‘Dvudvuta Bonkhe Labalilako’
‘Dvudvuta Bonkhe Labalilako’
‘Simakadze ungigcobile kutsi . . . ngidvudvute bonkhe labalilako.’—ISA. 61:1, 2.
1. Yini Jesu layentela labalilako, futsi kungani enta kanjalo?
JESU KHRISTU watsi: “Kudla kwami kukwenta intsandvo yalongitfumile, nekucedzela umsebenti wakhe langinike wona.” (Joh. 4:34) Njengobe Jesu bekafeza umsebenti labekawuniketwe nguNkulunkulu, waveta timfanelo taBabe wakhe letimangalisako. Lenye yaletimfanelo, lutsandvo lolukhulu Jehova lanalo ngebantfu. (1 Joh. 4:7-10) Umphostoli Pawula wakhuluma ngalenye indlela loluvetwa ngayo lolutsandvo ngesikhatsi achaza Jehova ngekutsi ‘unguNkulunkulu longumtfombo wayo yonkhe indvudvuto.’ (2 Khor. 1:3) Jesu waveta lolutsandvo ngesikhatsi enta loko lokwabiketelwa esiphrofethweni sa-Isaya. (Fundza Isaya 61:1, 2.) Esinagogeni laseNazaretha, wafundza lesiphrofetho futsi watsi lamavi lakuso bekagcwaliseka kuye. (Luk. 4:16-21) Kuwo wonkhe umsebenti lawenta emhlabeni, Jesu wabadvudvuta ngelutsandvo labalilako, wabakhutsata futsi wabaniketa kuthula kwengcondvo.
2, 3. Kungani balandzeli baKhristu kufanele bamlingise ngekutsi badvudvute labanye?
2 Bonkhe balandzeli baJesu kufanele bamlingise ngekutsi badvudvute labalilako. (1 Khor. 11:1) Pawula watsi: “Dvudvutanani nakhane.” (1 Thes. 5:11) Njengobe bantfu lamuhla bahlangabetana ‘netikhatsi letimatima,’ kunesidzingo lesikhulu sekutsi sibadvudvute. (2 Thim. 3:1) Emhlabeni wonkhe, bantfu labanyenti labanetinhlitiyo leticotfo bahlangana nebantfu labakhuluma baphindze bente ngendlela lebangela lusizi, kucindzeteleka kanye nebuhlungu.
3 Njengobe liBhayibheli labiketela, kulamalanga ekugcina alelive lelibi, bantfu labanyenti ‘bayatitsandza, batsandza imali, bayatigcabha, bayatigabatisa, balulata Nkulunkulu ngenhlamba. Ababalaleli batali babo, ababongi, bete bungcwele, bete lutsandvo, abatsetselelani. Batinyoka, abatitsibi, banebulwane, batondza lokuhle, batsengisa ngalabanye bantfu, banemawala, bakhukhumukiswe kutatisa, batsandza kutijabulisa kunekutsi babe ngulabatsandza Nkulunkulu.’ Kutiphatsa lokunjalo sekwandze kakhulu lamuhla kunangesikhatsi lesendlulile, ngobe ‘lababi nebakhohlisi sebadlange kakhulu ngebubi.’—2 Thim. 3:2-4, 13.
