‘Ia Faamāfanafana i ē Uma o Loo Faavauvau’
ʻIa Faamāfanafana i ē Uma o Loo Faavauvau’
ʻUa faauuina aʻu e Ieova e faamāfanafana i ē uma o loo faavauvau.’—ISA. 61:1, 2.
1. O le ā na faia e Iesu mo ē ua mafatia, ma aiseā?
NA FETALAI Iesu: “O laʻu meaʻai, o le faia lea o le finagalo o lē na auina mai aʻu, ma faaiʻu lana galuega.” (Ioa. 4:34) A o faataunuuina lona tofiga mai i le Atua, sa faaalia e Iesu uiga mataʻina o lona Tamā. E aofia ai i nei uiga le alofa tele o Ieova i tagata. (1 Ioa. 4:7-10) Na taʻua e le aposetolo o Paulo se tasi o faailoaga o lenā alofa, ina ua ia faamatalaina Ieova o le “Atua o faamāfanafanaga uma.” (2 Kori. 1:3) Sa faaalia e Iesu lenā alofa ina ua ia faia le mea na valoia i le valoaga a Isaia. (Faitau le Isaia 61:1, 2.) Sa faitau e Iesu lenā valoaga i le sunako i Nasareta ma faatatau na upu iā te ia lava. (Luka 4:16-21) I le taimi atoa o le faiva a Iesu, sa ia faamāfanafana ma le alofa ē ua faavauvau pe mafatia, ma na maua ai e i latou faalaeiauga ma le filemu o le mafaufau.
2, 3. Aiseā e ao ai i soo o Keriso ona faaaʻoaʻo iā te ia i le faamāfanafanaina o tagata?
2 E ao i soo uma o Iesu ona faaaʻoaʻo iā te ia e ala i le faamāfanafana i ē o loo mafatia. (1 Kori. 11:1) Na faapea mai Paulo: ʻIa outou fefaamāfanafanaaʻi pea ma atiaʻe e le tasi le isi.’ (1 Tesa. 5:11) Ua sili ona manaʻomia ona tatou faamāfanafana i isi, ona ua fesagaʻi le fanau a tagata i aso nei ma “aso e sili ona faigatā.” (2 Timo. 3:1) Ua toetoe o aso uma ua fesagaʻi ai tagata lotofaamaoni i so o se vaipanoa o le lalolagi, ma nisi e faia ni upu po o ni gaoioiga e faapogaia ai le mafatia, lototigā ma le faanoanoa.
3 E pei ona valoia i le Tusi Paia, i nei aso e gata ai o lenei faiga amioleaga o mea, e toʻatele tagata e avea ma “ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.” Ua sili atu ona leaga na uiga i aso nei nai lo o se isi lava taimi, auā ʻo tagata amioleaga ma ē taufaasesē, ua faateteleina pea lo latou leaga.’—2 Timo. 3:2-4, 13.
4. O le ā ua tupu i le tulaga o mea i le lalolagi i o tatou aso?
4 E lē tatau ona faateʻia i tatou i nei mea uma, talu ai ua faamanino mai i le Afioga a le Atua e faapea, “o le lalolagi atoa o loo nofo toʻilalo i le pule a lē o loo leaga.” (1 Ioa. 5:19) “O le lalolagi atoa,” e aofia ai faiga faapolotiki, lotu, faiga faapisinisi, ma faasalalauga taufaasesē. E lē fesiligia ua talafeagai ona taʻua Satani o “le pule o le lalolagi,” ma o “le atua o lenei faiga o mea a le lalolagi.” (Ioa. 14:30; 2 Kori. 4:4) Ua faasolo ina matuā leaga le tulaga o mea i le lalolagi atoa, talu ai ua lotoa tele Satani, auā ua ia iloa ua puupuu lona taimi o totoe, a o leʻi taofia o ia e Ieova. (Faaa. 12:12) Maʻeu le faamāfanafanaina i le iloaina, o le a lē faatagaina e le Atua ia Satani ma lana lalolagi amioleaga e faaauau pea ona iai, ma o le a foʻia le finauga na lāgā e Satani faasaga i le pule silisili ese a Ieova!—Kene., mata. 3; Iopu, mata. 2.
