ʼE Fua Lelei Koa Kiā Koutou Takotou ʼu Fakafiafia?
ʼE Fua Lelei Koa Kiā Koutou Takotou ʼu Fakafiafia?
“Ke kotou haga vakaʼi te meʼa ʼaē ʼe lelei ki te ʼAliki.”—EFE. 5:10.
1, 2. (a) ʼE fakahā feafeaʼi ʼi te Folafola ʼa te ʼAtua te loto ʼaē ʼa Sehova ke tou maʼuli fiafia? (b) Kapau kiā tātou ko te temi mālōlō ʼe ko he “meʼa ʼofa ia ʼo te ʼAtua,” pea koteā anai kā tou fai?
ʼI TE Tohi-Tapu, ʼe tou maʼu ai te ʼu palalau ʼe fakahā ai ko Sehova ʼe mole ina loto pē ke tou māʼuʼuli, kae ke tou toe māʼuʼuli fiafia. Ohagē lā iā Pesalemo 104:14, 15, ʼe ʼui ai ko Sehova ʼe ina “fakatupu ake te meʼa kai mai te kele, pea mo te vino moʼo fakafiafia te loto ʼo te tagata, mo te lolo moʼo fakagigila [tona] fofoga, pea mo te pane ʼaē ʼe ina fakafīmālie te loto ʼo te tagata.” Koia, ʼe fakahomo e Sehova te ʼu gāueʼaga, ke maʼu mai ai te fulumeto, mo te lolo, pea mo te vino moʼo taupau totatou maʼuli. Logolā ʼe mole ʼaoga ia te vino moʼo taupau totatou maʼuli, kae ʼe feala ke ina “fakafiafia te loto ʼo te tagata.” (Tnk. 9:7; 10:19). ʼEī, ʼe loto e Sehova ke tou fiafia, ke fonu totatou loto ʼi “te fiafia.”—Gāue 14:16, 17.
2 Koia ʼe mole kovi mokā ʼi ʼihi temi, ʼe tou fakatuʼutuʼu he lakaga ke tou “vakavakaʼi lelei [ai] te ʼu manulele ʼo te lagi” pea mo “te ʼu lilio ʼo te ʼu gāueʼaga,” peʼe tou fai ʼihi atu ʼu fakatuʼutuʼu ʼe fakamālohi ai tātou pea mo fakafiafia ai totatou maʼuli. (Mat. 6:26, 28; Pes. 8:3, 4) Ko he maʼuli fiafia pea mo lelei ʼe ko he “meʼa ʼofa ia ʼo te ʼAtua.” (Tnk. 3:12, 13) Kapau kiā tātou, ko te temi mālōlō ʼe kau ki te meʼa ʼofa ʼaia ʼaē neʼe foaki mai e te ʼAtua, pea ʼe tou fakaʼaogaʼi anai ia te temi mālōlō moʼo fakafiafiaʼi te loto ʼo te ʼAtua. *
