Oborẹ Wo Vwo Ru Ehaẹha Fierere?
Oborẹ Wo Vwo Ru Ehaẹha Fierere?
“Gba davwe wo yono obo ri je Ọrovwohwo.”—ẸF 5:10.
1, 2. (a) Mavọ yen Ota rẹ Ọghẹnẹ vwo djephia nẹ Jihova guọnọre nẹ avwanre riavwerhen rẹ akpeyeren? (b) E de ni erọnvwọn ra vwọ diotọ kerẹ “okẹ rẹ Ọghẹnẹ vwọ kẹ ohwo,” die yen o che mu avwanre vwo ru?
VWẸ Baibol na, a mrẹ eta sansan ri djerephia nẹ Jihova guọnọre nẹ e yeren akpọ je riavwerhen rọyen. Kerẹ udje, Une rẹ Ejiro 104:14, 15 tare nẹ Jihova yen nẹrhẹ “emuọre nẹ otọ na rhe, kugbe udi rọ vwẹ omavwerhe kẹ udu rẹ ohwo, ori rere opharo rọye vwo lo, kugbe ikara rọ nẹrhẹ udu rẹ ohwo gan.” Vwọrẹ uyota, Jihova yen nẹrhẹ ekankọn djẹ rere avwanre vwo vwo emuọre, ori kugbe udi vẹ erọnvwọn efa ra guọnọre vwẹ akpeyeren. Dede nẹ avwanre se yerin ababọ rẹ udi, jẹ Jihova kẹ avwanre udi ọ vwọ nẹrhẹ ‘oma rẹ avwanre sasa.’ (Agh 9:7; 10:19) Jihova guọnọre nẹ oma vwerhen avwanre, ọ guọnọre nẹ udu avwanre vọn “vẹ aghọghọ.”—Iru 14:16, 17.
2 Ọtiọyena, a da rhuẹrẹ ọke phiyọ vwo “ni emephran re hẹ obenu” vẹ “idodo rẹ aghwa na” yẹrẹ ru erọnvwọn efa re cha nẹrhẹ oma vwerhen avwanre dia obo re chọre-e. (Mt 6:26, 28; Un 8:3, 4) E vwo yeren akpọ rẹ omavwerhovwẹn, ọyen “okẹ rẹ Ọghẹnẹ vwọ kẹ ohwo.” (Agh 3:12, 13) Avwanre da riẹn nẹ ọke ra vwọ diotọ ọyen okẹ ro nẹ obọ rẹ Ọghẹnẹ rhe, o che mu avwanre vwọ reyọ ọke yena vwo ruiruo vwẹ idjerhe rẹ oma da vwerhọn. a
Vwẹ Aghwanre Sane Erọnvwọn Ru Wọ Vwọ Diotọ
3. Diesorọ ihwo vwo vwo iroro re fenẹre kpahen erọnvwọn ra vwọ diotọ vwo jẹ chọ?
3 Ihwo re vwẹ ẹro abavo vwo ni ehaẹha riẹnre nẹ Onenikristi vwo uturhi rọ vwọ jẹ ojẹ rẹ oka rẹ ehaẹha ro jere, ẹkẹvuọvo ayen je riẹn nẹ ọ dia ehaẹha eje yen fo kẹ aye-en. Diesorọ a vwọ ta ọtiọyen? A vwọ mrẹ ẹkpahọnphiyọ na, e jẹ a vwẹ erọnvwọn ra vwọ diotọ vwo dje emuọre. Emu ri je ihwo vwẹ ẹkuotọ sansan fẹnẹre. Vwẹ idjerhe vuọvo na, erọnvwọn ra vwọ diotọ ri je Inenikristi vwẹ ẹkuotọ ọvo sa fẹnẹ i ri je Inenikristi vwẹ ẹkuotọ ọfa. Obo ri je Inenikristi re dia ekogho vuọvo dede sa fẹnẹ. Kerẹ udje, ihwo evo vwo ẹguọnọ rẹ ẹbe ese jẹ evo no nẹ ọyena ghwa sasa oma rẹ ohwo-o, efa vwo ẹguọnọ rẹ idjighere ẹdjẹ jẹ evo se no nẹ eha yena ghwọrọ ohwo oma. Avwanre riẹnre nẹ ihwo sa jẹ ojẹ rẹ ayen vwo ru erọnvwọn re fẹnẹre, ọyena dia obo re chọre-e.—Ro 14:2-4.
