Sena Zyakulikondelezya Zyanu Zilagwasya?
Sena Zyakulikondelezya Zyanu Zilagwasya?
“Lyoonse kamusaanguna kusinizya naa ncomucita cilatambulika ku Mwami.”—Ef. 5:10.
1, 2. (a) Ino mbuti Jwi lya Leza mbolitondezya kuti Jehova uyanda kuti katukkomana mubuumi? (b) Ikuti kulikondezya katukubona kuti ‘ncipego ca Leza,’ ino kuyootugwasya kucita nzi?
MU BBAIBBELE, tujana majwi aatondezya kuti Jehova uyanda kuti katupona alimwi akukkomana mubuumi. Mucikozyanyo, lugwalo lwa Intembauzyo 104:14, 15 lwaamba kuti Jehova nguupa kuti “kujanwe zilyo muvu, awaini uubotezya moyo wamuntu, amafuta aakusyukizya busyu bwakwe, acilyo cipa moyo wamuntu inguzu.” Masimpe, Jehova nguupa kuti zisyango zikomene kutegwa tujane maila, mafwuta awaini kutegwa tujane zilyo. Pele waini upa ‘kukondwa mumoyo.’ Nokuba kuti waini taupi muntu kuba aabuumi, ulakonzya kupa kuti muntu akkomane. (Muk. 9:7; 10:19) Inzya, Jehova uyanda kuti katukkomene akuti myoyo yesu kaizwide “kubotelwa.”—Mil. 14:16, 17.
2 Aboobo, tatweelede kuyeeya kuti nkulubizya ikuti twabelesya ciindi cimwi kutegwa ‘tulange bayuni bauluka mujulu’ alimwi akulanga “maluba-luba aamusyokwe” naa kucita zisobano zimwi kutegwa tukatalusyigwe akukkomana mubuumi. (Mt. 6:26, 28; Int. 8:3, 4) Buumi bukkomanisya ‘ncipego ca Leza.’ (Muk. 3:12, 13) Ikuti ciindi cakulikondelezya twacibona munzila eeyi ciyootugwasya kutegwa tucibelesye munzila iikkomanisya Sikupa cipego eeci.
Kuzyiba Mpotweelede Kugolela Notucita Zyakulikondelezya Zisiyene-siyene
3. Nkaambo nzi ncocili cibotu kuba azyakulikondelezya zisiyene-siyene?
3 Aabo bakulanga munzila yeelede kulikondelezya balacinca-cinca zyakucita pele balizyi kuti tabeelede kuciindizya. Nkaambo nzi ncocili boobo? Kutegwa tujane bwiinguzi, atweezyanisye kulikondelezya acakulya. Zyakulya nzyobayandisya kapati bantu zilisiyene-siyene kweelana abusena. Masimpe ngakuti, zyakulya nzyobakkomanina kubusena bumwi tabakonzyi kuzikkomanina kubusena bumbi. Mbubwenya buyo, zyintu nzyobakkomanina Banakristo kubusena bumwi tazikonzyi kubakkomanisya Banakristo bali kubusena bumbi. Nokuba Banakristo bakkala mubusena bomwe, umwi ncakonzya kubona kuti cilakatalusya (mbuli kubala bbuku libotu), umwi ulakonzya kukubona kuti takunonezyi; ncakonzya kubona kuti cilakatalusya umwi (mbuli kuccovwa ncinga), umwi ulakonzya kucibona kuti cilalemya. Nokuba boobo, tulazumina kuti caboola kumakani aazyakulya alimwi azyakulikondelezya, tulakonzya kulisalila mpotweelede kugolela akuzyiba nzyotweelede kucita kutegwa tulikkomanisye.—Lom. 14:2-4.
