E faaanaanataeraa maitai anei ta oe?
E faaanaanataeraa maitai anei ta oe?
“Ia itea ia outou te mea au i te Fatu.”—EPH. 5:10.
1, 2. (a) Mea nafea tatou i ite ai e te hinaaro ra Iehova ia oaoa tatou i te oraraa? (b) E nafea ia faaohipa i te taime i roto i te faaanaanataeraa tei hohia mai e te Atua?
TE FAAITE maitai ra te Bibilia e te hinaaro ra Iehova ia oaoa tatou i te oraraa. Ia au i te Salamo 104:14, 15, te faatupu nei oia i ‘te maa no roto i te fenua, e te uaina e oaoa ˈi te aau o te taata nei; e te monoˈi i hinuhinu ai to ˈna mata, e te pane e itoito ai te aau o te taata.’ E horoa mai iho â Iehova i te maa hinaaro-mau-hia no te ora. Maoti oia e auhune ai te fenua a noaa mai ai te huero maa, te hinu e te uaina. E ‘oaoa atoa te aau o te taata’ i te uaina, noa ˈtu e e ere i te mea faufaa no te ora. (Koh. 9:7; 10:19) Te hinaaro ra iho â Iehova ia î to tatou aau i “te oaoa.”—Ohi. 14:16, 17.
2 Eiaha e manaˈo e e mâuˈa te taime ia ‘hiˈo i te mau manu o te reva’ e “te mau lili o te aua.” E nehenehe tatou e itoito i te reira, a oaoa ˈtu â ˈi. (Mat. 6:26, 28; Sal. 8:3, 4) Te hoê oraraa oaoa e te maitai, ‘mea hohia mai ïa e te Atua’ ia au i te Koheleta 3:12, 13. E ô atoa no ǒ mai i te Atua te taime ta tatou e rave no te faaanaanataeraa. E faaohipa anaˈe ïa i te reira ma te auhia e ana.
Faaanaanataeraa rau maiti-maitai-hia
3. No te aha e taa ê ai te maitiraa a te taata i te faaanaanataeraa?
3 Ua ite te feia e manaˈo tano to ratou i te faaanaanataeraa e ua rau te reira, eita râ ta ratou e nehenehe e maiti pauroa. No te aha e taa ê ai te maitiraa a te taata i te reira? A hiˈo na i te maa. I tera e tera fenua e i te hoê â fenua atoa, mea taa ê roa te maa auhia. Hoê â huru no te faaanaanataeraa e auhia e te mau Kerisetiano. Mea au paha na vetahi e taio i te hoê buka aore ra e haere na nia i te pereoo taataahi. Mea haumani râ e mea rohirohi no te tahi atu. Mai no te maa, e ere ïa hoê â faaanaanataeraa ta te taata e maiti.—Roma 14:2-4.
4. A faataa no te aha e maiti maitai ai i te faaanaanataeraa.
4 Ua ite râ tatou e e ere no te mea ua rau te faaanaanataeraa, e nehenehe ïa tatou e maiti pauroa. A hiˈo faahou na i te maa. Ua rau paha te maa ta tatou e hinaaro e amu, eita râ tatou e amu i te maa pê. E maˈihia tatou. Ua rau atoa te faaanaanataeraa maitai, e haapae râ tatou i te faaanaanataeraa atâta, haavî uˈana e te faufau. Aita teie mau mea e tuati ra i te mau aratairaa Bibilia. E faaino te reira i to tatou auhoaraa e te Atua e ia tatou iho. E maiti maitai anaˈe ïa i te faaanaanataeraa ma te feruri maite e mea tano anei aore ra eita. (Eph. 5:10) E nafea ïa?
5. E nafea ia ite e e faaanaanataeraa maitai ta tatou i te aro o Iehova?
5 Te faaanaanataeraa maitai i te aro o Iehova, ua tuati ïa i te mau ture aveia Bibilia. (Sal. 86:11) Hou a maiti ai, a feruri i teie na tuhaa e toru o te faaanaanataeraa: te huru, te taime, e te hoa ta tatou e hiˈopoa mai.
Te huru faaanaanataeraa
6. E haapae tatou i teihea huru faaanaanataeraa? No te aha?
6 Hou a maiti ai, e ui anaˈe, ‘Eaha tera faaanaanataeraa?’ A haamanaˈo e te vai ra e piti huru. Hoê, eiaha ïa; te tahi, peneiaˈe. Eaha te faaanaanataeraa e haapae? I roto i teie ao ino, mea rahi te faaanaanataeraa o te patoi roa ra i te mau aratairaa Bibilia aore ra o te ofati ra i te mau ture a te Atua. (Ioa. 1, 5:19) E haapae roa te mau Kerisetiano mau atoa i te reira, tei taaihia i te haamauiuiraa i te taata mai tera noa, te ohipa demoni, te peu mahu, te hohoˈa faufau, te haavîraa uˈana e te tahi atu mau ohipa ino. (Kor. 1, 6:9, 10; a taio i te Apokalupo 21:8.) Eiaha roa e maiti i teie huru faaanaanataeraa. E faaite ïa tatou ia Iehova e mea ‘riaria na tatou te ino.’—Roma 12:9; Ioa. 1, 1:5, 6.