4. Diesorọ o vwo fo nẹ a jomaotọ kpahen eka rẹ erọnvwọn ra vwọ diotọ re che vwobọ vwọ? Djudje rọyen.
4 Dede nẹ avwanre vwo uturhi ra vwọ jẹ ojẹ rẹ erọnvwọn ra vwọ diotọ, ọ dia ọyen o vwo mudiaphiyọ nẹ e che ru korọnvwọn korọnvwọn ro je avwanre-e. E vwo djudje rọyen, e jẹ a rhoma kpo udje rẹ emuọre na. Kidie nẹ avwanre sa re koka koka rẹ emu, ọ dia ọyen o vwo mudiaphiyọ nẹ a cha vwọ re emu ro gbonre-e. Ọyen emu rẹ ẹkpa a vwọ riọ kidie ọ sa nẹrhẹ e she ro ọga. Vwẹ idjerhe vuọvo na, dede nẹ avwanre sa jẹ ojẹ rẹ erọnvwọn ra vwọ diotọ sansan, ọ dia ọyen o vwo mudiaphiyọ nẹ avwanre che vwo vwobọ vwẹ erọnvwọn ra vwọ diotọ re vọnre vẹ imuoshọ, ozighi yẹrẹ ọfanrhiẹ-ẹn. Erọnvwọn ra vwọ diotọ tiọyena vwọso oborẹ Baibol na tare, e vọnre vẹ imuoshọ, i ji se miovwon oyerinkugbe ra vẹ Jihova vwori. Ọtiọyena, tavwen a ke jẹ ojẹ rẹ eka rẹ erọnvwọn ra vwọ diotọ re che vwobọ vwọ, ofori nẹ e roro sẹ e cha nẹrhẹ ophu mu Jihova yẹrẹ nẹrhẹ oma vwerhọn. (Ẹf 5:10) Mavọ yen e se vwo ru ọtiọyen?
5. Mavọ yen a sa vwọ riẹn oka rẹ erọnvwọn ra vwọ diotọ ri Jihova rhọnvwephiyọ?
5 Ehaẹha se vwo fierere kẹ avwanre je vwerhen Jihova oma, ofori nẹ i shephiyọ vẹ oborẹ Baibol na tare. (Un 86:11) Wo se vwo brorhiẹn rẹ oka rẹ ehaẹha ro shephiyọ kẹ wẹ, wọ sa vwẹ enọ nana vwọ fuẹrẹn, ‘Die yen o churobọ si? Ọke vọ yen mi che vwo ruo? Mẹ vẹ amono yen gba cha heha na?’ E jẹ a fuẹrẹn enọ nana ọvuọvo.
Die Yen O Churobọ Si?