4. Nkaambo nzi ncotuteelede kuciindizya notusala zisobano zyakulikondelezya? Amupe cikozyanyo.
4 Nokuba boobo, tulizyi kuti kuba azyakulikondelezya zisiyene-siyene takweelede kutupa kuciindizya. Mucikozyanyo, amulange-lange alimwi cikozyanyo cazyakulya. Nokuba kuti tulayanda kulya zyakulya zisiyene-siyene, tatukonzyi kulida caali zyakulya zibolede. Kulya zyakulya zili boobo kulakonzya kutondezya kuti tatuyeeyi kabotu alimwi tulakonzya kubikka buumi bwesu muntenda. Mbubwenya buyo, nokuba kuti tulaangulukide kulikondelezya azisobano zisiyene-siyene, tatukonzyi kulikondelezya azisobano zibikka buumi bwesu muntenda, zitondezya nkondo naa kutalilemeka. Kulikondelezya kuli boobu kulakonzya kutondezya kuti tatuzyibikkili maano njiisyo zyamu Bbaibbele alimwi kulakonzya kubikka buumi bwesu muntenda kumubili naa kumuuya. Kutegwa tutaciindizyi, tweelede kulangila limwi naa zisobano eezyo zitukkomanisya zilagwasya naa pe. (Ef. 5:10) Mbuti mbotukonzya kucita oobo?
5. Mbuti mbotukonzya kuzyiba naa zyakulikondelezya zyesu zileendelana azyeelelo zya Leza?
5 Kutegwa zyakulikondelezya zitugwasye akumukkomanisya Jehova, zyeelede kuti kazyeendelana azyeelelo zijanika mu Jwi lya Leza. (Int. 86:11) Kutegwa muzyibe naa zyakulikondelezya nzyomukkomanina zili kabotu, mulakonzya kubelesya mulongo uutakatazyi. Mulongo ooyu ulijisi mibuzyo yotatwe iikonzya kulembwa amabala aaya, ncinzi, ndilili, alimwi mbaani. Atwiilange-lange mibuzyo eeyi.
Ncinzi Cibikkilizyidwe?
6. Ino nzyakulikondelezya zili buti nzyotuteelede kucita alimwi nkaambo nzi?
6 Kamutanasala zisobano zyakulikondelezya, mubuzyo wakusaanguna ngomweelede kulibuzya ngooyu, Ncinzi?—nkokuti, ‘Ncinzi cibikkilizyidwe mucisobano eeci?’ Ciindi nomuyandaula bwiinguzi, mweelede kuyeeya kuti kuli buyo misyobo yobilo yazyakulikondelezya. Musyobo wakusaanguna ujatikizya zyintu nzyotutakonzyi kucita; wabili ujatikizya nzyotukonzya kucita. Ino musyobo wakusaanguna ubikkilizya nzi? Munyika ino mbyaabi, zyakulikondelezya zinji zitondezya micito iiteendelani amilawo ya Leza. (1 Jo. 5:19) Banakristo bakasimpe tabazizumini zyakulikondelezya zili boobu. Eezyi zyakulikondelezya zibikkilizya mizimo, koonana kwabaalumi balikke-likke naa bamakaintu, zyintu ziletela muzeezo wakoonana, nkondo naa zyintu zikulwaizya micito mibi. (1 Ko. 6:9, 10; amubale Ciyubunuzyo 21:8.) Kufwumbwa nkotubede, tutondezya Jehova kuti ‘tulasesemwa azyintu zibi kwiinda mukutacita zyakulikondelezya zili boobu.’—Lom. 12:9; 1 Jo. 1:5, 6.
7, 8. Mbuti mbotukonzya kuzyiba ikuti naa cakulikondelezya cili kabotu? Amupe cikozyanyo.
7 Musyobo wabili wa zyakulikondelezya ubikkilizya zyintu zitakasyidwe cacigaminina mu Jwi lya Leza. Mubukkale buli boobu, katutanasala zyakulikondelezya, tweelede kubona naa zilakonzya kumukkomanisya Jehova kweelana ambokutondezyedwe mu Bbaibbele. (Tus. 4:10, 11) Mpoonya tweelede kusala zyakulikondelezya zitakonzyi kupenzya manjezyeezya eesu. (Gal. 6:5; 1 Ti. 1:19) Mbuti mbotukonzya kucita oobo? Atuyeeye kuti: Katutanalya cakulya ncotutanalide inga twayanda kuzyiba nzyobakabikkilizya mucakulya eeco. Mbubwenya buyo, katutanasala zyakulikondelezya tweelede kuzyiba cibikkilizyidwe.—Ef. 5:17.
