“Tlan kakamamakgkatsiniw tiku lipuwamakgolh”
“Tlan kakamamakgkatsiniw tiku lipuwamakgolh”
«Jehová kilaksaknit [...] xlakata tlan nakkamamakgkatsini tiku lipuwamakgolh.» (ISA. 61:1, 2)
1. ¿La kamakgtayalh Jesús tiku xlipuwamakgolh chu tuku xlakata chuna tlawalh?
JESÚS wa: «Nkiliwat, wa naktlaway xtalakaskin nti nkimalakgachalh [o kimakamilh] chu na nakmasputuy xtaskujut» (Juan 4:34). Chu akxni makgantaxtilh tuku Dios xlakgayawanit, putum kilhtamaku limasiyalh xtayat xTlat chu tuku tlakg masiyalh wa pi lu xkapaxki latamanin (1 Juan 4:7-10). Pulaktu la Jehová kinkalimasiyaniyan pi kinkapaxkiyan wa akxni tlan kinkamamakgkatsiniyan. Uma likatsiyaw tuku xlakata apóstol Pablo lichuwinalh pi wa Dios «xlipaks ntakgtsiyajni» (2 Cor. 1:3). Cristo nachuna limasiyalh xlakata likatsilh chuna la xlichuwinanit palakachuwina Isaías (kalikgalhtawakga Isaías 61:1, 2). Akxni alh kpukgalhtawakga xalak Nazaret, likgalhtawakgalh tuku xlichuwinanit Isaías chu wa pi wa xmakgantaxtima tuku xlikgalhtawakgama (Luc. 4:16-21). Chu chuna tlawalh. Putum kilhtamaku nema lichuwinalh Dios tlan kamamakgkgatsinilh latamanin tiku xlipuwamakgolh.
2, 3. ¿Tuku xlakata akinin kstalaninanin Cristo nachuna tlan nakalikatsiniyaw amakgapitsin la Jesús?
2 Xlakata akinin kstalaninanin Cristo na talakaskin tlan nakamamakgkatsiniyaw tiku lipuwamakgolh (1 Cor. 11:1). Chuna wan Pablo: “Kalamakgpuwantinitit nchatunu amakgapitsin” (1 Tes. 5:11). Tiku xlikana katsiputunkgo xlakata Dios chu lamakgolh uma kakilhtamaku lakaskinkgo pi wi tiku kakamakgtayalh xlakata lilipuwamakgolh. ¿Tuku xlakata? Xlakata uma «tuwa kilhtamaku [chu] tuwa latamakan» chu tachuwinankgo latamanin tiku limasiyakgo xtachuwinkan chu tuku tlawakgo pi xakstu kapaxkikan (2 Tim. 3:1, NM).
3 Chuna la talichuwinanit kBiblia, uma xaʼawatiya kilhtamaku xʼanankgolh lhuwa latamanin «tiku xakstukan nakapaxkikan, napaxkikgo tumin, lichixkutnankgo tuku kgalhikgo, laktlankajwa, lixkajni lichuwinankgo Dios, ni kgalhakgaxmatkgo xnatlatnikan, ni paxtikatsininankgo, namakgxtakgnankgo, ni napaxkinankgo, nila nakatalakkaxlakan, nitlan nalichuwinankgo amakgapitsin, ni namachokgokgo tuku nitlan tlawaputunkgo, tiku lu lixkajni likatsikgo, ni napaxkikgo tuku tlan, naʼakgskgawinankgo, xalaktsakat, lu tlanka nakamakgkatsikan chu napaxkikgo tuku nalipaxuwakgo nixawa Dios». Chuna la titaxtuma kilhtamaku «lakchixkuwin tlakg lixkajni likatsimakgolh» chu kgantaxtuma la wan Biblia (2 Tim. 3:2-4, 13, NM).
4. ¿Tuku lama la uku xlikalanka Katiyatni?