O Loo Talaʻia le Tala Lelei i le Lalolagi Aoao
5. Ua faapefea ona faataunuuina i nei aso e gata ai, le valoaga e faatatau i le galuega talaʻi?
5 I lenei vaitaimi faigatā o le talafaasolopito o tagata, ua faataunuuina ai le mea na valoia e Iesu. Na fetalai o ia: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mata. 24:14) O lenei galuega talaʻi i le lalolagi aoao e faatatau i le Malo o le Atua, ua faatuputeleina le aofaʻi o tagata talaʻi ma vaipanoa ua talaʻia. I aso nei, e silia i le 7,500,000 Molimau a Ieova i le silia i le 107,000 faapotopotoga i le lalolagi aoao, o loo latou talaʻia le Malo o le Atua. Sa faaautū le galuega talaʻi ma le aʻoaʻo atu a Iesu i le Malo o le Atua, ma ua faia foʻi faapea e Molimau a Ieova. (Mata. 4:17) Ona o la tatou galuega talaʻi o loo faia i aso nei, ua iʻu ai ina matuā faamāfanafanaina ē o loo mafatia. I le na o le lua tausaga talu ai nei, e 570,601 le aofaʻi o i latou na papatisoina o ni Molimau a Ieova!
6. O le ā sou manatu e faatatau i le telē ua oo i ai la tatou galuega talaʻi?
6 E mafai ona matuā talisapaia le telē ua oo i ai lenei galuega talaʻi, e ala i le mātauina e faapea, e silia i le 500 gagana ua faaliliuina ma tufa atu i ai e Molimau a Ieova lomiga faale-Tusi Paia. E leʻi vaaia lava se mea faapea i le talafaasolopito o tagata! E matuā mataʻina le vaega faalelalolagi o le faalapotopotoga a Ieova, ona o le tumau pea ona iai, o galuega ua faataunuuina, faapea lona faatuputeleina. Pe a aunoa ma le taʻitaʻiga ma le fesoasoani a le agaga paia o le Atua, e lē mafai ona tupu se mea faapena i lenei lalolagi o loo pulea e Satani. Auā o loo talaʻia le tala lelei i le lalolagi atoa, ma maua faamāfanafanaga mai le Tusi Paia e lē gata i o tatou uso ma tuafāfine talitonu, ae faapea foʻi ē mafatia ua latou taliaina le feʻau o le Malo.
Faamāfanafanaina Uso Tapuaʻi
7. (a) Aiseā e tatou te lē faatalitalia ai Ieova e na te aveesea i le taimi nei tulaga mafatia uma? (e) E faapefea ona tatou iloa e mafai ona tatou tumau i sauāga ma puapuaga?
7 I lenei lalolagi ua tumu i mea leaga ma mafatiaga, e mautinoa e tatou te feagai ma nisi o tulaga e māfua ai ona mafatia. E tatou te lē faatalitalia le Atua e na te aveesea mea uma e faapogaia ai le lē fiafia po o le faanoanoa, seʻia oo ina ia faaumatiaina lenei faiga o mea. I le taimi e tasi, a o tatou fesagaʻi ma sauāga ua uma ona valoia, o loo tofotofoina lo tatou faamaoni iā Ieova o ni ē e lagolagoina lana pule silisili ese i le aoao o mea. (2 Timo. 3:12) Peitaʻi, e ala i le fesoasoani ma le faamāfanafana mai a lo tatou Tama i le lagi, e mafai ai ona tatou pei o Kerisiano faauuina i Tesalonia anamua, o ē na faaalia le “tumau ma le faatuatua” i taimi o sauāga ma puapuaga.—Faitau le 2 Tesalonia 1:3-5.
