Yumi ‘Leftemap Tingting Blong Olgeta We Oli Stap Krae’
Yumi ‘Leftemap Tingting Blong Olgeta We Oli Stap Krae’
“Hae God we i Masta blong yumi, hem i jusumaot mi . . . blong mi leftemap tingting blong olgeta we oli harem nogud, oli stap krae.”—AES. 61:1, 2.
1. ?Jisas i mekem wanem long ol man we oli stap krae? ?Mo from wanem hem i mekem olsem?
JISAS KRAES i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Taem Jisas i stap mekem wok ya we Jehova i givim long hem, hem i soemaot se hem i lavem ol man sem mak olsem we Papa blong hem i lavem ol man. (1 Jon 4:7-10) Aposol Pol i tokbaot wan rod we Jehova i yusum blong soemaot lav blong hem. Pol i singaot Jehova se hem i “God we i stamba blong fasin blong givhan.” (2 Kor. 1:3) Taem Jisas i stap mekem wok blong prij long wol, hem i soemaot we hem i lavem ol man olsem God. Profet Aesea i talemaot se bambae Jisas i mekem olsem. (Ridim Aesea 61:1, 2.) Jisas i talem se profet tok ya blong Aesea i blong tokbaot hem. (Luk 4:16-21) Taem Jisas i stap prij long ol man, hem i givhan long olgeta we oli harem nogud, oli stap krae. Hem i leftemap tingting blong olgeta mo i mekem tingting blong olgeta i kwaet.
2, 3. ?From wanem olgeta we oli biaen long Jisas oli mas givhan long narafala blong harem gud?
2 Ol man we oli biaen long Jisas oli mas givhan long olgeta we oli stap harem nogud, oli stap krae. (1 Kor. 11:1) Pol i talem se: “Yufala i mas stap toktok gud long yufala blong mekem tingting blong yufala i strong, mo yufala i mas givgivhan long yufala.” (1 Tes. 5:11) Ol man oli nidim narafala blong givhan long olgeta blong oli harem gud, from we laef naoia “i kam strong tumas.” (2 Tim. 3:1) Long ol defren ples long wol, ol man we oli gat gudfala fasin oli stap harem nogud moa, mo tingting blong olgeta i foldaon. Hemia from ol toktok mo fasin blong ol narafala we oli stap raonabaot long olgeta.
3 Baebol i talemaot se long ol lasdei blong rabis wol ya, bambae ol man “oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man, mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, mo oli praod tumas. Bambae oli man we oli wantem tumas ol samting we oli stap harem gud long hem, i winim we oli stap lavem God.” Fasin mo tingting blong ol man nogud i stap kam “mowas olgeta,” stret olsem we Baebol i talem.—2 Tim. 3:2-4, 13.
4. ?Laef long taem blong yumi i olsem wanem?
4 Yumi no sapraes long samting ya, from we Baebol i talem se “olgeta man blong wol ya oli stap long paoa blong Setan.” (1 Jon 5:19) Setan i yusum politik, ol jos, mo ol bisnes long wol ya blong lidim ol man oli go krangke. Mo hem i yusum sam narafala rod bakegen, blong pulum ol man blong folem ol giaman tingting blong hem. I klia nomo se Setan i “masta blong wol ya” mo hem i “rabis god blong wol ya.” (Jon 14:30; 2 Kor. 4:4) Laef long wol ya i stap kam mowas from we Setan i kros tumas. Hem i save se i gat smol taem nomo blong hem i stap yet. (Rev. 12:12) Yes, i no longtaem bambae God i spolem Setan mo rabis wol ya. Mo bambae i no gat man i agensem hae rul blong Jehova. !Ol save ya oli mekem yumi harem gud tumas!—Jen., japta 3; Job, japta 2.
Ol Man Oli Talemaot Gud Nius Long Olgeta Ples Long Wol
5. ?Long ol lasdei ya, wanem i soemaot se profet tok ya long saed blong wok blong prij i stap kamtru?
5 Jisas i talemaot profet tok ya se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.” (Mat. 24:14) Stret olsem we Jisas i talem, ol man blong Jehova long olgeta ples long wol, oli stap talemaot gud nius blong Kingdom blong God. Tede, bitim 7,500,000 Witnes blong Jehova, long bitim 107,000 kongregesen, oli stap mekem wok ya. Jisas i prij mo i tijim ol man long saed blong Kingdom blong God. Ol Witnes blong Jehova, oli mekem sem wok. (Mat. 4:17) Taem ol Witnes oli stap mekem wok ya, oli leftemap tingting blong plante man we oli harem nogud mo oli krae. !Las yia mo bifo las yia, 570,601 man evriwan oli baptaes, oli kam Witnes blong Jehova!
