Amamas Yu Insait Long En i Helpim yu?
Amamas Yu Insait Long En i Helpim yu?
“Wok yet long skelim gut ol samting em Bikpela i orait long en.”—EFE. 5:10.
1, 2. (a) Olsem wanem yumi save olsem Jehova i laik bai yumi stap amamas? (b) Haptaim yumi lusim bilong kisim amamas em presen God i givim, olsem na dispela i mas kirapim yumi long mekim wanem?
BAIBEL i kamapim klia olsem Jehova i laik bai yumi stap amamas. Song 104:14, 15 i tok, Jehova i save mekim olkain kaikai i kamap na “mipela i ken planim diwai wain na wokim wain bilong dring, bai bel bilong mipela i amamas. Na mipela i ken kisim wel bilong diwai oliv na welim pes bai pes i lait. Na mipela i ken planim wit na wokim bret bilong kaikai na strongim bodi.” Jehova i save givim yumi kaikai em yumi mas i gat bilong i stap laip. Em i mekim ol kaikai i gro long gaden na bai yumi gat wit, oil, na wain. Tru i no olsem yumi mas i gat wain bilong stap laip, tasol em inap mekim ‘bel i amamas.’ (Sav. 9:7; 10:19) Jehova i laik bai yumi mas i stap amamas.—Apo. 14:16, 17.
2 Olsem na yumi no ken ting yumi mekim rong sapos yumi lusim sampela haptaim long “lukim gut ol pisin long skai” na “ol plaua long bus.” Pasin bilong mekim olsem inap givim strong long yumi na givim amamas long yumi. (Mat. 6:26, 28; Sng. 8:3, 4) Laip i gat amamas long en na gutpela helt em “presen God i givim.” (Sav. 3:12, 13) Haptaim yumi lusim bilong kisim amamas em i insait long dispela presen God i givim long yumi. Olsem na yumi mas yusim laip bilong yumi long rot we i amamasim God.
Kain Kain Amamas—Sampela i Nogut
3. Bilong wanem ol man i makim ol narapela narapela amamas?
3 Ol man i gat stretpela tingting long samting ol i mekim bilong kisim amamas, ol i save olsem ol i fri long makim amamas ol i laik kisim. Na tu, ol i save olsem i gat sampela samting ol i no inap mekim bilong kisim amamas. Bilong wanem ol man i makim ol narapela narapela amamas? Bilong helpim yumi long kliagut long dispela, yumi ken skelim pasin bilong makim amamas yumi laikim wantaim pasin bilong makim kaikai yumi laikim. Ol manmeri long ol narapela narapela hap i no save laikim wankain kaikai. Wankain tu, ol Kristen long ol narapela narapela hap, ol i no save laikim wankain amamas. Na ol manmeri i stap long seim hap, ol tu i no save laikim ol wankain samting. Olsem: Wanpela bai amamas long ritim buk, tasol narapela bai les tru long mekim. Ating sampela bai amamas long raun lukim ol samting long bus, tasol sampela nogat. Olsem tasol, ol manmeri inap makim kaikai ol i laikim, na tu, ol inap makim amamas ol i laikim.—Rom 14:2-4.
4. Bilong wanem yumi mas sakim sampela amamas? Stori long dispela?
4 Yumi stap fri long makim amamas yumi laik insait long en, tasol i no stret long insait long olgeta kain amamas. Tingim kaikai; ating yumi laikim kain kain kaikai, tasol bai yumi no kisim ol kaikai i sting pinis, nogut bai yumi sik. Long wankain pasin, ating yumi laikim kain kain amamas. Tasol bai yumi no insait long pasin nogut, o pait, o mekim samting we yumi inap kisim bagarap. Ol kain samting olsem i no stret wantaim ol stiatok bilong Baibel. Ol i bagarapim pasin bilong yumi long stap pren bilong Jehova na inap nogutim helt bilong yumi. So yumi mas sakim sampela amamas. Yumi mas tingting gut long samting yumi laik mekim na makim amamas we i helpim yumi na Jehova i orait long en. (Efe. 5:10) Olsem wanem yumi inap makim amamas i gutpela long yumi?
