La to diversion la ze bona?
La to diversion la ze bona?
“Seité farve sicuri de quel che el Signor el aceta.” — EFE. 5:10.
1, 2. (a) Come la Bìblia assa ciaro che Geovà el vol che semo contenti? (b) Cossa saremo boni de far se vedemo la diversion come un presente de Dio?
LA BÌBLIA la mostra che Geovà el vol che godemo la vita. Par esémpio, el Salmo 104:14, 15 dise che Geovà el fà che ‘la tera la ne dae de magnar, che lu el dà el vin che fà contento el cuor del omo e el òio che el fà la so fàcia slusar e el pan che ghe dà forsa al so cuor’. L’è vera che Geovà ne dà magnar parché ghemo de bisogno, ma el vin anca el ne assa contenti. Lu el ne dà de pi de che sol quel che ghemo de bisogno par viver. (Ecl. 9:7; 10:19) Geovà el vol che noantri ghemo tanta alegria. — Ati 14:16, 17.
2 Par quela, no ghemo de sentirse mal se dele volte tolemo tempo par vardar i osei nel cielo o i bei fiori o par far altre robe che ne assa contenti. (Mat. 6:26, 28; Sal. 8:3, 4) Gaver felicità nela vita l’è un “presente de Dio”. (Ecl. 3:12, 13) Veder la diversion come parte de questo presente ne giutarà a doperarlo de una maniera che ghe piase a Geovà.
Robe difarente che se pol far e i limite
3. Parché che l’è importante ricordarse che ghen’è tanti tipi difarenti de diversion?
3 Quei che i pensa de una maniera echilibrada sora la diversion i sa che ghen’è tante robe par divertirse, ma anca che bisogna gaver limite. Come cossita? L’è come el magnar. In difarente parte del mondo un tipo de magnar l’è bon, ma in altre parte fursi nò. Anca cola diversion l’è cossita. Pol esser che arquanti servi de Dio ghe piase de un tipo de diversion e altri che i ze de star nel stesso paese ghe piase de far altre robe par divertirse. Fursi un ghe piase de leder un bel libro, ma quelatro nò tanto. Anca tanti ghe piase de ndar de bissicleta e altri sol de pensar i resta strachi. Ma quando parlemo de magnar e diversion, ghemo de ricordarse che ghen’è tante opsion e che cada persona la pol scòlier quel che la va far. — Rom. 14:2-4.
4. Parché che l’è bon gaver limite nela scòlia dela diversion?
4 Stesso che ghen sìpia tanti tipi difarenti de diversion, no vol dir che podemo far tuto quel che volemo. Vedemo nantra volta el esémpio del magnar. L’è vera che fursi ne piase tanti tipi de magnar. Ma mai ndaria piaserne de magnar robe smarse. Far una roba de questa podaria fin farne mal. Noantri ghemo tante opsion par divertirse. Ma no ndarìano scòlier diversion violente o sporche parché no volemo desobedir i prinsipi dela Bìblia, gnanca meter in rìscio la nostra salute e la amicìssia con Geovà. Cossita, vanti de divertirse, ghemo de saver che tipo de robe acetemo o nò come diversion. Par quela ghemo de saver se una diverson la ze bona o nò. (Efe. 5:10) Ma alora, come che podemo saverlo?
5. Come che podemo saver se la diversion che ghemo scoliesto la ze de acordo cola volontà de Dio?
5 Par saver se una diversion che ghemo scoliesto la ghe piase a Geovà e ne fà ben, la ga de esser de acordo coi prinsipi che Dio el ga scrito nela so parola la Bìblia. (Sal. 86:11) Ndemo considerar tre robe che pol giutarne a veder se la diversion che ghemo scoliesto la ze de acordo cola volontà de Geovà: (1) Che tipo de diversion ndemo scòlier? (2) quando ndemo divertirse? e (3) con chi? Ndemo veder una ala volta.
Che tipo de diversion ndemo scòlier?
6. A che tipo de diversion ghemo de dir nò e parché?
6 Prima de scòlier una diversion, ghemo de domandarse che tipo de diversion la ze questa. In questo sistema che semo drio viver, ghen’è tante diversion che le va contra i prinsipi bìblichi o le lege de Dio. (1 Gio. 5:19) I servi de Dio i dise nò a queste diversion. Par esémpio, diversion che ghen’è sadismo (far i altri sofrir de maniera fìsica o mental), robe relassionade coi demoni, omossessualismo, pornografia, violensa o le insentiva a praticar quel che l’è rugno, o imoral. (1 Cor. 6:9, 10; ledi Apocalisse 21:8.) No vol dir el posto che semo de star, ghemo de esser distanti de questi tipi de diversion par mostrar a Geovà che rigetemo quel che l’è sbalià. — Rom. 12:9; 1 Gio. 1:5, 6.