6. ?Wanem tingting blong yu long saed blong bigfala wok ya we yumi stap mekem blong talemaot gud nius?
6 Ol Witnes blong Jehova oli stap tanem ol buk long saed blong Baebol long bitim 500 lanwis, mo oli seremaot ol buk ya long ol man. !I no gat narafala grup we i mekem bigfala wok olsem samtaem! Nating se ol man blong Jehova oli laef long wol we i stap long paoa blong Setan, oli wok strong long wok blong Jehova mo namba blong olgeta i stap kam antap. Hemia from we tabu spirit blong God i stap givhan long olgeta mo i lidim olgeta. From we gud nius i stap goaot long olgeta ples long wol, ol man we oli lesin oli save harem gud olsem ol man blong Jehova.
Ol Kristin Brata Sista Oli Save Givhan Long Yumi
7. (a) ?From wanem yumi no mas ting se Jehova bambae i finisim evri samting we i mekem yumi harem nogud, bifo we hem i spolem wol ya? (b) ?From wanem yumi save se i gat rod blong yumi stanap strong taem yumi kasem trabol, mo taem man i mekem i nogud long yumi?
7 Yumi laef long wol ya we i fulap long rabis fasin, taswe bambae sam samting oli mekem yumi harem nogud. Yumi no mas ting se God bambae i karemaot evri samting we i mekem yumi harem nogud, bifo we hem i spolem wol ya. Bambae ol man oli agensem yumi mo oli mekem i nogud long yumi gogo taem ya i kamtru. Hemia sam samting we bambae i traem yumi, blong luk se yumi stap tru long Jehova mo yumi leftemap hae rul blong hem. (2 Tim. 3:12) Be Papa blong yumi long heven bambae i givhan long yumi mo i mekem yumi harem gud. From samting ya, bambae yumi save gat fasin olsem ol tabu Kristin long Tesalonaeka bifo. Taem oli kasem trabol mo ol man oli ronem olgeta, oli ‘stanap strong long Kristin laef blong olgeta, mo oli holemtaet bilif blong olgeta.’—Ridim 2 Tesalonaeka 1:3-5.
8. ?Wanem sam stori long Baebol we i soemaot se Jehova i stap givhan long ol man blong hem blong oli harem gud?
8 I tru tumas we Jehova i givhan long ol man blong hem blong oli harem gud. Yu traem tingbaot samting we i hapen long profet Elaeja. Nogud Kwin ya Jesebel i wantem kilim profet Elaeja i ded. Elaeja i fraet mo i ronwe. Hem i talem se hem i wantem ded nomo. Jehova i no tok strong long Elaeja. Defren olgeta, Jehova i givhan long hem blong i harem gud, mo i mekem tingting blong hem i strong blong i gohed long wok blong profet. (1 King 19:1-21) Long taem blong ol aposol tu, Jehova i givhan long ol man blong hem blong oli harem gud. Baebol i talem se ol Kristin long ol kongregesen olbaot long evri ples long Judia, long Galili, mo long Sameria, oli stap gud we i no moa gat man i spolem olgeta. Mo “Tabu Spirit i stap givhan long olgeta, i stap mekem olgeta oli strong moa, mo i stap mekem namba blong olgeta i kam antap moa. Mo olgeta oli stap ona gud long Masta blong yumi.” (Wok 9:31) !Yumi tu yumi glad tumas we tabu spirit i givhan long yumi blong harem gud!
9. ?From wanem yumi harem gud taem yumi lanem moa long saed blong Jisas?
9 Ol Kristin oli harem gud from we oli lanem plante samting long saed blong Jisas mo oli folem fasin blong hem. Jisas i talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Mat. 11:28-30) Taem yumi lanem se Jisas i kaen long ol man mo i lavem olgeta, mo yumi traem folem fasin blong hem, samting ya i mekem ol wari blong yumi oli godaon.
10, 11. ?Hu long kongregesen i save givhan long narafala blong i harem gud?