5. Olsem wanem yumi inap save olsem Jehova i orait long amamas yumi kisim o nogat?
5 Sapos yumi laik bai amamas yumi kisim i helpim yumi na em kain amamas Jehova i orait long en, orait dispela amamas i mas stret wantaim ol lo bilong Baibel. (Sng. 86:11) Long helpim yu long wokim ol disisen long amamas yu laik kisim, yu ken wokim wanpela lista. Dispela lista i gat 3-pela askim yumi ken givim long yumi yet. Olsem: Wanem kain?, hamas taim?, na wantaim husat? Nau bai yumi stori long ol dispela askim.
Wanem Kain Samting i Insait Long En?
6. Yumi no ken makim wanem kain amamas? Bilong wanem yumi no makim dispela kain amamas?
6 Paslain long yumi makim amamas yumi laik kisim, yumi mas askim yumi yet: Wanem kain ol samting i insait long en? Tingim, i gat tupela kain amamas. Namba 1, em ol amamas yumi no inap insait long en. Na namba 2, em ol amamas ating yumi inap insait long en. Wanem dispela amamas yumi no inap insait long en? Planti samting ol manmeri bilong dispela graun i mekim bilong kisim amamas i save pait wantaim ol stiatok bilong Baibel o i brukim ol lo bilong God. (1 Jon 5:19) Ol Kristen tru i no ken insait long ol kain amamas olsem. Dispela i makim ol amamas we i gat sampela wok bilong spirit nogut long en, gei pasin, ponografi, pait, pasin bilong amamas long givim bikpela pen long narapela, o olgeta kain amamas we pasin nogut i luk olsem em i gutpela samting. (1 Kor. 6:9, 10; ritim Revelesen 21:8.) Maski yumi stap we, bai yumi no makim dispela kain amamas, nogat tru. Yumi laik soim Jehova olsem yumi “heitim tru pasin nogut.”—Rom 12:9; 1 Jon 1:5, 6.
7, 8. Wanem samting inap helpim yumi long mekim gutpela disisen long amamas yumi laik kisim? Stori long dispela.
7 Dispela namba 2 amamas i makim ol samting yumi mas tingting gut long en paslain long yumi wokim disisen long insait long en. Ating Baibel i no stori stret long ol dispela kain amamas. Tasol ol stiatok bilong Baibel bai helpim yumi long kliagut long tingting bilong Jehova long ol samting i gutpela na stretpela. So paslain long yumi makim dispela kain amamas, yumi mas painimaut olsem ol i brukim ol stiatok bilong Baibel o nogat. (Snd. 4:10, 11) Na bihain yumi mas wokim disisen em bel i no gat tok long en. (Gal. 6:5; 1 Tim. 1:19) Olsem wanem yumi inap makim amamas i gutpela? Tingim gen kaikai. Paslain long yumi traim nupela kaikai, yumi laik save wanem samting i stap insait long en. I wankain long taim yumi laik makim amamas, yumi laik save gut long en na bai yumi ken wokim disisen olsem i stret Kristen i insait long en o nogat.—Efe. 5:17.
8 Olsem: Ating yu save laikim ol spot wankain olsem planti arapela man. Na yumi ken kisim bikpela amamas long rot bilong pilaim ol spot. Tasol long sampela spot, pilai inap kamap raf stret o man inap kisim bikpela bagarap. Na long sampela arapela spot, ol manmeri i save mekim bikpela pati na pait na ting olsem kantri bilong ol i winim ol arapela kantri. Yu mas mekim wanem sapos yu laikim ol spot we kain samting olsem i save kamap? Taim yu tingim ol samting i kamap long rot bilong ol dispela spot, ating yu bai pilim olsem tingting bilong yu i no stret wantaim tingting bilong Jehova o bel isi na pasin laikim em yumi save autim tok long en. (Ais. 61:1; Gal. 5:19-21) Tasol sapos yu kliagut olsem amamas yu laik insait long en i stret wantaim ol stiatok bilong Jehova, orait ating dispela amamas inap helpim yu na givim strong long yu.—Gal. 5:22, 23; ritim Filipai 4:8.
Hamas Taim Bai Mi Lusim Bilong Kisim Amamas?
9. Yu kisim wanem skul long bekim bilong yu long dispela askim, ‘Hamas taim bai yumi lusim bilong kisim amamas?’
9 Namba 1 askim yumi stori long en, em: Wanem kain amamas yumi bai insait long en? Bekim bilong yumi long dispela askim i kamapim klia samting yumi laikim na orait long en. Namba 2 askim i olsem: Hamas taim?—olsem, hamas taim bai yumi lusim bilong kisim amamas? Bekim bilong yumi long dispela askim i kamapim klia wanem samting i nambawan bikpela samting long yumi. Wanem samting inap helpim yumi long skelim sapos amamas em i bikpela samting long yumi o nogat?