8 Mucikozyanyo, mulakonzya kuti kamuzikkomanina zisobano alimwi kucita oobo takuli kulubizya. Zisobano zilakonzya kukkomanisya. Ino mbuti kuti kamukkomanina zisobano zimwi akaambo kakuti kuli kuzundana, zibikka buumi muntenda, bantu balalicisa kapati, balapanga coongo, batembaula cisi, naa zyintu zili mbuli zyeezi? Mwamana kulanga-langa zibikkilizyidwe, mulakonzya kubona kuti nzyomuyeeya tazyeendelani anzyayeeya Jehova alimwi amulumbe waluumuno aluyando ngotukambaukila bamwi. (Is. 61:1; Gal. 5:19-21) Kulubazu lumwi, ikuti naa zisobano eezyo zibikkilizya zyintu zimukkomanisya Jehova, nkokuti zyakulikondelezya eezyo nzibotu alimwi zilagwasya.—Gal. 5:22, 23; amubale Bafilipi 4:8.
Ndilili Nondicita Zyakulikondelezya?
9. Ino ncinzi citondezyegwa abwiinguzi kumubuzyo wakuti, ‘Ndilili nondicita zyakulikondelezya eezyi?’
9 Mubuzyo wabili ngomweelede kulibuzya ngwakuti, Ndilili?—nkokuti, ‘Ndilili nondicita zyakulikondelezya eezyi? Ino ndibelesya ciindi cinji buti?’ Bwiinguzi bwesu kumubuzyo wakuti ncinzi? ulatondezya zyintu nzyotuyandisya kapati—nzyotuyanda anzyotutayandi. Nokuba boobo, bwiinguzi kumubuzyo wakuti ndilili? utondezya zyintu nzyotubikkila maano kapati—zyintu nzyotubona kuti zilayandika kapati azyeezyo zitayandiki. Aboobo, mbuti mbotukonzya kuzyiba kuti naa tulazibikkila maano kapati zyakulikondelezya?
10, 11. Mbuti majwi aa Jesu aalembedwe mulugwalo lwa Mateyo 6:33 mbwaakonzya kutugwasya kuzyiba ciindi ncotweelede kubelesya kucita zyakulikondelezya?
10 Jesu Kristo wakaambila basikumutobela kuti: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Mk. 12:30) Aboobo, tweelede kusaanguna kuyanda Jehova mubuumi bwesu. Tulatondezya oobo kwiinda mukutobela lulayo lwa Jesu lwakuti: “Aboobo amuzumanane kusaanguna kuyandaula Bwami abululami bwakwe, eelyo zyintu zimbi zyoonse eezyi ziyooyungizyigwa kulindinywe.” (Mt. 6:33) Mbuti kaambo aaka mbokakonzya kutugwasya kuzyiba ciindi ncotweelede kubelesya mukulikondelezya?
11 Amubone kaambo aaka: Jesu wakatukulwaizya ‘kuzumanana kusaanguna kuyandaula bwami.’ Kunyina naakaamba kuti tweelede ‘kuzumanana kuyandaula buyo bwami.’ Cakutadooneka, Jesu wakalizyi kuti tuyooba azyintu zinji zyakuyandaula mubuumi kutali buyo Bwami. Tuyandika ŋanda, zyakulya, zyakusama, kuya kucikolo, mulimo, zyakulikondelezya alimwi azimwi buyo. Nokuba boobo, azyintu zyoonse nzyotuyandaula, comwe buyo ncoceelede kuba mubusena bwakusaanguna—zyintu zya Bwami. (1 Ko. 7:29-31) Kuzyiba ceelede kusaanguna kuboola mubuumi bwesu kuyootugwasya kubikka zyintu zya Bwami mubusena bwakusaanguna. Ikuti twacita oobo, tuyoozyiba mpotweelede kugolela caboola kumakani akulikondelezya.
