‘Lungngai Zawng Zawng Thlamuan Rawh’
‘Lungngai Zawng Zawng Thlamuan Rawh’
‘LALPAN hriak mi thih . . . Lungngai zawng zawng thlamuan tûrin.’—IS. 61:1, 2.
1. Isua’n lungngaite tân eng nge a tih a, engvângin nge a tih?
ISUA KRISTA chuan: “Mitîrtu duhzâwng tih leh, a hna thawh zawh tûr hi ka chaw a ni,” a ti a. (Joh. 4:34) Pathian hna pêk a hlen chhuahnaah Isua chuan a Pa mize ropui takte a lantîr a. Chûng zînga pakhat chu Jehova’n mite a hmangaihna nasa tak hi a ni. (1 Joh. 4:7-10) Tirhkoh Paula’n Jehova chu “thlamuanna zawng zawng Pathian” tia a sawi khân chutiang hmangaihna a lan chhuahna chu a târ lang a ni. (2 Kor. 1:3) Isua chuan Isaia hrilh lâwkna thute anga thil tiin chutiang hmangaihna chu a lantîr a. (Isaia 61:1, 2 chhiar rawh.) Ani chuan Nazareth khuaa inkhâwmna inah chu hrilh lâwk thu chu a chhiar a, chu chu amahah a inhmehbel a ni. (Lk. 4:16-21) A rawngbâwl hun chhûng zawngin, Isua chuan lungngaite lainat takin a hnêm a, fuihna leh rilru thlamuanna te a pe ṭhîn.
2, 3. Engvângin nge Krista hnungzuitute chuan mite thlamuanna kawngah amah an entawn a ngaih?
2 Isua hnungzuitu zawng zawng tân lungngaite thlamuana amah an entawn a ngai a. (1 Kor. 11:1) Paula chuan: “Inthlamuan tawnin, intichak tawn rawh u,” tiin a sawi a ni. (1 Thes. 5:11, C.L. Re-edited) Mihringte hian “hun khirh takte” kan tawn mêk avângin mite chuan thlamuanna an mamawh lehzual a. (2 Tim. 3:1) Khawvêl puma mi rilru ṭhate chuan tuemaw ṭawngkam leh thiltihte avânga lungchhiatna te, rilru natna te, leh lungngaihnate an tâwk tam tawlh tawlh a ni.
3 Bible-in a sawi lâwk angin, hêng ni hnuhnûng suaksual takah hian mi tam tak chu “mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktute an ni.” ‘Mi sual leh tihdertute chu mi bum leh buma awma an sual zual deuh deuh’ avângin chûng rilru put hmangte chu tûn hma zawng aiin a nasa tawh a ni.—2 Tim. 3:2-4, 13.
4. Tûn laia kan khawvêl dinhmun hi eng ang nge?
4 Pathian Thu chuan: “Khawvêl pumhlûm hi mi sual thu thuin a awm,” tih chiang taka min hrilh avângin hêng thil zawng zawngte hi mak kan ti tûr a ni lo. (1 Joh. 5:19) “Khawvêl pumhlûm” tihah chuan politics te, sakhuana te, sumdâwnna te, leh chanchin thehdarhna hmanruate pawh a tel a ni. Inâwm takin Diabol-Setana chu “khawvel lal” tih leh “he khawvêl pathian” tia koh a ni a. (Joh. 14:30; 2 Kor. 4:4) Jehova’n a tihboralna hun a thleng ṭêp tawh tih a hriat avângin Setana chu a thinur hle a, chuvângin khawvêl pum pui dinhmun chuan chhiat lam a pan zêl a ni. (Thup. 12:12) Pathianin Setana leh a inawpna suaksual tak a dawh hun tâwpna leh Jehova lalchungnunna chungchânga Setana thu buai tihchhuah chinfel hun a hnai tawh tih hriat chu a va thlamuanthlâk êm!—Gen., bung 3; Job., bung 2.
Khawvêl Pumah Chanchin Ṭha Hrilh A Ni
5. Engtin nge thu hrilhna chungchânga hrilh lâwkna chu hêng ni hnuhnûngahte hian a thlen famkim?
5 He mihring chanchina hun harsa tak chhûngah hian Isua hrilh lâwk thute chu a thleng famkim a. Heti hian a sawi a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin. (Mt. 24:14) Khawvêl puma Pathian Ram chanchin hrilhna hi a pung chho mêk zêl a. Tûn lai hian, khawvêl puma Jehova Thuhretute kohhran 1,07,000 aia tama mi 75,00,000 chuangte chuan khawvêl pumah Pathian Ram chanchin an hril a, chu chu Isua pawhin a thu hrilh leh zirtîrna thupui berah a lo hmang a ni. (Mt. 4:17) Tûn laia kan thu hrilhna chuan lungngaite hnênah thlamuanna nasa tak a pe a. Kum kalta kum hnih chhûng khân mi 5,70,601 chu baptisma changin Jehova Thuhretu an lo ni ta!
