“Lohiabada ese, lau ia abia hidi vadaeni . . . taitai taudia ibounai do lau durua, bona hagoadaia.”​—⁠ISA. 61:​1, 2.

1. Taitai taudia totona Iesu be dahaka ia karaia, bona dahaka dainai?

 IESU KERISO ia gwau: “Lauegu aniani be lau ia siaia tauna ena ura do lau karaia bona iena gaukara do lau karaia haorea.” (Ioa. 4:34) Iehova ese Iesu dekenai gaukara ta ia henia. Unai gaukara ia karaia neganai, taunimanima dekenai lalokau ia hahedinaraia, ena Tamana ia karaia bamona. (1 Ioa. 4:​7-10) Aposetolo Paulo ia gwau Iehova ese taunimanima ia lalokau henia dalana ta be, taitai taudia ia hagoadaia. (2 Kor. 1:⁠3) Isaia ena peroveta hereva hegeregerena, Iesu be ena haroro gaukara lalonai lalokau ia hahedinaraia danu. (Isaia 61:​1, 2 duahia.) Ena haroro gaukara ai taitai taudia ia hagoadaia bona lalomaino ia henidia. Oibe, Iesu ese Isaia ena peroveta herevana ia hamomokania.​—⁠Luka 4:​16-21.

2, 3. Dahaka dainai Keristani taudia ibounai ese ma haida idia hagoadaia be namo?

² Keristani taudia ibounai ese taitai taudia idia hagoadaia be namo. (1 Kor. 11:⁠1) Paulo ia gwau: “Do umui durua heheni bona  hagoadaia heheni noho.” (1 Tes. 5:11) Ita hagoadaia heheni be namo badina ita be “nega aukadia” lalonai ita noho. (2 Tim. 3:⁠1) Tanobada ibounai lalonai kudou-maoro taudia be kara dika taudia ese idia hahisidia dainai idia taitai.

³ Baibel ia peroveta dina gabedia ai, taunimanima momo be “sibodia do idia laloa bada, moni do idia ura henia bada, sibodia do idia abia isi, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia hahedinaraia lasi, ma haida do idia badinaia lasi, ruma bese lalonai lalokau be lasi, do idia ura lasi gwauhamata idia karaia, idia be ladana hadikaia taudia, sibodia edia ura do idia biagua lasi, do idia dagedage, kara namodia do idia ura henia lasi, ma haida edia mase dalana do idia karaia, do idia kwara auka, do idia heagi, moale karadia do idia ura henia bada, to Dirava do idia lalokau henia lasi.” Baibel ena hereva hegeregerena, kara dika taudia edia lalohadai bona kara be ia dika momokani.​—⁠2 Tim. 3:​2-4, 13.

4. Hari inai negai tanobada oromana be edena bamona?

⁴ Tanobada oromana dekenai ita hoa lasi badina Baibel ia gwau “tanobada ibounai be Dika Tauna ena siahu lalonai ia noho.” (1 Ioa. 5:19) Inai hereva “tanobada ibounai” ese politikol, tomadiho, bisinesi, bona Satani ena hahediba hereva koikoi idia halasia oreadia ia herevalaia. Ita diba momokani Satani Diabolo be inai “tanobada ena lohia” bona ia be “inai nega oromana ena dirava.” (Ioa. 14:30; 2 Kor. 4:⁠4) Tanobada ena oromana be ia dika ia lao noho, badina Satani ia badu dikadika. Ia diba ena nega be ia kwadogi. (Apok. 12:12) Danu, Satani ia gwau Iehova be maoro lasi taunimanima ia lohiaia totona, to Iehova ese unai koikoi herevana do ia hamaoromaoroa. Ita moale badina ita diba kahirakahira Dirava ese Satani bona inai tanobada dikana do ia hadikaia ore!​—⁠Genese karoa 3; Iobu karoa 2.