7, 8. A faataa eaha te tauturu mai ia maiti maitai i te faaanaanataeraa.
7 Ua taaihia te tahi atu faaanaanataeraa i te mau ohipa mea faufaa ia feruri maitai hou a maiti ai. E tauturu mai te mau aratairaa Bibilia ia taa i to Iehova manaˈo i te mea maitai, noa ˈtu e aita teie huru faaanaanataeraa e faataahia ra i roto i te Parau a te Atua. (Mas. 4:10, 11) I muri iho ïa e rave ai i ta tatou faaotiraa o te tauturu mai ia tapea i te manaˈo haava maitai. (Gal. 6:5; Tim. 1, 1:19) E nafea ïa? A feruri na: Hou a tamata ˈi i te hoê maa aita tatou i amu aˈenei, e hinaaro tatou e ite eaha tera maa. Oia atoa, hou a maiti ai, ia ite tatou eaha tera faaanaanataeraa.—Eph. 5:17.
8 Mea au paha na oe te tuaro, mai e rave rahi taata. Mea arearea roa vetahi. Area te tahi atu, mea atâta ïa, mea taehae te feia tuaro, mea rahi te pepe, mea faahuehue roa te taata, mea puai te here aiˈa, e te vai ra ˈtu â. Mea au paha na oe teie mau huru tuaro. E nafea ïa? A feruri ai oe, e faaoti paha oe e aita teie huru faaanaanataeraa e tuati ra i te manaˈo o Iehova aore ra i te poroi o te hau e te here ta tatou e poro ra ia vetahi ê. (Isa. 61:1; Gal. 5:19-21) Ia maiti râ oe i te faaanaanataeraa tia i te aro o Iehova, e maitai ïa oe a itoito atu ai.—Gal. 5:22, 23; a taio i te Philipi 4:8.
Te taime e faataa no te faaanaanataeraa
9. E faaite mai te pahonoraa i te uiraa, ‘Eaha te taime e faaanaanatae ai au?’ i te aha?
9 Ua ite mai nei tatou e tei te huru o ta tatou faaanaanataeraa e itehia ˈi eaha ta tatou e au e e farii. Te piti, te taime ïa. E ui anaˈe, ‘Eaha te taime e faaanaanatae ai au, e ehia rahiraa hora?’ E faaite mai te pahonoraa i teie uiraa eaha ta tatou fa matamua roa, oia hoi eaha te mea faufaa aˈe no tatou. O te faaanaanataeraa anei?
10, 11. E nafea te Mataio 6:33 e tauturu mai ai ia faataa i te taime e tano no te faaanaanataeraa?
10 Ua parau Iesu: “E hinaaro oe i to Atua ia Iehova ma to aau atoa, . . . ma to manaˈo atoa, e ma to puai atoa.” (Mar. 12:30) E here ia Iehova te mea faufaa roa ˈˈe i roto i to tatou oraraa. E pee anaˈe ïa i ta Iesu aˈoraa i roto i te Mataio 6:33 e ‘e mata na i te imi i te basileia o te Atua, e te parau-tia na ˈna; e amui-atoa-hia mai taua mau mea ra.’ E tauturu mai teie irava ia ite e mea faufaa anei te faaanaanataeraa no tatou e ia faataa i te taime e tano.
11 A tapao na: Te aˈo maira Iesu e ‘e mata na i te imi i te basileia.’ Eiaha râ ‘e mata noa i te imi i te basileia.’ Ua ite Iesu e mea rahi te mea o te oraraa e imi iho â tatou. E hinaaro tatou i te nohoraa, te maa, te ahu, te haapiiraa, te ohipa, te faaanaanataeraa, e te vai ra ˈtu â. O te Basileia râ na mua roa. (Kor. 1, 7:29-31) Ia taa ia tatou eaha te mea faufaa roa, o te Basileia ta tatou e tuu na mua. E te tahi atu mau mea, tae noa ˈtu te faaanaanataeraa, i muri iho ïa. Ia na reira tatou, e maitai tatou i te faaanaanataeraa.
12. E nafea te Luka 14:28 e tauturu mai ai no nia i te faaanaanataeraa?
12 Mea faufaa ia feruri na mua i te taime e pau no te faaanaanataeraa, a faaoti atu ai i te rahiraa hora e faaohipa no te reira. (Luka 14:28) Mai te peu e e pau te taime no te faaanaanataeraa, e aita faahou no te mau ohipa faufaa mai ta tatou iho haapiiraa Bibilia, te haamoriraa utuafare, te mau putuputuraa, aore ra te pororaa, aita ïa e tano ra. (Mar. 8:36) Mai te peu râ e e itoito tatou no te tavini â ia Iehova, e hoona ïa te taime ta tatou i faataa no te faaanaanataeraa.
