Nọ “Miọnhomẹna Mẹhe to Awubla Lẹpo”
Nọ “Miọnhomẹna Mẹhe to Awubla Lẹpo”
‘Jehovah ko yí amisisadode mi nado miọnhomẹna mẹhe to awubla lẹpo.’—ISA. 61:1, 2.
1. Etẹwẹ Jesu wà na mẹhe to awubla lẹ, podọ etẹwutu?
JESU KLISTI dọmọ: “Núdùdù ṣie wẹ nado wà ojlo ewọ he do mi hlan tọn podọ nado dotana azọ́n etọn.” (Joh. 4:34) To whenue Jesu to azọ́n he Jiwheyẹwhe dena ẹn wà, e do jẹhẹnu jiawu Otọ́ etọn tọn lẹ hia. Dopo to jẹhẹnu ehelẹ mẹ wẹ owanyi daho he Jehovah tindo na gbẹtọ lẹ. (1 Joh. 4:7-10) Apọsteli Paulu do dopo to aliho he mẹ owanyi enẹ yin didohia te hia to whenuena e dọ dọ Jehovah yin “Jiwheyẹwhe homẹmimiọn lẹpo tọn.” (2 Kọl. 1:3) Jesu do owanyi mọnkọtọn hia to whenue e wà nuhe yin didọ to dọdai Isaia tọn mẹ. (Hia Isaia 61:1, 2.) Jesu hia dọdai enẹ to sinagọgu mẹ to Nazalẹti bo yí hogbe etọn lẹ zan na ede. (Luku 4:16-21) To lizọnyizọn Jesu tọn mẹ, e gbọn owanyi dali miọnhomẹna mẹhe to awubla lẹ, bo gọalọna yé nado mọ tuli po jijọho ahun mẹ tọn po.
2, 3. Naegbọn hodotọ Klisti tọn lẹ dona hodo apajlẹ etọn nado nọ miọnhomẹnamẹ?
2 Hodotọ Jesu tọn lẹpo dona hodo apajlẹ etọn gbọn homẹmimiọnna mẹhe to awubla lẹ dali. (1 Kọl. 11:1) Paulu dọmọ: “Mì nọ to homẹmiọnna ode awetọ bo nọ to ode awetọ hẹn lodo.” (1 Tẹs. 5:11) Onú titengbe wẹ e yin dọ mí ni nọ miọnhomẹna mẹdevo lẹ, na gbẹtọvi lẹ to gbẹnọ to “ojlẹ awusinyẹn tọn he vẹawu nado pehẹ lẹ” mẹ. (2 Tim. 3:1) Lẹdo aihọn pé, ahunjijlọnọ susu wẹ to gbẹnọ to mẹhe ohó po nuyiwa yetọn po nọ hẹn awufiẹsa, apọṣimẹ, po awubla po wá lẹ ṣẹnṣẹn.
3 Sọgbe hẹ dọdai Biblu tọn, to azán godo tọn titonu ylankan ehe tọn lẹ mẹ, mẹsusu wẹ “yin wanyina mẹdetiti tọ́, wanyina akuẹtọ, mẹdezedagatọ, saklanọ, nùzantọ, tolivẹtọ do mẹjitọ go, mayọndagbenọ, nugbomadọtọ, owanyi jọwamọ tọn matindotọ, mẹhe ma nọ tindo gbigbọ gbekọndopọ tọn, mẹhẹngbletọ, wazẹjlẹgonọ, kanylantọ, mẹhe ma tindo owanyi na dagbewà, mẹdehiatọ, tasinyẹntọ, mẹhe nọ gbọn kikla dali yigo, wanyina gbẹdudu tọ́ kakati nido yin wanyina Jiwheyẹwhe tọ́.” Walọ mọnkọtọn lẹ ko ylan hugan gbede pọ́n todin, na ‘omẹ ylankan lẹ po mẹblutọ lẹ po ko ylan deji dogọ.’—2 Tim. 3:2-4, 13.
