‘Fiaulwisa Awonso Bedilanga’
‘Fiaulwisa Awonso Bedilanga’
“Yave unkusidi o mazi . . . yafiaulwis’awonso bedila.”—YES. 61:1, 2.
1. Yesu adieyi kavanganga mu kuma ki’awana badilanga? Ekuma?
YESU KRISTU wavova vo: “Okwame dia yavanga luzolo lua ndiona wantuma, yamanesa mpe salu kiandi.” (Yoa. 4:34) Muna lungisa e salu kavewa kwa Nzambi, Yesu watangininanga e fu ya S’andi. Kimosi muna fu yayi i zola kwampwena kasonga o Yave kwa wantu. (1 Yoa. 4:7-10) Paulu wa ntumwa wasonga imosi muna mpila Yave kesongelanga o zola vava kayikila Yave vo “Nzambi a fiauzi wawonso.” (2 Kor. 1:3) Yesu wasonga o zola kwaku vava kavanga dina diasakulwa kwa Yesaya wa ngunza. (Tanga Yesaya 61:1, 2.) Yesu watanga ungunza wau van’esambilu kuna Nazarete yo songa vo muna yandi ulunganena. (Luka 4:16-21) Ekolo kasalanga e salu kiandi, Yesu wafiaulwisanga awana badilanga, wabakasakesanga yo kubasadisa bakala ye luvuvamu lwa ntima.
2, 3. Ekuma alandi a Kristu bafwete kuntanginina muna fiaulwisanga akaka?
2 Alandi awonso a Yesu bafwete kuntanginina muna fiaulwisanga awana bedilanga. (1 Kor. 11:1) Paulu wavova vo: “Nulongaziana, yo vangaziana.” (1 Tes. 5:11) Tufwete fiaulwisanga akaka, musungula mu ‘lumbu yayi yampasi’ tuzingilanga. (2 Tim. 3:1) Ayingi muna akwa ntima miansongi omu nza yawonso, bezinganga kumosi y’awana bevovanga ye vanga mambu mekubakendelekanga yo kubamwesa e mpasi.
3 Nze una wasakulwa muna Nkand’a Nzambi, mu lumbu yayi yambaninu ndonga bena vo “akwa kuzola, minzola-nzimbu, akwa lusanu, akwa lulendo, akwa lutiangu, akolami ese yo ngudi, ntokozi, mindembi-velela, minkondwa-ungudi, minkondwa-ngwawani, akw’ekumbu, minkondwa-volo, akwa lunzi, mindembi zola mawete, ayekodi, akwa nswatakesa, akwa lungumvi-ngumvi, azodi ekembo ke mu Nzambi ko.” E fu yayi yambi mu wokela kaka yina, kadi ‘wantu ambi, y’akwa luvunu benungunukin’o bi.’—2 Tim. 3:2-4, 13.
4. Nkia mambu mevangamanga ova nza omu lumbu yeto?
4 Mawonso mama ke mafwete kutusivikisa ko, kadi o Nkand’a Nzambi ukiesesanga vo ‘e nza yawonso mu wisa kia ndiona wambi ilele.’ (1 Yoa. 5:19) “E nza yawonso,” i sia vo, nkubika za tuyalu, mabundu, kinkita ye nkubika z’amwangi a nsangu i nzila kesadilanga o Satana mu mwanganesa luvunu lwandi. Kalukatikisu ko vo Satana wa Nkandi Ampemba i ‘nyadi a nza yayi’ ye “nzambi a tandu kiaki.” (Yoa. 14:30; 2 Kor. 4:4) E mpasi mu nza yawonso mu wokela kaka zina, kadi o Satana makasi mayingi kena mau wau kazeye wo vo kolo kiandwelo kaka kisidi o Yave okumfwasa. (Lus. 12:12) Dialufiaulwisu mu zaya vo ekolo kavana Nzambi kwa Satana ye nz’andi yambi se kifokoka. E mpaka kafidisa Satana mu kuma kia Kimfumu kia Yave zisingikwa emvimba.—Etu., kapu kia 3; Yobi, kapu kia 2.