4. Yini leyentekile ngetimo talelive kulamalanga ekugcina?
4 Tonkhe letintfo akukafaneli tisimangalise, ngobe liVi laNkulunkulu liyasitjela kutsi “umhlaba wonkhe ungephansi kwemandla aLomubi.” (1 Joh. 5:19) “Umhlaba wonkhe” uhlanganisa tinhlangano tetembusave, tenkholo, tekutsengiselana kanye netindlela Sathane latisebentisako kute asakate imibono yakhe lengemanga. Kuyafaneleka-ke kutsi Sathane Develi abitwe ngekutsi ‘ngumbusi walelive’ kanye nangekutsi ‘ngunkulunkulu walomhlaba.’ (Joh. 14:30; 2 Khor. 4:4) Timo letisemhlabeni wonkhe tiya tiba timbi kakhulu njengobe Sathane atfukutsele kakhulu nyalo, ngobe uyati kutsi usalelwe sikhatsi lesifishane ngembikwekutsi Jehova ambhubhise. (Semb. 12:12) Kuyasidvudvuta kwati kutsi madvutane kubeketelela kwaNkulunkulu Sathane kanye nalelive lakhe lelibi sekutawuphela, futsi insayeya Sathane layiphakamisa mayelana nebukhosi baJehova seyitawuphendvulwa.—Gen., sehl. 3; Jobe, sehl. 2.
Tindzaba Letinhle Tishunyayelwa Emhlabeni Wonkhe
5. Siphrofetho lesimayelana nemsebenti wekushumayela sigcwaliseka njani kulamalanga ekugcina?
5 Kuletikhatsi letimatima kunato tonkhe letike taba khona emlandvweni, loko Jesu lakubiketela sekuyagcwaliseka. Watsi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.” (Mat. 24:14) Liyakhula lizinga lowentiwa ngalo umsebenti wekufakaza ngeMbuso waNkulunkulu emhlabeni wonkhe. Lamuhla, boFakazi BaJehova labangetulu kwa-7 500 000, labahlanganyela emabandleni langetulu kwa-107 000, bashumayela emhlabeni wonkhe ngeMbuso waNkulunkulu, njengobe nje naJesu ashumayela futsi wafundzisa ngawo. (Mat. 4:17) Ngesizatfu saloko, umsebenti wetfu wekushumayela lamuhla udvudvuta bantfu labanyenti labalilako. Ngeminyaka lemibili nje kuphela, bantfu labangu-570 601 babhatjatisiwe baba boFakazi BaJehova.
6. Likutjelani lizinga umsebenti wetfu wekushumayela lowentiwa ngalo?
6 Kuyamangalisa kubona lizinga lelikhulu boFakazi BaJehova lamuhla labahumusha baphindze basakate ngalo tincwadzi teliBhayibheli ngetilwimi letingetulu kwa-500. Kute intfo lefanana nalena leke yenteka emlandvweni. Kuyamangalisa kuba khona kweluhlangotsi lwasemhlabeni lwenhlangano yaJehova, umsebenti leliwentako kanye nekukhula kwalo. Ngaphandle kwekucondziswa kanye nekusitwa ngumoya longcwele waNkulunkulu, loluhlangotsi belungeke lukwati kwenta loku kulelive lelicondziswa nguSathane. Ngesizatfu sekutsi tindzaba letinhle setishunyayelwa emhlabeni wonkhe, indvudvuto levela emiBhalweni ayigcini nje ngekujatjulelwa ngemakholwa lesikanye nawo, kodvwa iphindze ijatjulelwe bantfu labalilako labemukela umlayeto weMbuso.
Kudvudvuta Emakholwa Lesikanye Nawo
7. (a) Kungani singeke silindzele kutsi Jehova atisuse nyalo tonkhe timo letisicindzetelako? (b) Sati njani kutsi singakwati kubeketelela lushushiso kanye nebumatima?
7 Kulelive leligcwele bubi kanye netinkinga, siyati kutsi sitawuhlangabetana nato timo letibangela kucindzeteleka. Angeke silindzele kutsi Nkulunkulu asuse tonkhe tintfo letisenta singajabuli nobe sikhale, ngembikwekutsi abhubhise lelive lelibi. Kwanyalo, njengobe sihlangabetana nelushushiso lolwabiketelwa, sitfola litfuba lekuveta kutsi sisekela bukhosi baJehova bendzawo yonkhe. (2 Thim. 3:12) Ngetulu kwaloko, njengobe sisitwa futsi sidvudvutwa nguBabe wetfu wasezulwini, singafanana nemaKhristu lagcotjiwe aseThesalonika, labeketelela lushushiso ngekukhutsatela kanye nangekukholwa.—Fundza 2 Thesalonika 1:3-5.