6. Eka rẹ erọnvwọn ra vwọ diotọ vọ yen ofori nẹ avwanre kẹnoma kẹ, kẹ diesorọ?
6 Tavwen a ke jẹ oka rẹ ehaẹha re che vwobọ vwọ, onọ rẹsosuọ ro fori nẹ a nọ oma avwanre yen, Die?—Kọyen, ‘Die yen ehaẹha na churobọ si. A vwọ kpahenphiyọ onọ na, ofori nẹ a riẹn nẹ akpọ re de yerẹn na vọnre vẹ erọnvwọn ra vwọ diotọ re vwọso obo ri Baibol na tare. (1Jọ 5:19) Inenikristi rẹ uyota sen eka rẹ erọnvwọn ra vwọ diotọ tiọyena kare kare. Erọnvwọn nana churobọ si ighe ri titẹ iruemu rẹ ọkon, orhan, eshare vwo du eshare, ihoho rẹ ihwo re banphiyọ, ozighi yẹrẹ ighe ri dje obo ri miovwirin phiyọ obo ri yovwirin. (1Kọ 6:9, 10; se Ẹvwọphia 21:8.) Ọ da tobọ dianẹ avwanre ọvo yen herọ, avwanre djephia nẹ e nene odjekẹ ri Jihova rọ tare nẹ e “jẹn umwemwu tu ovwan oma” womarẹ a vwọ kẹnoma kẹ oghẹre rẹ ighe tiọna.—Ro 12:9; 1Jọ 1:5, 6.
7, 8. Idjerhe vọ yen a sa vwọ fuẹrẹn erọnvwọn ra vwọ diotọ? Djudje rọyen.
7 O vwo erọnvwọn efa ra vwọ diotọ re vwọso oborẹ Baibol na tare-e. Vwẹ ẹdia tiọyena, a ke sane oka erọnvwọn ra cha vwọ diotọ, e jẹ a nabọ frẹkotọ reyọ odjekẹ ri Jihova vwọ vwanvwọn. (Isẹ 4:10, 11) Ofori nẹ e brorhiẹn ro che jẹ ẹwẹn obrorhiẹn rẹ avwanre ekpokpo. (Ga 6:5; 1Ti 1:19) Mavọ yen e se vwo ru ọtiọyen? Roro kpahen ẹdia nana: Tavwen a ke ria emu ra je re dẹvo-o, a ka nọ kpahen ekuakua sansan re vwo chere emu na. Vwẹ idjerhe vuọvo na, tavwen a ke tuẹn oka rẹ ehaẹha ọvo phiyọ, ofori nẹ a ka fuẹrẹn obo ro churobọ si.—Ẹf 5:17.
8 Kerẹ udje, ọ sa dianẹ omaẹsasọ je we kirobo ro ji je ihwo buebun. Eha rẹ omaẹsasọ ghene nẹrhẹ oma rẹ ohwo sasa, ọ je nẹrhẹ oma vwerhen ohwo. Die yen wo che ru ọ da dianẹ eha rẹ omaẹsasọ rọ vọnre vẹ ozighi yẹrẹ imuoshọ yen je we yẹrẹ oka rẹ omaẹsasọ ọvo je we fikirẹ oborẹ ihwo ghọghọ wan siẹrẹ ẹkuotọ rayen de phikparobọ? Ọ da dianẹ oka rẹ ehaẹha ri Jihova rhọnvwephiyọ-ọ yen je we, wo de ji no nẹ ọyen obo re brare wo vwo ghwoghwo kpahen ufuoma vẹ ẹguọnọ kẹ ihwo, jẹ wo nughe rẹ eha tiọyena, gba kẹnoma kẹ oka rẹ ughe yena. (Aiz 61:1; Ga 5:19-21) Ẹkẹvuọvo, o de muwẹro nẹ ehaẹha ro je we na che miovwin Jihova ivu-un, kọyen o che fierere kẹ wẹ.—Ga 5:22, 23; se Filipae 4:8.
Ọke Vọ Yen Mi Che Vwo Ruo?