E Nsangu Zambote Zisamunwanga omu Nza Yawonso
5. Ungunza mu kuma kia salu kia umbangi aweyi ulunganenanga mu lumbu yayi yambaninu?
5 E diambu kavova Yesu mu kuma kia lumbu yayi yambaninu mu lungana dina. Wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” (Mat. 24:14) E salu kia samuna nsangu zambote za Kintinu kia Nzambi mu wokela kaka kina. O unu, tezo kia 7.500.000 ma Mbangi za Yave belungananga mu vioka 107.000 ma nkutakani mu nza yawonso mu sala e salu kiaki. Nze una Yesu kasamunwina yo longa oma ma Kintinu kia Nzambi, Mbangi za Yave mpe diau adimosi bevanganga. (Mat. 4:17) Mu kuma kia salu besalanga, ndonga mun’awana bedilanga befiaulwiswanga. Mu mvu miole miviokele, tezo kia 570.601 ma wantu bavubilu se Mbangi za Yave.
6. Adieyi obenze mu kuma kia lunungunuku lwa salu kia umbangi tusalanga?
6 O lunungunuku lwa salu kia umbangi lumonekenanga mu salu besalanga Mbangi za Yave kia sekola nkanda misasilanga Nkand’a Nzambi mu vioka 500 za ndinga yo kayanesa mio kwa wantu. E salu kiaki ke kiateka salwa ko muna lusansu lwa wantu! O lunungunuku lwa nkubik’a Yave ova ntoto ye salu besalanga ki’esivi kikilu. Kondwa lusadisu lwa mwand’avelela a Nzambi, ke diadi lendakana ko mu sala e salu kiaki omu nza yayi iyalwanga kwa Satana. E nsangu zambote zisamunwanga mu nza yawonso, ke zifiaulwisanga kaka Mbangi za Yave ko, kansi zifiaulwisanga mpe awana bedilanga vava betambulwilanga e nsangu za Kintinu.
Fiaulwisanga Mpangi Zaku za Mwanda
7. (a) Ekuma ka tufwete vavila ko vo Yave katuvevola muna mpasi zawonso tumonanga o unu? (b) Aweyi tuzayidi wo vo tulenda kweto zizidila e mpasi ye lubangamu?
7 Mu nza yayi yazala yo umpumbulu ye mpasi, yeto awonso tuwanana ye mambu mampasi. Ekolo e nza yayi ke yafwasilu ko, ka tufwete vava ko vo Nzambi katuvevola mu mambu mawonso metwasanga e ntantu ye mpasi. Wau tuvingilanga ekolo kiaki, e mpasi tumonanga zisonganga kana vo tusikilanga ye kwikizi muna Yave yo yikama kimfumu kiandi. (2 Tim. 3:12) Muna lusadisu ye lufiaulwisu lwa S’eto ezulu, tulenda tanginina Akristu akuswa kuna Tesalonika ana bazizidila e mpasi ye lubangamu ye kwikizi kiawonso.—Tanga 2 Tesalonika 1:3-5.
8. Nkia ziku ya Nkand’a Nzambi isonganga vo Yave ofiaulwisanga selo yandi?
8 Ka lukatikisu ko vo Yave ofiaulwisanga e selo yandi. Kasikil’owu, vava zingu kia Eleya wa ngunza kiakala mu vonza mu kuma kia Izebele wa Ntinu a Nkento ambi, Eleya wamona wonga yo tina, wazola nkutu vo kafwa kwandi. Kansi vana fulu kia tumba Eleya, Yave wamfiaulwisa yo kumvana unkabu kimana kalungisa e salu kiandi kia kingunza. (1 Nti. 19:1-21) Dina kavanga o Yave muna nkutakani y’Akristu muna tandu kiantete, disonganga una kefiaulwisilanga nkangu andi. Kasikil’owu, muna Nkand’a Nzambi tutanganga vo: “E dibundu muna Yuda yawonso ye Ngalili ye Samaria i mpuvama diavuvama yo vangama.” Vana ntandu, ‘wau diakangadilanga muna vumi wa Mfumu yo muna fiauzi wa mwand’avelela, diawokèla.’ (Mav. 9:31) Diakiese kikilu mu zaya vo oyeto mpe tulenda tambula ‘lufiaulwisu lwa mwand’avelela.’
9. O longoka oma ma Yesu aweyi dilenda kutufiaulwisila?
9 Wau vo tu Akristu, tufiaulwiswanga vava tulongokanga oma ma Yesu Kristu yo landa e ntambi zandi. Yesu wavova vo: “Nwiz’oku ngina, yeno awonso nufuntukanga yo bimuka yo mazitu, ikunuvundisa. Nuvwata vangu kiame, nwalongwa kwa mono; kadi i nlembami yo ntim’anleka: nwasolola vundu kia mioyo mieno. Kadi vangu kiame kiambote, enatu diame diampevo.” (Mat. 11:28-30) O longoka e mpila ina Yesu kakadilanga yo wantu yo tanginina e mbandu andi, i diambu diamfunu dilenda kutusadisa mu vevola e mpasi tumonanga.