Tou Fai He ʼu Tonu ʼe Lelei ʼo ʼUhiga Mo Te ʼu Fakafiafia
3. He koʼē ʼe fakapotopoto ke tou tali ʼe lahi te ʼu fakafiafia ʼaē ʼe feala ke tou filifili?
3 Ko nātou ʼaē ʼe manatu fakapotopoto ʼo ʼuhiga mo te ʼu fakafiafia, ʼe mahino kiā nātou ʼe lahi te ʼu fakafiafia, kae ʼe toe ʼaoga foki kiai hona ʼu tuʼakoi. Koteā tona tupuʼaga? Moʼo tali kiai, tou fakatatau te ʼu fakafiafia ki te meʼa kai. ʼE kehekehe te ʼu meʼa kai mai he fenua ki he tahi fenua. ʼI tona fakahagatonu, ko te meʼa kai ʼaē ʼe leleiʼia e te hahaʼi ʼi he koga meʼa, ʼe lagi mole faʼa leleiʼia e te hahaʼi ʼo he tahi age koga meʼa. ʼO toe fēia pē, ko te ʼu fakafiafia ʼaē ʼe leleiʼia e ʼihi Kilisitiano ʼo he fenua, ʼe lagi mole faʼa leleiʼia e he ʼu Kilisitiano ʼo he tahi age fenua. Māʼiapē lā mo he ʼu Kilisitiano ʼe natou māʼuʼuli ʼi he fenua, ko he fakafiafia ʼaē ʼe hagē maʼa he tahi ʼe ko he temi mālōlō (ohagē lā ko te lautohi takoto), ʼe lagi ko he meʼa fakapiko ia ki he tahi age; pea ko te fakafiafia ʼaē ʼe hagē maʼa he Kilisitiano ʼe fakamālohi ki tona sino (ohagē lā ko te ʼaka lēlue), ʼe lagi ko he meʼa fakatupu gaʼegaʼe ia ki he tahi age. Ohagē pē ko te lava filifili ʼa he ʼu hahaʼi he faʼahiga meʼa kai ʼe natou leleiʼia, ʼe toe feala pē foki ke natou filifili te faʼahiga fakafiafia ʼaē ʼe natou leleiʼia.—Loma 14:2-4.
4. He koʼē ʼe ʼaoga he ʼu tuʼakoi ki te ʼu faʼahiga fakafiafia ʼaē ʼe tou filifili? Kotou tuku mai he fakatā.
4 Kae ʼe toe mahino kiā tātou ko te lahi ʼo te ʼu fakafiafia ʼe mole fakagafua ia ke tou fai fakavalevale. Moʼo fakatā ia te faʼahi ʼaia, tou toe talanoa ki te meʼa kai. Tatau aipē peʼe tou fia kai ki he ʼu meʼa kai kehekehe, kae ʼe mole tou fia kai anai ki he meʼa kai kua kovi, heʼe mole ko he aga fakapotopoto ia pea ʼe feala anai ke tou māhahaki ai. ʼO toe fēia aipē, logolā ʼe tou tali ʼe lahi te ʼu faʼahiga fakafiafia ʼe lelei, kae ʼe mole tou kau anai ki he ʼu fakafiafia ʼe feala ke tou tuʼutāmaki ai, peʼe maʼu ai te agamālohi, peʼe ko te ʼu aga heʼeʼaoga. Kapau ʼe tou kau ki te ʼu taʼi fakafiafia ʼaia, pea ʼe tou fakafeagai anai ki te ʼu pelesepeto Fakatohi-tapu pea mo tou tuʼutāmaki ai ʼi te faʼahi fakasino peʼe ko te faʼahi fakalaumālie. Ke tou ʼiloʼi papau ʼe mole tou fakalaka ʼi te ʼu tuʼakoi, ʼe lelei ke tou kumi muʼa peʼe fua lelei peʼe kailoa kiā tātou te ʼu fakafiafia ʼaē ʼe tou leleiʼia. (Efe. 5:10) ʼE tou lava ʼiloʼi feafeaʼi te faʼahi ʼaia?
5. ʼE feafeaʼi hatatou ʼiloʼi lelei peʼe mulimuli tatatou ʼu fakafiafia ki te ʼu pelesepeto ʼa te ʼAtua?
5 Ke fua lelei kiā tātou te ʼu fakafiafia ʼaē ʼe tou filifili pea mo leleiʼia e Sehova, ʼe ʼaoga ke ʼalutahi mo te ʼu pelesepeto ʼaē ʼe tuʼu ʼi te Folafola ʼa te ʼAtua. (Pes. 86:11) Ke tou ʼiloʼi lelei peʼe mulimuli kiai te ʼu faʼahiga fakafiafia ʼaē ʼe tou leleiʼia, ʼe feala ke tou vakaʼi te lisi. ʼI te lisi ʼaia ʼe maʼu ai faʼahi e tolu ʼo ʼuhiga mo te fakafiafia: tona lelei, tona lahi, pea mo te fakakaugā. Tou vakaʼi takitahi ia te ʼu faʼahi ʼaia.