4. Etẹwẹ ko jọ do ninọmẹ aihọn tọn go to ojlẹ mítọn mẹ?
4 Ehe lẹpo ma dona paṣa mí, na Ohó Jiwheyẹwhe tọn hẹn ẹn họnwun dọ “aihọn lọ pete tin to huhlọn mẹylankan lọ tọn glọ.” (1 Joh. 5:19) “Aihọn lọ pete” bẹ adà tonudidọ, sinsẹ̀n, ajọwiwa, po aliho nujijla oklọ tọn lẹ po hẹn. Abajọ Satani Lẹgba yin yiylọ po gbesisọ po dọ “ogán aihọn tọn lọ” podọ “yẹwhe titonu ehe tọn.” (Joh. 14:30; 2 Kọl. 4:4) Ninọmẹ nulẹ tọn to yinylan dogọ lẹdo aihọn pé na Satani to homẹgble daho ji, to yinyọnẹn mẹ dọ whenu gli de wẹ pò bọ Jehovah nado de emi sẹ̀ sọn aimẹ. (Osọ. 12:12) Lehe e yin homẹmiọnnamẹnu nado yọnẹn dọ dotẹnmẹ he Jiwheyẹwhe jodona Satani po titonu ylankan etọn po na wá vivọnu to madẹnmẹ bọ whẹho he Satani fọndote gando nupojipetọ-yinyin Jehovah tọn go na yin dididẹ do sọ!—Gẹnẹsisi weta 3; Job weta 2.
Wẹndagbe lọ to Yinyin Lilá Lẹdo Aihọn Pé
5. Nawẹ dọdai he gando azọ́n yẹwhehodidọ tọn go lọ to hẹndi mọ to azán godo tọn ehelẹ mẹ gbọn?
5 Nuhe Jesu dọ dọdai etọn to hẹndi mọ to ojlẹ sinsinyẹn whenuho gbẹtọvi tọn ehe mẹ. E dọmọ: “Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá.” (Mat. 24:14) Azọ́n kunnudide lẹdo aihọn pé tọn he gando Ahọluduta Jiwheyẹwhe tọn go ehe to yinyin wiwà todin hugan gbede pọ́n. To egbehe, hugan Kunnudetọ Jehovah tọn 7500000 to agun 107000 linlán mẹ lẹdo aihọn pé wẹ to yẹwhehodọ gando Ahọluduta Jiwheyẹwhe tọn go dile Jesu yí i do basi hosọ yẹwhehodidọ po mẹpinplọn tọn etọn po do. (Mat. 4:17) Na azọ́n yẹwhehodidọ egbezangbe tọn mítọn wutu, mẹhe to awubla lẹ to yinyin homẹmiọnna. Abajọ to owhe awe agọe tọn lẹ mẹ, gbẹtọ 570601 wẹ yí baptẹm taidi Kunnudetọ Jehovah tọn!
6. Etẹwẹ hiẹ lẹn gando obá he mẹ azọ́n yẹwhehodidọ tọn mítọn ko gbloada jẹ go?
6 Mí sọgan mọnukunnujẹ obá daho he mẹ azọ́n yẹwhehodidọ tọn ehe ko gbloada jẹ mẹ, eyin mí doayi e go dọ Kunnudetọ Jehovah tọn lẹ nọ basi lẹdogbedevomẹ owe sinai do Biblu ji lẹ tọn to ogbè 500 linlán mẹ. Onú ehe nkọ ma ko jọ pọ́n to whenuho gbẹtọvi tọn mẹ! Adà aigba ji tọn titobasinanu Jehovah tọn, azọ́n he wà e te, po jideji etọn po jiawu taun. Matin anademẹ po alọgọ gbigbọ wiwe Jiwheyẹwhe tọn po, e na vẹawu dọ onú mọnkọtọn ni jọ to aihọn he tin to anademẹ Satani tọn glọ ehe mẹ. Na yẹwheho wẹndagbe lọ tọn to yinyin didọ to aigba fininọ lẹpo ji wutu, e ma yin yisenọ hatọ mítọn lẹ kẹdẹ wẹ to vivi homẹmimiọn sọn Owe-wiwe lẹ mẹ tọn dù gba, ṣigba mẹhe to awubla bo kẹalọyi owẹ̀n Ahọluduta lọ tọn lẹ lọsu.