Sivarai Namona be Tanobada Hegegemadai Idia Harorolaia

5. Edena dala ai Mataio 24:14 ena peroveta herevana be ia guguru noho?

⁵ Iesu ia peroveta ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mat. 24:14) Iesu ia hereva bamona, Iehova ena taunimanima be tanobada hegegemadai Dirava ena Basileia ena sivarai namona idia harorolaia noho. Edia kongrigeisen be 107,000 mai kahana bona pablisa taudia 7,500,000 mai kahana be unai gaukara idia karaia. Iesu be ma haida dekenai Dirava ena Basileia ia harorolaia bona hadibaia, bona Iehova ena Witnes taudia be unai bamona idia karaia noho. (Mat. 4:17) Inai gaukara  amo idia ese taitai taudia momo idia hagoadaia. Vanegai lagani rua lalonai, taunimanima ibounai 570,601 be idia bapatiso bona Iehova ena Witnes taudia ai idia lao!

6. Haroro gaukara ia bada ia lao dainai, dahaka oi laloa?

⁶ Hari inai negai, Iehova ena Witnes taudia be gado 500 mai kahana ai Baibel idia hahanaia bona hariharilaia. Guna orea ta be unai bamona ia karaia lasi! Ena be Satani ese ia biagua tanobadana ai idia noho, to Iehova ena taunimanima be idia haroro goadagoada bona edia namba be ia bada ia lao noho. Unai idia karaia diba badina Dirava ena lauma helaga ese idia ia durua bona hakaua. Sivarai namona be tanobada hegegemadai idia harorolaia dainai, Basileia ena sivarai ese taitai taudia edia lalona ia hagoadaia.

Kongrigeisen Lalonai Haida ese Ita Idia Hagoadaia Diba

7. (a) Edena negai Dirava ese ita mamia hisihisi ibounai do ia haorea? (b) Dagedage bona hisihisi ita haheaukalaia diba, a?

⁷ Ita be kara dika ia honu tanobadana ai ita noho dainai, lalohisihisi idia havaraia gaudia be momo. Ita diba ita davaria hisihisi ibounai be Dirava ese do ia haorea lasi ela bona inai tanobada dikana ia hadikaia ore. Dagedage ena hahetoho ita davaria neganai, iseda kara amo do ita hahedinaraia ita be Iehova bona iena lohia siahuna ita abia isi o lasi. (2 Tim. 3:12) Dagedage bona hisihisi negadiai, namona be Tesalonika horoa Keristani taudia ita tohotohoa. Iseda guba Tamana ena heduru amo “haheauka bona abidadama” do ita hahedinaraia noho.​—⁠2 Tesalonika 1:​3-5 duahia.

8. Baibel ese edena dala ai ia hahedinaraia Iehova be ena hesiai taudia ia durua?

⁸ Iehova ena hesiai taudia be hekwakwanai idia davaria neganai, nega ibounai idia ia hagoadaia. Hegeregere, Kwini Iesebele be peroveta tauna Elia ia ura hamasea gwauraia neganai, Elia ia gari bona ia heau. Danu, ia lalohisihisi bada dainai ia gwau ia mase be namo. Ena be unai bamona ia laloa, Iehova ese ia gwau henia lasi, to ia hagoadaia mai gari lasi ida ena peroveta gaukara do ia karaia. (1 King Taudia, karoa 19) Danu, Iehova ese aposetolo taudia edia nega ai idia noho kongrigeisen ia durudia. Baibel ia gwau Iudea, Galilea, bona Samaria ibounai dekenai idia noho kongrigeisen be maino ai idia noho, bona idia goada. Baibel ia gwau: “Kongrigeisen be Iehova ia gari henia dalanai ia raka, bona lauma helaga ese ia hagoadaia hegeregerena, kongrigeisen be ia bada ia lao.” (Kara 9:31) Ita danu ita moale badina lauma helaga ese ita ia hagoadaia!

9. Dahaka dainai Iesu dibaia karana ese ita ia hagoadaia diba?

⁹ Ita Keristani taudia be Iesu Keriso ita diba bona iena haheitalai ita tohotohoa dainai goada ita abia. Iesu ia gwau: “Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Lauegu huaia auna do umui huaia bona lau dekenai diba umui tahua, badina lau be manau bona lalomanada tauna bona goada matamata do umui davaria. Lauegu huaia auna be ia namo, bona umui lau noia do umui huaia gauna be ia metau lasi.” (Mat. 11:​28-30) Iesu be lalokau bona hebogahisi dalanai taunimanima ia kara henidia. Iena kara ita tohotohoa neganai, ita lalohekwarahilaia gaudia do ita laloa momo lasi.