10, 11. Nani olenda fiaulwisa akaka muna nkutakani?
10 Tulenda fiaulwiswa mpe kwa mpangi zeto z’Akristu. Kasikil’owu, badika una akuluntu muna nkutakani balenda sadisila awana bewanananga ye mambu mampasi. Yakobo wasoneka vo: “Vena y’on’oyela [muna mwanda] vovo nwin’e? Mbula kabokela mbuta za dibundu; bansambila.” Nkia nluta dilenda twasa? “E sambu kia lukwikilu kivuluz’on’oyela, o Mfumu okuntelamesa; ovo sumuka kasumukini, oyambulwilwa mo.” (Yak. 5:14, 15) Mpangi zakaka mpe muna nkutakani, balenda kutufiaulwisa.
11 Nkumbu miayingi, akento bemonanga vo diasazu mu mokena mambu mekubatokanesanga y’akw’au akento. Musungula ampangi z’akento bena vo s’ambuta ye bazikuka balenda vana luludiku lwambote kwa nsanga z’aleke. Mpangi zazi zambuta nanga banwana kala yo sunda e diambu ditokanesanga nsanga z’aleke. E ngemba ye fu yambote besonganga ilenda sadisa kikilu akaka. (Tanga Tito 2:3-5.) Kansi, akuluntu ye mpangi zakaka bafwete mpe ‘kasakesanga akwa ntima mia nkenda’ vana vena mpangi zeto. (1 Tes. 5:14, 15) Diambote twasungamenanga vo Nzambi ‘okutufiaulwisanga muna mpasi zeto zawonso, kimana twalenda fiaulwisa awana bena muna konso mpasi.’—2 Kor. 1:4.
12. Ekuma dinin’o mfunu mu kalanga muna tukutakanu tw’Akristu?
12 E mpila yambote tulenda fiaulwisilwa, i kalanga muna tukutakanu tw’Akristu muna tuwilanga malongi ma Nkand’a Nzambi mekutukasakesanga. Muna Nkand’a Nzambi tutanganga vo Yuda yo Sila ‘bawondelela wana-ngudi muna mambu mayingi, yo kubasikidisa.’ (Mav. 15:32) Tulenda kala ye moko ya lukasakeso ye mpangi zeto muna nkutakani una lukutakanu ke lwayantikidi ko ye kuna mfoko. Muna kuma kiaki, kana nkutu vo diambu diampasi tunwananga diau, ka tuyambudi lungana ko muna tukutakanu, kadi o vanga wo ke dikutusadisa ko. (Nga. 18:1) Kansi, diambote twalemvokela elongi diavumunwinwa dia Paulu wa ntumwa vava kavova vo: “Mbula twabadikaziana mpe twapalanina muna zola yo mavangu mambote; ke tuvunz’o lungana ko, nze fu kia wantu akaka, tuwonzaziana kaka; yo siamisa wo o vanga, wau tumwene vo e lumbu se kifinamene.”—Ayib. 10:24, 25.
Tufiaulwiswanga kwa Diambu dia Nzambi
13, 14. Songa una sono ya Nkand’a Nzambi ilenda kutufiaulwisila.
13 Kiakala vo tu Akristu avubwa yovo ke kolo ko twayantikidi longoka e ludi mu kuma kia Nzambi ye makani mandi, tulenda tambula lufiaulwisu lwafwana muna Diambu dia Nzambi. Paulu wasoneka vo: “Konso mana mateka sonekwa, masonekenwa muna longwa kweto, muna luzindalalu, yo muna fiauzi wa sono; twakala ye vuvu.” (Roma 15:4) E Sono Yavauka ilenda kutufiaulwisa ye ‘toma kutukubika muna salu yawonso yambote.’ (2 Tim. 3:16, 17) O zaya e ludi mu kuma kia makani ma Nzambi yo kala ye vuvu kiasikila kia kusentu, dikutufiaulwisanga kikilu. Muna kuma kiaki, yambula twatoma sadilanga Nkand’a Nzambi ye nkanda misasilanga wo emi milenda kutufiaulwisa yo kututwasila nluta mu mpila zayingi.