8. Ngubuphi bufakazi lobusemiBhalweni lobuveta kutsi Jehova uyatidvudvuta tinceku takhe?
8 Asingabati kutsi Jehova uyatiniketa tinceku takhe indvudvuto letiyidzingako. Nasi sibonelo: Ngesikhatsi Indlovukazi Jezebeli ifuna kubulala umphrofethi Elija, lomphrofethi waphelelwa sibindzi futsi wabaleka; bekafuna ngisho nekufa. Kodvwa kunekutsi Jehova amsole, wamdvudvuta futsi wamniketa sibindzi sekuchubeka nemsebenti wakhe wekuba ngumphrofethi. (1 Khos. 19:1-21) Bufakazi bekutsi Jehova uyabadvudvuta bantfu bakhe buphindze bubonakale kuloko lokwenteka ebandleni lemaKhristu angelikhulu lekucala. Sibonelo saloko kutsi sifundza ngesikhatsi lapho ‘emabandla lakulo lonkhe laseJudiya naseGalile naseSamariya aba nesikhatsi sekuthula, akhiwa.’ Ngetulu kwaloko, ‘akhula ngebunyenti ngobe [bekadvudvutwa] ngumoya longcwele futsi aphila imphilo yekwesaba Jehova.’ (Imis. 9:31) Sijabula kakhulu ngekwati kutsi natsi ‘singadvudvutwa ngumoya longcwele.’
9. Kungani kufundza ngaJesu kungasidvudvuta?
9 Tsine njengemaKhristu, sidvudvutwa kufundza ngaJesu Khristu kanye nekuhamba etinyatselweni takhe. Jesu watsi: “Wotani kimi, nine nonkhe lenikhatsele nalenisindvwa yimitfwalo, ngitaniphumuta. Bekani lijoko lami etikwenu, nifundze kimi, ngobe mine ngimnene, ngitfobekile ngenhlitiyo, khona niyawutfola kuphumula kwemiphefumulo yenu; ngobe lijoko lami lilula, nemtfwalo wami awusindzi.” (Mat. 11:28-30) Kufundza ngendlela Jesu labaphatsa kahle ngayo bantfu kanye nangekulandzela sibonelo sakhe lesihle, kungasisita kutsi sikhululeke ekucindzetelekeni lesihlangabetana nako.
10, 11. Bobani ebandleni lokufanele badvudvute labanye?
10 Natsi singadvudvutwa ngemaKhristu lesikanye nawo. Nasi sibonelo: Cabanga ngendlela labadzala ebandleni labangabasita ngayo labo labahlangabetana netimo leticindzetelako. Umfundzi Jakobe wabhala: “Ukhona yini logulako [ngekwakamoya] emkhatsini wenu? Akabite babonisi belibandla, bamthandazele.” Loko kutawuba namuphi umphumela? “Umthandazo wekukholwa uyawumphilisa logulako, iNkhosi imvuse, nome entile tono uyawutsetselelwa tona.” (Jak. 5:14, 15) Nalamanye emalunga elibandla angabadvudvuta labanye.
11 Bantfu besifazane bavame kutiva bakhululekile kucoca nalabanye besifazane ngetinkinga tabo. Bodzadze lasebakhulile futsi labanalokuhlangenwe nako lokunyenti, bangabaniketa teluleko letinhle bodzadze labasebasha. Kungenteka kutsi labodzadze lasebakhulile futsi labavutsiwe ngekwakamoya nabo bake bahlangabetana netimo letifananako ekuphileni kwabo. Luvelo kanye netimfanelo tabo letinhle tingaba lusito lolukhulu. (Fundza Thithusi 2:3-5.) Labadzala kanye nalabanye ebandleni bangakwati ‘kubaniketa sibindzi labaphelelwa ngemandla emoyeni,’ futsi kufanele bente kanjalo. (1 Thes. 5:14, 15) Kubalulekile kukhumbula kutsi Nkulunkulu “uyasidvudvuta etinhluphekweni tetfu tonkhe; kuze labo labasetinhluphekweni sibe nemandla ekubadvudvuta.”—2 Khor. 1:4.
