Kansenamwahwihala Koaros me Kin Pahtou kan

“[Koht] ketin poaroneiehdo pwe I en koaloalamwahwihala koaros me kin pahtou kan.”​—AIS. 61:2.

1. Dahme Sises ketin wiahiong me pahtou kan? Dahme kahrehda?

SISES KRAIS mahsanih: “Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.” (Sohn 4:34) Siohwa ketikihong Sises doadoahk ehu en wia. Ni Sises eh ketin wia doadoahk wet, e ketin kasalehda soangen limpoakohte me Semeo kin ketin kasalehiong aramas akan. (1 Sohn 4:7-10) Wahnpoaron Pohl koasoia duwen ehu ahl me Siohwa kin ketin kasalehda limpoak ni eh kahdaneki Ih “Koht me pwarer en kansenamwahu koaros.” (2 Kor. 1:3) Nin duwen Aiseia eh kohpada, Sises ketin kasalehda soangen limpoakohte nan sapwellime doadoahk en kalohk nin sampah. (Wadek Aiseia 61:2.) Sises ketin kadehdehda me kokohp en Aiseia kin dokedoke. (Luk 4:16-21) Nan sapwellime doadoahk en kalohk, Sises ketin kansenamwahwihala me pahtou kan oh ketikihong irail kangoang oh popohl.

2, 3. Dahme kahrehda irail me kin idawehn Sises anahne kansenamwahwih meteikan?

² Koaros me kin idawehn Sises anahne kansenamwahwih  me pahtou kan. (1 Kor. 11:1) Pohl koasoia: “Kumwail kakehlakahda [“kansenamwahwih,” NW] emenemen kumwail, oh sawaspene.” (1 Des. 5:11) Aramas akan anahne sawas pwe ren nsenamwahu, pwehki atail momour nan “ahnsou apwal ekei.” (2 Tim. 3:1) E tohtohlahr nan sampah pwon me aramas mwahu kan kin anahne kousoan nanpwungen aramas akan me kin nda oh wia soahng kan me kin kahrehiong irail lokolok oh nsensuwed.

³ Nin duwen kokohp en Paipel eh padahkihong kitail, ni imwin koasoandi suwed wet, me tohto pahn kin “roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot. Re sohte pahn poadidi ong pelien lamalam; irail pahn sempoak, soh mahk, karaun likamw oh pehmara, lemei, oh re pahn kailongki me mwahu; re pahn pangala iangarail kan, re pahn loaumwohmw oh kalahwasa, oh re pahn inengieng pein arail peren laudsang kupwur en Koht.” Oh nin duwen Paipel eh pil kohpada, mwomwen ahn aramas suwed kan ar madamadau oh wiewia pahn “nantihweite sang ni me suwed ong ni me suwedsang.”​—2 Tim. 3:2-4, 13.

4. Dahme wiawihong irair en sampah nan atail ahnsou?

⁴ Kitail sohte kin pwuriamweikihla mepwukat pwehki Mahsen en Koht padahkihong kitail me “sampah unsek mi pahn manaman en Me Suwedo.” (1 Sohn 5:19) “Sampah unsek” kin pidada palien politik, pelian lamalam, oh palien pesines oh pil ahl teikan me Sehdan kin doadoahngki pwe eh madamadau en lella wasa koaros. Sehdan me Tepil iei uhdahn “kaunen sampah wet” oh “koht suwed en sampah wet.” (Sohn 14:30; 2 Kor. 4:4) Irair en sampah kin susuwedla pwehki ahnsou wet Sehdan inenen lingeringer. E ese me eh ahnsou mwotomwotalahr. (Kaud. 12:12) Kitail uhdahn nsenamwahukihla atail ese me Koht sohte pahn ketin mweidohng Sehdan oh eh koasoandi suwed wet en mihmihte, oh Siohwa pahn ketin kapwungala ire me pid sapwellime pwuhng en kaunda!​—Sen., irelaud 3; Sohp, irelaud 2.