Homẹmimiọnna Sinsẹ̀n-Basitọ Hatọ Lẹ
7. (a) Naegbọn mí ma sọgan donukun dọ Jehovah ni de ninọmẹ ayimajai tọn lẹpo sẹ̀ todin? (b) Nawẹ mí wagbọn do yọnẹn dọ mí sọgan doakọnna homẹkẹn po nukunbibia po?
7 To aihọn he gọ́ na kanyinylan po yajiji po ehe mẹ, mí ma sọgan dapana ninọmẹ he nọ hẹn ayimajai wá lẹ. Mí ma sọgan donukun dọ Jiwheyẹwhe ni de nuhe nọ hẹn awubla kavi awufiẹsa wá lẹ sẹ̀ gba, na mí dona nọte kakajẹ whenue e na và titonu ehe sudo. Mọdopolọ, e ko yin didọdai dọ mí na pehẹ homẹkẹn, podọ ehe nọ hùn dotẹnmẹ dote na mí nado hẹn tenọgli mítọn go bo nọgodona nupojipetọ-yinyin Jehovah tọn. (2 Tim. 3:12) Ṣigba, na Otọ́ olọn mẹ tọn mítọn nọ gọalọna mí bo nọ miọnhomẹna mí wutu, mí sọgan yí akọndonanu po yise po do pehẹ homẹkẹn po nukunbibia lẹ po taidi Klistiani yiamisisadode Tẹsalonika hohowhenu tọn lẹ.—Hia 2 Tẹsalonikanu lẹ 1:3-5.
8. Kunnudenu Owe-wiwe tọn tẹwẹ dohia dọ Jehovah nọ miọnhomẹna devizọnwatọ etọn lẹ?
8 Ayihaawe ma tin dọ Jehovah nọ miọnhomẹna devizọnwatọ etọn lẹ. Di apajlẹ, to whenue ahọsi ylankan Jezebẹli sìn-adán nado hù yẹwhegán Elija, yẹwhegán lọ hẹn adọgbigbo bu bo họnyi, bo tlẹ dọ dọ emi jlo okú. Ṣigba, kakati nado gblewhẹdo Elija, Jehovah miọnhomẹna ẹn bo na ẹn adọgbigbo nado hẹn azọngban yẹwhegán tọn etọn di. (1 Ahọ. 19:1-21) Kunnudenu he sọ dohia dọ Jehovah nọ miọnhomẹna omẹ etọn lẹ wẹ nujijọ he wá aimẹ to agun Klistiani owhe kanweko tintan tọn mẹ. Di apajlẹ, mí hia dọ to ojlẹ de mẹ, “agun he tin lẹdo Jude po Galili po gọna Samalia lẹpo pé biọ ojlẹ jijọho tọn de mẹ, bo to yinyin hinhẹn lodo.” Humọ, “agun lọ pete to jijideji dile e zindonukọn to budisi Jehovah mẹ podọ to homẹmimiọn gbigbọ wiwe tọn mẹ.” (Owalọ 9:31) Lehe mí dopẹ́ do sọ dọ míwlẹ lọsu nọ mọ “homẹmimiọn gbigbọ wiwe tọn” yí!
9. Naegbọn nupinplọn gando Jesu go sọgan miọnhomẹna mí?
9 Taidi Klistiani lẹ, mí nọ mọ homẹmimiọn na mí nọ plọnnu gando Jesu Klisti go bo nọ hodo afọdòmẹ etọn lẹ. Jesu dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na alindọn mìtọn lẹ. Na zẹgẹ ṣie bọawu bọ agbàn ṣie sọ fua.” (Mat. 11:28-30) Nupinplọn gando aliho mẹjlọdote tọn he mẹ Jesu yinuwa hẹ gbẹtọ lẹ te go po apajlẹ dagbe etọn hihodo po na gọalọna mí taun nado de ayimajai he mí sọgan pehẹ lẹ pò.