7, 8. Come savemo se la diversion la ze bona o nò?
7 Anca se la Bìblia no la parla se una diversion che volemo scòlier la ze bona o nò, ghemo de star atenti. Prima de scòlier quela diversion ghemo de saver cossa che Geovà el pensa par meso dei prinsipi dela Bìblia. (Pro. 4:10, 11) Cossita podaremo gaver una bona cossiensa. (Gàl. 6:5; 1 Tim. 1:19) Par capir meio, pensaghe sora un esémpio. Vanti de magnar una roba che no cognossemo mia volemo saver cossa che ghen’è rento, come i ingredienti prinsipai. Dela medèsima maniera, vanti de scòlier una diversion, ghemo de far peschise par capir cossa che ghen’è in quela diversion. — Efe. 5:17.
8 Par esémpio, fursi te piase de sport. Lori i pol esser emossionanti. Ma l’è importante domandarse: parché che me piase de quel sport? Sarà che l’è parché ghen’è competission, o parché el mete in rìscio la vita? O parché i selebra le vitòrie de maniera pericolosa? O fursi parché son nassesto in quel paese? Se dopo de pensarghe sora queste domande, vedemo che la diversion che scoliemo no la ze de acordo cola maniera de Geovà pensar e col messàgio de pace e amor che predichemo, alora saria meio assarla de banda. (Isa. 61:1; Gàl. 5:19-21) Par nantra banda, se la diversion che la ghemo scoliesto la ghe piase a Geovà, ela la sarà bona par noantri. — Gàl. 5:22, 23; ledi Filipensi 4:8.
Quando vao divertirme?
9. Parché ghemo de pensarghe sora quando ndaremo divertirse?
9 La seconda domanda che ghemo de farse la ze quando vao divertirme e par quanto tempo. La nostra risposta ala domanda la mostra cossa che noantri vedemo come le robe pi importante.
10, 11. ome le parole de Gesù in Mateo 6:33 le ne giuta a dessider quanto tempo ndaremo guastar cola diversion?
10 Gesù Cristo el ga dito ai so seghidori: “Te ghè de amar a Geovà el to Dio con tuto el to cuor, con tuta la to ànima, con tuta la to mente e con tuta la to forsa.” (Mar. 12:30) Par quela, se volemo che el amor a Geovà el sìpia la roba pi importante dela nostra vita, volemo far come Gesù Cristo el ga dito: “Alora, seité a meter el Regno e la giustìssia de Dio nel primo posto, e cossita tute queste altre robe le ve sarà dontade.” (Mat. 6:33) Come che queste parole le ne giuta a veder se guastemo massa tempo o demo massa importansa ale diversion?
11 Varda nantra roba: Gesù el ne ga dito par seitar a ‘ndar in serca prima del Regno’. Lu no’l ga dito che gavarìano de ndar sol in serca del Regno. Lu el savea che gavarìano de ndar in serca de tante altre robe nela vita. Ghemo bisogno de casa, magnar, robe de meter su, istrussion, laoro, diversion e tante altre robe. Ma intrà queste robe, sol una la ga de esser nel primo posto, che la ze el Regno. (1 Cor. 7:29-31) Queste parole de Gesù le ga de motivarne a ndar in serca prima del Regno e a doperar ben el tempo con altre atività, come la diversion. Se femo cossita, gavaremo una diversion che la ne benefissia.
12. Come che Luca 14:28 ne giuta a doperar ben el tempo cole diversion?
12 Quando vao divertirme? Quando parlemo del tempo che doperemo nele diversion, l’è importante pensarghe ben prima. (Luc. 14:28) Ghemo de capir se le nostre diversion no le va tor el tempo dele robe pi importante come el tempo de studiar la Bìblia, de far la adorassion in fameia, dele riunion o anca dela predicassion. (Mar. 8:36) Ma se el tempo che ghemo doperà par le diversion ne giuta a sentirse meio par ndar in serca del Regno, podemo esser sicuri che ghemo fato una bona dessision.
Con chi vao divertirme?