4 Uma tuku lama ni kaks lilakawanaw xlakata Biblia masiya pi «kxlitliwakga akgskgawini wilakgo, xlipaks ntachixkuwitat» o latamanin (1 Juan 5:19). Akxni wan «xlipaks ntachixkuwitat» kilhchanima política, ni xaxlikana takanajla, stananin, chu tuku limaklakaskinkgo. Wa xlakata Satanás wanikan «xapuxku yunu nkatuxawat [o kakilhtamaku]» chu «mapakgsinan yuma katuxawat» (Juan 14:30; 2 Cor. 4:4). ¿Tuku xlakata tlakg nitlan kakitaxtunima kakilhtamaku? Xlakata Satanás lu lisitsinit xlakata nialh lhuwa kilhtamaku kgalhi (Apo. 12:12). Nialh makgas, Jehová nialh katimastalh talakaskin, pi Satanás chu xkakilhtamaku natawilakgo chu nalimasiya pi kaj watiya minini namapakgsinan. ¡Lu tlan namakgkatsiyaw! (Gén., cap. 3; Job, cap. 2.)
Xliputum Katiyatni lichuwinanaw Dios
5. ¿La kgantaxtuma kxaʼawatiya kilhtamaku tuku tatsokgnit xlakata la xʼama talichuwinan Dios?
5 Nachuna akxilhmaw pi kgantaxtuma tuku tilichuwinalh Jesús pi xʼama kgantaxtu: «Na xapulh taliʼakgchuwinanit nawan xlikatlanka nkatuxawat yuma xatlan tamakatsin xla tapakgsin; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni» kakilhtamaku (Mat. 24:14). Taskujut nema tlawamaw xlikalanka Katiyatni lu taliwakama. La uku, 7,500,000 tiku lichuwinamakgolh Dios chu wilakgolh k107,000 congregaciones, chu xlikalanka Katiyatni lichuwinamakgolh xTamapakgsin Dios, wa Tamapakgsin nema tilichuwinalh chu masiyalh Jesús (Mat. 4:17). Chu xlakata uma wantuku lichuwinanaw tlan limakgkatsikgo latamanin. Chu litasiya pi chuna, xlakata kaj akgtiy kata nema titaxtulh tamunukgolh 570,601 chu xtatayananin Jehová litaxtukgolh.
6. ¿Tuku lakpuwana xlakata la stakma taskujut nema tlawama xkachikin Dios?
6 Atanu tuku liwana masiya pi tlan kinkakitaxtuniman, xlakata la uku tamatitaxtima k500 tanu tanu tachuwin likgalhtawakga nema takilhtinit Biblia. ¡Nikxni chuna xtamakgantaxtima! Xlakata xkachikin Jehová nema wi kKatiyatni chuntiya wi, tlakg skujma chu tlakg lhuwa tuku tlawama, uma lu ¡xlikana kaks lilakawanaw! Nila tlan xkakitaxtunilh komo niwa espíritu santo xkamakgtayalh, xlakata uma kakilhtamaku tiku Satanás kapulalima chu lakataya uma taskujut. Xlakata talichuwinama xalakwan xalaksasti, lhuwa latamanin makgamakglhtinamakgolh uma tamakatsin chu tlan limakgkatsikgo chuna la wilaw akinin xlakskujnin Dios.
Kakamatliwakglhwi kinatalankan
7. 1) ¿Tuku xlakata nila nalakpuwanaw pi Jehová tunkun nakamalakgsputu putum tuku lipatinanaw? 2) ¿Tuku likatsiyaw pi tlan natayaniyaw akxni nakinkaputsastalanikanan chu natayaniyaw taʼakglhuwit?
7 La uku putum patinanaw xlakata uma kakilhtamaku niku lu talhuwinit tiku lixkajni likatsikgo chu anan lhuwa talipuwan. Xlakata Dios nina malakgsputu, chuntiya napatinanaw chu wi tuku nitlan nakinkakitaxtuniyan. Akinin chuntiya natayaniyaw akxni nakinkaputsastalanikana chuna la xtalichuwinanit kBiblia, chu nalakpuwanaw pi xlakata chuna titaxtumaw tlan nalimasiyaniyaw Jehová pi ni makgxtakgaw chu tatayayaw pi wa lakgchan namapakgsinan (2 Tim. 3:12). Xtamakgtay Jehová chu xlakata kinkamatliwakglhan, tlan nachuna natlawayaw la xapulana kstalaninanin Cristo tiku xatalaksakni xwankgonit nema xlamakgolh kxamakgan Tesalónica, tiku lu tlan limasiyakgolh “xtapaxuwanaliyankan, chu xtakanajlakan lantla lipikua xkasokgalimaka, chu xkamapatinimaka” (kalikgalhtawakga 2 Tesalonicenses 1:3-5).