Te Lelei ʼo Te ʼu Fakafiafia
6. Ko te ʼu fakafiafia fea ʼaē ʼe tou fakafisi kiai, pea koteā tona tupuʼaga?
6 ʼI muʼa ʼo hakotou filifili he faʼahiga fakafiafia, ʼe ko te ʼuluaki fehuʼi ʼaenī ʼaē ʼe tonu ke kotou fai kiā koutou totonu: ‘Koteā te agaaga ʼo te ʼu fakafiafia ʼaē ʼe au leleiʼia?’ ʼI takotou kumi tona tali, ʼe lelei ke kotou manatuʼi ʼe ʼi ai te ʼu faʼahiga fakafiafia tāfito e lua. ʼE tou fakafisi ki te ʼuluaki kae ʼe lagi tou tali anai te lua. Koteā te ʼuluaki faʼahiga fakafiafia? ʼI te mālama agakovi ʼaenī, ʼe lahi te ʼu fakafiafia ʼe maʼu ai te ʼu aga ʼe fakafeagai ʼosi ki te ʼu pelesepeto Fakatohi-tapu, peʼe natou maumauʼi ia te ʼu lao ʼa te ʼAtua. (1 Soa. 5:19) ʼE fakafisi ʼosi te kau Kilisitiano moʼoni ki te ʼu taʼi fakafiafia fuli ʼaia. ʼE kau kiai te ʼu fakafiafia ʼaē ʼe maʼu ai te fiafia ʼo te fakamamahiʼi ʼo ʼihi, te ʼu meʼa fakatemonio, te fai tagata, te ʼu ʼata peʼe ko te ʼu pāki ʼaē ʼe ʼasi ai te ʼu felāveʼi fakasino heʼeʼaoga, peʼe ko te agamālohi, peʼe fakamaʼuhigaʼi ai te ʼu aga ʼaē ʼe kovi mo heʼeʼaoga. (1 Ko. 6:9, 10; lau ia Fakahā 21:8.) Tatau aipē peʼe tou tō tokotahi peʼe tou fakatahi mo ʼihi, kae kapau ʼe tou fakafisi ke tou kau ki te ʼu taʼi fakafiafia ʼaia, pea ʼe tou fakamoʼoni ai kiā Sehova tatatou “fehiʼa ki te meʼa ʼaē ʼe kovi.”—Loma 12:9; 1 Soa. 1:5, 6.
7, 8. ʼE tou lava fakafuafua feafeaʼi te lelei ʼo he fakafiafia? Kotou tuku mai he fakatā.
7 Ko te lua faʼahiga fakafiafia ʼe ko te ʼu fakafiafia ʼaē ʼe mole fai ai he ʼu aga ʼe tauteaʼi fakahagatonu ʼi te Folafola ʼa te ʼAtua. Koia, ʼi muʼa ʼo hatatou filifili he fakafiafia, ʼe lelei ke tou vakaʼi fakalelei peʼe ʼalutahi te ʼu fakafiafia ʼaia mo te meʼa ʼaē ʼe leleiʼia e Sehova, ʼaē ʼe fakahā ʼi te ʼu pelesepeto Fakatohi-tapu. (Taag. 4:10, 11) Pea ʼe ʼaoga leva ke tou fai he tonu ʼe tou taupau ai he leʼo ʼo loto ʼe lelei. (Kal. 6:5; 1 Tim. 1:19) ʼE feafeaʼi hatatou fai te faʼahi ʼaia? Tou fakakaukauʼi age muʼa ia te faʼahi ʼaenī: ʼI muʼa ʼo hatatou kai ki he meʼa kai foʼou, ʼe lagi tou fia ʼiloʼi muʼa te ʼu meʼa ʼaē neʼe fai ʼaki te meʼa kai ʼaia. ʼO toe tatau aipē, ʼi muʼa ʼo hatatou filifili he faʼahiga fakafiafia, ʼe ʼaoga ke tou kumi lelei te ʼu agaaga ʼo te fakafiafia ʼaia.—Efe. 5:17.