12. Kungani kubalulekile kuba khona emihlanganweni yebuKhristu?
12 Indlela lebaluleke kakhulu lesingadvudvutwa ngayo kuba khona emihlanganweni yebuKhristu, lapho kucocwa ngemavi eliBhayibheli lasidvudvutako. Sifundza kutsi Judasi kanye naSilasi “bacoca sikhatsi lesidze nebazalwane babacinisa emadvolo ngekubakhutsata.” (Imis. 15:32) Ngembikwekutsi imihlangano icale nangemuva kwayo, emalunga elibandla avame kucoca ngetintfo letakhako. Ngako-ke, ngisho nalapho sihlushwa timo leticindzetelako, akukafaneli sitehlukanise nalabanye, ngobe kwenta kanjalo angeke kuyilungise inkinga lesinayo. (Taga 18:1) Kodvwa senta kahle kulalela seluleko lesiphefumulelwe semphostoli Pawula lesitsi: “Ngako-ke asinakane, sisitane ngekukhutsatana elutsandvweni nasemisebentini lemihle. Singakuyekeli kuhlangana ndzawonye, njengobe labanye sebanemkhuba wekungahlangani; kodvwa asikhutsatane kakhulu, njengobe nani niyabona kutsi lilanga selisondzele.”—Heb. 10:24, 25.
Tfola Indvudvuto EVini LaNkulunkulu
13, 14. Veta kutsi imiBhalo ingasidvudvuta njani?
13 Ngisho nobe singemaKhristu labhajatisiwe nobe sisandza kucala kufundza ngaNkulunkulu nangetinjongo takhe, singatfola indvudvuto lenkhulu eVini laKhe. Pawula wabhala: “Konkhe kwasendvulo lokusemBhalweni kwabhalelwa kufundzisa tsine, kuze sibe nelitsemba lelingumphumela wekubeketela newekucinisela lesikutfola kulowo mBhalo.” (Rom. 15:4) ImiBhalo leNgcwele ingasidvudvuta iphindze ‘isihlomise kute silungele kwenta wonkhe umsebenti lomuhle.’ (2 Thim. 3:16, 17) Kwati liciniso mayelana nenjongo yaNkulunkulu kanye nelitsemba lelicinisekisiwe ngelikusasa, kungasiniketa indvudvuto lenkhulu. Ngako-ke, asilisebentise ngalokugcwele liVi laNkulunkulu kanye netincwadzi letisekelwe kulo letingasidvudvuta tiphindze tisizuzise kakhulu.
14 Jesu wasibekela sibonelo lesihle ngekusebentisa imiBhalo kute afundzise futsi advudvute labanye. Nasi sibonelo: Ngemuva kwekuvuswa kwakhe, ‘wabachazela imiBhalo’ bafundzi bakhe lababili. Njengobe bekakhuluma nabo, tinhlitiyo tabo tatsintseka kakhulu. (Luk. 24:32) Alandzela sibonelo saJesu lesiphelele, umphostoli Pawula wasebentisa ‘imiBhalo.’ Ngesikhatsi aseBheriya, tilaleli takhe ‘talemukela ngenshisekelo livi. Onkhe emalanga betiphenyisisa imiBhalo tiyihlolisise.’ (Imis. 17:2, 10, 11) Ngako-ke, kubalulekile kutsi sifundze liBhayibheli malanga onkhe, sizuze kulo kanye nasetincwadzini tebuKhristu letentelwe kusidvudvuta nekusiniketa litsemba kuletikhatsi letimatima.
Letinye Tindlela Lesingabadvudvuta Ngato Labanye
15, 16. Ngutiphi tintfo lesingatenta kute sisite siphindze sidvudvute emaKhristu lesikanye nawo?