10 Ol narafala long kongregesen oli save givhan long yumi blong yumi harem gud. Yu traem tingbaot samting we ol elda oli save mekem blong givhan long olgeta we bilif blong olgeta i no strong. Jemes i tokbaot olgeta ya olsem se oli sik. Hem i talem se: “?I gat wan long yufala we i sik? I gud hem i singaot ol elda blong jos blong oli kam luk hem. Nao olgeta oli save prea long hem.” ?Wanem gudfala samting i kamaot from help blong ol elda? “Prea blong man we i bilif bambae i hilim sikman ya. Masta blong yumi bambae i mekem bodi blong hem i strong bakegen, mo sipos hem i bin mekem sam sin, Masta blong yumi bambae i fogivim hem from.” (Jem. 5:14, 15) Be i no ol elda nomo long kongregesen we oli save givhan long yumi blong yumi harem gud.
11 Plante taem ol woman oli harem gud moa blong talemaot ol trabol blong olgeta long narafala woman. Ol olfala sista mo ol sista we oli gat gudfala save long trutok, oli save givim gudfala advaes long ol yangfala sista. Maet ol Kristin sista ya we oli olfala moa, oli pastru long sam samting long laef blong olgeta, we i klosap sem mak long samting we i stap hapen long laef blong ol yangfala sista. Taem oli lesin gud mo oli soemaot se oli intres long ol yangfala sista, samting ya bambae i givhan bigwan long ol yangfala sista ya. (Ridim Taetas 2:3-5.) Ol elda mo ol narafala oli mas “toktok gud blong leftemap tingting blong olgeta we oli harem nogud oltaem from we tingting blong olgeta i foldaon.” Hemia wan samting we yumi evriwan i save mekem. (1 Tes. 5:14, 15, NW) Mo i gud blong tingbaot se God i ‘stap givhan long yumi long olgeta trabol blong yumi, blong mekem yumi harem gud. Nao taem ol narafala oli gat trabol, yumi save givhan long olgeta blong mekem olgeta oli harem gud.’—2 Kor. 1:4.
12. ?From wanem i impoten blong go long ol miting?
12 Wan impoten samting we yumi mas mekem blong harem gud, hemia se yumi mas go long ol Kristin miting. Save blong Baebol we yumi harem long ol miting i leftemap tingting blong yumi. Yumi ridim long Baebol se Judas mo Saelas tufala i givim plante tok, blong ‘leftemap tingting blong ol brata, mo blong mekem olgeta oli strong.’ (Wok 15:32) Bifo mo afta long ol miting blong yumi, ol brata sista long kongregesen oli storian blong leftemap tingting blong olgeta. Taswe, nating se yumi harem nogud from wan trabol, i moa gud yumi joen wetem ol Kristin brata sista blong yumi. Sipos yumi stap yumi wan nomo, bambae yumi harem nogud moa. (Prov. 18:1) Yumi mas mekem samting we aposol Pol i talem, hem i se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong jos, olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.”—Hib. 10:24, 25.
Ol Tok Blong Baebol i Save Givhan Long Yumi
13, 14. ?Ol tok blong Baebol i save givhan olsem wanem long yumi?
13 Ol tok blong Baebol i save givhan long yumi blong harem gud, nating se yumi baptaes finis no yumi jes stat blong stadi long saed blong God mo ol plan blong hem. Pol i raetem long leta blong hem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Ol tok blong Baebol i save mekem yumi harem gud mo i save mekem yumi “waes long olgeta samting, nao bambae yumi savegud ol rod blong mekem ol gudfala wok.” (2 Tim. 3:16, 17) I gud yumi ridim mo yumi stadi long Baebol mo ol buk blong yumi. Olsem nao, bambae yumi lanem trutok long saed blong ol plan blong God mo bambae yumi putum tingting blong yumi i stap strong long ol promes blong hem. Bambae ol tok blong Baebol i mekem yumi harem gud, mo bambae yumi kasem plante narafala blesing from we tingting blong yumi i stap strong long ol promes blong God.
14 I gud yumi folem fasin blong Jisas. Hem i yusum Baebol blong tijim narafala mo blong givhan long narafala blong i harem gud. Afta we God i mekem Jisas i laef bakegen long ded, Jisas i kamtru long tu disaepol blong hem. Jisas i talemaot ol tok blong Baebol long tufala. Samting ya i mekem tufala i harem gud tumas. (Luk 24:32) Aposol Pol i folem nambawan fasin blong Jisas. Hem i yusum Baebol blong pulum ol man blong oli tingting. Long Berea, olgeta we oli lesin long hem, oli ‘wantem tumas blong harem tok blong hem, mo evri dei, oli stap ridimgud ol tok blong Baebol, blong faenemaot se ol tok ya blong hem i tru no i no tru.’ (Wok 17:2, 10, 11) !Yes, i impoten tumas we yumi ridim Baebol evri dei! !Yumi mas letem ol tok blong Baebol mo ol tok long ol buk blong yumi, oli givhan long yumi! Bambae oli mekem yumi harem gud mo bambae tingting blong yumi i stap strong long ol promes blong God.