8. O ā faamaoniga i le Tusi Paia e iloa ai e faamāfanafana e Ieova ana auauna?
8 E mautinoa e saunia mai e Ieova faamāfanafanaga e manaʻomia e ana auauna. O se faaaʻoaʻoga, ina ua taumafai le masiofo amioleaga o Iesepela e fasioti le perofeta o Elia, sa lotovaivai lenā perofeta ma sola ese, ma iʻu lava ina faapea mai ua fia oti. Ae nai lo o le otegia o Elia, na faamāfanafana o ia e Ieova ma tuu atu i ai le lototele, ina ia faaauau ai lana galuega o se perofeta. (1 Tu. 19:1-21) O le isi faamaoniga e iloa ai e faamāfanafana e Ieova ona tagata, o le mea na tupu i le faapotopotoga Kerisiano i le uluaʻi senituri. O se faaaʻoaʻoga, ua taʻua e faapea na “nonofo filemu le faapotopotoga i Iutaia atoa ma Kalilaia ma Samaria, ua faamalosia foʻi i latou.” E lē gata i lea, “ua faatoʻateleina pea i latou ona o le faamāfanafana mai o le agaga paia, a o savavali i le mataʻu iā Ieova.” (Galu. 9:31) Maʻeu lo tatou lotofaafetai ona ua tatou maua foʻi “le faamāfanafana mai o le agaga paia”!
9. Aiseā e mafai ai i le aʻoaʻoina e faatatau iā Iesu ona faamāfanafanaina ai i tatou?
9 I le avea ai ma Kerisiano, ua faamāfanafanaina i tatou e ala i le aʻoaʻoina e faatatau iā Iesu Keriso ma mulimuli i ona tulagāaao. Na fetalai Iesu: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou. Auā e avegofie laʻu amo, ma e māmā foʻi laʻu avega.” (Mata. 11:28-30) O le aʻoaʻoina e faatatau i le auala alofa na feagai ai Iesu ma tagata, ma mulimuli i lana faaaʻoaʻoga lelei, e mafai ona avea ma fesoasoani sili ina ia faagalogalo ai mafatiaga e ono oo iā i tatou.
10, 11. O ai i latou i le faapotopotoga e ono mafai ona tuuina atu faamāfanafanaga?
10 E mafai foʻi ona faamāfanafanaina i tatou e ala i uso ma tuafāfine Kerisiano. O se faaaʻoaʻoga, seʻi manatu i le auala e fesoasoani ai toeaina o le faapotopotoga i ē o loo fesagaʻi ma tulaga faigatā. Na tusi le soo o Iakopo: “Pe e iai ea se tasi o outou ua maʻi [faaleagaga]? Inā aami atu ia o toeaina o le faapotopotoga ina ia latou tatalo mo ia.” Ma o le ā le iʻuga? “O le tatalo e faia i le faatuatua e malosi ai le tagata maʻi, ma o le a faatūina o ia e Ieova. E faamagaloina foʻi o ia pe afai ua agasala.” (Iako. 5:14, 15) E mafai foʻi e isi o le faapotopotoga ona saunia faamāfanafanaga.
11 E masani lava e sili atu ona faigofie i fafine ona talanoa atu i isi fafine e faatatau i faafitauli eseese. Aemaise lava tuafāfine matutua ma ua lava le tomai, e mafai ona latou avatu ni fautuaga aogā i tuafāfine lāiti. Atonu o nei tuafāfine Kerisiano matutua faaleagaga, sa oo foʻi iai tulaga faapena i o latou olaga. E mafai ona avea o latou uiga tigā alofa ma agavaivai o se fesoasoani sili. (Faitau le Tito 2:3-5.) Ioe, e mafai ma e tatau i toeaina ma isi ona “faamāfanafana i ē mafatia” o loo tatou faatasi. (1 Tesa. 5:14, 15) E lelei foʻi ona manatua, o le Atua e na te “faamāfanafanaina i tatou i o tatou puapuaga uma, ina ia mafai foʻi ona tatou faamāfanafana atu i ē ua oo i ai so o se puapuaga.”—2 Kori. 1:4.