10, 11. Olsem wanem tok bilong Jisas long Matyu 6:33 inap helpim yumi long makim hamas taim yumi bai lusim long kisim amamas?
10 Jisas Krais i tokim ol disaipel bilong em: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Yumi soim olsem pasin bilong yumi long laikim Jehova em i namba wan samting long laip bilong yumi taim yumi bihainim tok bilong Jisas olsem: “Wok yet long painim Kingdom pastaim na stretpela pasin bilong God na em bai givim olgeta dispela samting long yupela.” (Mat. 6:33) Tok bilong Jisas i helpim yumi long skelim sapos amamas i bikpela samting long yumi o nogat, na i helpim yumi long skelim hamas taim yumi lusim bilong insait long en.
11 Jisas i tokim yumi long wok yet long “painim Kingdom pastaim,” tasol i no dispela tasol. Jisas i save olsem yumi gat planti arapela samting yumi mas mekim long laip bilong yumi. Yumi mas i gat taim long mekim wok skin, painim kaikai, haus, klos, kisim skul, painim amamas, na ol arapela samting. Tasol ol dispela samting i no stap namba wan long laip bilong yumi. Kingdom em i namba wan samting. (1 Kor. 7:29-31) Taim yumi kliagut long wanem samting i mas i stap namba wan, bai yumi painim Kingdom pastaim, na pasin bilong painim amamas na ol arapela samting bai stap namba tu long yumi. Sapos yumi mekim olsem, amamas inap helpim yumi.
12. Olsem wanem Luk 14:28 inap helpim yumi long wokim disisen long amamas yumi bai kisim?
12 Paslain long yumi wokim disisen long samting yumi bai mekim bilong kisim amamas, yumi mas skelim gut “pe” bilong dispela samting, olsem hamas taim yumi bai lusim bilong insait long en. (Luk 14:28) Yumi save tromoi mani bilong baim samting, olsem tasol yumi save tromoi taim bilong kisim amamas. Yumi mas makim hamas taim yumi bai lusim bilong kisim amamas. Nogut yumi lusim bikpela haptaim tumas long kisim amamas na yumi no gat taim long ol bikpela samting, olsem mekim Baibel stadi bilong yumi yet, famili lotu, go long ol miting Kristen, o autim tok. (Mak 8:36) Sapos amamas yumi kisim i strongim yumi long mekim yet wok bilong God, orait ating bai yumi pilim olsem haptaim yumi lusim bilong kisim dispela amamas i gutpela samting bilong helpim yumi.
Yumi Ken Poroman Wantaim Husat?
13. Bilong wanem yumi mas skelim gut ol man yumi poroman wantaim taim yumi kisim amamas?
13 Namba 3 askim i olsem: Mi save poroman wantaim husat taim mi painim amamas? Em bikpela samting long skelim dispela askim bikos ol man husat yumi poroman wantaim ol, dispela inap stiaim wanem kain amamas yumi kisim. Kain olsem, yumi save amamas long kaikai wantaim ol arapela. Na i wankain tu long amamas. Yumi save amamas moa taim yumi amamas wantaim ol gutpela pren. Olsem na planti bilong yumi, moa yet ol yangpela, i laik amamas wantaim ol arapela. Tasol paslain long yumi makim amamas yumi bai kisim, yumi mas makim husat i gutpela poroman o poroman nogut. Long dispela rot yumi ken save olsem amamas yumi kisim bai helpim yumi o nogat.—2 Sto. 19:2; ritim Sindaun 13:20; Jems 4:4.
14, 15. (a) Olsem wanem pasin bilong Jisas i helpim yumi long makim ol gutpela pren? (b) Taim yu laik makim wanpela long i stap pren bilong yu, yu mas givim wanem ol askim long yu yet?
14 Sapos yumi bihainim pasin bilong Jisas, dispela bai helpim yumi long painim ol gutpela pren. Jisas i save laikim tumas ol manmeri. (Snd. 8:31) Taim em i stap long graun, em i soim pasin laikim long ol man na em i rispektim ol. (Mat. 15:29-37) Tasol Jisas i save olsem pasin bilong mekim gut long wanpela man i no makim olsem tupela i stap gutpela pren tru. Jisas i mekim gutpela pasin long olgeta man, tasol em i no stap gutpela pren bilong olgeta man. Tok em i mekim long 11-pela aposel i helpim yumi long save olsem wanem em i makim ol gutpela pren bilong em. Em i tok: “Sapos yupela i bihainim ol lo mi givim long yupela, orait yupela i pren bilong mi.” (Jon 15:14; lukim tu Jon 13:27, 30) Ol lain i bihainim tok bilong Jisas na mekim wok bilong Jehova, ol tasol i stap pren bilong Jisas.