6. Kan thu hrilhna darh zauzia chungchâng hi eng angin nge i ngaih?
6 He thu hrilhna a darh zau nasatzia chu Jehova Thuhretute’n ṭawng chi hrang 500 chuanga Bible ṭanchhan thu leh hlate an lehlin a, an sem chhuah aṭang hian a hriat theih a. Hetiang rêng hi mihring chanchinah a la thleng ngai lo! Jehova inawpna pâwl lei lam pêng lo awm ṭan dân te, a hna thawh te, leh a ṭhan dân te chu thil mak chungchuang a ni. Pathian thlarau thianghlim chak tak ṭanpuina leh kaihhruaina tel lo chuan Setana thununna hnuaia awm he khawvêlah hian chutiang thil chu a thleng theih hauh lo vang. Chanchin ṭha chu khawvêl puma hrilh a nih avângin, Pathian Thu aṭanga thlamuanna chu kan unaute chauh ni lo, Lalram thuchah pawmtu mi lungngaite pawhin an hmu mêk a ni.
Unaute Thlamuanin
7. (a) Engvângin nge Jehova chu hrehawm tawrhna zawng zawng tibo nghâl tûra kan beisei theih loh? (b) Engtin nge tihduhdahna leh hrehawmnate chu tawrh chhuah theih a ni tih kan hriat theih?
7 Suahsualna leh hrehawm tawrhnaa khat he khawvêlah hian, hrehawmna min thlen thei dinhmun ṭhenkhat kan tawng ngei dâwn a. Pathianin he khawvêl kalhmangte a tihtâwp hma chuan kan hlim lohna leh manganna awmtîrtu thilte a lâk bo chu kan beisei thei lo. Chu mi hun a lo thlen hma chuan, sawi lâwk tawh tihduhdahna kan tawrhte chuan lei leh vâna a lalchungnunna thlâwptu kan nih anga Jehova laka kan rinawmna chu a fiah a ni. (2 Tim. 3:12) Mahse, kan Pa vâna mi ṭanpuina leh thlamuanna nên chuan tihduhdahna leh hrehawmnate chhel taka tuar chhuaktu hmân lai Thessalonika khuaa hriak thih Kristiante ang kan ni ve thei a ni.—2 Thessalonika 1:3-5 chhiar rawh.
8. Jehova’n a chhiahhlawhte a thlamuan ṭhîn tih finfiahna Bible châng eng nge awm?
8 Pathian Jehova chuan a chhiahhlawhte hnênah an mamawh thlamuanna a pe ṭhîn tih hriat chu rinhlelh rual a ni lo. Lalnu sual Jezebeli’n zâwlnei Elija thah a tum khân, zâwlnei chu huaisenna hlohvin, a tlânchhia a, thih a duh thu a sawi hial a ni. Mahse, Jehova chuan Elija chu hauh a hnêkin, a thlamuan a, zâwlnei a nih anga a rawngbâwlna chu hlen chhuak tûrin huaisenna a pe zâwk a ni. (1 Lal. 19:1-21) Jehova chuan a mite a thlamuan ṭhinzia chu kum zabi khatnaa Kristian kohhran thil tawn aṭangin a hmuh theih a. Entîr nân, “kohhranhote chu Judai ram vêlah te, Galili ram vêlah te, Samari ram vêlah te chuan an nghet deuh deuh va, muang takin an awm ta a,” tih kan chhiar a ni. Chu bâkah, “Lalpa ṭih dêkin, thlarau thianghlim thlamuanin an awm a, an lo pung ta telh telh a,” tih kan chhiar bawk. (Tirh. 9:31) Keini pawh ‘thlarau thianghlim thlamuana kan awm’ avângin kan va lâwm tak êm!
9. Engvângin nge Isua chungchâng zirna chuan min thlamuan theih hle?
9 Kristian kan nih angin, Isua Krista chungchâng zir leh a hniak hnung zuina aṭangin thlamuanna kan hmu a. Isua chuan heti hian a sawi: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tiin. (Mt. 11:28-30) Isua’n anmahni tichak thei zâwnga mi dangte a cheibâwl dân chungchâng hriat leh a entawn tûr siam ṭha takte zuina hrim hrim pawh chuan kan hrehawmna engpawh a chhâwk zângkhai thei hle a ni.