13. Parché che ghemo de pensar ben con chi ndaremo divertirse?
13 La tersa domanda che ghemo de farse la ze: Con chi vao divertirme? Le persone che le partissipa de una diversion le pol farla restar meio. Pensa par esémpio sora qual che sucede quando magnemo qualcossa insieme de nantra persona. Semo pi contenti e fin el magnar par che ze meio. L’è cossita anca cola diversion. Quando semo insieme de boni amighi, semo boni de divertirse meio. Alora, no ze de maraveiarse che ne piase de partissipar de una diversion quando ghen’è altri insieme, ancora de pi par i gióveni. Ma par gaver boni risultadi, ne toca scòlier prima chi che sarà insieme a noantri quando ndemo divertirse. — 2 Cró. 19:2; ledi Proverbi 13:20; Tia. 4:4.
14, 15. (a) Che esémpio Gesù el ga dato sora scòlier ben con chi divertirse? (b) Che domande ghemo de farse sora quei che i se diverte con noantri?
14 Quando l’era qua nela tera, Gesù el ga dato el esémpio de come scòlier ben quei con chi lu ndea divertirse. Lu el ga mostrà che el amea a tute le persone. (Mat. 15:29-37) El ga mostrà questo amor de quando Dio le ga creade. (Pro. 8:31) Ma Gesù el ga mostrà che l’era difarente esser amigo e amar ale persone. Lu el amea a tute le persone, ma l’era amigo sol de quei che i fea quel che lu el insegnea. Lu el ga parlà ai 11 apòstoli fedeli: “Valtri sì me amighi se fé quel che mi ve comando.” (Gioani 15:14; varda anca Gioani 13:27, 30.) Sol quei che i lo obedia e i servia a Geovà i era so amighi.
15 Cossita, quando te pensi se te ghè de esser amigo de qualchedun, ricòrdate de quel che Gesù el ga dito. Sarà bon domandarse: ‘Questa persona la mostra in quel che la fà e quel che la dise che la obedisse ai comandamenti de Geovà e de Gesù? La mostra che la rispeta i prinsipi e insegnamenti dela Bìblia? Passar tempo insieme ndarà incoraiarne a ndar in serca del Regno in primo posto e a esser leal a Geovà?’ Se la risposta a queste domande la ze “si”, te pol esser sicuro che te ghè catà un amigo par divertirse. — Ledi Salmo 119:63; 2 Cor. 6:14; 2 Tim. 2:22.
La nostra diversion la ze bona?
16. Cossa che ghemo de scòlier par le nostre diversion?
16 Ghemo visto che l’è importante pensarghe se le nostre diversion le ze bone, se doperemo ben el tempo e con chi se divertimo. Par farne ben, ghemo de saver se i ze de acordo con quel che dise la Bìblia. Cossita prima de divertirse, ghemo de pensarghe sora quel che ndemo far: ‘Cossa che ghen sarà par divertirse? La diversion la ze bona o nò?’ (Pro. 4:20-27) L’è bon anca pensarghe sora: ‘Quanto tempo vao doperar par divertirme? L’è un tempo giusto?’ (1 Tim. 4:8) Ghemo de scòlier anca: ‘Con chi vao divertirme? I ze boni amighi?’ — Ecl. 9:18; 1 Cor. 15:33.
17, 18. (a) Cossa che podemo far par saver se le nostre diversion le ze de acordo cola maniera de Geovà pensar? (b) Cossa che te vol far sora le diversion?
17 Se no semo sicuri che un de questi punti i ze de acordo cola Bìblia, alora sarà meio no farlo. Ma se savemo che tuti i tre i ze de acordo cola maniera de Geovà pensar, alora ndaremo darghe onor a Geovà e saremo contenti. — Sal. 119:33-35.
18 Ghemo visto che l’è tanto importante pensar ben nele diversion che ndaremo partessipar, nel tempo che guastemo cola diversion giusto e nele persone che le sarà insieme. Femo el meio par meter in pràtica el consilio che ghen’è nela Bìblia: “Alora, se magné, se bevé o se fé qualche altra roba, gavé de far tute le robe par la glòria de Dio.” — 1 Cor. 10:31.
Seto spiegar?
Come che te pol meter in pràtica i prinsipi sora le diversion che ghen’è in . . .
• Mateo 6:33?
[Domande del Stùdio]
[Quadro]
(Par veder tuto el testo, varda la publicassion)
Che tipo de diversion ndemo scòlier?
[Quadro]
(Par veder tuto el testo, varda la publicassion)
Quando ndemo divertirse?
[Quadro]
(Par veder tuto el testo, varda la publicassion)
Con chi?
[Stampa]
Come podemo far come Gesù quando ndemo scòlier amighi e le diversion?