Te hoa e faaanaanatae ai
13. No te aha e feruri maitai ai e e faaanaanatae tatou e o vai ma?
13 Te toru o te tuhaa faufaa e feruri, te hoa ïa. A ui, ‘E faaanaanatae au e o vai ma?’ Tei te huru o to tatou mau hoa e itehia ˈi e mea maitai anei ta tatou faaanaanataeraa aore ra eita. Ia tamaa oe e te hoa maitai, mea au roa. Oia atoa no te faaanaanataeraa. No reira e rave rahi o tatou, te feia apî iho â râ, e au ai e faaanaanatae e te tahi atu. Mea maitai râ ia feruri na mua i te feia ta tatou e faahoa e te feia ta tatou e ore roa e amuimui. Maoti te reira e maiti ai tatou i te faaanaanataeraa maitai.—Par. 2, 19:2; a taio i te Maseli 13:20; Iak. 4:4.
14, 15. (a) E nafea to Iesu hiˈoraa e tauturu mai ai ia maiti i te hoa maitai? (b) Ia uiui tatou i te aha no nia i te hoa?
14 E tauturu mai te hiˈoraa o Iesu ia maiti i te hoa maitai. I here noa na Iesu i te taata ia au i te Maseli 8:31. I te fenua nei, ua here e ua faatura oia i te mau huru taata atoa. (Mat. 15:29-37) Ua ite râ oia e mea taa ê te farii-maitai-raa i te taata e te faahoaraa ˈtu. I farii maitai noa na oia i te mau taata atoa, e hoa rahi râ to ˈna. No nia i ta ˈna na 11 aposetolo taiva ore, ua na ô Iesu: “O outou to ˈu taua ia haapao outou i te mau parau atoa ta ˈu i parau atu ia outou na.” (Ioa. 15:14; a hiˈo atoa i te Ioane 13:27, 30.) Te feia ta Iesu i maiti ei hoa no ˈna, o tei pee ïa ia ˈna e tei tavini ia Iehova.
15 Hou a maiti ai i te hoa rahi, mea maitai ia haamanaˈo i ta Iesu i parau. A uiui na: ‘Te faaite ra anei teie taata na roto i te parau e te ohipa e te pee ra oia i ta Iehova e ta Iesu mau faaueraa? Te haafaufaa ra anei oia mai ia ˈu i te aratairaa Bibilia no nia i te maitai e te ino? E faaitoito anei oia ia ˈu ia haapao na mua i te Basileia i roto i to ˈu oraraa, a tavini noa ˈi ia Iehova ma te taiva ore?’ Ia pahono oe E, ua itea ïa ia oe te hoa maitai e faaanaanatae ai orua.—A taio i te Salamo 119:63; Kor. 2, 6:14; Tim. 2, 2:22.
E faaanaanataeraa maitai anei ta tatou?
16. Ia ite tatou i te aha no nia i te faaanaanataeraa?
16 Ua hiˈo mai nei tatou e toru tuhaa o te faaanaanataeraa: te huru, te taime e te hoa. Te faaanaanataeraa maitai, ua tuati ïa i te mau ture aveia Bibilia no nia i teie na tuhaa e toru. No reira, hou a maiti ai, mea faufaa ia ite tatou i te huru o ta tatou faaanaanataeraa. Oia hoi, ‘Eaha tera faaanaanataeraa? Mea maitai anei aore ra mea taehae e te faufau?’ (Mas. 4:20-27) No nia i te taime, e ui anaˈe: ‘Ehia rahiraa hora e faaanaanatae ai au? Mea tano anei aore ra eita?’ (Tim. 1, 4:8) E no nia i te hoa, ia ui tatou: ‘E faaanaanatae au e o vai ma? E hoa maitai anei aore ra eita?’—Koh. 9:18; Kor. 1, 15:33.
17, 18. (a) E nafea ia ite e e faaanaanataeraa maitai ta tatou? (b) No nia i te faaanaanataeraa, ia tutava outou taitahi i te aha?
17 Ia tuati teie na tuhaa e toru o ta tatou faaanaanataeraa i te mau ture aveia Bibilia, e itoito ïa tatou a faahanahana ˈtu ai ia Iehova. (Sal. 119:33-35) Aita anaˈe, e ere ïa i te mea maitai.
18 No reira, hou a maiti ai i te faaanaanataeraa, e tutava anaˈe i te rave i te mea tia i te taime tano e te hoa maitai. Ia hinaaro iho â tatou paatoa e pee i teie aˈoraa Bibilia: “Te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua.”—Kor. 1, 10:31.
E nehenehe anei outou e faataa?
No nia i te faaanaanataeraa, e nafea ia faaohipa i te . . .
• Philipi 4:8?
• Mataio 6:33?
• Maseli 13:20?
[Uiraa haapiiraa]
[Hohoˈa i te api 11]
(Hiˈo i te papai)
✔Huru
[Hohoˈa i te api 12]
(Hiˈo i te papai)
✔Taime
[Hohoˈa i te api 14]
(Hiˈo i te papai)
✔Hoa
[Hohoˈa i te api 12]
E nafea ia pee ia Iesu no te maiti i te hoa e te faaanaanataeraa?