10, 11. Mẹnu lẹ wẹ sọgan miọnhomẹnamẹ to agun mẹ?
10 Klistiani hatọ lẹ sọgan sọ miọnhomẹna mí. Di apajlẹ, lẹnnupọndo lehe mẹho agun tọn lẹ nọ gọalọna mẹhe to pipehẹ ninọmẹ ayimajai tọn lẹ do ji. Devi Jakọbu wlan dọmọ: “Be mẹde to azọ̀njẹ [to gbigbọ-liho] to mì mẹ? Mì gbọ e ni ylọ sunnu mẹho agun tọn lẹ wá ede dè, na yé ni hodẹ̀ do e ji.” Etẹwẹ na yin kọdetọn lọ? “Odẹ̀ yise tọn na hẹn mẹhe to azọ̀njẹ jẹgangan, podọ Jehovah na jlọ ẹ dote. Humọ, eyin e ko wà ylando lẹ, e na yin jijona ẹn.” (Jak. 5:14, 15) Hagbẹ agun lọ tọn devo lẹ lọsu sọgan miọnhomẹnamẹ.
11 E nọ saba bọawuna yọnnu lẹ nado dọho hẹ yọnnu devo lẹ gando nuhahun voovo lẹ go. Titengbe yọnnu mẹhomẹ lẹ, yèdọ mẹmẹyọnnu numimọnọ lẹ sọgan na ayinamẹ dagbe susu mẹmẹyọnnu jọja lẹ. Mẹmẹyọnnu mẹhomẹ he whèwhín ehelẹ sọgan ko jugbọn nuhahun dopolọ lẹ mẹ to gbẹzan yetọn mẹ. Awuvẹmẹ po jẹhẹnu yọnnu-yinyin tọn yetọn lẹ po sọgan gọalọ taun. (Hia Titu 2:3-5.) Na nugbo tọn, mẹho lẹ po mẹdevo lẹ po sọgan podọ dona nọ “dọho homẹmiọnnamẹ tọn na alindọn he jẹflumẹ lẹ” to agun mẹ. (1 Tẹs. 5:14, 15) Podọ mí dona nọ flindọ Jiwheyẹwhe “nọ miọnhomẹna mí to nukunbibia mítọn lẹpo mẹ, na mí nido sọgan penugo nado miọnhomẹna mẹhe tin to whlepọn wunmẹ depope mẹ” lẹ.—2 Kọl. 1:4.
12. Naegbọn e do yin onú titengbe dọ mí ni nọ yì opli Klistiani tọn lẹ?
12 Aliho titengbe de nado mọ homẹmimiọn yí wẹ nado nọ tin to opli Klistiani tọn lẹ ji, yèdọ fie hodidọ sinai do Biblu ji lẹ nọ na tuli mí te. Mí hia dọ Juda po Sila po “yí ohó susu do na tuli mẹmẹsunnu lẹ bo hẹn yé lodo.” (Owalọ 15:32) Jẹnukọn podọ to opli mítọn lẹ godo, hodọdopọ mẹjlọdote tọn lẹ nọ tin to hagbẹ agun lọ tọn lẹ ṣẹnṣẹn. Enẹwutu, eyin mí tlẹ to yaji na ninọmẹ ayimajai tọn de wutu, mì gbọ mí ni ma klan míde dovo blo, na mọwiwà ma na hẹn ninọmẹ lọ pọnte. (Howh. 18:1) Kakatimọ, mí na wà dagbe nado hodo ayinamẹ gbọdo apọsteli Paulu tọn dọmọ: “Mì gbọ mí ni nọ lẹn ode awetọ tọn pọ́n nado nọ whàn mídelẹ hlan owanyi po azọ́n dagbe lẹ po kọ̀n, e ma yin nado nọ gbẹkọ pipli dopọ mítọn lẹ go, dile mẹdelẹ tindo aṣa lọ do gba, ṣigba nado nọ na tuli ode awetọ, podọ humọ dile mì mọdọ azán lọ to dindọnsẹpọ.”—Heb. 10:24, 25.