10, 11. Kongrigeisen lalonai daidia ese ma haida idia hagoadaia diba?

¹⁰ Kongrigeisen lalonai haida ese ita idia hagoadaia diba danu. Hegeregere, elda taudia ese manoka taudia idia durua dalana mani ita laloa. Iamesi ia gwau: “Umui huanai ta ia gorere, a? Namona be kongrigeisen ena tau badadia ia boiria, bona ia totona do idia guriguri.” Edia heduru ese dahaka namo ia havaraia? “Guriguri mai abidadama ese gorere tauna do ia hanamoa bona Iehova ese ia do ia hatorea isi. Danu, bema ia be kara dikadia  ia karaia, Dirava ese ena dika do ia gwauatao.” (Iam. 5:​14, 15) To, unai be elda taudia sibona edia maduna, a?

¹¹ Vaia hahine momo be hekwakwanai ta idia davaria neganai, idia gari lasi hahine ma ta dekenai unai idia herevalaia totona. Taihu burukadia bona lo taihu ese taihu matamatadia dekenai sisiba namodia idia henia diba, badina guna reana idia be unai bamona hekwakwanai idia davaria danu. Mai hebogahisi ida edia lalohekwarahi herevadia idia kamonai neganai, unai ese taihu matamatadia ia hagoadaia diba. (Tito 2:​3-5 duahia.) Oibe, elda taudia bona ma haida ese kongrigeisen lalonai “lalometau taudia” idia hagoadaia be namo. (1 Tes. 5:​14, 15) Bona namona be ita laloatao Dirava be ‘hisihisi ibounai lalonai ita dekenai lalogoada ia henia noho, vadaeni hisihisi idauidau idia abia taudia ma haida ita hagoadaia’ diba.​—⁠2 Kor. 1:⁠4.

12. Dahaka dainai hebou dekenai ita lao be mai anina bada?

¹² Goada ita abia dalana namona ta be Keristani heboudia dekenai do ita lao, badina unuseniai Baibel ena hahegoada herevadia ita kamonai. Baibel ia gwau Iuda bona Sila be “hagoadaia hereva momo idia gwauraia bona tadikaka idia hagoadaia.” (Kara 15:32) Hebou ia do hamatamaia lasi bona hebou murinai, ita hahegoada heheni be namo. Unai dainai ena be hekwakwanai ita davaria, to iseda tadikaka taihu ida ita hebou be namo. Badina sibona ita noho neganai, hekwakwanai be do ia bada sibona. (Aon. 18:⁠1) To, aposetolo Paulo ena hereva ita badinaia, ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona. Bona iseda hebou karana ita rakatania lasi, vaia haida ese idia karaia bamona, to do ita hagoadaia heheni, bona unai kara do ita habadaia noho, badina umui itaia unai dina be ia kahirakahira noho.”​—⁠Heb. 10:​24, 25.

Baibel ese Ita Ia Hagoadaia

13, 14. Edena dala ai Baibel ese ita ia hagoadaia diba?

¹³ Herevana ita be bapatiso Keristani taudia eiava hari sibona Dirava bona iena ura ita dibaia noho, Baibel ese ita ia hagoadaia diba. Paulo ia gwau: “Guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:⁠4) Baibel amo goada ita abia dainai do ita ‘hegeregere momokani, bona ita noho hegaegae gaukara namodia ibounai ita karaia totona.’ (2 Tim. 3:​16, 17) Baibel bona Baibel idia herevalaia bukadia bona magasin ita duahia bona stadilaia neganai, vaira negana ena helaro  bona Dirava ena ura do ita dibaia. Bema unai bamona ita karaia, unai helaro namona ese ita do ia hagoadaia bona do ita moale.