8 Ohagē lā, ʼe lagi kotou leleiʼia te faigaoʼi, pea tokolahi ʼe natou leleiʼia mo nātou. Ko te faigaoʼi ʼe ko he temi fakafiafia. Kae ʼe feafeaʼi lā mo kapau ʼe tou leleiʼia he faigaoʼi ʼuhi ko tona fakataupiepie mālohi, peʼe fakamataku, peʼe fakatupu tuʼutāmaki, peʼe ʼuhi ko te ʼu fai fakavikiviki agamālohi, te tauhi fakavale ki he foʼi ʼekipi ʼo he fenua, peʼe ʼuhi ko he tahi ʼu agaaga fēia? ʼI takotou ʼosi vakaʼi te ʼu agaaga ʼo te ʼu fakafiafia, ʼe lagi kotou mahino anai ʼe mole ʼalutahi takotou manatu, mo te faʼahiga manatu ʼa Sehova pea mo te logo ʼo te tokalelei pea mo ʼofa ʼaē ʼe tou fakamafola ki te hahaʼi. (Isa. 61:1; Kal. 5:19-21) ʼI te tahi age faʼahi, kapau ʼe lelei kiā Sehova ia te agaaga ʼo te ʼu fakafiafia ʼaē ʼe kotou filifili, pea ʼe lagi fua lelei anai kiā koutou pea mo fakamālohi koutou.—Kal. 5:22, 23; lau ia Filipe 4:8.
Te Lahi ʼo Te Temi Ki Te ʼu Fakafiafia
9. Koteā ʼaē ʼe tou mahino kiai ʼi tatatou tali ki te fehuʼi ʼaē ‘Ko temi e fia ʼe au fakaʼaogaʼi ki te ʼu fakafiafia?’
9 Ko te lua fehuʼi ʼaenī ʼaē ʼe lelei ke kotou fai kiā koutou totonu: ‘Ko temi e fia ʼe au fakaʼaogaʼi ki te ʼu fakafiafia?’ Ko tatatou tali ki te fehuʼi ʼaē ʼo ʼuhiga mo tona lelei, ʼe tou mahino ai ki te ʼu fakafiafia ʼaē ʼe tou leleiʼia, te ʼu fakafiafia ʼaē ʼe tou tali pea mo ʼaē ʼe mole tou tali. Kae ko te tali ki te fehuʼi ʼaē ʼo ʼuhiga mo tona lahi, ʼe tou mahino ai ki te ʼu faʼahi ʼaē ʼe tou fakamuʼamuʼa, te ʼu faʼahi ʼaē ʼe maʼuhiga pea mo ʼaē ʼe mole maʼuhiga. Koia, koteā ʼaē ʼe feala ke tokoni mai ke tou ʼiloʼi te tuʼulaga ʼo te ʼu fakafiafia ʼi totatou maʼuli?
10, 11. ʼE tokoni feafeaʼi mai te ʼu folafola ʼaē ʼa Sesu iā Mateo 6:33, ke tou fai he tonu ʼo ʼuhiga mo te ʼu fakafiafia?
10 Neʼe ʼui fēnei e Sesu Kilisito ki tana kau tisipulo: “ ʼE tonu ke ke ʼofa kiā Sehova tou ʼAtua ʼaki tou loto kātoa pea mo tou nefesi kātoa pea mo tau manatu kātoa pea mo tou mālohi kātoa.” (Mko. 12:30) Koia, ʼe ko totatou ʼofa kiā Sehova ʼaē ʼe tou fakamuʼamuʼa ʼi totatou maʼuli. ʼE tou fakahā te faʼahi ʼaia ʼaki tatatou mulimuli ki te fakatotonu ʼaenī neʼe fai e Sesu: “Koia kotou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kiā koutou.” (Mat. 6:33) ʼE lava tokoni feafeaʼi mai ia te ʼu folafola ʼaia, ke tou ʼiloʼi ia te tuʼulaga ʼo te ʼu fakafiafia ʼi totatou maʼuli pea mo te lahi ʼo te temi ʼaē ʼe tonu ke tou fakaʼaogaʼi kiai?