9. Die yen ẹkpahọnphiyọ rẹ avwanre djephia kpahen onọ nana, ‘Ọke vọ mi che vwo vwobọ vwẹ ehaẹha na?’
9 Onọ rivẹ ro fori nẹ a nọ oma avwanre yen, Ọke vọ?—Kọyen, ‘Ọke vọ yen mi che vwo vwobọ vwẹ ehaẹha na? Bro ọke yen me cha ghwọrọ phiyọ?’ Ẹkpahọnphiyọ rẹ avwanre vwọ kẹ onọ na, die? dje ẹro re vwo ni obo ri yovwirin vẹ obo re brare phia. Ẹkẹvuọvo, ẹkpahọnphiyọ avwanre vwọ kẹ ọno na, ọke vọ? dje obo re ma ghanre kẹ avwanre phia. Ọtiọyena, kẹ mavọ yen a sa vwọ riẹn sẹ erọnvwọn rẹ avwanre vwọ diotọ yen ma ghanre kẹ avwanre vwọ vrẹ obo ro fori nẹ ọ dia?
10, 11. Idjerhe vọ yen eta ri Jesu rehẹ Matiu 6:33 sa vwọ chọn avwanre uko vwo brorhiẹn rẹ uchọke ra cha ghwọrọ phiyọ ehaẹha?
10 Jesu Kristi ta kẹ idibo rọyen nẹ, “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi, kugbe iroro wẹn ejobi ji kugbe ogangan wẹn ejobi.” (Mk 12:30) Ọtiọyena, ẹguọnọ re vwo kpahen Jihova yen e che phi phiyọ ẹdia rẹsosuọ vwẹ akpeyeren avwanre. Avwanre dje ẹguọnọ nana phia siẹrẹ a da yan nene ota ri Jesu nana: “Ẹkẹvuọvo gba ka guọnọ uvie rẹ Ọghẹnẹ tavwe, kugbe ọvwata rọye, kọ vwẹ emu na ejobi ba kẹ kẹ wẹ.” (Mt 6:33) Mavọ yen eta nana sa vwọ chọn avwanre uko vwọ riẹn obo ro fori nẹ ehaẹha ghanre te kẹ avwanre vẹ uchọke ra cha ghwọrọ phiyọ?
11 Jokaphiyọ ẹkpo nana: Jesu jiro kẹ avwanre nẹ a ‘ka guọnọ uvie rẹ Ọghẹnẹ tavwe.’ Ọ dia ọ vuẹ avwanre nẹ, ‘gba ka guọnọ uvie rẹ Ọghẹnẹ ọvo-o.’ O phẹnre dẹn nẹ, Jesu riẹnre nẹ vwọba Uvie na, avwanre cha guọnọ erọnvwọn efa vwẹ akpeyeren. Kerẹ udje, avwanre guọnọ uwevwin ra cha dia, emuọre, iwun, ẹbe eyono, iruo, ehaẹha, kugbe erọnvwọn efa. Ẹkẹvuọvo, ofori nẹ ẹga ra vwọ kẹ Jihova ghanre vrẹ erọnvwọn nana eje. (1Kọ 7:29-31) Ofori nẹ a vwẹ ọke avwanre vwo ruiruo vwẹ idjerhe rọ cha kẹ avwanre uphẹn re vwo ru obo re ma ghanre kẹ avwanre, rọ dia ẹga ra vwọ kẹ Jihova. E de ru ọtiọyen, ehaẹha rẹ avwanre ko se fierere kẹ avwanre.
12. Idjerhe vọ yen a sa vwọ reyọ odjekẹ rọhẹ Luk 14:28 vwo ruiruo siẹrẹ a da ta ota kpahen ehaẹha?
12 Eriyina, bẹsiẹ a ke jẹ ehaẹha ọvo re che vwobọ vwọ, ofori nẹ a riẹn uchọke rọ cha reyọ mie avwanre. (Lu 14:28) Ofori nẹ a riẹn ọke re vwori ra sa reyọ vwọ hẹha na rere o vwo jẹ uyono ri Baibol, ẹga rẹ orua, uyono ẹra, yẹrẹ iruo rẹ aghwoghwo avwanre egbowọphiyọ. (Mk 8:36) Ẹkẹvuọvo, ọ da dianẹ ehaẹha ro je avwanre na kẹ avwanre uphẹn vwo vwobọ vwẹ ẹga ri Jihova vọnvọn, ọyena kọ sa dia omamọ rẹ ehaẹha re se vwo bru ọke fia.