¹⁴ Iesu be haheitalai namona, badina ia ese Toretore Helagadia ia gaukaralaia ma haida ia hadibaia bona hagoadaia totona. Danu, ia toreisi lou murinai, iena hahediba taudia rua dekenai ia hedinarai, bona Toretore Helagadia edia anina ia hahedinaraia goevagoeva. Unai ese idia ia hagoadaia. (Luka 24:32) Aposetolo Paulo ese Iesu ena haheitalai namona ia tohotohoa, bona Toretore Helagadia amo taunimanima ia hadibaia namonamo. Berea dekenai, kamonai taudia be “mai edia ura bada ida Dirava ena hereva idia kamonai bona dina ta ta ai Toretore Helagadia idia tahua namonamo.” (Kara 17:​2, 10, 11) Unai dainai dina ta ta ai Baibel bona Baibel bukadia ita duahia be mai anina bada! Inai nega aukadia ai unai ese ita ia hagoadaia bona durua diba.

Haida Ita Durua Daladia

15, 16. Edena dala ai iseda tadikaka ita durua bona hagoadaia diba?

¹⁵ Dala idauidau ai iseda tadikaka ita durua bona hagoadaia diba. Hegeregere, buruka o gorere taudia totona sitoa dekenai ita lao diba edia ura gaudia ita hoia totona, eiava edia ruma gaukara haida ita karaia diba. Unai ese ia hahedinaraia idia ita laloa bada. (Fili. 2:⁠4) Iseda tadikaka edia kara namodia, hegeregere lalokau, gari lasi karana, abidadama bona idia karaia gaukara namodia dainai ita hanamodia be namo.

¹⁶ Buruka taudia hagoadaia dalana ma ta be idia ita vadivadi henidia bona guna edia hesiai gaukara lalonai idia karaia gaudia bona idia abia hahenamo ena sivarai ita kamonai diba. Unai ita karaia neganai, idia ese ita idia hagoadaia danu! Ita vadivadi henia taudia ida Baibel eiava Baibel idia herevalaia bukadia o magasin ita duahia diba. Eiava idia ida pura ena Gima Kohorona stadi eiava Kongrigeisen Baibel Stadi bukana ita stadilaia diba. Eiava orea ena DVD ta ita itaia, eiava ekspiriens ta ita duahia o herevalaia diba.

17, 18. Edena dala ai ita diba Iehova be ena hesiai taudia ia durua bona hagoadaia?

¹⁷ Bema ita diba iseda tadikaka o taihu ta be mai ena hekwakwanai, ia totona ita guriguri be namo. (Roma 15:30; Kol. 4:12) Ena be ita be mai eda hekwakwanai, to ma haida ita durua neganai, iseda abidadama be do ia goada Davida ena bamona, ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Sal. 55:22) Iehova be hanaihanai ita do ia durua bona hagoadaia, unai dainai do ita lalohisihisi lasi.

¹⁸ Dirava ese ena hesiai taudia ia hamaoroa: “Lau Lohiabada inai, lau ese umui lau hagoadaia noho.” (Isa. 51:12) Iehova ese ita do ia hagoadaia danu bona ita do ia durua ma haida ita hagoadaia totona. Herevana iseda helaro be guba o tanobada ai, Paulo ese horoa Keristani taudia dekenai ia gwauraia herevana ese ita ia hagoadaia diba, ia gwau: “Dirava iseda Tamana ese ita ia lalokau henia. Bona iena hebogahisi hereadaena amo ita ia hagoadaia hanaihanai bona ita dekenai helaro namona ia henia. Namona be Ia bona iseda Lohiabada Iesu Keriso ese emui kudouna idia hagoadaia, vadaeni kara namodia bona hereva namodia ibounai lalonai do umui gini goada.”​—⁠2 Tes. 2:​16, 17.

Oi Laloatao, A?

• Iseda haroro gaukara ena bada be edena bamona?

• Edena dala ai taitai taudia ita hagoadaia diba?

• Edena Baibel siridia ese idia hamomokania Iehova be ena taunimanima ia hagoadaia?

[Study Questions]

[Picture on page 28]

“Taitai taudia” oi hagoadaia, a?

[Picture on page 30]

Buruka bona matamata taudia be haida idia hagoadaia diba