11 Kotou tokagaʼi ia te manatu ʼaenī: neʼe fakatotonu mai e Sesu ke tou ‘haga kumi muʼa te puleʼaga.’ Neʼe mole ina ʼui mai ia ke tou haga kumi pē te puleʼaga.’ ʼE mahino ia, neʼe ʼiloʼi e Sesu ʼe toe lahi anai te tahi ʼu meʼa ʼe ʼaoga ke tou kumi ʼi totatou maʼuli. ʼE ʼaoga kiā tātou he ʼapi, he meʼa kai, he ʼu mutuʼi meʼa, he ako ʼi te ʼu faleako, he gāue, he ʼu fakafiafia, pea mo te tahi atu ʼu faʼahi. Kae ʼi te ʼu meʼa fuli ʼaē ʼe tou kumi, ʼe ko te faʼahi pē e tahi ʼe tonu ke tou fakamuʼamuʼa: te ʼu gāue ʼo te Puleʼaga. (1 Ko. 7:29-31) Ko te manatu tāfito ʼaia ʼe ina uga anai tātou ke tou tuku ki muli te ʼu fakafiafia pea mo ʼihi atu ʼu gāue, ke feala ai hatatou fakamuʼamuʼa te gāue ʼaē ʼe tonu ke tou fakahoko, ʼaē ko te tokaga ki te ʼu gāue ʼo te Puleʼaga. Kapau ʼe tou fai fēia, pea ʼe fua lelei anai kiā tātou te ʼu fakafiafia.
12. ʼO ʼuhiga mo te ʼu fakafiafia, ʼe tou lava maʼuliʼi feafeaʼi ia te pelesepeto ʼaē ʼe tuʼu iā Luka 14:28?
12 ʼI muʼa ʼo hatatou fai he ʼu tonu ʼo ʼuhiga mo te ʼu fakafiafia, ʼe ʼaoga ke tou fakakaukauʼi lelei te temi ʼaē kā tou fakaʼaogaʼi anai kiai. Ohagē pē ko he laga e he tahi he tule, ʼe tonu ke ina “lau te paʼaga kā puli anai kiai.” (Luka 14:28) ʼE tonu ke tou ʼiloʼi peʼe ko temi e fia ʼe toʼo anai e he faʼahiga fakafiafia. Pea ʼe tonu leva ke tou fai he tonu ʼo ʼuhiga mo te temi ʼaē ʼe lelei anai kiai. Kā tou fakaʼaogaʼi he temi ki te ʼu fakafiafia ʼo mole kei tou fakahoko ai ia te ʼu gāue maʼuhiga, ohagē ko tatatou ako takitokotahi ia te Tohi-Tapu, te tauhi fakafāmili, te kau ki te ʼu fono, peʼe ko te kau ki te fakamafola ʼo te Puleʼaga, pea ʼe mole tou fakaʼaogaʼi lelei anai ia te temi ʼaia. (Mko. 8:36) Kae kapau ʼe tou fakafiafia ʼi ʼihi temi, ʼo tou maʼu ai he mālohi ke hoko atu tatatou fai ia te ʼu gāue ʼo te Puleʼaga, pea ʼe lagi tou manatu anai ʼe lelei te temi ʼaē ʼe tou fakaʼaogaʼi ki te fakafiafia ʼaia.
Te Fakakaugā ʼi Te ʼu Fakafiafia
13. He koʼē ʼe ʼaoga ke tou filifili lelei ia nātou ʼaē kā kau anai ki tatatou ʼu fakafiafia?
13 Ko te tolu fehuʼi ʼaenī ʼaē ʼe lelei ke kotou fai kiā koutou totonu: ‘Ko ai ʼaē ʼe au fia fakafiafia mo ia?’ ʼE maʼuhiga ke tou tokagaʼi ia te faʼahi ʼaia ʼo te ʼu fakafiafia. Koteā tona tupuʼaga? Heʼe fakalogo te lelei ʼo tatatou ʼu fakafiafia ki te lelei ʼo tatatou fakakaugā. Ohagē pē ko hakotou fiafia lahi mokā kotou kakai mo hokotou ʼu kaumeʼa lelei, ʼo toe fēia pē, ʼe lahi anai takotou fiafia ʼi te ʼu temi mālōlō mokā kotou fakatahi mo he ʼu kaumeʼa lelei. Koia ʼe tou mahino ai, tokolahi iā tātou, tāfito te kau tūpulaga, ʼe natou leleiʼia age hanatou fakafiafia fakatahi mo ʼihi atu. Kae ke fua lelei ia te temi ʼaia, ʼe fakapotopoto anai hatatou ʼiloʼi fakatomuʼa peʼe ko he fakakaugā lelei peʼe kovi.—2 Fkma. 19:2; lau ia Tāʼaga Lea 13:20; Sake 4:4.