8. ¿Tukuya liʼakxilhtit kinkamasiyaniyan pi Jehová putum kilhtamaku tlan kamamakgkatsini kskujnin?
8 Jehová putum kilhtamaku kamaxki litliwakga xlakskujnin. Kalichuwinaw Elías. Akxni Jezabel tiku lu lixkajni xlikatsi wanilh pi xʼama makgni, Elías lu pekualh, tsalalh chu tsukulh wan pi xniputun. Pero Dios ni likilhnilh wanilh tachuwin nema tlan mamakgkatsinilh chu matliwakglhli xlakata chuntiya xpalakachuwinalh (1 Rey. 19:1-21). Xlikana pi Jehová kamatliwakglha xkachikin, chu chuna limasiya tuku titaxtukgolh kstalaninanin Cristo kxapulana siglo. Kʼakgtum texto uma tuku wan: «Xkgalhikgoy ntatanksni [o xatapaxuwan xwilakgolh] nkgamputum nkanajlanin, [o congregación], [...] xlikatlanka Judea, chu Galilea, chu Samaria, chu na chuna kstakmakgo kxtakanajlakan mpi xlilamakgo kxtamakpuwan nkimPuchinakan, chu xtaliwakamakgo lantla x[ka]makgpuwantinimakgo Spiritu Santo» (Hech. 9:31). ¡Lu lipaxuwayaw pi katsimaw pi na “kinkamakgpuwantiniman Spiritu Santo”!
9. ¿Tuku xlakata wanaw pi akxni likgalhtawakgayaw tuku tlawalh Cristo kinkamatliwakglhan?
9 Atanu tuku na tlan kinkamamakgkatsiniyan wa nalikgalhtawakgayaw chu nachuna natlawayaw tuku ti tlawalh Cristo. Jesús wa: «Kakilakgtantit xlipaks wixin wanti skujtamakganitantit, chu nkukananitantit, lakimpi kit nakkamajaxayan. Kalipitit nkimukiwi kmiokgspunkan, chu na kakinkatsinitit, mpi lu wa xasmalhwa nkit, chu na tsatata nkinaku. Na natakgsniyatit ntajaxni [kmilatamatkan]. Xampi wa nkimukiwi, lu wa ni tuwa liyankan, chu wa nkintakuka, skapaka [o ni tsinka]» (Mat. 11:28-30). Chuna la katsiyaw, Cristo tlan xkalikatsini amakgapitsi, xkamatliwakglha chu xkapaxki. Chu akxni likgalhtawakgaparayaw tuku kinkamasiyanin chu fuerza natlawayaw nachuna nalatamayaw la tilatamalh kinkamatliwakglhan, chu tlan kinkamamakgkatsiniyan.
10, 11. ¿Tiku xalak congregación tlan namamakgkatsinikgo amakgapitsin?
10 Atanu tiku na kinkamakgtayakgoyan, wa lakgkgolotsin xalak congregación umakgolh, natalan kamakgtayakgo tiku tuwa titaxtumakgolh. Chuna la wa Santiago: «¿Wi tiku [taxlajwanima xtakanajla] kmilakgstipankan? Katachuwinalh lakgkgolotsin xalak congregación, chu katlawakgolh oración xpalakata». ¿Tuku tlan nakitaxtu? «Oración namatliwakglha xtakanajla, chu Jehová namakipara. Nachuna komo xtlawanit talakgalhin, natapatikan.» (Sant. 5:14, 15, NM.) Xlikana, putum xalak congregación tlan nalamatliwakglhaw.
11 Min kilhtamaku natalan lakpuskatin tlan makgkatsikgo atanu tala puskat litachuwinankgo xtakglhuwitkan. Natalan tiku tlakg tliwakga wi xtakanajla tlan nakamakgtayakgo chu laktlan tastakyaw nakawanikgo tiku kajku laktsuman, xlakata max nachuna titaxtukgolh kxlatamatkan. Xlakata lu tlan kakgaxmatnikgo chu kalakgalhamankgo uma kamakgtaya natalan tiku kajku laktsuman (kalikgalhtawakga Tito 2:3-5). Xlikana pi na lu xlakaskinka pi lakgkgolotsin xalak congregación chu amakgapitsi natalan «namakgpuwantinikgo[...] wanti laklatayakgoy» o nitlan makgkatsikgo kcongregación (1 Tes. 5:14, 15). Putum kilhtamaku kalakapastakwi pi Dios tlan kinkamamakgkatsiniyan “xlipaks kintalakgaputsitkan” xlakata “na chuna nchu nkin, limakgtsiyajkgoyaw watiya ntakgtsiyajni wantu nkin nkinkalimakgtsiyajnitan Dios” (2 Cor. 1:4).