15 Singawasita siphindze siwadvudvute ngetindlela letehlukehlukene emaKhristu lesikanye nawo. Sibonelo saloko kutsi singase sisite emaKhristu lasakhulile nobe lagulako ngekutsi siwayele etitolo. Singawasita ngemisebenti yasekhaya, ngaleyondlela, sivete kutsi siyawakhatsalela. (Fil. 2:4) Mhlawumbe singancoma tikhonti lesikanye nato ngetimfanelo tato letinhle, letinjengelutsandvo, kuhlakanipha, sibindzi kanye nekukholwa.
16 Kute sidvudvute lasebakhulile, singabavakashela siphindze silalelisise lokuhlangenwe nako kwabo kanye netibusiso labatitfole emsebentini waJehova. Loku kungasikhutsata kuphindze kusidvudvute. Njengobe sibavakashele, singabafundzela liBhayibheli nobe tincwadzi letisekelwe kulo. Mhlawumbe singalungiselela nabo sihloko lesitawufundvwa eSifundvweni se-Sicongosekulindza nobe eSifundvweni SeliBhayibheli Selibandla sangalelo viki. Singabukela nabo ema-DVD lanetihloko letisekelwe emiBhalweni. Singaphindze sifundze nobe silandzise lokuhlangenwe nako lokukhutsatako lokusetincwadzini tetfu.
17, 18. Njengetinceku taJehova letetsembekile, kungani singaciniseka ngekutsi utasisekela aphindze asidvudvute?
17 Nangabe sicaphela kutsi sikhonti saJehova lesikanye naso sidzinga kudvudvutwa, singasifaka emithandazweni yetfu lesiyenta ngansense. (Rom. 15:30; Khol. 4:12) Njengobe sibeketelela tinkinga tekuphila futsi sifuna kudvudvuta labanye, singaba nekukholwa kanye nekuciniseka lokufanana nekwemhlabeli, lowatsi: “Lahlela imitfwalo yakho kuSimakadze, yena uyawukusimisa; angeke avume phakadze naphakadze kutsi lolungile wakhe atanyatanyiswe.” (Hla. 55:22) Jehova utawuhlale akulungele kudvudvuta kanye nekusekela tinceku takhe letetsembekile.
18 Naku Nkulunkulu lakutjela tikhonti takhe tasendvulo: “Mine, mine ngekwami, nginguye lonidvudvutako.” (Isa. 51:12) Jehova utakwenta lokufananako nakitsi futsi utayibusisa imisebenti lemihle kanye nemavi etfu njengobe sidvudvuta labalilako. Ngisho nobe sinelitsemba lekuphila ezulwini nobe emhlabeni, ngamunye wetfu angadvudvutwa ngemavi aPawula lawabhalela emaKhristu lagcotjiwe: “Shangatsi Jesu Khristu iNkhosi yetfu matfupha, naNkulunkulu, longuBabe lowasitsandza, kwatsi ngemusa wakhe wasikhutsata ngendvudvuto yaphakadze, wasipha nelitsemba lelihle, angadvudvuta tinhlitiyo tenu, anakhele kuyo yonkhe imisebenti lemihle nakuwo onkhe emavi lamahle.”—2 Thes. 2:16, 17.
Uyakhumbula?
• Wentiwa ngelizinga lelingakanani umsebenti wetfu wekudvudvuta labalilako?
• Ngutiphi letinye tetintfo lesingatenta kute sidvudvute labanye?
• Ngubuphi bufakazi lobusemiBhalweni lobuveta kutsi Jehova uyabadvudvuta bantfu bakhe?
[Imibuto Yesihloko Lesifundvwako]
[Sitfombe ekhasini 28]
Uyabadvudvuta yini labalilako?
[Sitfombe ekhasini 30]
Bantfu labasebasha kanye nalabakhulile bangabadvudvuta labanye