15 Paslain long yu makim wanpela long i stap gutpela pren bilong yu, i gutpela long tingim tok bilong Jisas. Askim yu yet: Toktok na pasin bilong dispela man i soim olsem em i save bihainim tok bilong Jehova na Jisas? Em i save laikim gutpela pasin na heitim pasin nogut? Bai em i helpim mi long putim Kingdom i stap namba wan long laip bilong mi na stap gut long Jehova? Sapos yu tok yes long ol dispela askim, orait yu gat wanpela gutpela pren em yu ken kisim amamas wantaim.—Ritim Song 119:63; 2 Kor. 6:14; 2 Tim. 2:22.
Amamas Yumi Kisim i Stret?
16. Yumi mas givim wanem ol askim long yumi yet long ol amamas yumi laik kisim?
16 Yumi skelim pinis 3-pela askim long ol samting bilong amamas: Wanem kain? hamas taim? na wantaim husat? Paslain long yumi insait long sampela amamas, yumi mas tingim gut olsem em i gutpela samting o nogat na yumi bai lusim hamas taim long kisim amamas na yumi bai amamas wantaim husat. Sapos yumi laik bai amamas yumi kisim i helpim yumi, orait em i mas stret wantaim ol lo bilong Baibel. Taim yumi laik skelim olsem amamas bilong yumi i gutpela o nogat, orait yumi mas askim yumi yet olsem: Wanem samting i insait long dispela amamas? Jehova bai orait long en, o pasin bilong pait o pasin pamuk i insait long en? (Snd. 4:20-27) Na tu, yumi mas askim yumi yet olsem: Yumi bai lusim hamas taim long kisim amamas? Na dispela kain amamas i gutpela inap long yumi lusim haptaim bilong insait long en? (1 Tim. 4:8) Na taim yumi laik skelim olsem husat bai stap pren bilong yumi, yumi mas askim yumi yet olsem: Bai mi poroman wantaim husat taim mi insait long dispela amamas? Ol bai stap olsem ol gutpela poroman o poroman nogut?—Sav. 9:18; 1 Kor. 15:33.
17, 18. (a) Olsem wanem yumi ken save olsem amamas yumi makim i stret wantaim ol lo bilong Baibel o nogat? (b) Yu bai wokim wanem kain disisen long ol samting yu bai mekim bilong kisim amamas?
17 Sapos amamas yumi laik insait long en i no stret wantaim ol lo bilong Baibel long dispela 3-pela samting, orait dispela kain amamas i no gutpela. Tasol sapos amamas yumi laik kisim i stret wantaim ol lo bilong Baibel long dispela 3-pela samting yumi stori long en, orait amamas yumi kisim bai givim ona long Jehova na helpim yumi.—Sng. 119:33-35.
18 So taim yumi wokim ol disisen long ol amamas yumi laik kisim, yumi mas wok strong long makim ol amamas i stret, na hamas taim yumi bai lusim bilong kisim amamas, na amamas wantaim ol manmeri i stret yumi poroman wantaim ol. Yumi laik bihainim tok Baibel i mekim olsem: “Maski yupela i kaikai o dring o mekim narapela samting, yupela i mas mekim olgeta samting bilong givim glori long God.”—1 Kor. 10:31.
Yu Inap Stori Long Dispela?
Olsem wanem ol stiatok i stap long ol dispela skripsa inap helpim yumi long makim ol amamas i gutpela?
[Askim Bilong Stadi]
[Sat long pes 9]
(Bilong save ol dispela rait i stap we long pes, lukim buk o magasin)
✔Wanem kain
[Sat long pes 10]
(Bilong save ol dispela rait i stap we long pes, lukim buk o magasin)
✔Hamas taim
[Sat long pes 12]
(Bilong save ol dispela rait i stap we long pes, lukim buk o magasin)
✔Wantaim husat
[Piksa long pes 10]
Olsem wanem yumi ken bihainim pasin bilong Jisas taim yumi laik makim ol poroman na amamas yumi laik kisim?