Mẹ Vẹ Amono Yen Gba Cha Heha Na?
13. Diesorọ o vwo fo nẹ a frẹkotọ sane ihwo ri che nene avwanre heha kugbe?
13 Onọ rerha ro fori nẹ a nọ oma avwanre yen: “Mẹ vẹ amono yen gba cha heha na?” Ọnana ẹbẹre ọvo rọ je ghanre vwẹ ota ro shekpahen ehaẹha na. Diesorọ? Kidie igbeyan re vẹ avwanre gbe vwobọ ehaẹha na se djobọte avwanre vwọrẹ erhuvwu yẹrẹ umiovwon. Kirobo rọ kẹ ohwo omavwerhovwẹn ọke ra vẹ igbeyan da riemu kuẹgbe ye, eriyin yen ọ je kẹ ohwo omavwerhovwẹn ọke ra vẹ emamọ rẹ igbeyan da heha kuẹgbe. Ẹkẹvuọvo, o ki muwẹro nẹ oka rẹ ehaẹha ọvo fo kẹ wẹ, kẹ ofori nẹ wọ vwẹ aghwanre sane ihwo ri che nene uwe heha na wọ sa vwọ riẹn igbeyan ri fori nẹ wo rhiabọreyọ vẹ i ri fori nẹ wọ kẹnoma kẹ.—2Ik 19:2; se Isẹ 13:20; Jem 4:4.
14, 15. (a) Udje vọ yen Jesu phi phiyotọ kpahen a vwọ sane omamọ rẹ igbeyan? (b) Enọ vọ yen ofori nẹ avwanre nọ oma rẹ avwanre kpahen igbeyan rẹ avwanre?
14 E de nene udje rẹ oborẹ Jesu sane igbeyan rọyen wan, ọ cha chọn avwanre uko mamọ vwọ sane igbeyan. Vwo nẹ ọke ra vwọ ma akpọ na yen Jesu vwo vwo ẹguọnọ rẹ ihworakpọ. (Isẹ 8:31) Ọ vwọ hẹ otọrakpọ na, o djephia nẹ o vwo ẹguọnọ rẹ koka koka rẹ ihwo. (Mt 15:29-37) Dede nẹ Jesu vwo ẹguọnọ rẹ ihwo, o jomaotọ sane ihwo re cha dia igbeyan rọyen re kẹrerẹ. Jesu vwọ ta ota kẹ iyinkọn 11 rọyen re fuevun, ọ da ta: “Ovwan igbeyan mẹ ọ da dianẹ ovwan ru obo ri mi ji urhi rọye kẹ ovwan.” (Jọ 15:14; ji ni Jọ 13:27, 30.) Ihwo re ga Jihova ri ji nene irhi rọyen ọvo yen Jesu vwo ru igbeyan rọyen re kẹrerẹ.
15 Ọtiọyena, gba kọn ota rẹ Jesu na phiyọ ẹwẹn siẹrẹ wọ da guọnọ sane igbeyan wẹn. Nọ oma wẹn enọ kerẹ: ‘Ohwo nana djephia nẹ ọ nyupho ri Jihova vẹ Jesu? O nene iyono ri Baibol ri shekpahen obo ri yovwirin vẹ obo re brare kirobo ri mi ruẹ? Oyerinkugbe mẹ vẹ ọyen sa chọn vwẹ uko vwọ phi Uvie na phiyọ ẹdia rẹsosuọ vwẹ akpeyeren mẹ je fuevun ga Jihova?’ Ẹkpahọnphiyọ wẹn vwọ kẹ enọ nana da dia e, kọyen wọ mrẹ uvi rẹ ugbeyan ru wẹ vẹ ọyen sa riavwerhen rẹ ehạeha kugbe re.—Se Une rẹ Ejiro 119:63; 2Kọ 6:14; 2Ti 2:22.