12. Aiseā e tāua ai ona tatou auai i sauniga faa-Kerisiano?
12 O se isi auala tāua e maua ai faamāfanafanaga, o le auai lea i sauniga faa-Kerisiano, ia e faia ai talanoaga faale-Tusi Paia e faalaeiauina ai i tatou. E tatou te faitau e faatatau iā Iuta ma Sila e faapea, na la “faalaeiau i le ʻauuso i le tele o lauga ma faamalosia i latou.” (Galu. 15:32) A o leʻi amata ma pe a māeʻa foʻi a tatou sauniga, e iai avanoa e mafai ai ona faia ni talanoaga e atiaʻe ai faatasi ma isi sui o le faapotopotoga. O lea la, seʻi aua neʻi faaesea i tatou lava, e tusa lava pe tatou te mafatia ona o ni tulaga faigatā, auā o le faia faapea o le a atili ai ona tutupu faafitauli. (Faata. 18:1) Nai lo o lea, e lelei ona tatou mulimuli i le fautuaga a le aposetolo o Paulo: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.”—Epe. 10:24, 25.
Maua Faamāfanafanaga Mai le Afioga a le Atua
13, 14. Faamatala mai auala e mafai ona faamāfanafanaina ai i tatou i le Tusi Paia.
13 E tusa po o i tatou o ni Kerisiano ua papatisoina, po o ē faatoʻā amata ona aʻoaʻoina e faatatau i le Atua ma lona finagalo, ae e mafai ona tatou maua faamāfanafanaga sili mai le Afioga tusia a le Atua. Na tusi mai Paulo: “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) E mafai ona faamāfanafanaina i tatou i le Tusi Paia, ma avea i tatou o ni ē e ʻmatuā agavaa ma e lava saunia mo galuega lelei uma.’ (2 Timo. 3:16, 17) O le iloaina o le upu moni e faatatau i le finagalo o le Atua, ma le mauaina o se faamoemoe moni mo le lumanaʻi, e mautinoa o le a aumaia ai iā i tatou le faamāfanafanaga sili. O lea la, seʻi o tatou faaaogā lelei le Afioga a le Atua ma lomiga faale-Tusi Paia, ia e mafai ona faamāfanafanaina ai ma aogā iā i tatou i le tele o auala.
14 Sa faataatia e Iesu se faaaʻoaʻoga lelei e ala i le faaaogā o Tusitusiga Paia e aʻoaʻo ma faamāfanafana ai isi. O se faaaʻoaʻoga, ina ua faaali atu Iesu i ona soo i le mavae o lona toetū, sa ia “faamatala [atu] Tusitusiga Paia” i ona soo e toʻalua. A o talanoa atu iā i laʻua, sa matuā pāʻia o la loto. (Luka 24:32) Sa mulimuli le aposetolo o Paulo i le faaaʻoaʻoga e sili ona lelei a Iesu, e ala i le ʻfetufaaʻi ma tagata i Tusitusiga Paia.’ O ē na faalogologo iā Paulo i Perea, sa “latou taliaina le upu ma le fiafia tele, ua latou matuā iloiloina Tusitusiga Paia i aso taʻitasi.” (Galu. 17:2, 10, 11) Maʻeu la le talafeagai mo i tatou ona faitau le Tusi Paia i aso taʻitasi, ina ia tatou maua mai ai aogā! E mafai foʻi ona tatou maua aogā mai i lomiga faa-Kerisiano, ua fuafuaina ina ia aumaia ai iā i tatou faamāfanafanaga ma le faamoemoe i nei taimi faigatā.
Isi Auala e Faamāfanafana ai i Isi
15, 16. O ā ni mea e mafai ona tatou faia ina ia fesoasoani ma faamāfanafana ai i uso Kerisiano?
15 E tele auala aogā e mafai ona tatou fesoasoani ma faamāfanafana ai i uso Kerisiano. O se faaaʻoaʻoga, atonu e mafai ona tatou faia ni faatauga mo uso ma tuafāfine talitonu ua matutua pe mamaʻi. E tatou te ono fesoasoani atu i isi i a latou feʻau i le fale, e faaalia ai e tatou te naunau moni iā i latou. (Fili. 2:4) Atonu e mafai ona tatou faamālō atu i uso ma tuafāfine tapuaʻi i o latou uiga lelei e pei o le alofa, tomai, lototele ma le faatuatua.