14, 15. (a) Koteā te faʼifaʼitaki neʼe tuku mai e Sesu ʼo ʼuhiga mo te filifili ʼo he ʼu kaumeʼa lelei? (b) Ko te ʼu fehuʼi fea ʼe lelei ke tou fai kiā tātou totonu ʼo ʼuhiga mo totatou ʼu kaumeʼa?
14 ʼE tokoni lahi anai kiā tātou mo kapau ʼe tou mulimuli ki te faʼifaʼitaki ʼa Sesu ʼo ʼuhiga mo te filifili ʼo te ʼu fakakaugā. Talu mai te fakatupu ʼo te tagata, neʼe ʼofa ki ai Sesu. (Taag. 8:31) ʼI tana ʼi te kele, neʼe tokaga pea mo ʼofa ki te hahaʼi fuli pē. (Mat. 15:29-37) Kae neʼe ʼiloʼi e Sesu ʼe ʼi ai te kehekehe ʼo te fakahā ʼo he aga fakakaumeʼa pea mo te liliu ko he kaumeʼa lelei. Logolā neʼe aga fakakaumeʼa mo te hahaʼi fuli pē, kae neʼe mole kaumeʼa lelei ia mo nātou fuli. Ko te ʼu palalau ʼaē neʼe fai e Sesu ki tana kau ʼapositolo agatonu e toko 11, ʼe ina fakahā mai pe neʼe feafeaʼi tana filifili tona ʼu kaumeʼa lelei. Neʼe ina ʼui fēnei: “Ko koutou ko toku ʼu kaumeʼa mo kapau ʼe kotou fai te meʼa ʼaē ʼe au fakatotonu atu kiā koutou.” (Soa. 15:14; vakaʼi mo Soa. 13:27, 30.) Neʼe ko nātou pē ʼaē neʼe natou mulimuli iā te ia pea mo tauhi kiā Sehova, ʼaē neʼe liliu ko hona ʼu kaumeʼa lelei.
15 Koia, ʼe fakapotopoto anai hakotou manatuʼi te ʼu palalau ʼaē neʼe fai e Sesu mokā kotou filifili he tahi ke liliu ko hokotou kaumeʼa lelei. Kotou fai kiā koutou totonu ia te ʼu fehuʼi ʼaenī: ‘ ʼE hā koa ʼi tana ʼu palalau pea mo tana aga ʼe fakalogo ki te ʼu fakatotonu ʼa Sehova pea mo Sesu? ʼE ʼofa koa ki te meʼa ʼaē ʼe lelei pea mo fehiʼa ki te meʼa ʼaē ʼe kovi? ʼE ina ʼekenaki koa au ke au fakamuʼamuʼa ia te Puleʼaga ʼi toku maʼuli pea mo liliu ko he kaugana agatonu ʼa Sehova?’ Kapau ʼe kotou ʼio ki te ʼu fehuʼi fuli ʼaia, pea kua kotou maʼu he kaumeʼa lelei ʼe feala ke kotou fakafiafia fakatahi mo ia.—Lau ia Pesalemo 119:63; 2 Ko. 6:14; 2 Tim. 2:22.
ʼE Lelei Koa Takotou ʼu Fakafiafia?