Sam Moa Rod Blong Givhan Long Narafala
15, 16. ?Wanem sam samting we yumi save mekem blong givhan long ol Kristin brata sista mo mekem olgeta oli harem gud?
15 I gat plante samting we yumi save mekem blong givhan long ol Kristin brata sista mo mekem olgeta oli harem gud. Yumi save givhan long olgeta we oli olfala no we oli sik, blong go pem kakae blong olgeta long stoa. Yumi save givhan long ol narafala blong mekem sam wok long haos blong olgeta. Taem yumi mekem olsem, yumi soemaot se yumi intres long olgeta. (Fil. 2:4) Yumi save talem long ol brata sista se yumi laekem ol gudfala fasin blong olgeta, olsem lav we oli gat, strong tingting, mo bilif blong olgeta. Yumi save talem tu long olgeta se yumi wantem gat gudhan olsem olgeta.
16 Wan samting we yumi save mekem blong givhan long ol olfala blong oli harem gud, hemia se yumi go luk olgeta. Mo yumi lesin taem oli storian long ol samting we oli mekem long laef blong olgeta, mo long ol blesing we oli kasem long wok blong Jehova. !Ating bambae yumi sek se storian blong olgeta i leftemap tingting blong yumi mo i mekem yumi harem gud! Yumi save ridim Baebol mo sam buk blong ogenaesesen wetem olgeta. Maet yumi save rerem Wajtaoa wetem olgeta no yumi rerem Baebol Stadi Blong Kongregesen. Yumi save lukluk wan DVD blong ogenaesesen wetem olgeta. Mo yumi save ridim no talem sam stori we oli stap long ol buk blong yumi.
17, 18. ?From wanem yumi save gat strong tingting se Jehova bambae i givhan long ol man blong hem mo i mekem olgeta oli harem gud?
17 Sipos yumi save se wan brata no sista i nidim narafala blong givhan long hem blong i harem gud, yumi prea long saed blong hem. (Rom 15:30; Kol. 4:12) Taem yumi harem nogud from sam trabol mo taem yumi traem blong givhan long narafala, yumi save gat strong bilif olsem Deved. Hem i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” (Sam 55:22) Oltaem bambae Jehova i givhan long yumi mo i mekem yumi harem gud. Bambae hem i neva lego ol man blong hem we oli stap tru long hem.
18 God i talem long ol man blong hem bifo se: “Olgeta. !Mi mi Hae God! !Mi nao mi stap mekem yufala i strong!” (Aes. 51:12) Bambae Jehova i mekem i sem mak long yumi. Bambae hem i blesem yumi taem yumi traehad blong givhan long narafala blong i harem gud. Ol tok we Pol i talem long ol tabu Kristin long taem blong hem, oli save leftemap tingting blong yumi evriwan, nating se bambae yumi laef long heven no long paradaes long wol. Hem i talem se: “Papa blong yumi, hem i lavem yumi, mo i stap givhan long yumi long gladhat blong hem. Oltaem hem i stap mekem tingting blong yumi i strong, mo i stap mekem yumi harem gud from we yumi stap putum tingting blong yumi long hem. Mo prea blong mitrifala, we Jisas Kraes, Masta blong yumi, wetem God, Papa blong yumi, tufala bambae i stap leftemap tingting blong yufala, mo tufala i stap mekem yufala i strong, blong yufala i save stanap strong oltaem blong talem ol gudfala toktok mo blong mekem ol gudfala wok.”—2 Tes. 2:16, 17.
?Yu Yu Tingbaot?
• ?Wok blong prij i bigfala olsem wanem?
• ?Wanem sam samting we yumi save mekem blong givhan long narafala blong i harem gud?
• ?Baebol i soemaot olsem wanem, se Jehova i stap givhan long ol man blong hem blong oli harem gud?
[Kwestin]
[Tok blong pija long pej 26]
?Yu yu stap leftemap tingting blong olgeta we oli harem nogud, oli stap krae?
[Tok blong pija long pej 28]
Ol yangfala mo ol olfala oli save leftemap tingting blong narafala