12. ¿Tuku xlakata lu xlakaskinka ankan ktamakxtumit?
12 Tamakxtumit xla kstalaninanin Cristo, chu tuku masiyakan xlakata Biblia matliwakglhnan putum kilhtamaku. Biblia wan pi Judas chu Silas «akgchuwinanin xwankgonit, makgpuwantinikgolh natalanin» (Hech. 15:32). Nachuna akxni nina tsuku tamakxtumit katachuwinanaw natalan chu uma tlawa pi tlan nalimakgkatsiyaw. Wa xlakata, komo titaxtumaw taʼakglhuwit, ni kakamakgxtakgwi kinatalankan xlakata ni katitalakkaxtlawalh kintaʼakglhuwitkan (Pro. 18:1). Wata kamakgantaxtiw tastakyaw nema Dios matsokgnilh Pablo: «Kalalimakgpuwantinitit nchatunu amakgapitsin ktapaxkit, chu kxalakwan tatlaw. Ni timakgxtakgaw ntani ntamakgstokgaw lantla ntlawakgo makgapitsin xalismanin, wampi kaj nalamakgpuwantiniyaw; na kax natlawayaw mpi ukxilhaw ntalakatsuwimaja yama ntlanka kilhtamaku» (Heb. 10:24, 25).
Xtachuwin Dios kinkamatliwakglhan
13, 14. ¿La kinkamatliwakglhan xTachuwin Dios?
13 Maski lhuwata kata tamununitaw o kajku tsukumaw katsiyaw xlakata Jehová chu xtalakaskin, putum kgalhiyaw Biblia nema tlan kinkamamakgkatsiniyan. Chuna wa Pablo: «Sampi wa nkatuwa ntu xapulana ntatsokgli, wa litsokgka mpi chuna nalikatsiniyaw wantu ntlan; lakimpi wa lantla nalikgalhiyaw ntapaxuwanaliyan, chu naliakgpuwantiyaw ntatsokgnun, nalikgalhiyaw ntakgalhkgalhitin» (Rom. 15:4). Xtachuwin Dios matliwakglha kstalanina Cristo chu masiyani xlakata «nitu nakitsankganiy nchixku nti skujnaniy Dios, paks tlan nakatsiy lantla natlaway xlipaks ntu ntlan» (2 Tim. 3:16, 17). ¡Lu tlan limakgkatsiyaw akxni katsiniyaw tuku natlawa Dios chu nakgalhiyaw akgtum lu tlan takgalhkgalhin xlakata tuku aku namin! Wa xlakata liwana kalimaklakaskiw Biblia chu likgalhtawakga nema kinkamakgtayakgoyan naʼakgatekgsaw tuku wan Biblia. Xlikana tlan nalimakgkatsiyaw chu lhuwa tuku atanu tlan nakinkaliminiyan.
14 Jesús kinkawilinin lu tlan liʼakxilhtit. Xla limaklakaskilh xTachuwin Dios xlakata tlan nakamasiyanikgo chu tlan nakalimamakgkatsinikgo amakgapitsin. Akxni xlakastakwananitta, katasiyanilh chatiy kstalaninanin chu liwana kamasiyanilh, “kamalakatanksanilh ntachuwin xla xtatsokgnun Dios” chu asta kxnaku xchanikgo tuku xkamasiyani (Luc. 24:32). Apóstol Pablo nachuna tlawalh la tlawalh Cristo. Makglhuwa limaklakaskilh «xtachuwin Dios» xlakata xmakgatekgsnikgolh. ¿Tuku tlawakgolh tiku xkgaxmatnikgo? Tiku xalak Berea «xlipaks xtapaxuwankan ntimakgamakglhtinankgolh xtachuwin Dios, chali chali xlakputsakgoy ntatsokgnun» (Hech. 17:2, 10, 11). Xlikana pi lu xlakaskinka chali chali kalikgalhtawakgaw Biblia. Xlakata Biblia chu likgalhtawakga nema na anta takilhtinit, tlan kinkamamakgkatsiniyan chu kgalhiyaw takgalhkgalhin kʼuma kakilhtamaku nema lu xakatuwa.