Rongamwahwo Lohkselier nin Sampah Pwon

5. Ia duwen kokohp en kalohk eh pweida ni imwin rahn akan?

⁵ Sises ketin kohpada: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Mad. 24:14) Duwehte Sises ketin mahsanih, sapwellimen Siohwa aramas akan nan sampah pwon kin kalohki rongamwahu duwen Wehin Koht. Rahnwet, Sounkadehdehn Siohwa kan daulih meh 7,500,000 nan mwomwohdiso daulih 107,000 kin wiewia doadoahk wet. Sises ketin kalohki oh padahngki duwen Wehin Koht,  oh Sounkadehdehn Siohwa kan pil kin wia duwehte. (Mad. 4:17) Nan doadoahk wet, re kin kansenamwahwihala tohto me pahtoulahr akan. Nan sounpar riau me ahpwtehn neko, irail meh 570,601 papidaisla nin duwen Sounkadehdehn Siohwa kan.

6. Ia omw madamadau duwen pweidahn doadoahk en kalohk?

⁶ Ahnsou wet, Sounkadehdehn Siohwa kan kin kawehwe oh kihseli sawasepen Paipel kan daulih lokaia 500. Sohte ehu pwihn me kin wia soangen doadoahk wet. Mendahki re mi nan sampah ehu me Sehdan kaunda, sapwellimen Siohwa aramas akan kin pwerisek oh kalaudehla arail kin papah Koht. Met sohte kak pweida ma sohte sawas oh kaweid sang sapwellimen Koht manaman. Pwehki rongamwahu eh kin lohkseli nin sampah pwon, aramas akan me kin pwungki rohng en Wehio pil kak ahneki nsenamwahu duwehte sapwellimen Siohwa aramas akan.

Meteikan nan Mwomwohdiso Kak Kansenamwahwih Kitail

7. (a) Dahme kahrehda kitail sohte kak kasik ahnsou wet Siohwa en ketikihsang mehkoaros me kahrehda nsensuwed? (b) Ia duwen atail ese me kitail kak dadaur pahn kalokolok oh kahpwal kan?

⁷ Pwehki kitail momour nan sampah me diren suwed, kitail koaros pahn lelohng lokolok. Kitail en dehr kasik me Koht pahn ketikihsang mehkoaros me kahrehiong kitail nsensuwed mwohn eh pahn ketin kasohrehla koasoandi wet. Ni atail kin awiawih rahno, kalokolok pahn kasonge kitail ma kitail lelepek ong Siohwa oh utungada sapwellime kaunda. (2 Tim. 3:12) Ahpw pwehki Samatail nanleng eh ketin sewese oh kansenamwahwih kitail, kitail kak duwehte Kristian keidi kan nan Deselonika me kin kasalehda “pwoson oh kanengamah” erein ahnsoun kalokolok oh kahpwal kan.​—Wadek 2 Deselonika 1:3-5.

8. Ia duwen Paipel eh kasalehda me Siohwa kin ketin kansenamwahwih sapwellime ladu kan?

⁸ Siohwa uhdahn ketin kansenamwahwih sapwellime ladu kan. Karasepe, ni lih nanmwarki suwed Sesepel eh men kemehla soukohp Elaisa, e masakada oh tang. E pil nda me e men mehla. Siohwa sohte ketin lipwoare Elaisa, ahpw e ketin kansenamwahwih oh ketikihong eimah pwe en pousehlahte wia eh doadoahk nin duwen soukohp men. (1 Nan. 19:1-21) Pil ehu karasepe duwen Siohwa eh ketin kansenamwahwih sapwellime aramas akan iei sawas me e ketikihong mwomwohdiso ni mwehin wahnpoaron ko. Paipel mahsanih: “Mwomwohdiso ahpw meleileidi wasa koaros nan Sudia, Kalili, oh Sameria. E ahpw pil kekeirda oh towe kan ngederla sang ni sawas en [“sapwellimen Koht manaman,” NW]; oh re kin momour ni ar wauneki Kaun-o.” (Wiewia 9:31) Kitail uhdahn pil kalahnganki ale sawas en sapwellimen Koht manaman!

9. Dahme kahrehda atail sukuhlki duwen Sises kak kansenamwahwih kitail?

⁹ Nin duwen Kristian kan, kitail kin nsenamwahula sang ni atail kin sukuhlki duwen Sises Krais oh idawehn sapwellime mehn kahlemeng. Sises mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk; kumwail ahpw pahn diar kommoalpen [“amwail mour,” NW] kan. Pwe mehn wisik me I pahn kihong kumwail me mengei, oh audepe kan me marahra.” (Mad. 11:28-30) Ni atail kin sukuhlki duwen kadek oh limpoak me Sises kin ketin kasalehiong aramas akan oh uhd song alasang, kitail kak sohla pehm ekei pwunod kan me kitail ele ahneki.