Dike Ohó Jiwheyẹwhe Tọn Ni Miọnhomẹna We
13, 14. Dọ lehe Owe-wiwe lẹ sọgan miọnhomẹna mí do.
13 Vlavo mí yin Klistiani he ko yí baptẹm kavi mí ṣẹṣẹ jẹ nuplọn ji gando Jiwheyẹwhe po lẹndai etọn po go, mí sọgan mọ homẹmimiọn susu yí sọn Ohó Jiwheyẹwhe tọn mẹ. Paulu wlan dọmọ: “Nuhe ko yin kinkandai jẹnukọn lẹpo yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.” (Lom. 15:4) Owe Wiwe lẹ sọgan miọnhomẹna mí bo hẹn mí “pegan to gigọ́ mẹ, bo yin hinhẹn sọgbe mlẹnmlẹn na azọ́n dagbe lẹpo.” (2 Tim. 3:16, 17) Na taun tọn, nugbo lọ yinyọnẹn gando lẹndai Jiwheyẹwhe tọn lẹ go po todido nujọnu tọn tintindo na sọgodo po na miọnhomẹna mí. Enẹwutu, mì gbọ mí ni nọ yí Ohó Jiwheyẹwhe tọn po owe sinai do Biblu ji lẹ po zan ganji, na yé sọgan miọnhomẹna mí bo hẹn ale wá na mí to aliho susu mẹ.
14 Jesu ze apajlẹ dagbe dai gbọn Owe-wiwe lẹ yiyizan nado plọnmẹ podọ nado miọnhomẹna mẹdevo lẹ dali. Di apajlẹ, to whenue e sọawuhia awe to devi etọn lẹ mẹ to fọnsọnku etọn godo, e ‘basi zẹẹmẹ Owe-wiwe lẹ tọn’ na yé. Dile e to hodọna yé, hodidọ etọn yinuwado ahun yetọn ji taun. (Luku 24:32) Apọsteli Paulu ‘yihojlẹdohogo sọn Owe-wiwe lẹ mẹ’ dile e to apajlẹ dagbe Jesu tọn hodo. To Belea, hosetọ etọn lẹ “yí jeje daho tlala do kẹalọyi ohó lọ, bo nọ yí sọwhiwhe do gbadopọnna Owe-wiwe lẹ egbesọegbesọ.” (Owalọ 17:2, 10, 11) Lehe e sọgbe dọ mí ni nọ hia Biblu egbesọegbesọ, bo mọaleyi sọn e mẹ podọ sọn owe Klistiani tọn lẹ he yin awuwlena nado miọnhomẹna mí bo na mí todido to ojlẹ tukla tọn ehelẹ mẹ do sọ!
Aliho Devo lẹ Nado Miọnhomẹna Mẹdevo Lẹ
15, 16. Etẹwẹ yin delẹ to nuhe mí sọgan wà nado gọalọ bo miọnhomẹna Klistiani hatọ lẹ mẹ?
15 Mí sọgan gọalọna Klistiani hatọ lẹ bo gbọnmọ dali miọnhomẹna yé to aliho voovo lẹ mẹ. Di apajlẹ, mí sọgan yì whleahi na mẹhomẹ kavi yisenọ hatọ he to azọ̀njẹ lẹ. Mí sọgan gọalọna mẹdevo lẹ nado wà whégbè-zọ́n lẹ, bo gbọnmọ dali do ojlo mẹdetiti tọn hia yé. (Flp. 2:4) Vlavo mí sọgan dọnudo sinsẹ̀n-basitọ hatọ lẹ na jẹhẹnu dagbe yetọn lẹ taidi owanyi, vivẹnudido, adọgbigbo, po yise po.