12. Mbuti njiisyo iijanika mulugwalo lwa Luka 14:28 mboikonzya kubelesyegwa caboola kumakani aakulikondelezya?
12 Aboobo, caboola kumakani aakulikondelezya tweelede kuzyibila limwi ciindi ncotuyoobelesya. (Lk. 14:28) Tweelede kulibuzya kuti ‘ino cakulikondelezya eeci ciyanda ciindi cinji buti?’ Mpoonya tweelede kulibuzya alimwi kuti ‘ino tujisi ciindi cinji buti cakucita zisobano zyakulikondelezya eezyo?’ Kuti kulikondelezya kulatupa kubula ciindi cakucita zyintu ziyandika kapati mbuli ciiyo ca Bbaibbele cesu tobeni, kukomba mumukwasyi, kujanika kumiswaangano ya Bunakristo naa kutola lubazu mumulimo wa Bwami, nkokuti tatweelede kubelesya ciindi cesu mukulikondelezya kuli boobo. (Mk. 8:36) Pele kuti zyakulikondelezya eezyo ziyootugwasya kucita zyintu zya Bwami, tulakonzya kusala kubelesya ciindi cinji.
Mbaani Mbondiyanzana Limwi?
13. Nkaambo nzi ncotweelede kusala bantu mbotuyanzana limwi?
13 Mubuzyo watatu ngomweelede kulibuzya ngwakuti, Mbaani?—nkokuti, ‘Mbaani mbondiyanda kuyanzana limwi ciindi cakulikondelezya?’ Cilayandika kapati kukalanga-langa kaambo aaka caboola kumakani aakulikondelezya. Nkaambo nzi? Nkaambo kakuti ikutegwa cakulikondelezya cibote naa pe, ciya buyo abantu mbomuyanzana limwi. Mbubwenya buyo mbocikkomanisya kulida antoomwe cakulya abantu bali kabotu, kucita zyakulikondelezya kulakkomanisya kapati ikuti mwayanzana abantu bali kabotu. Aboobo, nkakaambo kaako ibanji akati kesu kwaambisya bana-bana balakkomana kulikondelezya nobali abamwi. Nokuba boobo, kutegwa tusinizye kuti cisobano cilagwasya, cilayandika kuzyibila limwi musyobo wabantu mbotusala kuyanzana limwi abaabo mbotuteelede.—2 Mak. 19:2; amubale Tusimpi 13:20; Jak. 4:4.
14, 15. (a) Ncikozyanyo nzi Jesu ncaakapa kujatikizya kusala balongwe babotu? (b) Mibuzyo nzi njotweelede kulibuzya kujatikizya balongwe besu?
14 Kutobela cikozyanyo ca Jesu cijatikizya kusala bantu mbotuyanzana limwi kuyootugwasya kapati. Kuzwa kumatalikilo aakulenga, Jesu wakali kubayanda bantu kapati. (Tus. 8:31) Ciindi naakali anyika, wakatondezya kuti wakali kubayanda bantu bamisyobo yoonse. (Mt. 15:29-37) Nokuba boobo, Jesu wakalizyi kwiindana kuliko akati kakusangalazya muntu akubamba cilongwe. Nokuba kuti wakali kubasangalazya bantu boonse, wakali kubamba buyo cilongwe abaabo bakali kutobela zyeelelo zigaminide. Kaambila baapostolo bakwe basyomeka bali 11, Jesu wakati: “Munooli beenzuma ikuti kamucita nzyondimulailila.” (Joh. 15:14; amubone alimwi Joh. 13:27, 30.) Bantu Jesu mbaakabamba limwi cilongwe bakali baabo bakali kumutobela alimwi bakali kubelekela Jehova.