Lhuwa la tlan nakamatliwakglhaw kinatalankan
15, 16. ¿La tlan nakamakgpuwantiniyaw kinatalankan?
15 Wi atanu la tlan nakamatliwakglhaw kinatalankan. Akgtum liʼakxilhtit, wantiku tatatlakgo o linkgoya kata tlan nakatamawaniyaw tuku lakaskinkgo. Nachuna tlan nakamakgtayayaw tiku lakaskinkgo nakamakgtayakan kxchikkan (Fili. 2:4). Nachuna, nakawaniyaw pi lu tlan tlawamakgolh xlakata paxkinankgo, lakgskgalalan, ni pekuankgo, xlakata xtakanajlakan o atanu tuku tlan xtayatkan.
16 Pulaktu la tlan nakamatliwakglhaw tiku linkgoya kata wa akxni nakalakgapaxialhnanaw chu liwana nakakgaxmatniyaw akxni kinkalitachuwinankgoyan la pulana kskujnikgo Jehová chu la makglhtinankgonit tasikulunalin. Xlikana pi wata akinin tlakg tlan nakinkakitaxtuniyan xlakata max nakinkamatliwakglhan. Akxni kalakganaw tlan nakalikgalhtawakganiyaw Biblia chu amakgapitsi likgalhtawakga xalak Biblia. Lu tlan tlan xwa, xkalikgalhtawakganiw revista Makatsinina o libro nema natalikgalhtawakga kcongregación. Atanu tuku na tlan natlawayaw wa akxtum naʼakxilhaw videos nema takilhtinit kBiblia chu nakalikgalhtawakganiyaw xlakata xlatamatkan amakgapitsi natalan nema tsokgkanit klibros o atanu likgalhtawakga.
17, 18. ¿Tuku xlakata katsiyaw pi tlan nalipawanaw Dios pi nakinkamakgtayayan chu tlan nakinkamamakgkatsiniyan?
17 Akxni katsiyaw pi chatum kintalakan wi tuku lu lilipuwama, tlan naskiniyaw Jehová kamakgtayalh (Rom. 15:30; Col. 4:12). Akxni ni katsiyaw tuku natlawayaw xlakata wi tuku nitlan titaxtuyaw o atanu tiku titaxtumakgolh tuku nitlan, kilimasiyatkan pi lu kanajlaniyaw Dios, nakinkamakgtayayan chuna la tlawalh salmista: «Para la tsinka takuka makglhkatsiya mintalipuwan y tu makgatuyiyan, kamaxki Kintikukan Dios, xla namakgtayayan xlakata tlan natalaya» (Sal. 55:22). Komo ni namakgxtakgaw Dios putum kilhtamaku akxtum nakinkatatawilayan chu nakinkamatliwakglhan.
18 Makgasa Jehová kawanilh xlakskujnin: «Akit... akit watiya Tiku tlan kamamakgkatsiniyan» (Isa. 51:12). La uku nachuna kinkamatliwakglhan, chu kinkasikulunatlawayan xlakata kalimatliwakglhaw kintachuwinkan chu tuku tlawayaw xpalakata tiku lipuwamakgolh. Max anta kgalhimaw nalatamayaw kʼakgapun o Katiyatni, putum tlan kinkamamakgkatsiniyan tuku Pablo kawanilh tiku na xatalaksakni: «Na watiya nkimPuchinakan Jesucristo, chu Dios kinTlatkan, wa cha nti nkintikapaxkin, chu na kintikamaxkin xlipan takgtsiyajni, chu xatlan takgalhkgalhitin nkaj lipaxkatsinit, kamakgtsiyajkgolh minakukan, chu na kakamatliwakglhan ntu kxatlan tachuwin, chu ntatlaw» (2 Tes. 2:16, 17).
¿Lakapastakaku uma?
• ¿La talhuwinit taskujut nema tlan kamamakgkatsini latamanin?
• ¿La tlan nakamatliwakglhaw amakgapitsi?
• ¿Tukuya textos xalak Biblia limasiya pi Jehová tlan kamamakgkatsini xlakskujnin?
[Takgalhskinin]
[Epígrafe xla página 26]
¿Kamakgtayayaw tiku patinamakgolh?
[Epígrafe xla página 28]
Lakgkgawasan chu tiku lakgkgolotsina kalamatliwakglhwi