16 O se isi auala e mafai ona tatou faamāfanafana ai i ē ua matutua, o le asiasi atu lea i ai ma faalogologo lelei a o faamatala mai mea na tutupu iā i latou i taimi ua mavae, ma faamanuiaga ua latou maua i le auaunaga iā Ieova. O lenei auala e ono faalaeiau ma faamāfanafanaina ai i tatou. Atonu e tatou te faitauina le Tusi Paia po o lomiga faale-Tusi Paia faatasi ma ē e tatou te asiasi atu i ai. Pe tatou te iloilo foʻi le mataupu lea o le a suʻesuʻe i le Suʻesuʻega o le Olomatamata i le vaiaso, po o le tusi lea o le a talanoaina i le Suʻesuʻega Faale-Tusi Paia a le Faapotopotoga i le vaiaso. E tatou te ono matamata faatasi ma i latou se tasi o a tatou DVD faale-Tusi Paia. Pe atonu foʻi e tatou te faitau pe faamatala atu ni mea na tutupu e faalaeiau ai, o loo tusia i a tatou lomiga.
17, 18. I le avea ai ma auauna faamaoni a Ieova, aiseā e tatou te mautinoa ai o le a ia lagolagoina ma faamāfanafanaina i tatou?
17 Pe afai ua tatou iloa se uso po o se tuafafine o loo manaʻomia se faamāfanafanaga, e mafai ona tatou taʻua o ia i a tatou lava tatalo. (Roma 15:30; Kolo. 4:12) A o tatou feagai ma faafitauli o le olaga ma taumafai malosi e faamāfanafana i isi, o le a mafai ona iā i tatou le faatuatua ma le mautinoa lea sa iai i le faisalamo, o lē na pese e faapea: “Ia tuuina atu iā Ieova ou popolega uma, o ia lava e na te tausia oe. E na te lē tuua lava le tagata amiotonu ia tautevateva.” (Sala. 55:22) Ioe, o le a faamāfanafanaina pea ma lagolagoina e Ieova i tatou o ana auauna faamaoni.
18 Na fetalai mai le Atua i ona tagata tapuaʻi i aso anamua: “O aʻu, o aʻu lava o Lē e faamāfanafana iā te outou.” (Isa. 51:12) O le a faia foʻi faapea e Ieova iā i tatou, ma faamanuia i a tatou gaoioiga ma upu lelei, a o tatou faamāfanafana atu i ē o loo mafatia. E tusa lava pe tatou te faamoemoe e ola i le lagi pe ola i le lalolagi, ae e mafai ona faamāfanafanaina i tatou taʻitoʻatasi i upu a Paulo, i ona uso Kerisiano ua faauuina i le agaga: “O lo tatou Alii o Iesu Keriso ma le Atua lo tatou Tamā, o lē e alofa iā i tatou ma foaʻi mai le faamāfanafanaga e faavavau, ma le faamoemoe matagofie e ala i le agalelei faifua, ia faamāfanafana i o outou loto ma faatumauina outou i galuega ma upu lelei uma.”—2 Tesa. 2:16, 17.
Pe E te Manatua?
• O le ā le tele ua oo atu i ai la tatou galuega o le faamāfanafana i ē o loo mafatia?
• O ā nisi o mea e mafai ona tatou faia ina ia faamāfanafana ai i isi?
• O ā faamaoniga mai le Tusi Paia e iloa ai e faamāfanafana e Ieova ona tagata?
[Fesili mo le Suʻesuʻega]
[Ata i le itulau 28]
Po o fai sou sao i le faamāfanafanaina o ē o loo mafatia?
[Ata i le itulau 30]
E mafai e talavou ma ē ua matutua ona fefaalaeiauaʻi