10, 11. Kohhranah tuin nge thlamuanna pe thei?
10 Kan unaute pawhin min thlamuan thei bawk a. Entîr nân, kohhrana upate’n dinhmun hrehawm tak tuarte an ṭanpui dân hi ngaihtuah teh. Zirtîr Jakoba chuan heti hian a ziak a ni: “In zîngah damlo an awm em? Kohhran upa kohtîr sela, anin Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang,” tiin. (Jak. 5:14, 15) Kohhrana mi dangte pawhin thlamuanna chu an pe thei bawk.
11 Hmeichhiate chuan an buaina tawh chi hrang hrangte chu an hmeichhiatpuite hnêna hrilh nuam an ti zâwk tlângpui ṭhîn a. A bîk takin, unaunu thiltawn ngah zâwkte chuan unaunu naupang zâwkte chu fuihna thu ṭha tak tak an pe thei a ni. Chûng unaunu puitling takte chuan chutiang chi buainate chu an lo tâwk ve tawh pawh a ni thei a. Ṭha taka ngaihthlâksak leh ngaihsakna hmangin unaunu naupang zâwkte chu nasa takin an ṭanpui thei a ni. (Tita 2:3-5 chhiar rawh.) Upate leh mi dangte chuan kan zînga ‘mi beidawngte chu an thlamuan’ thei a, an thlamuan tûr a ni bawk. (1 Thes. 5:14, 15, C.L. Re-edited) Tin, ‘hrehawm eng anga awmte pawh chu kan thlamuan ve theihna tûrin Pathian chuan kan hrehawmna zawng zawngah min thlamuan ṭhîn,’ tih hriat reng chu a ṭha bawk.—2 Kor. 1:4.
12. Engvângin nge Kristian inkhâwmnaa tel chu thil pawimawh tak a nih?
12 Thlamuanna hmuh theihna kawng pawimawh tak dang leh chu Kristian inkhâwmnaa tel hi a ni a, chuta Bible thu sawihote chuan min tichak ṭhîn a ni. Juda leh Sila chuan “thu tam takin unaute chu an thlamuan a, an tinghet,” tih kan chhiar a. (Tirh. 15:32) Kan inkhâwm hma leh bân hnu hian kohhran unaute nêna inkawmna mi tichak thei tak neih a ni ṭhîn. Chuvângin, dinhmun hrehawm tak avânga kan lungngai a nih pawhin, i inkulh hrang ngai lo vang u, chutianga tihna chuan thil awm dân a siam ṭha dâwn si lo. (Thuf. 18:1) Chutianga awm ahnêkin, thlarauva thâwk khum Paula fuihna thu: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawh nasa lehzual sauh rawh u,” tih hi kan zâwm zâwk tûr a ni.—Heb. 10:24, 25.
Pathian Thu Aṭangin Thlamuanna Nei Rawh
13, 14. Pathian Lehkha Thuin min thlamuan theih dân târ lang rawh.
13 Kristian baptisma chang tawh emaw, Pathian leh a thil tumte chungchâng zir ṭan chauh emaw kan nih pawhin, Pathian Thu ziak aṭangin thlamuanna nasa tak kan nei thei a. Paula chuan heti hian a ziak a ni: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a,” tiin. (Rom 15:4) ‘Pathian Lehkha Thu Thianghlim chuan min thlamuan thei a, ‘hna ṭha tinrêng thawk tûra kim taka inthuamin min tifamkim thei a ni.’ (2 Tim. 3:16, 17) Pathian thil tumte chungchâng thu dik hriatna leh hma lam hun beiseina dik tak neihna chuan min thlamuan thei tak zet a ni. Chuvângin, min thlamuan thei leh kawng tam taka hlâwkna min pe thei Pathian Thu leh Bible ṭanchhan thu leh hla chhuahte hi theihtâwpin i hmang ṭangkai ang u.