Ehaẹha Na Yovwin Kẹ Wẹ?
16. Die yen ofori nẹ avwanre riẹn e se vwo brorhiẹn rẹ eka rẹ erọnvwọn ra vwọ diotọ re che vwobọ vwọ?
16 Avwanre yonori nẹ a da guọnọ nẹ ehaẹha avwanre fierere kẹ avwanre, kẹ ofori nẹ o shephiyọ vẹ oborẹ Baibol tare vwẹ ẹdia erha. Ofori nẹ a nọ oma rẹ avwanre: ‘Die yen ehaẹha nana churobọ si, o yovwin kẹ vwẹ gbanẹ ọ brare? (Isẹ 4:20-27) Bro ọke yen me cha ghwọrọ phiyọ? Ọke me cha ghwọrọ phiyọ che bun te ẹdia re me rha cha mrẹ ọke vwọ kẹ Jihova-a? (1Ti 4:8) Mẹ vẹ amono yen gba cha heha na kugbe? Ayen cha dia emamọ rẹ igbeyan kẹ vwẹ gbanẹ erharhe rẹ igbeyan?’—Agh 9:18; 1Kọ 15:33.
17, 18. (a) Mavọ yen a sa vwọ riẹn sẹ erọnvwọn rẹ avwanre vwọ diotọ yan mu iwan ri Baibol na? (b) Die yen wo brorhiẹn wo vwo ru vwọ kpahen eka rẹ erọnvwọn ra vwọ diotọ ru wo che vwobọ vwọ?
17 Ehaẹha rẹ avwanre rhe shephiyọ vẹ oborẹ Baibol na tare vwẹ ẹdia rẹ erha na-a, gba kẹnoma kẹ. Ẹkẹvuọvo, ehaẹha rẹ avwanre de shephiyọ vẹ oborẹ Baibol tare vwẹ ẹdia erha na, kọyen ọ che yovwin kẹ avwanre, ọ je cha ghwa urinrin bru Jihova ra.—Un 119:33-35.
18 Ọtiọyena, vwọ kpahen ehaẹha rẹ avwanre, e jẹ a davwẹngba vwo ru obo ri yovwirin vwẹ ọke ro fori vẹ ihwo ri fori. Vwọrẹ uyota, avwanre eje guọnọ nene uchebro ri Baibol na rọ tare nẹ, “Owenẹ wọ rere eyẹ wọ dare, eyẹ kemu kemu wo ruru, ru ayen ejobi vwọ kẹ urinrin rẹ Ọghẹnẹ.”—1Kọ 10:31.
[Eta rehẹ obotọ na]
a Vwẹ uyovwinrota nana, a vwẹ eta na “ehaẹha” vẹ “erọnvwọn ra vwọ diotọ” vwo ruiruo kugbe, a vwẹ ayen vwo dje ọke ra rhuẹrẹphiyotọ vwọ kẹ erọnvwọn re ruẹ vwo rovwonma vẹ akpọẹriọ.
Wo Se Dje Fiotọ?
Vwọ kpahen ehaẹha, mavọ yen wọ sa vwọ yan nene odjekẹ rọhẹ . . .
• Filipae 4:8?
• Matiu 6:33?
• Isẹ 13:20?
[Enọ]
[Uhoho]
(Wọ da guọnọ mrẹ obo ra nabọ sio wan, ni ọbe na)
✔Die
[Uhoho]
(Wọ da guọnọ mrẹ obo ra nabọ sio wan, ni ọbe na)
✔Ọke vọ
[Uhoho]
(Wọ da guọnọ mrẹ obo ra nabọ sio wan, ni ọbe na)
✔Amono
[Uhoho]
Mavọ yen e se vwo nene udje ri Jesu ọke ra da sane igbeyan vẹ erọnvwọn ra vwọ diotọ?