʼe, kuandu ita atu halo atividade halimar nian ruma, ita presiza ‘sura uluk’ kona-ba tempu neʼebé ita sei uza. (Lc 14:28) Hanesan ita presiza hanoin uluk kona-ba osan hira mak ita sei gasta antes atu hola sasán ruma, ita mós presiza hanoin kona-ba tempu neʼebé ita sei gasta atu halimar. Se ita haree katak ita presiza gasta tempu barak toʼo labele halo buat neʼebé importante liu, hanesan estuda Bíblia, halaʼo adorasaun nuʼudar família, tuir reuniaun kristaun, ka halaʼo serbisu haklaken, diʼak liu atu la halo atividade neʼe. (Mc 8:36) Maibé se ita haree katak atividade neʼe sei ajuda ita atu kontinua halaʼo ita-nia serbisu ba Maromak, neʼe katak atividade halimar nian neʼe iha folin duni no lori diʼak ba ita.

Halimar ho sé?

13. Tanbasá mak ita presiza hanoin didiʼak kona-ba ema neʼebé ita halimar hamutuk?

¹³ Pergunta terseiru neʼebé ita mós presiza husu ba ita-nia an mak: ‘Haʼu sei halimar ho sé?’ Importante tebes atu hanoin kona-ba neʼe tanba ema neʼebé ita ransu hamutuk bele halo ita-nia atividade sai diʼak. Porezemplu, kuandu ita han hamutuk ho kolega diʼak, ita sente kontente liu. Hanesan neʼe mós, kuandu ita halo atividade halimar nian hamutuk ho kolega neʼebé diʼak, ita sente kontente liu. Tan neʼe, ita barak, liuliu joven sira, gosta atividade halimar nian neʼebé ema barak bele hola parte. Maibé, antes atu halo atividade ruma, diʼak atu ita hatene ema hanesan saida mak bele sai kolega neʼebé diʼak.—2 Crôn 19:2; lee Provérbios 13:20; * Tgo 4:4.

14, 15. (a) Jesus hatudu ezemplu diʼak saida kona-ba hili kolega neʼebé diʼak? (b) Kuandu hili kolega, ita presiza husu pergunta saida deʼit?

¹⁴ Atu ajuda ita hili kolega diʼak, mai ita hanoin kona-ba Jesus nia ezemplu.  Horiuluk kedas, Jesus sempre hadomi ema. (Prov 8:31) Kuandu nia iha mundu, nia hatudu domin no respeitu ba ema hotu. (Mt 15:29-37) Maibé, Jesus hatene katak hatudu laran-diʼak ba ema, neʼe la hanesan ho sai belun ho ema neʼe. Maski nia hatudu laran-diʼak ba ema hotu, maibé nia hili ema balu deʼit atu sai ninia belun. Jesus nia liafuan ba ninia apóstolu naʼin-11 hatudu ho klaru oinsá mak nia hili ninia belun. Nia dehan: “Imi haʼu-nia belun sira wainhira imi halo tuir buat neʼebé haʼu haruka ba imi.” (Joao 15:14; haree mós Joao 13:27, 30) Sin, Jesus habelun deʼit ho ema neʼebé halo tuir nia no serbí Jeová.

¹⁵ Tan neʼe, kuandu ita hili ema ruma atu sai ita-nia kolega, diʼak atu hanoin-hetan buat neʼebé Jesus hatete. Husu ba ita-nia an: ‘Ema neʼe nia liafuan no hahalok hatudu katak nia halo tuir Jeová no Jesus ka lae? Nia hadomi buat neʼebé diʼak no odi buat neʼebé aat ka lae? Nia sei ajuda haʼu atu tau uluk Maromak nia hakarak iha haʼu-nia moris no kontinua serbí Jeová ho laran-metin ka lae?’ Se ita-nia resposta ba pergunta sira-neʼe mak sin, neʼe katak ita hili kolega neʼebé diʼak atu halo atividade halimar nian hamutuk.—Lee Salmo 119:63; * 2 Kor 6:14; 2 Tim 2:22.

Hili didiʼak atividade halimar nian

16. Antes atu hili atividade halimar nian ruma, ita presiza husu ita-nia an pergunta saida deʼit?

¹⁶ Iha lisaun neʼe, ita koʼalia kona-ba pergunta tolu neʼebé ita presiza husu ita-nia an antes atu hili atividade halimar nian. Pergunta sira-neʼe mak: ‘Atividade halimar nian neʼe envolve hahalok saida? Bainhira mak haʼu sei halo atividade neʼe? Haʼu sei halimar ho sé?’ Antes atu hili atividade halimar nian ruma, ita presiza duni atu hanoin didiʼak kona-ba buat hirak-neʼe. Kuandu ita hanoin kona-ba atividade neʼe envolve hahalok saida, ita presiza husu ita-nia an: ‘Atividade neʼe envolve hahalok neʼebé halo kontente Jeová, ka envolve hahalok aat?’ (Prov 4:20-27) Kuandu ita hanoin kona-ba bainhira mak atu halo atividade neʼe, ita presiza husu: ‘Haʼu sei uza oras hira atu halo atividade neʼe? Haʼu sei uza tempu neʼe ba buat neʼebé iha folin ka lae?’ (1 Tim 4:8) No mós, kuandu ita hanoin kona-ba kolega neʼebé ita sei halimar hamutuk, ita presiza husu: ‘Haʼu sei halimar ho sé iha atividade neʼe? Sira kolega neʼebé diʼak ba haʼu ka lae?’—Ecle 9:18; 1 Kor 15:33.

17, 18. (a) Oinsá mak ita hatene se ita-nia atividade halimar nian diʼak ba ita? (b) Kuandu ita atu hili atividade halimar nian, ita hakarak halo saida?

¹⁷ Se atividade halimar nian neʼebé ita hanoin atu halo la tuir Bíblia nia matadalan kona-ba pergunta tolu neʼe ida, neʼe katak atividade neʼe ladiʼak ba ita. Maibé, se ita-nia atividade neʼe tuir Bíblia nia matadalan hotu neʼebé ita foin koʼalia, ita-nia atividade neʼe sei fó glória ba Maromak Jeová no sei lori diʼak ba ita.—Sal 119:33-35.

¹⁸ Tan neʼe, kuandu ita atu halo atividade halimar nian ruma, mai ita hakaʼas an atu halo buat neʼebé diʼak, iha tempu neʼebé diʼak, no hamutuk ho kolega neʼebé diʼak. Sin, ita hotu hakarak halo tuir Bíblia nia konsellu tuirmai neʼe: “Neʼe duni, imi han ka hemu, ka buat naran deʼit neʼebé imi halo, halo buat hotu-hotu ba Maromak nia glória.”—1 Kor 10:31.

[Nota–rodapé]

Ita bele hatán?

Kuandu hili atividade halimar nian, oinsá mak ita bele halo tuir Bíblia nia matadalan iha . . .

• Filipe 4:8?

• Mateus 6:33?

• Provérbios 13:20?

[Pergunta estudu nian]

[Dezeñu iha pájina 9]

✔Saida?

[Dezeñu iha pájina 10]

✔Bainhira?

[Dezeñu iha pájina 12]

✔Ho sé?

[Dezeñu iha pájina 10]

Oinsá mak ita bele halo tuir Jesus nia ezemplu kuandu ita hili kolega no atividade halimar nian?