10, 11. Ihs me kak kansenamwahwih kitail nan mwomwohdiso?

¹⁰ Meteikan nan mwomwohdiso pil kak kansenamwahwih kitail. Karasepe, medewehla ia duwen elder kan ar kak sewese irail me arail pwoson luwetala. Seims ntingihedi: “Mie rehmwail me soumwahu? En ekerodo me mah kan en mwomwohdiso pwe re en kapakapki.” Oh ia imwilahn arail sawas? “Kapakap  wet me pahn wiawi ni pwoson, pahn komourala me soumwahwo: Kaun-o pahn ketin kakehlahda, oh ketin lapwahsang dipe kan.” (Seims 5:14, 15) Ahpw kaidehn elder kante me kak kansenamwahwih kitail nan mwomwohdiso.

¹¹ Lih akan kalapw mengeiki koasoiaiong lih teikan arail kahpwal kan. Sister mah oh koahiek kan kak kihong sister pwulopwul kan kaweid mwahu. Kristian lih mah pwukat mwein lelohng soangen irair kohte nan arail mour. Sang ni arail kin rong oh nsenoh, re kak wia sawas laud ong sister pwulopwul kan. (Wadek Taitus 2:3-5.) Ni mehlel, elder kan oh meteikan kak oh anahne “kakehlaka irail kan me nan kapehd tikitik” nanpwungatail. (1 Des. 5:14, 15) Oh e pil mwahu en tamataman me Koht “kin ketin sewesei kitail nan atail apwal akan koaros, pwe kitail en pil kak sewese irail kan me kin mihla nan soangen apwal koaros.”​—2 Kor. 1:4.

12. Dahme kahrehda e kesempwal en iang towehda mihting kan?

¹² Iang towehda mihting en Kristian kan iei ahl kesempwal en kansenamwahwih kitail. Padahk kan sang Paipel me kitail kin rong nan mihting kan kin kangoange kitail. Kitail kin wadek me Sudas oh Sailas “koasoakoasoiong me pwoson akan ahnsou reirei, penepeneu oh kangkakehlaka irail.” (Wiewia 15:32) Mwohn oh mwurin atail mihting kan, tohn mwomwohdiso kan kin koasoipene oh kangoangpene. Eri, mehnda ma kitail kin lokolongki kahpwal kan, e mwahu en ahneki ahnsou rehn iengetail Kristian kan. Kelekelehpw pahn ihte kasuwedihla kahpwal kan. (Lep. Pad. 18:1) Ahpw kitail anahne wia dahme wahnpoaron Pohl koasoia: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kaun-o kerendohr.”​—Ipru 10:24, 25.

Paipel Kin Kansenamwahwih Kitail

13, 14. Ia duwen iren Paipel kan ar kak kansenamwahwih kitail?

¹³ Sohte lipilipil ma kitail Kristian me papidaislahr de kitail ahpwtehn tapiada sukuhlki duwen Koht oh kupwure kan, Paipel uhdahn kak kansenamwahwih kitail. Pohl ntingihedi: “Mehkoaros me ntingdier nan Pwuhk Sarawi e ntingdier pwe en padahkih kitail, pwe kitail en ahneki koapworopwor sang ni kanengamah oh kakehlepen loalatail me Pwuhk Sarawi kin ketikihong kitail.” (Rom 15:4) Paipel kak kansenamwahwih kitail oh kahrehiong kitail en “koahiekla ni soangen wiewia mwahu koaros.” (2 Tim. 3:16, 17) Kitail kak loalokongkihla padahk mehlel duwen kupwuren Koht oh koapworopwor mehlel ong ahnsou kohkohdo sang ni atail kin wadek oh onopki Paipel oh sawaspen Paipel kan. Ma kitail pahn wia met, kitail kak nsenamwahu oh paiekihda koapworopwor me kohsang nan Paipel.