14 Yesu watusisila mbandu ambote muna sadila sono ya Nkand’a Nzambi mu longa wantu yo kubafiaulwisa. Vava kafuluka, wamoneka kw’alongoki andi awole yo ‘kubasasila e Sono.’ Ediadi diabafiaulwisa kikilu. (Luka 24:32) Muna tanginina e mbandu a Yesu, Paulu wa ntumwa wasadilanga e ‘sono mu mokena’ yo wantu. Awana banwanga kuna Beroya, ‘batambulwila e diambu kuna mvevo a ntima, e lumbu yawonso bafimpanga e sono.’ (Mav. 17:2, 10, 11) Muna kuma kiaki, diambote twatanganga o Nkand’a Nzambi e lumbu yawonso kumosi ye nkanda mieto kadi mikutuvananga e vuvu ye kutufiaulwisa mu ntangwa yayi yampasi tuzingilanga.
Mpila Zakaka Tulenda Fiaulwisila Akaka
15, 16. Nkia mambu tulenda vanga muna sadisa yo kasakesa mpangi zeto z’Akristu?
15 Tulenda sadisa yo fiaulwisa mpangi zeto z’Akristu mu mpila zayingi. Kasikil’owu, tulenda sadisa mpangi zeto z’anunu yovo ambevo mu kwenda kubasumbila e lekwa kuna zandu. Tulenda mpe sadisa akaka mu salu ya mpila mu mpila. O vanga wo disonga vo mfunu tukubavwanga. (Fili. 2:4) Tulenda sanisina mpangi zeto z’Akristu muna fu yambote besonganga nze zola, umbakuzi, unkabu ye lukwikilu.
16 Muna fiaulwisa mpangi z’anunu, tulenda kubakingula ye toma wunikina vava bekutuzayisanga lusansu lwau ye nsambu betambulanga muna salu kia Yave. Ediadi dilenda kutukasakesa yo kutufiaulwisa. Tulenda tanga kumosi o Nkand’a Nzambi ye nkanda kevaikisanga ntaudi akwikizi vava tukubakingulanga. Tulenda longoka yau elongi di’Eyingidilu dilongokwa muna lumingu lwaluna yovo Elongi dia Nkand’a Nzambi dia Nkutakani. Tulenda tala kumosi e DVD zeto. Tulenda mpe tanga yovo mokena diambu dialukasakeso dina muna nkanda mieto.
17, 18. Nze selo yakwikizi ya Yave, ekuma tulenda kadila ye ziku vo yandi okutusadisa yo kutufiaulwisa?
17 Avo tumwene vo mpangi eto wa Nkristu lufiaulwisu kavwidi o mfunu, tufwete kunsia muna sambu yeto. (Roma 15:30; Kol. 4:12) Ekolo tunwananga ye mambu mampasi yo sia ngolo mu fiaulwisa akaka, tulenda kala ye vuvu ye lukwikilu nze Davidi ona wavova vo: “Yekek’ezitu diaku kwa Yave, yandi okusikina: Keyambula nsongi kanikunwa ko yakwele mvu.” (Nku. 55:22) Kieleka, o Yave ofiaulwisanga yo kasakesa selo yandi yakwikizi.
18 Nzambi wavovesa asambidi andi kuna nz’ankulu vo: “Omono, mono i ndion’okufiaulwisa.” (Yes. 51:12) Diau adimosi kevanga o Yave kwa yeto, osambula e mvovo ye mavangu meto mambote ekolo tufiaulwisanga awana bedilanga. Twakala ye vuvu kia vwila moyo kun’ezulu yovo ova ntoto, konso muntu mu yeto olenda fiaulwiswa muna mvovo mia Paulu mina kasonekena akw’andi Akristu akuswa. Wasoneka vo: “O Mfumu eto Yesu Kristu, yandi kibeni, yo Nzambi w’Es’eto, ona watuzola yo kutuvanin’o lufiaulwisu lua mvu ya mvu, ye vuvu kiambote muna nsambu, kafiaulwisa ntima mieno, yo kunusikidisa muna salu yambote, yo mambu mawonso mambote.”—2 Tes. 2:16, 17.
Nga Osungamene?
• Yamu nkia tezo e salu kieto kia umbangi kinungunukinanga?
• Nkia mambu tulenda vanga mu fiaulwisa akaka?
• O Nkand’a Nzambi aweyi usongelanga vo Yave ofiaulwisanga nkangu andi?
[Yuvu ya Longoka]
[Foto ina muna lukaya lwa 28]
Nga ofiaulwisanga awana bedilanga?
[Foto ina muna lukaya lwa 30]
Aleke y’ambuta balenda kasakesa akaka