14 Isua chuan mi dangte zirtîr leh thlamuan nâna Pathian Lehkha Thu hman kawngah entawn tûr ṭha tak a siam a ni. Entîr nân, a thawh leh hnua a inlârna pakhatah Isua chuan a zirtîr pahnihte chu ‘Pathian Lehkha Thute a hrilhfiah’ a. Chutianga anmahni a biak lai chuan an thinlung chu a harh huai mai a ni. (Lk. 24:32) Isua entawn tûr siam ṭha tak chu zuiin tirhkoh Paula pawhin mite chu ‘Pathian Lehkha Thu aṭangin khûn takin a chhûtpui,’ ṭhîn. (Tirh. 17:2, 10, 11) Beroia khuaa a thu ngaithlatute chuan “rilru lâwm takin thu chu an pawm a, an thusawi chu a dik leh dik loh hriat nân ni tin Pathian Lehkhaah an zawng ṭhîn a.” (Tirh. 17:2, 10, 11) Nî tina Bible chhiar a, chuta ṭanga hlâwkna neih leh hêng hun harsa taka thlamuanna leh beiseina min pe tûra duan Kristian thu leh hla chhuahte chhiar a, hlâwkpui chu a va inâwm tak êm!
Mi Dangte Thlamuan Theih Dân Kawng Dangte
15, 16. Kristian unaute ṭanpui leh thlamuan nâna kan tih theih thil ṭhenkhat chu engte nge ni?
15 Kan Kristian unaute chu kawng hrang hrangin kan ṭanpuiin kan thlamuan thei a. Entîr nân, kan unau tar tawhte emaw, dam lote emaw chu kan bazaarsak thei a. Mi dangte chu in chhûng chêt vêlah ṭanpuiin anmahni kan ngaihsakzia kan lantîr thei bawk. (Phil. 2:4) Tin, kan unaute chu an mize ṭha hmangaihna te, remhriatna te, huaisenna te, leh rinna te avângin kan fak thei bawk.
16 Tarte thlamuan kan tum hian, anmahni kan tlawhin, an thiltawn leh Jehova rawngbâwlnaa malsâwmna an dawn min hrilhte chu ngun takin kan ngaithla thei a. Chu chuan min tichakin min thlamuan thei a ni. Kan mi tlawhte chu Bible emaw, Bible ṭanchhan thu leh hla chhuahte emaw kan chhiarpui thei bawk. Kâr tina Vênnainsâng zir tûr emaw, Kohhrana Bible Zirnaa zir tûr emaw chu kan sawihopui thei a. Society chhuah DVD pawh kan enpui thei bawk. Tin, kan thu leh hla chhuahte kan chhiarpuiin, thiltawn mi tichak thei takte chu kan hrilh chhâwng thei bawk.
17, 18. Engvângin nge Jehova chhiahhlawh rinawmte chuan a ṭanpuina leh thlamuanna an beisei tlat theih?
17 Kan unau tuemawin thlamuan a mamawh tih kan hriat chuan, mi mal ṭawngṭainaah kan telh thei a. (Rom 15:30, 31; Kol. 4:12) Harsatna kan tawng emaw, mi dangte ṭanpui tumin theihtâwp kan chhuah emaw pawh ni se, he fakna hla: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” tih satu rinna ang hi kan nei ve thei a ni. (Sâm 55:22) Ni e, Jehova chuan a chhiahhlawh rinawmte thlamuan leh ṭanpui a inpeih reng a ni.
18 Pathian chuan hmân laia amah betute chu: “Nangmahni thlamuantu che u ka ni,” tiin a hrilh a. (Is. 51:12) Kan tân pawh chutiang bawk chuan a ti ang a, lungngaite kan thlamuan hian kan thil ṭha tih leh ṭawngkamte chu mal a sâwm ang. Kan beisei chu lei lam emaw vân lam emaw pawh ni se, Paula’n thlarauva hriak thih a unaute hnêna a thu sawi: “Kan Lalpa Isua Krista ngei leh Pathian kan Pa, min hmangaihtu leh khawngaihna avânga chatuana thlamuanna leh beiseina ṭha min petu chuan, in thinlungte chu tithlamuangin, thil tihṭhat leh thusawi ṭhat tinrêngah tinghet rawh se,” tih hian min thlamuan ṭheuh thei a ni.—2 Thes. 2:16, 17. (w11-E 10/15)
Kan Hre Chhuak Em?
• Lungngaite thlamuan tûra kan rawngbâwlna chu eng ang taka darhzau nge a nih?
• Mi dangte thlamuan tûra kan tih theih ṭhenkhat chu engte nge ni?
• Jehov’n a mite a thlamuan ṭhinzia târ langtu Pathian Lehkha Thute chu eng nge ni?
[Zirlai Atâna Zawhnate]
[Phêk 29-naa milem]
Lungngaite thlamuannaah i tel ve em?
[Phêk 31-naa milem]
La naupang leh tar tawhte chu mi dangte tichaktu an ni thei