15 Aboobo, ciindi nomuyanda kusala umwi muntu kutegwa abe mulongwe naa pe, inga cabota kuyeeya majwi aa Jesu. Amulibuzye mibuzyo mbuli bwayeeyi: ‘Sena muntu ooyu ulatondezya kuti ulaitobela milawo ya Jehova aya Jesu muŋambawido yakwe amumicito? Sena ulalilemeka kweelana azyeelelo zyamu Bbaibbele mbubwenya mbuli ndime? Sena kubamba cilongwe anguwe kuyoondigwasya kubikka zyintu zya Bwami mubusena bwakusaanguna mubuumi bwangu akuba mubelesi mubotu wa Jehova?’ Ikuti bwiinguzi bwanu kumibuzyo eeyi mbwakuti inzya, nkokuti mulijisi mulongwe mubotu ngomuyookkomana limwi ciindi cakulikondelezya.—Amubale Intembauzyo 119:63; 2 Ko. 6:14; 2 Ti. 2:22.
Sena Zyakulikondelezya Zyesu Zileelela?
16. Ncinzi ncotweelede kuzyiba caboola kumakani akulikondelezya?
16 Twalanga-langa buyo mubufwaafwi zibeela zyotatwe zijatikizya kulikondelezya—musyobo, ciindi alimwi abantu mbotweelede kuyanzana limwi. Kutegwa zyakulikondelezya zyesu zitugwasye zyeelede kweendelana azyeelelo zyamu Bbaibbele kujatikizya zibeela eezyi. Aboobo, katutanacita cakulikondelezya cili coonse, tweelede kusola kubona naa cileelela. Caboola kumusyobo, tweelede kulibuzya kuti: ‘Ncinzi cibikkilizyidwe? Sena cilakondelezya naa pe?’ (Tus. 4:20-27) Kujatikizya ciindi, tweelede kulibuzya kuti: ‘Nciindi cinji buti ciyandika? Sena ciindi eeci cileelede naa pe?’ (1 Ti. 4:8) Kujatikizya bantu mbotuyanzana limwi, tweelede kulibuzya kuti: ‘Ino mbaani mbotuyoocita limwi cakulikondelezya eeci? Sena balongwe baliboobu mbabotu naa pe?’—Muk. 9:18; 1 Ko. 15:33.
17, 18. (a) Mbuti mbotukonzya kuzyiba naa zyakulikondelezya zyesu zileendelana azyeelelo zyamu Bbaibbele? (b) Ncinzi ncomukanzide kucita caboola kumakani aakusala zyakulikondelezya?
17 Ikuti musyobo wakulikondelezya taweendelani azyeelelo zyamu Bbaibbele mumbazu zyoonse zyotatwe, nkokuti taceeleli pe. Kulubazu lumwi ikuti twabikkila maano kubona kuti zyakulikondelezya zyesu zyeendelana azyeelelo zyamu Bbaibbele mumbazu zyoonse zyotatwe, kulikondelezya kwesu kuyoomulemeka Jehova akutugwasya.—Int. 119:33-35.
18 Aboobo, caboola kukulikondelezya, tweelede kubikkila maano kucita ciluzi aciindi ceelede alimwi abantu bali kabotu. Inzya, atube amakanze aakuyanda kutobela lulayo lwamu Bbaibbele lwakuti: “Kufwumbwa naa mulalya naa mulanywa nokuba kucita cintu cimbi cili coonse, amucite zyintu zyoonse kutegwa Leza alemekwe.”—1 Ko. 10:31.
Sena Inga Mwapandulula?
Caboola kumakani aakulikondelezya, mbuti mbomukonzya kuzitobela njiisyo zijanika mu . . .
• Bafilipi 4:8?
• Matayo 6:33?
[Mibuzyo yaciiyo]
[Citondezyo cili apeeji 9]
✔Ncinzi
[Citondezyo cili apeeji 10]
✔Ndilili
[Citondezyo cili apeeji 12]
✔Mbaani
[Cifwanikiso apeeji 10]
Mbuti mbotukonzya kwiiya cikozyanyo ca Jesu caboola kumakani aakusala balongwe alimwi azyakulikondelezya zyesu?