16 Nado sọgan miọnhomẹna mẹhomẹ lẹ, mí sọgan dla yé pọ́n bo yí sọwhiwhe do dotoai dile yé to numimọ yetọn lẹ po dona he yé duvivi etọn to sinsẹ̀nzọn Jehovah tọn mẹ lẹ po dọna mí. Na nugbo tọn, ehe sọgan na tuli mí bo miọnhomẹna mí! Mí sọgan hia Biblu po owe sinai do Biblu ji mítọn lẹ po hẹ mẹhe mí dlapọn lẹ. Vlavo mí sọgan gbadopọnna hosọ Oplọn Atọ̀họ̀-Nuhihọ́ lọ Tọn osẹ lọ tọn kavi nudọnamẹ he na yin hodọdeji to Biblu Pinplọn Agun tọn whenu to osẹ lọ mẹ hẹ yé. Mí sọgan pọ́n DVD he sinai do Owe-wiwe ji de dopọ. Podọ mí sọgan sọ hia kavi dọ numimọ tulinamẹ tọn delẹ sọn owe zinjẹgbonu mítọn lẹ mẹ.
17, 18. Taidi devizọnwatọ nugbonọ Jehovah tọn lẹ, naegbọn mí sọgan deji dọ ewọ na nọgodona mí bo miọnhomẹna mí?
17 Eyin mí doayi e go dọ Jehovah sẹ̀ntọ hatọ de tindo nuhudo homẹmimiọn tọn, mí sọgan ylọ yinkọ etọn to odẹ̀ mẹdetiti tọn mítọn lẹ mẹ. (Lom. 15:30; Kọl. 4:12) Dile mí to pipehẹ nuhahun gbẹ̀mẹ tọn lẹ bo yí vivẹnudido do to homẹmiọnna mẹdevo lẹ, mí sọgan tindo yise po nujikudo dopolọ po taidi Psalm-kantọ he jihàn dọmọ: “Ze agbàn towe dlan OKLUNỌ ji, ewọ nasọ hẹn we dote; ewọ ma na dike dodonọ ni yin sisẹtẹnna.” (Ps. 55:22) Ayihaawe ma tin dọ Jehovah na nọgodona devizọnwatọ nugbonọ etọn lẹ bo na nọ miọnhomẹna yé to whepoponu.
18 Jiwheyẹwhe dọna sinsẹ̀n-basitọ etọn lẹ to hohowhenu dọmọ: “Yẹn, yèdọ yẹn wẹ [Ewọ] he to homẹmiọnna mì.” (Isa. 51:12) Jehovah na wà nudopolọ na mílọsu bo na dona nuyiwa po hodidọ dagbe mítọn lẹ po dile mí to homẹmiọnna mẹhe to awubla lẹ. Vlavo mí tindo todido olọn mẹ tọn kavi aigba ji tọn, hogbe Paulu tọn lẹ hlan Klistiani yiamisisadode hatọ etọn lẹ sọgan miọnhomẹna dopodopo mítọn dọmọ: “Na Oklunọ mítọn Jesu Klisti lọsu podọ Jiwheyẹwhe Otọ́ mítọn, yèdọ mẹhe yiwanna mí bo na mí homẹmimiọn madopodo po todido dagbe po gbọn nukundagbe majẹhẹ dali, ni miọnhomẹna mì bo hẹn mì lodo to walọ po ohó dagbe lẹpo po mẹ.”—2 Tẹs. 2:16, 17.
Be Hiẹ Flin Ya?
• Obá tẹ mẹ wẹ azọ́n mítọn nado miọnhomẹna mẹhe to awubla lẹ ko gbloada jẹ?
• Etẹlẹ wẹ mí sọgan wà nado miọnhomẹna mẹdevo lẹ?
• Kunnudenu Owe-wiwe tọn tẹwẹ dohia dọ Jehovah nọ miọnhomẹna omẹ etọn lẹ?
[Kanbiọ Oplọn tọn lẹ]
[Yẹdide to weda 28]
Be hiẹ nọ miọnhomẹna mẹhe to awubla lẹ ya?
[Yẹdide to weda 30]
Jọja po mẹho po sọgan na tulimẹ