 ¹⁴ Sises ketin wia mehn kahlemeng mwahu ong kitail sang ni eh ketin doadoahngki iren Paipel kan pwehn padahkih oh kansenamwahwih meteikan. Mwurin eh ketin iasada, Sises ketin pwarohng sapwellime tohnpadahk riemen oh ketin kawehwehiong ira iren Paipel kan ni unsek. Met uhdahn kansenamwahwih ira. (Luk 24:32) Wahnpoaron Pohl kin alasang Sises oh doadoahngki iren Paipel kan pwehn sewese aramas akan en medemedewe. Nan Peria, irail me rong ih “ngoangki mehlel rong mahseno, oh rahn koaros irail kin onopki Pwuhk Sarawi.” (Wiewia 17:2, 10, 11) Eri, e uhdahn kesempwal kitail en wadek Paipel rahn koaros oh pil wadek sawaspen Paipel kan pwehn sewese kitail! Met kin kihong kitail koapworopwor oh kansenamwahwih kitail nan ahnsou apwal pwukat.

Ahl Teikan me Kin Kansenamwahwih Meteikan

15, 16. Ia ekei soahng kan me kitail kak wia pwehn kangoange oh kansenamwahwih riatail kan?

¹⁵ Mie soahng tohto me kitail kak wia pwehn sewese oh kansenamwahwih riatail kan. Karasepe, mwein kitail kak sawas netdohng irail me mah de soumwahu kan. Kitail ele kak sewesehki meteikan soahng kan me re anahne wia ni imwarail kan. Met kasalehda me kitail nsenohkin irail. (Pil. 2:4) Kitail kak kapingahki riatail kan arail koahiek kan oh irair mwahu kan me duwehte limpoak, eimah oh pwoson.

¹⁶ Kitail kak kansenamwahwih me mah kan sang ni atail kin mwemweitla rehrail oh rong arail kin koasoiaiong kitail dahme kin wiawihong irail oh kapai kan ni arail kin papah Siohwa. Mwein met pahn kak kangoange oh kansenamwahwih kitail. Mwein kitail kak wadek Paipel oh neitail sawasepen Paipel kan rehrail. Mwein kitail kak onopkipene ehu iren onop en Kahn Iroir de ehu ire sang pwuhken Onop en Paipel en Mwomwohdiso me pahn wiawi nan wihko. Ele kitail kak kilang ehu neitail DVD kan. Kitail pil kak wadek oh koasoia duwen dahme wiawihong ekei riatail Kristian kan sang nan neitail sawasepen Paipel kan.

17, 18. Dahme kahrehda kitail kak kamehlele me Siohwa pahn ketin sewese oh kansenamwahwih sapwellime ladu lelepek kan?

¹⁷ Ma kitail ese me emen riatail Kristian anahne sawas, kitail kin kapakapki. (Rom 15:30; Kol. 4:12) Ni atail kin lokolok pwehki irair apwal kan oh ni atail pil song en kansenamwahwih meteikan, kitail kak ahneki soangen pwoson me Depit ahneki: “Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Mel. 55:22) Ahnsou koaros Siohwa pahn ketin kansenamwahwih oh sewese kitail. E sohte pahn ketin kansensuwedihala sapwellime ladu lelepek kan.

¹⁸ Koht ketin mahsanihong sapwellime tohnkaudok kan mahs: “Iei ngehi me kakehleikumwailda.” (Ais. 51:12) Siohwa pil pahn ketin wia met ong kitail oh pahn kapaiada atail nannanti en kansenamwahwih meteikan. Sohte lipilipil mehnia koapworopwor me kitail ahneki, ahn Pohl kaweid ong Kristian keidi ko ahnsowo kak kansenamwahwihala emenemen kitail: “Pein atail Kaun Sises Krais, oh Koht Samatail, me kin ketin loalloale kitail, oh pwehki sapwellime kalahngan e ketikidohng kitail roson soutuk oh koapworopwor kehlail, en ketin audehkihda mohngiongimwail sapwellime roson, oh en ketin kakehlaikumwailda pwe kumwail en kak wia oh koasoia mehkoaros me mwahu.”​—2 Des. 2:16, 17.

Ke Tamataman?

• Ia uwen laud en atail doadoahk en kalohk?

• Ia ekei soahng kan me kitail kak wia pwehn kansenamwahwih meteikan?

• Ia duwen Paipel eh kasalehda me Siohwa kin ketin kansenamwahwih sapwellime aramas akan?

[Peidek en Onop]

[Kilel nan pali 29]

Ke kin kansenamwahwih me pahtou kan?

[Kilel nan pali 31]

Me pwulopwul oh mah kan kak kangoange meteikan