16. Koteā ʼaē ʼe ʼaoga ke tou ʼiloʼi ʼo ʼuhiga mo tatatou ʼu fakafiafia?
16 Neʼe tou vakaʼi fakanounou faʼahi e tolu ʼo ʼuhiga mo te fakafiafia: tona lelei, tona lahi pea mo te fakakaugā. Ke fua lelei kiā tātou, ʼe ʼaoga ke mulimuli fakalelei tatatou ʼu fakafiafia ki te ʼu pelesepeto Fakatohi-tapu ʼaē ʼe pipiki ki te ʼu faʼahi takitahi ʼaia e tolu. Koia, ʼi muʼa ʼo hatatou filifili he faʼahiga fakafiafia, ʼe ʼaoga ke tou vakaʼi peʼe mulimuli ki te ʼu pelesepeto Fakatohi-tapu. Ke tou ʼiloʼi peʼe lelei he fakafiafia, ʼe tonu ke tou kumi peʼe koteā tona agaaga. ʼE leleiʼia koa e Sehova? ʼE agamālohi koa peʼe aga heʼeʼaoga? (Taag. 4:20-27) ʼO ʼuhiga mo tona lahi, ʼe tou kumi anai peʼe ko temi e fia ʼaē ʼe tou fakaʼaogaʼi ki te fakafiafia. ʼE tonu koa ke tou fakaʼaogaʼi te temi ʼaia kiai peʼe kailoa? (1 Tim. 4:8) Pea ʼo ʼuhiga mo te fakakaugā, ʼe tou kumi anai ke tou ʼiloʼi pe ko ai ʼaē ʼe tou fakafiafia mo ia. ʼE ko he ʼu kaumeʼa lelei koa peʼe ko he ʼu kaumeʼa kovi?—Tnk. 9:18; 1 Ko. 15:33.
17, 18. (a) ʼE tou lava ʼiloʼi feafeaʼi peʼe mulimuli tatatou ʼu fakafiafia ki te ʼu pelesepeto Fakatohi-tapu? (b) Koteā te tonu kā kotou fai anai ʼo ʼuhiga mo takotou ʼu fakafiafia?
17 Kapau ʼe mole mulimuli he faʼahiga fakafiafia ki te ʼu pelesepeto Fakatohi-tapu ʼaē ʼe pipiki ki te ʼu faʼahi ʼaia e tolu, pea ʼe mole lelei ia. ʼI te tahi age faʼahi, kapau ʼe tou ʼiloʼi papau ʼe mulimuli tatatou ʼu fakafiafia ki te ʼu pelesepeto Fakatohi-tapu ʼaē ʼe pipiki ki te ʼu faʼahi ʼaia e tolu, pea ʼe fakakolōliaʼi ai ia Sehova pea mo fua lelei kiā tātou.—Pes. 119:33-35.
18 Koia kā tou fai he tonu ʼo ʼuhiga mo te ʼu fakafiafia, tou faiga ke tou fai te meʼa ʼaē ʼe lelei, ʼi tona temi totonu pea ʼaki te fakakaugā ʼaē ʼe lelei. ʼEī, ʼofa pē ke tou fia mulimuli fuli ki te tokoni ʼaenī ʼi te Tohi-Tapu: “Peʼe kotou kakai, peʼe kotou ʼiʼinu, peʼe ko he faʼahiga meʼa pē ʼe kotou fai, kotou fai te ʼu meʼa fuli moʼo fakakolōliaʼi ʼo te ʼAtua.”—1 Ko. 10:31.
[Nota]
^ ʼI te ʼalatike ʼaenī, ko te kupuʼi palalau “temi mālōlō” pea mo te kupu “fakafiafia” ʼe fakaʼaogaʼi lualua moʼo talanoa ki te ʼu fakatuʼutuʼu ʼaē ʼe tou maʼu ai te fiafia.
ʼE Feala Koa Hakotou Fakamahino?
ʼO ʼuhiga mo te ʼu fakafiafia, ʼe kotou lava maʼuliʼi feafeaʼi ia te ʼu pelesepeto ʼaē ʼe tou maʼu iā . . .
• Filipe 4:8?
• Mateo 6:33?
[ʼU fehuʼi ʼo te ako]
[Paki ʼo te pāsina 11]
✔Tona Lelei
[Paki ʼo te pāsina 12]
✔Tona Lahi
[Paki ʼo te pāsina 14]
✔Te Fakakaugā
[Paki ʼo te pāsina 12]
ʼE tou lava mulimuli feafeaʼi ki te faʼifaʼitaki ʼa Sesu, mokā tou filifili totatou ʼu kaumeʼa pea mo tatatou ʼu fakafiafia?